!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

ЗНМ: Менаџментот на МПМ, наместо да ја реши кризата, се пресметува со новинарите


Скопје, 21 април, 2017 - 13:10 (META) 

Здружението на новинарите на Македонија (ЗНМ) денеска изрази загриженост поради опасноста „Медиа принт Македонија“ (МПМ), која поседува четири весници, еден магазин и еден интернет-портал, да оди под стечај.

ОД ЗНМ велат дека намерата на сопствениците и на менаџерите на МПМ не е да ја решат кризата во компанијата, туку полека да ги згаснат весниците преку постојано отпуштање на новинарите, што, како што нагласуваат од Здружението, не претставува само кршење на работничките права на новинарите, туку е и удар врз слободата на медиумите.

„Обидите за преземање на дел од вработените во новата сестринска фирма преку огласи, претставуваат понижување за новинарите и опасност за отпушање на неподобните. Менаџментот нема храброст да признае дека неуспехот на компанијата е негов неуспех. Наместо да ги отстранат причините што ја произведоа кризата, тие брутално се пресметуваат со новинарите“, стои во соопштението на ЗНМ.

Оттаму велат дека драстичното намалување на тиражите на весниците и на приходите од огласи се случило поради „погрешните политики на менаџментот на компанијата, кои преку послушни уредници некритички ги поддржуваа политиките на владејачката партија ВМРО-ДПМНЕ“.

„Тивкото пропаѓање на МПМ е најдобар пример дека партискиот печат во Македонија нема иднина. Само слободното и професионалното новинарство може да создаде самоодржливи медиуми, кои одговорно ќе ја одиграат својата улога во демократијата, да ги информираат граѓаните и да ја контролираат власта“, нагласуваат од ЗНМ.

Здружението се солидаризира со Самостојниот синдикат на новинари и медиумски работници (ССНМ) во неговите барања да се почне дијалог помеѓу синдикатот и менаџментот на МПМ заради наоѓање одржливо решение во интерес на сите.


Поддршка за новинарите во МПМ од синдикатите на Црна Гора, Хрватска и на Србија


Скопје, 24 февруари, 2017 - 15:34 (META) 

Синдикатите на новинари на Црна Гора, Хрватска и на Србија изразија целосна солидарност и поддршка на Самостојниот синдикат на новинари и медиумски работници и на новинарите на „Утрински весник“, „Дневник“ и на „Вест“, трите дневни весници на фирмата „Медиа принт Македонија“, кои штрајкуваат од 17 февруари годинава поради неисплатени плати, придонеси и хонорари, како и поради избегнувањето на управата да им даде основни информации за состојбата и за плановите за опстанок на фирмата.

„Како и другите во регионов, и новинарите на МПМ се еден од примерите на искористување на медиумите во транзициските земји за остварување на економски и на политички цели на центрите на моќ, а сè под закрилата на ширењето на демократијата во земјите од Југоисточна Европа. Спрегата на сопствениците на медиумите и на политичката елита на локано, но и на пошироко европско ниво, повеќе се грижеше за својот профит и за наметнување на своите политички цели, а помалку за правото на јавноста во тие земји да биде информирана за битни теми. Медиумските сопственици од западните земји не ги донесоа очекуваните промени“, велат од синдикатите на новинари од Црна Гора, Хрватска и од Србија.

Со оглед на сличните транзициски искуства и состојбите во медиумите, синдикатите на новинарите на Црна Гора, Хрватска и на Србија велат дека во целост ја разбираат тешката положба на македонските колеги и колешки и ги поддржуваат во нивната борба за основно човеково право да бидат платени за својата работа и да го одбранат своето човечко и професионално достоинство.


Петти ден штрајк на новинарите во МПМ


Скопје, 21 февруари, 2017 - 12:52 (META) 

Со симболично делење на јубилејниот петилјадити број на весникот „Вест“ од страна на штрајкувачкиот одбор на „Вест“, „Утрински весник“ и на „Дневник“, денеска се одбележа петтиот ден од штрајкот на новинарите и на медиумските работници во редакциите на „Медиа принт Македонија“.

Од Самостојниот синдикат на новинари велат дека прекинот на работата заради неисполнетите барања за плата и за хонорари продолжува, но и дека продолжува и нивната подготвеност за конструктивна комуникација.

ССНМ и штрајкувачките одбори уште еднаш истакнуваат дека станува збор за легитимна акција која не е со цел да се наруши угледот на весниците ниту на МПМ.

