!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ: На Заев му е побитен евтиниот популизам, отколку чистиот воздух


Скопје, 14 ноември, 2017 - 10:05 (META) 

Владата на Зоран Заев шест месеци нема превземено ниту еден суштински чекор за прочистување на воздухот, велат од опозициската ВМРО-ДПМНЕ и додаваат дека наместо почист воздух, градовите се гушат во смог, а „ветувањата на СДС доживуваат фијаско“.

„Наместо да се справуваат со загадувањето, градоначалниците на СДС тргнаа со контрамерки. Шилегов и Богоев ги стартуваа мандатите со сечење на дрва низ градот. Мерните станици на Министерството за животна средина и просторно планирање секојдневно алармираат превисоки концентрации на ПМ10-честичките, загадено е низ цела Македонија, а вчера особено алармантно беше во Тетово, Карпош и Кавадарци“, стои во соопштението.

Од партијата додаваат дека „згора на тоа СДС се дрзна да ја укине и акцијата „Денот на дрвото“, во која досега, според ВМРО-ДПМНЕ, биле засадени 36 милиони дрва, со над 50 отсто успешност.

„Граѓаните врз сопственото здравје почнаа да ги чувствуваат лагите и манипулациите на владата на СДС. На Заев му е побитно да продава евтин популизам отколку да реализира реални мерки со кои ќе се подобри живеењето на граѓаните на Република Македонија“, велат од ВМРО-ДПМНЕ.


Заев со видеопорака ги повика граѓаните на нова акција со пенкало в недела


Скопје, 12 октомври, 2017 - 13:16 (META) 

Лидерот на СДСМ и премиер, Зоран Зоран, преку видео-обраќање ги повика граѓаните на локланите избори в недела да ги заокружат промените и на локално ниво и да потврдат дека Македонија оди напред, кон пораст и развој.

– Бидете горди и сигурни – Македонија e слободна и слободно живее! И сега, мораме да продолжиме! Промената мора да биде целосна, затоа што на Македонија ѝ треба целосна слобода, економија, правичност и живот во секоја општина.
Вашите барања се јасни и јас ве уверувам дека нашите градоначалници ќе направат сè за да ги исполнат плановите што ги создадоа за вас: децата да бидат згрижени и да учат во топли и пријатни градинки и училишта, граѓаните да се движат по квалитетни и асфалтирани улици и патишта, да има канализација во секоја општина, да има чиста вода за пиење до секој дом, да дишеме чист воздух, затоа што нема слобода и живот без чист воздух, секој да добие навремена услуга во својата општина – вели Заев во видеопораката.

Тој уверува дека сето ова бргу ќе се оствари, дека е дојдено време на „нова политика“, во која „зборот е збор, а гласот на граѓаните е најважен“.

– Новата политика значи дека преку централната власт силно ќе ги поддржиме општините и граѓаните. Парите мора да одат на локално ниво за да направиме општини по ваша мерка, општини кои работат за вас и кои ве поврзуваат. Затоа, почитувани граѓани на Република Македонија, ајде заеднички во нова акција, в недела, на 15 октомври! Знаеме како треба – со пенкало. Сите да излеземе и да го дадеме својот глас за живот во Македонија и во секоја општина. Ајде да гласаме слободно за да ги завршиме промените што заедно ги донесовме. За да живеат селата и градовите во Македонија! За да живеат граѓаните на Македонија! За да живее нашата убава Македонија – порачува Заев.


Кандидатите за градоначалници ветуваат препород за Сарај


Скопје, 5 октомври, 2017 - 10:34 (META) 

Со буџет на Општина Сарај од 20 милиони евра, кога би застанале на челото на општината, четворицата кандидати за градоналник на оваа општина, ветуваат дека ќе направат многу. Така кажаа на вчерашната дебата од дебатниот карван „Живот во Македонија“ (#Debatpernime), кој го организираат „Порталб“, „Калѕо“, „Вистиномер“ и телевизијата „Арт“.

Башким Бакиу од Беса, Блерим Беџети од ДУИ, Екрем Алија од Алијанса за Албанците и Сефедин Алиу од ДПА ветија дека 30 отсто од буџетот би се трошеле за реконструкција на постојните и за изградба на нови улици и патишта, како и за изградба на училиште во Чајлане, превоз за учениците од селата, изградба на поликлиника во Сарај, подобро управување со отпадот и за инвестиции во туристичките капацитети Матка, езерото Треска и рекреативниот центар Сарај.

Исто така, беше ветено ново училиште во Свиларе и ординации и други медицински установи од јавното здравство, а ако недостига медицински кадар, би се ангажирале и Косовци, пренесува „Порталб“.

Дебатата ја водеше новинарката Јета Џара. Дебатниот карван „Живот во Македонија“ продолжува денеска во Гостивар.


Синдикатот на „Југохром“ бара нова средба со Заев


Тетово, 17 јули, 2017 - 13:23 (META) 

Синдикатот на компанијата „Југохром“ бара нова средба со премиерот Зоран Заев, бидејќи, како што велат оттаму, сè уште ништо не е реализирано од претходниот состанок помеѓу нивните претставници и Владата, што се одржа на 18 јуни оваа година.

