„Китка“, селска идила и гозби под Љуботен ве очекуваат во Вратница


Тетово, 13 декември, 2018 - 9:48 (META) 

Авантуристите, планинарите, ловците, но и секој што љуби планински амбиент и вкусна органски произведена домашна храна и специјалитети од Долни Полог, ќе најдат одлично место за остварување на желбите во хостелот и ловечка куќа „Китка“ во живописното шарпланинско село Вратница, од каде погледот го плени моќниот врв Љуботен.

До селото се стигнува лесно – без разлика дали со автомобил или со велосипед – преку широкиот регионален пат што од Тетово води кон граничниот премин „Јажинце“. Алтернативен правец е локалниот пат, по кој почнувајќи од клучката „Желино“ на автопатот Скопје – Тетово, преку селата Сиричино, Шемшово и Жилче се стасува до Лешок, од каде се свртува десно и се продолжува по патот Тетово – Јажинце.

Селска кујна и специјалитети на чист воздух

Непосредно до овој пат, во средината на селото Вратница, е Хостел и Хантинг Лоџ „Китка“, објект на надморска височина од 750 метри, кој покрај чистиот шарпланински воздух во времето на енормно загадување на воздухот во градовите, ќе ве пречека и со грст специјалитети од дивеч, но и со печурки и други безмесни деликатеси, со тамошни органско произведени свежи зеленчуци и овошја и чаеви собрани од падините на Шар Планина, како и вкусни специјалитети подготвени од нив.

Хостелот за селски и авантуристички туризам нуди шест соби –  една еднокреветна, три двокреветни и две четворокреветни. Од последните две, едната, со претходна резервација, домаќините ќе ја претворат во ВИП соба со дрвен брачен кревет и сопствена бања со масажна када.

Во пакетот „Ноќевање“ е вклучен и појадок кој ја негува традицијата, со познатиот љуботенски природен чај.

Печено и колбаси од дивеч

Гостите ќе бидат послужени со свежи јајца, костени, мед што домаќините го вадат од своите сандаци, овошје и зеленчук произведени од локалните жители, но и нешто што е специфично за „Китка“ – месо од дива свиња, дивокоза, зајак и друго, приготвено на традиционален начин. Се разбира, ако имате стрв за такви специјалитети, тоа ќе мора да им го најавите на домаќините.

Домашните колбаси од дива свиња се уникатен производ на „Китка“ и може да се пробаат во секое време, без најава.

Во секое време ќе бидете послужени и со тетовско гравче подготвено во грне „По рецептот на баба“ и со компири израснати на локалните ниви. Тука се и сезонските салати, а сега, во зимскиот период, туршии направени од вредните домаќини.

Авантури за физички подготвените и локалитети за другите

Во близина на хостелот се наоѓат неколку прекрасни места, како Вратничко Езеро, кое е на еден километар јужно од „Китка“. На полпат е и манастирската црква „Свети Цар Константин и Елена“, изградена на темелите на стара црква од 12. век.

За тие што сакаат пешачење во планина, на еден час пеш од Вратница се наоѓа заедничка мала планинарска куќа од отворен тип, која е на половина од правецот од Ливадичко Езеро до границата со Косово. Вратница, инаку, е почетното место за сите што сакаат да го освојат врвот Љуботен.

Доколку не можете да пешачите долго, хостелот располага со две теренски возила со кои ќе ве одвезат до таму до каде што се може на четири тркала.

Хостелот и ловечка куќа „Китка“ ги нуди и сите услови за велосипедистите, а тоа досега го искористиле и голем број странци.

Ведрите домаќини велат дека во рамките на Проектот за зајакнување на иновативен туризам (СТЕП) се планираат и комплетни туристички пакети, како „Планински велосипедизам“, „Пчеларење“, и „Селски пакет“, односно собирање костени, правење ајвар, печење ракија и се друго што може да биде интересно за гостите од бетонските „џунгли“.


Општина Чаир ќе доделува субвенции за велосипеди


Скопје, 27 јули, 2018 - 16:06 (META) 

Општина Чаир денеска ја пушти во употреба велосипедската патека на улицата Втора Македонска бригада и соопшти дека ќе доделува субвенции за велосипеди.

