Филипче: За пропустот со вакцините, може да го раскинеме договорот со „Македонија лек“


Скопје, 8 јануари, 2019 - 16:05 (META) 

Министерот за здравство, Венко Филипче, денеска изјави дека кај само еден отсто од вкупниот број увезени МРП вакцини, имало проблем со декларациите, на кои бил впишан рок кој не соодветствува со реалниот рок, кој не е изминат.

– Инспекции ќе има во здравствените домови кои извршиле прием на вакцините, но и во самата компанија, која ќе треба да си ги испита процедурите за да видат каков пропуст направиле. Нема да дозволиме ништо да го подрива угледот и довербата во нашиот здравствен систем, во период кога правиме напори да го зачуваме угледот. Наша намера е да ги смениме сите оние работи кои родија сомнеж во јавноста околу исправноста на вакцините. Министерството за здравство ќе ги преземе сите мерки кои се во рамки на правната регулатива да се справиме со ова, да укажеме на производителот каков проблем се јавил со локалниот добавувач, за да докажеме дека сме сериозна власт на која граѓаните и се на прво место – рече Филипче.

Тој потенцира дека не се најдени вакцини со изминат рок, односно дека е најден мал процент на вакцини со погрешни декларации.

– Станува збор за декларации на кои има постар датум од она што е вистински рок, кој е наведен и на кутијата и на вијалата на самата вакцина. Одговараме за квалитетот на вакцините, за критериумите на нивната набавка. Многу сериозно го разгледуваме прашањето. Вакцините се проверени од инспектори, дадена е дозвола за дистрибуција, дадена е дозвола од Агенцијата за лекови. Инициравме контрола во неработни денови, што укажува дека крајно сериозно пристапување на прашањето. Не сакавме да се создаде дополнителна паника во јавноста, посебно не во овој период на епидемија. Претставници на министерството и на Агенцијата за лекови ја контролираат серијата која се увезува на земјата. Но тогаш, дистрибутерот нема обврска да стави декларација, туку тоа го прави отпосле. После добивањето на таа дозвола, се лепат лепенки и вакцините се дистрибуираат во здравствените домови – појасни Филипче.

Тој информира дека немало никаков проблем со чувањето на вакцините. Директорите на здравствените домови веднаш биле задолжени да информираат во врска со нивниот прием. Вакцини со погрешна декларација се пронајдени во Здравствениот дом „Железничар“, во Демир Хисар, во Велес и во Свети Николе.

– Лекот не е фалсификат, се работи за техничка грешка. Кога ќе ги собереме сите количини, ќе постапиме понатаму со фирмата „Македонија лек“. Тие направиле техничка грешка, односно наместо нови, залепиле стари налепници. Понатаму ќе видиме како ќе се одвиваат работите – рече министерот.

Според него, оправдано е прогласувањето на епидемија од морбили.

– После многу години, ова е еден случај каков што не сме имале во нашата држава. Вкупно 60 заболени е сериозна бројка и затоа се преземени овие мерки. Апелот е ист, родителите треба да ги вакцинираат децата зашто тоа е единствениот излез, само така може да се запре оваа епидемија. Имавме несреќа да се дететктираат налепници кои се надеваме дека нема да создадат паника. Ќе преземеме се` што е во наши рамки, вклучително и раскинување на договорот, ако се докаже дека ова бил пропуст кој можел да се превенира. Како што сме ние сериозни во овој процес, сакаме да имаме и сериозни партнери. Ќе инсистирам да се реши ова што поскоро, како и да бидам лично информиран за сите инспекциски надзори, како во компанијата, така и од пунктови на терен. Сакам да верувам дека е техничка грешка. Ги уверувам сите граѓани дека станува збор за квалитетна и добра вакцина, дека нема ризик, дека релацијата со болести се темели на парамедицина. Со нашите мерки целта ни беше да интервенираме во почетокот, да не дозволиме да имаме смртни случаи, па тогаш да преземаме активности – додава Филипче.


Лекарската комора без став за моделот на приватизација на Итната помош


Скопје, 17 декември, 2018 - 10:02 (META) 

Една од најстарите организации и претставник на лекарската фела во Македонија, Лекарската комора нема став за тоа дали е подобро да се приватизира Итната медицински помош, пренесува „Порталб.мк“.