Од синдикатот велат дека сакаат да бидат информирани од премиерот за „моменталната состојба и за неговото видување на статусот на комапнијата“, бидејќи, како што се додава во соопштението, синдикатот бил под притисок од вработените во „Југохром“, кои бараат организирање протести.

„На одржаната средба со Вас и со Кочо Анѓушев беше договорено дека Вие ќе преземете активности за одржување средба со сопственикот на компанијата и со невладините организации, за повторно да се разгледаат и да се најдат начини за фабирката да почне со работа. Бидејќи помина подолго време, а сме под силен притисок од вработените во „Југохром“ за организирање протести, бараме да одржиме средба на која би нè информирале за моменталната состојба и за вашето мислење за статусот на компанијата. Ве молиме бараната средба да биде одржана во најкраток можен рок, односно уште во текот на оваа недела“, стои во соопштението од синдикатот на „Југохром“.

Комбинатот престана со работа на 31 октомври минатата година, откако Инспекторатот за животна средина донесе одлука да се запре производствениот процес на фабриката, поради непочитувањето на рокот за изградба на филтер-станицата. Од раководството на „Југохром“ велат дека не успеале навреме да ја изградат станицата поради одолжување на постапката за добивање градежна дозвола.


ВМРО-ДПМНЕ: Единствено што умеат СДС и Заев е евтин политички популизам


Скопје, 9 јули, 2017 - 11:43 (META) 

Владата на СДС си поигрува и ги потценува граѓаните наместо да работи на исполнување на ветувањата, велат од ВМРО-ДПМНЕ во соопштение до јавноста.

„СДС ветуваше пораст на економијата од 5 до 7 отсто на годишно ниво, но владата на Зоран Заев сега смета дека може да оствари пораст од само 2,2 отсто или 0,8 процентни поени помалку од порастот што го проектираше ВМРО-ДПМНЕ. СДС најавуваше зголемување на капиталните инвестиции, а сега владата на Зоран Заев со предложениот ребаланс истите ги скрати за 3 милијарди денари. Тоа се цели 50 милиони евра помалку за капитални инвестиции од проекциите кои ги имаше владата на ВМРО-ДПМНЕ. Со ова се потврдува дека владата на СДС не е реформска, туку антиреформска“, се вели во партиското соопштение.

Според ВМРО-ДПМНЕ, СДС и Заев единствено што знаат и умеат е деструкција, криза и, како што велат, евтин политички популизам од кој немаат полза ниту државата, ниту граѓаните.


Делев: ВМРО-ДПМНЕ ја воведе минималната плата, СДСМ да продолжи со мерките


Скопје, 13 јуни, 2017 - 16:02 (META) 

„Минималната плата е воведена и утврдена од владата предводена од ВМРО-ДПМНЕ, во директен дијалог со работодавците и со синдикатите“, изјави денеска на прес-конференција Христијан Делев од ВМРО-ДПМНЕ.

Тој потсети дека Законот за минимална плата пред донесувањето беше огромен хендикеп за огромен број работници.

„Со утврдувањето на минималната плата, повеќе до 65.000 работници си го решија долгогодишниот проблем, бидејќи им се исплатуваше плата пониска од предложениот износ. Очекувањата на граѓаните се да продолжи и понатаму трендот на воведување мерки и реализирањето проекти за зголемување на минималната плата, подобрување на квалитетот на животот, како и на нивниот животен стандард“, изјави Делев.

Тој додаде дека граѓаните очекуваат СДСМ да ги исполни ветувањата и да овозможи нови 64.000 работни места и просечна плата од 30.000 денари, како и минимална плата од 16.000 денари во првата година од мандатот.


Мицкоски: Ветувањата кои ги даде новата влада мора да се реализираат со рокови


Скопје, 10 јуни, 2017 - 15:26 (META) 

„Невработеноста падна на рекордно најниско ниво и сега изнесува 22,9 проценти. Тоа е разликата помеѓу напорното работење на ВМРО-ДПМНЕ и деструктивните политики на СДС“, изјави членот на ИК на ВМРО-ДПМНЕ, Христијан Мицкоски, на прес-конференција.

Според него, „ваквите резултати не се постигнуваат со манипулации и со креирање лажни вести, туку со посветеност, знаење и со работа“.

– Напорната работа, активните мерки за вработување, ниските даноци, политиката на странски инвестиции, поволната бизнис-клима, оперативните планови на Владата за вработување кои беа спроведувани изминативе години, придонесоа невработеноста да се намали на историски најниски 22,9 проценти – изјави Мицкоски.

Тој додаде дека ветувања кои се дадени од страна на новата влада предводена од СДСМ, мора да се реализираат со роковите што ги задале како ветувања, а не да се релативизираат.