Новата велосипедска патека е поставена на коловозот на улицата и е обележана со пластични конуси. Таа беше поставена заедно со Град Скопје, а завршувањето на работите денеска свечено го одбележаа градоначалникот на општина Чаир Висар Ганиу и  Сенад Смаиловиќ, директорот на ЈП „Улици и патишта – Скопје”.

„Со изградбата на овој сегмент, продолжувајќи потоа со другите улици и булевари во Чаир, ќе се овозможи создавање на една главна оска на велосипедски патеки која ќе го поврзе Чаир со другите делови на градот“, се вели во соопштението.

Исто така, Општина Чаир соопшти дека ќе надомести до 50 отсто од трошоците, но не повеќе од 3.000 денари по човек, за првите 50 жители на општина Чаир што ќе купат велосипед и ќе побараат субвенција. Доделувањето на парите ќе биде по принципот „прв дојден – прв услужен“.


Промовирани пет станици за поправка на велосипеди во Скопје


Скопје, 5 јули, 2018 - 13:14 (META) 

Град Скопје и Стопанска банка АД – Скопје денеска ги промовираа 5-те станици за поправка на велосипеди кои ќе им овозможат на велосипедистите да извршат мали интервенции на своите велосипеди.

Локациите на сервисните станици се на места каде што има поголема фреквенција на велосипедски сообраќај и на позиции каде што веќе постои 24 часовен видеонадзор, со цел да се заштитат станиците од намерно предизвикани штети.

Сите освен една станица се на бензински станици, и тоа станиците на „Макпетрол“ кај поликлиника „Букурешт“, кај Транспортен центар, на излезот од Скопје на улицата кон Маџари, како и бензинската станица на „Окта“ во Ново Лисиче, како и пред Инфо центарот на Град Скопје во Градскиот парк.

Станиците се опремени со пумпа за гуми и шест специфични алати кои се стандардни за ситни поправки на велосипедите.

-Првата пробна станица беше поставена пред повеќе од една година и е во одлична форма. За првите корисници на станиците кои на социјалните мрежи ќе споделат фотографија со #ВозиПравоВозиЗдраво, банката ќе обезбеди симболични подароци – изјави Ратка Тирицовска, Директор на дирекцијата за маркетинг и односи со јавност во Стопанска банка.


Град Скопје има буџет за уште околу 300 барања за субвенции за велосипеди


Скопје, 4 јуни, 2018 - 11:24 (META) 

Град Скопје ги информира граѓаните дека од објавениот jавен повик на 21 април до денеска, се поднесени 2.860 барања за субвенции за купување велосипед.

„Според предвидените финансиски средства за оваа намена во буџетот на Град Скопје, преостануваат средства за уште околу 300 барања. Средствата што Градот Скопје ќе ги субвенционира се во износ од 50 отсто од вредноста на велосипедот, но не повеќе од 3.000 денари по лице, со вклучен персонален данок на доход, како и 50 отсто од вредноста на адаптираниот велосипед за лица со телесна инвалидност, но не повеќе од 90.000 денари по лице, со вклучен персонален данок на доход“ се додава во соопштението.

За субвенционирање на граѓаните за набавка на велосипеди во буџетот на Град Скопје за 2018 година, се предвидени 10 милиони денари, од кои 9 милиони денари се предвидени за субвенции за велосипеди, додека еден милион денари за адаптирани велосипеди за лица со телесна инвалидност.

Јавниот повик се реализира по принципот „прв дојден, прв услужен“.


Град Скопје ќе субвенционира и велосипеди за лица со посебни потреби


Скопје, 12 април, 2018 - 12:28 (META) 

Град Скопје ќе издвои 10 милиони денари за субвенции за граѓаните за набавка на велосипеди, информираат од таму.

„9 милиони денари ќе бидат издвоени за субвенции за набавка на велосипеди, а 1 милион денари ќе бидат издвоени за субвенции за набавка на рачни велосипеди или рачни велосипеди со електрично помагало за лица со посебни потреби“, информираат од Град Скопје.

Со оваа одлука е предвидено максималниот износ за поединечна субвенција за купување велосипед по лице да биде 50 отсто од вредноста на велосипедот, но не повеќе од 3.000 денари, со вклучен персонален данок на доход.