„Прво не знаеме дали ќе се приватизира, затоа и немаме став за ова прашање. Треба да видиме кој ќе ја изврши физибилити студијата, затоа и не се знае дали ќе се приватизира. Откако Министерството ќе обезбеди информации за претпријатието кое ќе ја спроведе анализата, тогаш ќе реагираме“, изјавија кратко од Лекарската комора.

Службата за Итна медицинска помош ќе подлежи на физибилити студија за да се најде подобар начин на функционирање. Анализа ќе ја врши еден од трите оператори колку што се пријавиле на повикот на Министерството, но имињата не се откриваат.

За да се зајакне служба за Итна медицинска помош, министерот за здравство Венко Филипче најави нови 12 амбулантни возила, од кои шест се распределени во Скопје, врз критериум кој што не постои, а останатите шест во други градови. Возилата се уште не се во употреба, а во меѓувреме службата најави 100 вработувања во текот на 2019 година.

Итната медицинска помош во Македонија функционира со стари и амортизирани возила, а нивниот број не кореспондира со бројот на жители во одредени градови. Имало случаи во тие возила да има и губење на човечки животи. За да се избегнат овие ситуации, Министерството за здравство вети замена на амбулантните возила врз основа на километражата, со што не се согласуваат автомеханичарите, бидејќи тие бараат замена на возилата врз основа на километражата во градовите надвор од Скопје, додека во Скопје, тоа треба да се врши врз основа употребливоста.


Новите возила на Итната помош не се во употреба, се најавуваат нови вработувања


Скопје, 14 декември, 2018 - 10:13 (META) 

Дванаесетте нови амбулантни возила се уште не се примени од Министерството за здравство, и не се во употреба, а во меѓувреме министерот Венко Филипче најави и вработувања на стручен кадар во службата за Итна медицинска помош, пренесува „Порталб.мк“.

„Тие возила ќе дојдат. Очекуваме и донации од Република Чешка. Постои финансиска согласност за прием на лекари и медицински сестри кои ќе работат во Итната медицинска помош. На почетокот ќе реализираме 40 вработувања, а до средината на следната година ќе имаме уште 60 вработувања“, рече Филипче во емисијата „Економски магазин“ на „Алсат М“.

Службата за Итна медицинска помош ќе подлежи на физибилити студија да се најде подобар начин на функционирање. Анализата ќе ја спроведе еден оператор, од три кои се пријавија на повикот на Министерството. Но, имињата не се обелоденети. Од Министерството за здравство изјавија дека по изборот на операторот и завршување на физибилити студијата, ќе следи јавна дебата за да се даде одговор на прашањето „Кој е најдобриот начин на функционирање на Итната помош?“.

Физибилити студијата ќе се спроведе во јавно-приватно партнерство, што доведе до сомневање дека и Итната медицинска помош ќе се приватизира, како и Детската кардиохирургија. Дилемите се дали граѓаните ќе плаќаат двојно поскапи медицински услуги? Дали се инвестира во приватното здравство и се занемарува јавното здравје? Дали се блокира пристапот на новинарите до информациите?

Министерството за здравство одлучи дека Детската кардиохирургија на Универзитетскиот клинички центар ќе биде префрлена во болницата „Жан Митрев“. Услугите ќе бидат покриени од Фондот за здравство, додека здравствените работници ќе фигурираат како вработени во „Жан Митрев“.

За „Левица“, истата судбина – приватизација ќе ја има и Итната медицинска помош.

„Овој чин може да се гледа како класична интервенција и уништување на јавното здравство.  Министерството за здравство изјави дека овој модел на јавно-приватно партнерство ќе се користи во случајот на Итната помош, доколку анализата која се нарачала покаже дека тој модел е подобар отколку поделбата помеѓу приватното и јавното здравство. Иако досега оваа анализа не е објавена во јавноста на транспарентен начин, тие сепак донеле таква одлука“, велат од „Левица“.


Филипче: Внесувајте храна богата со витамини за заштита од загадувањето на воздухот


Скопје, 7 декември, 2018 - 15:36 (META) 

Сите институции се насочени кон спроведување на мерки коишто ќе придонесат за намалување на загаденоста на воздухот, рече Министерот за здравство, Венко Филипче кој заедно со Драган Ѓорѓев од Институтот за јавно здравје денеска одржаа прес-конференција на којашто ги посочија препораките и советите на здравствените власти за заштита на граѓаните од загадувањето на воздухот.