„Во заеднички интерес на сите е опстанокот и успешно работење на брендовите во чие градење многумина кои денес штрајкуваат се вклучени со сиот свој професионален и човечки капацитет. Mенаџментот упорно одбива средба со претставниците на штрајкувачкиот одбор. Тензиите се зголемуваат. Со тоа и неизвесноста. Зголемувањето на времетраењето на штрајкот е директен резултат на однесувањето на менаџментот“, велат од ССНМ.

Новинарите и медиумските работници денеска добија поддршка и од прогреснивните синдикати на УПОЗ, СИЕР, АГРО и на СУДКОС.


СЈО истражува во МПМ


Скопје, 17 февруари, 2017 - 11:56 (META) 

Тим на Специјалното јавно обвинителство (СЈО) денеска влегол во „Медиа принт Македонија“ (МПМ) дознава „Призма“. Целта на СЈО била да истражуваат дел од финансиското работење на оваа издавачка куќа, која под своја капа ги има весниците „Дневник“, „Утрински весник“, „Вест“, „Македонски спорт“, магазинот „Теа“ и интернет порталот „Телеграф“.

Сопственик на МПМ остана само поранешниот шеф на макдонската дипломатија и претседател на 66. Генерално собрание на ООН, Срѓан Керим, додека неговите партнери „Интернет груп“ од Србија и македонскиот бизнисмен Јордан Камчев веќе не се дел од сопственичката структура. Денеска, пак, новинарите од трите дневни весници на МПМ почнаа да штрајкуваат поради задоцнети плати.


Новинарите на МПМ почнуваат со штрајк на неопределено време


Скопје, 17 февруари, 2017 - 10:31 (META) 

Новинарите и другите медиумски работници на „Медиа принт Македонија“ (МПМ), денеска, на Денот на македонското новинарство (17 февруари), ќе стапат во штрајк на неопределено време.

Штрајкот е во организација на Самостојниот синдикат на новинари и медиумски работници на Македонија (ССНМ), а одлуката неодамна ја донесоа синдикалните групи во дневните весници „Утрински весник“, „Дневник“ и „Вест“.

– Ваквиот непосакуван начин на борба за своите права на новинарите и другите медиумски работници е директна последица на негрижата на сопствениците и менаџментот на компанијата за нејзиниот развој во основната дејност – издавање печатени медиуми и печатење на други производи. Раководството на компанијата, за кое вчера јавноста беше информирано дека делумно веќе го напуштило бродот кој тоне, наместо грижа за одржување на тиражите на весниците и други иновативни решенија, портфолиото на медиумите го стави во слугинска улога на бизнис и партиски центри на моќ – соопштија од ССНМ.

Од таму додаваат дека „наместо да се свестат, сопствениците на комапнијата излезот го побараа во постојано бркање на успешни уреднички тимови и новинари, а носејќи колеги кои им се по волја на властите.“

Вчера, компаниите „Орка Холдинг“, и „Интернет груп инвестмент“ соопштија дека ги продале своите удели во „Графички центар – Скопје“, сопственикот на МПМ.


Српските весници престанаа да се дистрибуираат во Македонија, оти МПМ им должи


Белград, 8 февруари, 2017 - 11:01 (META) 

Дневните весници од Србија од завчера не се дистрибуираат во Македонија поради долг на „Медија принт Македонија“ (МПМ) кон српскиот дистрибутер „Беоколп“, јавуваат српските медиуми.
Комерцијалниот директор на „Беоколп“, Драшко Ѓуриќ, за Унијата на новинари на Србија (УНС) изјави дека МПМ повторно не исплатила пари за дистрибуција.

– МПМ на „Беоколп“ не му исплатил три заостанати рати. Никогаш не је запираме дистрибуцијата кога исплатите малку доцнат, тоа не ни е практика, но ова веќе ја премина границата. Грдо е што нè доведуваат во ситуација да ја прекинеме работата, но без тоа не би можеле да го наплатиме услугите – рече Ѓуриќ.

Тој додава дека српските весници нема да се најдат на продажните места во Македонија, најмалку до петок.

– Дури и денеска да ни исплатат сè, нема да стигнеме пред петок да организираме дистрибуција. Веруваме дека проблемот нема да се одолжи и дека наскоро ќе биде сè по старо – вели Ѓуриќ.
Од УНС велат дека се обиделе да добијат одговор од МПМ, но дека не одговарале на нивните повици.
Ова не е првпат „Беоколп“ да ја сопре дистрибуцијата на српски весници во Македонија, Последен пат, во октомври минатата година, повеќе од десет дена српските весници не се дистрибуираа во Македонија.