„Новитет во јавниот повик за набавка на велосипеди за 2018 година, што е во фаза на подготовка, е тоа што оваа година Градот Скопје ќе субвенционира набавка на рачни велосипеди (велосипед на рачен погон), како и рачни велосипеди со електрични помагала за лица со посебни потреби. Градот Скопје ќе субвенционира 50 отсто од вредноста на рачниот велосипед и рачниот велосипед со електрично помагало за лица со посебни потреби, но не повеќе од 90.000 денари по лице, со вклучен персонален данок на доход“, велат од Град Скопје.


Граѓаните поднеле 800 барања за субвенции за велосипеди до Град Скопје


Скопје, 23 мај, 2017 - 10:53 (META) 

Од објавувањето на јавниот повик до денеска, до Град Скопје се поднесени повеќе од 800 барања за субвенции за купување на велосипеди, информираат оттаму.

Средствата што ќе ги надоместува Град Скопје се во износ од 50 проценти од цената на велосипедот, но не повеќе од 4.000 денари, нето-износ по лице.

„Град Скопје, со цел да ги стимулира граѓаните за користење велосипеди, ќе им обезбеди поврат на дел од потрошените средства, за набавка на велосипед од 13 мај, со објавувањето на јавен повик во дневните весници и на градската веб-страница, се до исцрпување на буџетот наменет за таа намена, но не подоцна од 31 декември 2017 година,“ информираат оттаму.

Јавниот повик ќе биде реализиран по принципот „прв дојден прв услужен“.


Велосипедската патека на кеј во Горно Лисиче се продолжува за два километри


Скопје, 15 мај, 2017 - 14:52 (META) 

Екипите на Град Скопје и на ЈП „Улици и патишта“ ја асфалтираат патеката за возење велосипеди и ролерки на реката Вардар во Горно Лисиче, на потегот од големиот парк на булеварот Февруарски поход до железниот мост во Горно Лисиче, од десната страна.

Оваа патека е во должина од 2.000 метри, со ширина од четири метри.

Патека на Кејот на реката Вардар што се протега од големиот парк на булеварот Февруарски поход до железниот мост во Горно Лисиче, односно до крај на регулацијата на реката Вардар, претставува продолжување на патеката што се протегаше од мостот Тодор Александров до паркот на булеварот Февруарски поход.


„Марш на молкот“ низ скопските улици


Скопје, 26 септември, 2015 - 13:43 (META) 

Стотици граѓани се собраа кај фонтаната во градскиот парк во Скопје, на крстосницата каде последна жртва на сообраќајна несреќа беше малолетниот Давид. Тие во знак на револт ги оставија своите велосипеди на крстосницата зад транспарент на кој пишуваше „Коце, врати ни ги улиците“.

Златко Радески, татко на девојче кое загина на пешачки во Ново Лисиче, им порача на присутните и на надлежните само да се обидат да ја почувствуваат болката од загубата што тој ја има како родител.

Побарал средба со градоначалникот Коце Трајановски за да разговараат за подобри сообраќајни решенија за зголемување на безбедноста на пешаците.

Забележливо е присуство и на голем број родители со деца, со колички, на велосипеди, загрижени за безбедноста на своите најмили. Граѓаните во моментов го маршираат таканаречениот „марш на молкот“ кој е тивок и безгласен за да се даде почит на жртвите во сообраќајот.

Колоната се двжи кон административните бараки на Град Скопје.


Градските советници одлучија во Скопје да се вози со 50 км/ч


Скопје, 22 септември, 2015 - 20:18 (META) 

Советниците на Град Скопје денеска донесоа одлука да се усвојат заклучоците што ги предложија советниците од СДСМ, а се наменети за зголемување на безбедноста во сообраќајот.

Како што информираше денеска на прес-конференција координаторот на советничката група на СДСМ, Дамјан Манчевски, дел од предлозите се: намалување на дозволената брзина на движење на возилата на 50 километри на час, изградба на надземни пешачки премини, унапредување на велосипедската инфраструктура и подобрување на хоризонталната и на вертикалната сообраќајна сигнализација.

Од советничката група на СДСМ побараа информација кој и што ќе гради на местото каде сега се наоѓаат просториите на Градот Скопје, но, како што велат, таква информација не добиле.