Филипче советува да се ограничи движењето и активностите на отворен простор на најранливата популација (деца, повозрасни и хронично болни лица), како и за лицата коишто работат на отворено. Тој потенцира храната треба да биде богата со витамини и антиоксиданси, а хронично болните редовно да ја земаат препишаната терапија од својот лекар.

Ѓорѓев вели дека е клучно сите граѓани да го подобрат својот имунитет.

-Ефектите на здравјето, прво се на респираторниот систем, значи заштита на белодробниот систем, астматичарите било на која возраст треба да се и се под опсервација за зачестените астматични напади во овие услови. И секако избегнување на масовни собири, каде што во услови на аерозагадување концентрациите се високи во надворешен и внатрешен простор – исто така е една од препораките во овој период – вели Ѓорѓев.

Преку Системот „Мој термин“, здравствените власти веќе имаат доволно податоци во однос на бројот на ранливи категории на граѓани, а Филипче вели дека се прави план на кој начин и кому ќе бидат поделени 50 илјади заштитни маски.


Филипче бега од одговор за критериумите за бројот на амбулантни возила


Скопје, 3 декември, 2018 - 10:10 (META) 

Министерот за здравство Венко Филипче, по прес-конференцијата што се одржа во Министерството за здравство, одлучи да го избегне одговорот на прашањето на „Порталб.мк“ „зошто при набавката на 12 амбулантни возила за Итната медицинска помош користел критериум што не постои и дали ќе се откаже од изјавата“.

На прашањето „дали за набавката на 12 амбулантни возила се засновале на критериум што не постои“, Филипче одговори дека „не е точно дека не постои стандард.“

„Ќе ви ги испратам документите од организацијата која ги дефинира тие стандарди“, одговори Филипче, кој одби да го даде тој документ.

Ова е трет пат како министерот вели дека има стандард и дека ќе го документира тоа, но во документите што ги испрати, за кои тој вели дека во нив е стандардот, не се спомнува дека „за 50 илјади жители треба да има едно амбулантно возило“.

Набавката на 12 амбулантни возила за Итната помош, и распределбата на шест од нив само во Скопје, како што беше објавено во медиумите и од страна на Министерството за здравство, се заснова на критериумот дека за 50 илјади жители треба да има едно амбулантно возило.

И Министерството, но и некои медиуми ја цитираа Светската здравствена организација (СЗО), некои дури рекоа дека тоа е европски критериум, но никој не го објави јавно документот на стандардот што се наведува.


За набавка на амбулантните возила, Филипче се повикува на стандард кој не постои


Скопје, 30 ноември, 2018 - 9:59 (META) 

Набавката на 12 амбулантни возила за Итната медицинска помош, и дистрибуција на шест од нив само во Скопје, е врз основа на критериумот дека „за 50 илјади жители треба да има едно амбулантно возило“.

За овој критериум, Министерството за здравство и медиумите се повикуваат на Светската здравствена организација (СЗО), но никој не го објави документот од каде е изваден тој стандард, пишува „Порталб.мк“.

Според текстот, Министерството за здравство нема критериум по кој се врши распределба на возилата на Итната медицинска помош.

„Порталб.мк“ веќе подолго време го истражува начинот на функционирање на службата за Итна медицинска помош во Македонија и во други земји, но не наишле на никакви критериуми во врска со распределбата на амбулантни возила по број на жители.

„Според препораките на Светска здравствена организација, на 50.000 луѓе мора да има едно возило на Итна медицинска помош. До сега во Градот Скопје имало шест возила. Со оваа набавка, се обезбедуваат дополнителни шест возила, со што капацитетот на Итната медицинска помош ќе се зголеми за 100 проценти, но, исто така ќе се исполнат и стандардите на СЗО“, рече министерот за здравство, Венко Филипче.

Од него се бара, јавно да објави дека набавката на 12 амбулантни возила на Итната помош е заснована на критериум што не постои и да одговори дали е направено претходно тестирање од Министерството за здравство за состојбата на службата за Итна медицинска помош, и на кое ниво се забележани пропустите.