„Дневник“, „Утрински“ и „Вест“ со намален тираж поради недостиг од хартија, МПМ негира


Скопје, 5 ноември, 2016 - 17:02 (META) 

Дневните весници што ги издава „Медиа принт Македонија“ (МПМ), „Дневник“, „Утрински весник“ и „Вест“, во петокот и во викенд-изданијата излегоа во многу намален тираж и без редвните прилози, наводно, поради недостиг од печатарска хартија.

Оваа состојба, која се гледа и на проджните места, каде и вчера и денеска тешко се наоѓаат примероци од трите весници, била констатирана и на вчерашниот состанок на синдикалните претставници од овие медиуми со Синдикатот на новинари и медиумски работниции (ССНМ), на кој разговарале за состојбата со доцнењето на плати изминатиов период во оваа компанија.

Дека нешто се случува со тиражот на весниците, зборува и податокот што и продавачите низ продажните места тврдат дека им бил донесен помал број весници од вообичаеното – кај некои дури и 80 отсто помалку.

Ова се случува во предизборниот период, само две недели пред почетокот на изборната кампања и 36 дена од предвремените избори.

Јана Станисављева, извршен директор на компанијата, тврди дека оваа информација не е вистинита.

– Не е вистина, тиражот е стандарден – ни рече Станисављева.

Одговор, но в понеделник, ни вети Александар Динев, управител во МПМ, затоа што, како што рече, не бил во можност викендов да ни одговори.

Кон крајот на јули годинава, МПМ им подели откази на 19 вработени, најголем дел новинари. Овој потег, кој беше осуден од Здружението на новинари (ЗНМ), од компанијата беше оправдан како „економска мерка“. Овие вработени до ден денеска ги немаат добиено ветените отпремнини што им следуваат, а некои за тоа имаат поднесено и тужби  по напуштањето на работното место.

Сопственик на трите весници е компанијата „Медиа принт Македонија“ ДООЕЛ Скопје, која е формирана со  паричен влог од речиси два милиони евра, а е фирма ќерка на „Графички центар“ ДОО Скопје. Удел во оваа компанија, пак, имаа три компании:

  • „Орка холдинг“ АД Скопје на Орце Камчев
  • „Мирекс плус“ ДООЕЛ Скопје на Срѓан Керим
  • „Интернет инвестмент груп “, Нови Сад, Србија“ на Веселин Јевросимовиќ.

Сепак, на почетокот од август годинава, БИРН објави дека Јевросимовиќ, кој инаку е еден од сопствениците и на порталот „Телеграф“, а кој исто така е дел од МПМ, како и на телевизија „Алфа“, излегува од медиумскиот бизнис во Македонија, односно од овие два медиума. Имено, според пишувањата преку фирмата „ЦХС Инвест груп“ во сопствеништвото на ТВ „Алфа“ влегува Иво Јанкоски од продуцентската куќа „Трето уво“, а преку „Интернет инвестмент груп“ во сопствеништвото на „Телеграф“ влегува Јана Станисављева. Според БИРН, Станисављева, станала сопственик на „Интернет груп инвестмент“, фирма преку која до неодамна со една третина во сопствеништвото беше присутен капиталот на Веселин Јевросимовиќ во „Графички центар“.


Со продажбата на „Слободен печат“ мнозинството македонски медиуми добија српски газди


Скопје, 26 октомври, 2016 - 23:24 (META) 

Српската компанија „Адриа медиа груп“ објави дека го откупила контролниот удел во весникот „Слободен печат“. Преку оваа зделка белградската групација стана доминантен сопственик во новата издавачка компанија „Адриа медиа Балкан“, која од денеска го издава весникот „Слободен печат“ кој е критички медиум кон политиките што ги практикува сегашната власт.

Со тоа српските компании, кои во огромен процент се застапени во медиумскиот простор во Македонија, („Дневник“, „Утрински весник“, „Вест“ и порталот „Телеграф“, телевизијата „Алфа“) добија уште еден медиум.

Kомпанијата е издавач и на српскиот дневен весник „Курир“, на истоимениот портал (kurir.rs) и на повеќе други популарни печатени изданија, веб-портали и мобилни апликации.

Претседателот на АМГ, Александар Родиќ, изјави дека одлуката за влез на македонскиот пазар е донесена со верба во потенцијалите за развој на дигитални и печатени медиуми во Македонија.

Досегашни сопственици на „Слободен печат“, според документите од Централниот регистар, беа Владимир Кошевалиски и Градимир Јовановиќ.

Кошевалиски претходно бил маркетинг-менаџер во „Аутомотив груп“, а познат е и како сопруг на водителката Иванна Хаџиевска, сега вработена во кабинетот на лидерот на СДСМ, Зоран Заев.

Градимир Јовановиќ е поранешен уредник и новинар во македонското радио, кој е во пензија.