ВМРО-ДПМНЕ: Дебати и празни флоскули нема да го подобрат стандардот на граѓаните


Скопје, 9 јуни, 2017 - 9:30 (META) 

„Изговори, најави за дебати и празни флоскули од типот на „цели кон кои се стремиме“ нема да го подобрат стандардот на граѓаните“, велат од ВМРО-ДПМНЕ во редовното утринско соопштение.

Од партијата порачуваат дека СДСМ треба да ја надмине опсесијата со антиреформи и да почне да работи на реализација на ветувањата кои ги даде на граѓаните.

„Тоа што Заев ќе ја урива оградата од владата или ќе ја укине програмата Кембриџ нема да помогне на економски план каде вети 16.000 денари минимална и 30.000 денари просечна плата. Тоа што Заев сака да се спаси од одговорност за криминалот со покренување на постапка за смена на Јавниот обвинител нема да им помогне на докторите да добијат плата од 100.000 денари како што им беше ветено. Со испорачувањето закани за реизбор на судиите, Заев можеби ќе се одмазди за сите пресуди против министрите-криминалци во неговата влада, но тоа нема да им помогне на граѓаните кои бараа продолжување на породилното отсуство од 9 на 18 месеци“, стои во соопштението.

Од ВМРО-ДПМНЕ велат дека добро е што СДСМ се обидува да продолжи дел од нивните проекти бидејќи, како што велат, парите останати во буџетот се токму за исплата на субвеници, покачени пензии и стипендии.

Повторувањето на грчките црвени линии, додаваат од партијата, не им значи ништо на граѓаните кои очекуваат СДСМ да обезбеди брз влез во Европската Унија и во НАТО, како што тоа ветија, без притоа да се задира во идентитетски прашања или да се прават договори на штета на македонскиот народ.


Граѓаните знаат што направи ВМРО-ДПМНЕ додека ја водеше владата, велат од партијата


Скопје, 4 јуни, 2017 - 17:55 (META) 

Креирањето хајки, измислувањето афери и манипулациите се силна страна на СДСМ, но тоа нема да им донесе придобивки на граѓаните ниту на краток, ниту на среден, ниту на долг рок, се вели во реакцијата на ВМРО-ДПМНЕ на соопштението на СДСМ.

„Антиреформската влада на СДС нема да може бесконечно да користи кредити употребувајќи го зборот „ќе“. Граѓаните очекуваат минимална плата од 16.000 денари, а просечна од 30.000 денари. Граѓаните очекуваат и зголемени пензии, а специјалистите плата од 100.000 денари. Граѓаните очекуваат нови 500 километри автопат“, стои во соопштението на опозициската партија.

Оттаму велат дека граѓаните знаат што направила ВМРО-ДПМНЕ додека ја водеше владата и затоа партијата победила на десетте последни изборни циклуси.

„ВМРО-ДПМНЕ успеа да отвори повеќе од 160.000 нови работни места и да ја намали невработеноста на 23 отсто. Факт е дека владата предводена од ВМРО-ДПМНЕ на земјоделците им додели повеќе од 1 милијарда евра во субвенции, на пензионерите им ги зголеми пензиите, воведе минимална плата со прогресивен проектиран пораст. СДС ќе треба да одбере дали има капацитет и ќе се обиди да се приближи на овие достигнувања или ќе се занимава само со ВМРО-ДПМНЕ, оставајќи им ги на граѓаните само ветувањата“, велат од партијата.


ВМРО-ДПМНЕ: Владата на СДСМ ќе биде со краток рок бидејќи е антиреформска


Скопје, 4 јуни, 2017 - 10:54 (META) 

Атентатот што се случи врз Никола Тодоров е директна последица на хистеричната и неаргументирана хајка што СДСМ и невладините организации финансирани од Сорос ја реализираат неколку години, се вели во редовното утринско соопштение на ВМРО-ДПМНЕ.

Од опозициската партија порачуваат дека СДСМ има одговорност и дека „тоа не може да го скрие преку лажни реакции и изјави“.

„Владата на СДС и аболираниот криминалец Зоран Заев ветуваа дека ќе ги вратат младите во Македонија и дека ќе тече мед и млеко. Во текот на кампањата им ветуваа на лекарите дека ќе земаат 100.000 денари, а сега велат дека тоа им е цел која би се остварила до крајот на мандатот. Додека народот ги очекува ветуваните поголеми плати, пензии, просечната плата од 30.000 денари, СДС се обидува да дефокусира со скапо платена, деструктивна и лажна црна пропаганда против ВМРО-ДПМНЕ. Антиреформската влада на СДС наместо да се насочи кон зголемување на платите, пензиите и порастот на економијата, мандатот го почна со укинување проекти и со најава за блокирање на сè што е во тек“, стои во соопштението на ВМРО-ДПМНЕ.

Оттаму нагласуваат дека мерките на СДСМ не водат кон подобар живот бидејќи се популистички, а не проекти кои даваат резултати на долг рок.

„Поради тоа рокот на оваа влада нема да е долг. Оваа влада не е реформска туку антиреформска“, заклучуваат од ВМРО-ДПМНЕ.