Скопје има само 13 возила на Итна помош, а Кочани, со 38.000 жители – десет (инфографик)


Скопје, 23 ноември, 2018 - 10:34 (META) 

Министерството за здравство обезбеди 12 возила за Итна медицинска помош, при што, шест од нив ќе бидат распределени во Скопје, а за другите шест не се знае во кои градови.

Ниту деловникот за работа на Итната помош, ниту пак Министерството за здравство ги имаат дефинирано критериумите според кои се распределуваат возилата низ градовите. Од друга страна, постои значајна разлика во бројот на амбулантни возила по глава на жител што ги имаат другите градови пренесува „Порталб.мк“.

Министерот за здравство, Венко Филипче изјави дека возилата ќе бидат распоредени таму каде што е потребно, но не наведе како ќе се дефинираат „потреби на градовите“, бидејќи со Правилникот не се предвидува такво нешто.

„Шест други возила ќе бидат распределени низ целата земја, во здравствените домови каде што има поголема потреба. Возилата не може да се заменат одеднаш, ќе треба постепено да се реши, и следната година, со набавката на овие возила ќе добиеме и соодветен кадар таму каде има потреба“, рече Филипче.

Запрашан од „Порталб.мк“ за критериумите за распределба, Филипче првично рече дека ќе биде направено во согласност со моменталната состојба на возилата, но подоцна изјави дека распределбата ќе се врши откако ќе ги прашаат здравствените центри за тоа, кој колку има потреба.

„Да бидеме реални, има здравствени центри, кои велат дека немаат потреба за возила“, рече Филипче.

И со новата набавка, нема да се подобри сегашната ситуација во Македонија, при што во понаселените градови имаат мал број на возила за Итна медицинска помош, додека во помалку населените имаат поголем број на возила.

Во Скопје со над 800 илјади жители во служба се 13 возила, во Кочани со над 38 илјади жители има 10 возила. Кичево има над 52 илјади жители, што е повеќе од Кочани, но има само четири возила на Итна помош. Меѓу поголемите градови се Гостивар и Струмица, но тие имаат само по две возила, иако тие имаат само по три илјади жители помалку од Кочани.


Вакцините се безбедни, нивниот квалитет е гарантиран (инфографици)


Скопје, 19 ноември, 2018 - 14:10 (META) 

Имунизацијата на населението е значајна здравствена, социјална и економска придобивка. Вакцините штитат од тешки заразни заболувања, а со тоа се создава колективен имунитет и заштита од епидемии на целата заедница.

Во Македонија, согласно законската регулатива континуираната вакцинација кај децата од 0-18 години е задолжителна. Опфат над 95 отсто може да создаде колективен имунитет и заштита на населението од појава на заразна болест во епидемиска форма. Она што е значајно да се истакне е дека право на секое дете е да биде заштитено и вакцинирано против тешки заразни заболувања, а обврска на родителот е да му го овозможи тоа право.

Невакцинираните деца ги загрозуваат останатите

Епидемиолозите со кои разговаравме нагласуваат дека децата кои не се вакцинирани го загрозуваат здравјето на останатите.

– Оние деца кои имаат намален имунитет заради примарна имунодефициентна болест, малигно заболување, хронична терапија со кортикопрепарати не може да се вакцинираат. Децата кои не се вакцинирани, ги доведуваат во опасност овие деца, Првите не смеат да се вакцинираат зашто кај нив постои контраиндикација за вакцинација, така што децата кои не се вакцинирани ако заболат може лесно да им пренесат болест. Затоа потребно е опфатот на вакцинирани деца да е што поголем, на тој начин ќе се создаде колективен имунитет и ќе се намали можноста децата кои не може да се вакцинираат да заболат – предупредува д-р Катерина Ставридис, епидемиолог во Институтот за јавно здравје.

Последните години државата прави напори за промоција на вакцинацијата во јавноста и зголемување на свесноста за бенефитите од вакцинацијата, но тоа не е доволно.