Најголем удел во македонските медиуми има Веселин Јевросимовиќ, кој е српски бизнисмен и основач на компанијата „Комтрејд“, која во 2009 година го доби тендерот за набавка на компјутери за деца во основните училишта во вредност од 11,7 милиони евра.

Во рамките на овој тендер, Јевросимовиќ на македонската влада ѝ продаде 55.000 компјутери за учениците до трето одделение.

Веселин Јевросимовиќ во 2013 година го откупи мнозинскиот пакет акции во скопската телевизија „Алфа“.

Јевросимовиќ има сопственички удел и во компанијата „Графички центар“, инаку една од сопствениците на групацијата МПМ, која ги издава весниците „Дневник“, „Утрински весник“, „Вест“ и порталот „Телеграф“.

Медиумите во август годинава известија дека две српски фирми на бизнисменот Веселин Јевросимовиќ кои учествуваат во сопствеништвото на телевизијата „Алфа“ и на порталот „Телеграф“, излегуваат од бизнисот во Македонија, но тоа остана неофицијална информација.

Дел од медиумите се поврзани со Србија и преку свои новинари кои работат како дописници во оваа земја. Дел од медиумите шпекулираа дека уредничката во телевизија „Сител“ и на дневниот весник „Вечер“, Ивона Талевска, од 2013 година работи како дописник на српската новинска агенција „Танјуг“ и на јавниот сервис „Радио-телевизија Србија“. Oваа вест не заврши со потврда ниту од Талевска, ниту од српските медиуми.

Интересно е дека во септември дневниот весник и портал „Курир“ од Србија објави текст со наслов „ПРЕДУПРЕДУВАЊЕ: Лажен Курир ги залажува читателите во Македонија“.

„Информативниот портал www.kurir.mk нема никаква врска со изданијата од „Адрија медиа груп“, дневниот весник „Курир“ и веб-страницата www.kurir.rs“, соопштија од „Адрија медиа груп“.

„Македонскиот портал www.kurir.mk е очигледен обид за манипулација со јавноста и за злоупотреба на највлијателниот медиумски бренд на Балканот“, пишува српскиот „Курир“.

„Ги предупредуваме нашите читатели во Македонија дека пишувањата на порталот www.kurir.mk не ги одразуваат ставовите и уредувачката политика на изворниот „Курир“, бидејќи зад оваа неуспешна копија стојат политичари“, посочија тогаш од српското печатено издание.

Сопственик на македонската копија е компанијата „ЕМ Медиа“ ДОО од Скопје, која е поврзана со Сашо Мијалков, поранешен шеф на македонската тајна служба – УБК, тогаш обвинија од АМГ.


Унгарија смета дека слободата на медиумите во таа земја не е загрозена


Будимпешта, 21 октомври, 2016 - 18:22 (META) 

Министерството за надворешни работи нa Унгарија денеска соопшти дека загриженоста на Соединетите Американски Држави (САД) поради слободата на унгарските медиуми е неоснована, јавуваат светските медиуми.

Според портпаролот на унгарското министерство за надворешни работи, Тамаш Менцер, унгарските медиуми изнесуваат низа различни ставови и притоа нивната слобода не е загрозена.

Портпаролот на американскиот Стејт департмент, Марк Тонер, изјави вчера дека САД будно го следеле случајот со згаснувањето на најголемиот опозициски весник „Непсабадшаг“ и со одлуката на парламентот за забрана за работа на еден интернет-портал.

Менцер тоа го оцени како мешање на американските власти во одлуката на унгарските сопственици на медиумите да ги затворат овие медиуми.


Медиумите потпишаа Повелба за етичко известување на изборите


Скопје, 12 февруари, 2016 - 13:16 (META) 

Денеска, во просториите на ЕУ-инфоцентарот во Скопје, новинари и уредници од поголемите медиуми во Македонија потпишаа Повелба за етичко известување за изборите, во организација на Советот за етика во медиумите на Македонија (СЕММ).

На потпишувањето на повелбата присуствуваа и евроамбасадорот во Македонија, Аиво Орав, амбасадорот на Велика Британија, Чарлс Гарет, и холандскиот амбасадор Вилем Ваутер Пломп.

Повелбата ја потпишаа сите национални телевизии, поголеми весници и портали во Македонија.

„Ние, ноовинарите, уредниците и раководството на медиумите, почитувајќи го правото на јавноста да биде објективно, вистинито и навремено информирана и имајќи целосна одговорност и свесност за улогата на медиумите околу претстојните парламентарни избори во државата, ја прифаќаме оваа Повелба“, стои во документот.