Да се влијае на свеста во континуитет

Секоја година во Македонија се одбележува Неделата на имунизацијата со бројни активности и настани поврзани со вакцинацијата. Но, тоа не треба да се прави не само во текот на таа недела, туку треба да биде континуиран процес. Иако епидемиолозите се организираат на секаков начин да го намалат отпорот кај родителите, сепак е потребна подобра и поактивна комуникација со родителите. И не само кај родителите, потребно е зголемување на свесноста и на здравствените работници: матичните лекари, педијатарите, гинеколозите за значењето и бенефициите на имунизацијата, како и за безбедноста на вакцините, затоа што тие најдобро може да ја промовираат вакцинацијата.

Безбедноста е гарантирана Вакцините што се користат во државата се квалитетни, а здравствените власти го гарантираат тој квалитет. Првиот човек на ресорот здравство во државата, министерот Венко Филипче во интервју за „Мета“ потенцира дека родителите не треба да се грижат околу безбедноста на истите бидејќи истите тие вакцини што се набавуваат, се користат и во земјите-членки на Европската Унија. – Во целост се гарантира за квалитетот на вакцините, затоа што истите се од реномирани производители од земји на Европска Унија (Франција, Белгија, Бугарија) одобрени производители од страна на СЗО кои ги исполнуваат сите потребни стандарди. Вакцините од производител до краен корисник – децата, се транспортираат, складираат и чуваат на соодветна температура од 2-8 степени. Секоја пратка се прима и проверува од страна на претставници од Министерство за здравство и Агенција за лекови, а Агенцијата за лекови по опсежните анализи издава одобрение за пуштање во промет. Да напоменам дека овие вакцини се употребуваат и во земјите каде се произведуваат – рече Филипче. Да не се одложува вакцинирањето Во Македонија, сепак опфатот со вакцинација не е на задоволително ниво и тоа главно е резултат на лобирањата на антиваксерите кои најчесто не вакцинираат поради недовербата во здравствениот систем, стравот од компликации по примањето на вакцините, како и поради стравот од небезбедноста на вакцините. Дека е тоа така, показател е падот на опфатот со првата доза на МРП вакцината е силно поврзан со влијанието на антивакциналното лоби кое зема засилен замав и во нашата земја, па многу родители или ја одбиваат МРП вакцинацијата или ја одложуваат до постигнување на поголема возраст на своите деца. Податоците до кои дојде „Мета“ покажуваат дека во однос на вакцинацијата со прва доза на МРП вакцина која се дава на возраст од 12 месеци, во 2017 е регистриран опфат од 82,6 oтсто што незначително се разликува во однос на 2016 година кога опфатот бил 82,1 отсто. Но, почнувајќи од 2014 година, се бележи континуирано намалување на опфатот, а последните три години, опфатот со МРП вакцинацијата континуирано е под 90 отсто. За разлика од опфатот со првата доза, опфатот со втората доза кај деца на 6 годишна возраст односно во прво одделение е значително повисок. Во 2017, опфатот со втората доза на МРП вакцината е 97 отсто, кој е повисок од опфатот во 2016 кога бил 93,3 отсто, како и од просечниот опфат за изминатиот петгодишен период кој изнесува 94,8 отсто. Многумина оваа вакцина ја поврзуваат со аутизмот, што можеби е и главната причина зошто се избегнува. Но, студијата направена во 1998 покажала некаква поврзаност со аутизмот е побиена, а трудот во кој била изнесена оваа студија бил повлечен од списанието во кое бил објавен. Оттогаш се направени бројни студии во кои биле споредувани стотици илјади деца кои ја примиле МРП вакцината со деца кои никогаш не ја примиле вакцината, при тоа е утврдено дека ризикот за појава на аутизам е еднаков во двете групи, што ја отфрла теоријата дека МРП вакцината предизвикува аутизам.

Едукација и повеќе вакцинални тимови на терен

Што се однесува до опфатот на вакцинација, бројките од извештајот за имунизација на Институтот за јавно здравје покажуваат дека има разлика во одредени општини која е значителна. Она на што треба да се работи е подобра информираност и едукација на населението од полезноста на вакцините, како и работа на терен во смисла на повеќе тимови за вакцинација.

Она што е потребно се што повеќе превентивни тимови на терен со цел да се зголеми колективниот имунитет. Во моментов постои недостиг на кадар и недоволна вклученост на нови вакцинални тимови, на кои укажуваат епидемиолозите. За да се зголеми опфатот, потребна е и поголема контрола од институциите, но и континуирано и навремено снабдување со вакцини.

Пишува: Антонија Поповска


Почнува вакцинацијата против сезонски грип


Скопје, 5 ноември, 2018 - 10:04 (META) 

Во сите Центри за јавно здравје во земјава денеска почнува вакцинацијата против сезонски грип. Годинава обезбедени се 41.000 дози вакцини, од кои 28.000 се наменети за лицата над 65 години што немаат пензија или пензијата што ја добиваат е пониска од 14.480 денари.

Како што вчера соопшти министерот за здравство Венко Филипче, вакцината е квалитетна и според светските стандарди.

– Набавивме четиривалентна вакцина, која е најнова, висококвалитетна, и заштитува од четири видови на инфлуенца и истата е според препораките на Светската здравствена организација (СЗО и Европската медицинска агенција. Вакцините се набавени од француската фармацевтска компанија „Санофи Пастер“. Вакцинацијата не е задолжителна, но ја препорачуваме за лица над 65 години, како и за другите со хронични болести, но и здравствени работници и други лица во здравствен ризик – потенцираше Филипче.

Лицата постари од 65 години што припаѓаат на погоре наведените категории, со чек од пензијата треба да појдат кај својот матичен лекар, кој ќе им закаже вакцинирање во некој од центрите за јавно здравје. Лицата во оваа старосна категорија што не добиваат пензија, ќе можат да се вакцинираат со потврда од ПИОМ.

Сите останати лица што сакаат да се вакцинираат против сезонски грип, тоа може да го направат по цена од 650 денари во центрите за јавно здравје.


Колективниот имунитет „опаднат“, државата со вакцини ќе го зголемува (инфографик)


Скопје, 18 октомври, 2018 - 10:20 (META) 

Минатата година, опфатот на вакцинација на ниво на држава бил помал од 95 отсто, колку што е препораката на Светската здравствена организација, освен за „бе-се-же“ (БСГ) вакцината, покажуваат последните бројки на Институтот за јавно здравје. Има 2.800 деца на возраст од 13 месеци кои не ја примиле „ем-ер-пе“ (МРП) вакцината, а дури 2.400 од нив се од Скопје. Опфатот на вакцинирани со оваа вакцина е само 66 отсто.

– Разликата во вакцинацијата е значителна. Тоа се должи на повеќе фактори кои што ги прават ваквите разлики, а се однесуваат на информираноста на населението односно дезинформираноста за безбедноста на вакцините – вели Злате Мехмедовиќ, директор на Здравствен дом.

Министерот за здравство Венко Филипче за „Мета“ веќе најави мерки за зголемување на опфатот со вакцинација.

– Согласно Акцискиот план, приоритетни области за дејствување, во кои е вклучена и нашата држава се набавка на квалитетни вакцини, ефикасна контрола врз процесот на имунизација, пристапност до вакцините и континуирана промоција и едукација на бенефитите од вакцинацијата – изјави министерот.

Опфатот на вакцинација со МРП е мал заради стравот дека вакцината има врска со појава на аутизам. Родителите ја одложуваат, чекајќи децата да прозборуваат и проодаат, па потоа ги носат на вакцина.

Здравствените власти во неколку наврати досега потенцираа дека нема причини за одложување на оваа вакцина затоа што има научни докази дека вакцината нема врска со аутизам.
Најмалку вакцинирани деца против морбили има во Скопје. Лекарите упатија апел до родителите дека и оваа вакцина е безбедна и со години се употребува, нема причина да ја одложуваат вакцинацијата.

Филипче нагласи дека во целост се гарантира за квалитетот на вакцините, затоа што истите, како што рече, се набавуваат од реномирани производители од земји на Европска унија (Франција, Белгија, Бугарија) одобрени производители од страна на СЗО кои ги исполнуваат сите потребни стандарди.

Тој во интервјуто за „Мета“ истакна дека вакцините од производител до краен корисник – децата, се транспортираат, складираат и чуваат на соодветна температура од 2 до 8 Целзиусови степени.

– Секоја пратка се прима и проверува од страна на претставници од Министерство за здравство и Агенција за лекови, а Агенцијата за лекови по опсежните анализи издава одобрение за пуштање во промет. Да напоменам дека овие вакцини се употребуваат и во земјите каде се произведуваат – рече тој.