Заев – Данкан: Бојкотот на референдумот е бојкот на иднината на државата


Скопје, 18 септември, 2018 - 13:01 (META) 

Премиерот Зоран Заев на денешната средба со британскиот државен министер за Европа и Америка, Ален Данкан констатирале, како што соопштија од Владата, дека секоја поединечна одлука за бојкот на референдумот е бојкот на иднината на државата и на демократијата.

Според Владата, Данкан го поддржал процесот на интеграции на Македонија и охрабри земјава да ги оствари стратешките цели, што е важно за Mакедонија, но и за целиот регион. Заев на средбата повторно го кажал своето очекување дека огромно мнозинство граѓани ќе гласаат „за“ на референдумот.

-Огромно мнозинство граѓани се за членство на Република Македонија во ЕУ и во НАТО, затоа што тоа ќе донесе стабилност и безбедност во државата и европски животен стандард. Јас сум уверен дека тоа ќе се преслика на претстојното гласање за референдумот. Очекувам сите политички субјекти во државата и поединци да најдат сила и дека ќе се издигнат над политичките интереси и ќе одговорат на обврската да се изјаснат на референдумот, во овој историски момент за иднината на државата – рекол премиерот.

На состанокот се разговарало и за други актуелни политички и безбедносни прашања на домашен и регионален план.


Британскиот министер за Европа и Америка, Алан Данкан утре во Македонија


Скопје, 17 септември, 2018 - 16:30 (META) 

Внатрешно политичките состојби и реформската НАТО и ЕУ агенда во Република Македонија и подготвителните активности поврзани со успешна реализација на референдумот на 30 септември ќе бидат дел од темите за кои утре во Скопје ќе разговараат министерот за Европа и Америка во британскиот Форин Офис, Сер Алан Данкан и неговиот домаќин Никола Димитров.

Сер Алан Данкан и Димитров, како што соопшти МНР, ќе се осврнат и на регионалната соработка, британскиот ангажман во рамките на Берлинскиот Процес, преговорите меѓу ЕУ и Обединето Кралство околу Брегзит.

Посетата на министерот Данкан претставува уште една потврда за зголемениот интензитет на политичкиот дијалог меѓу двете земји изминатава година, особено по историската посета на британската премиерка, Тереза Меј на Република Македонија на 17 мај, нагласува МНР.


Иванов ги прими акредитивите на новите амбасадори на Обединетото Кралство и Саудиска Арабија


Охрид, 26 јули, 2018 - 14:27 (META) 

Претседателот на Република Македонија, Ѓорге Иванов денеска во вила Билјана во Охрид ги прими акредитивните писма на новоименуваните амбасадори на Обединетото Кралство на Велика Британија и Северна Ирска и на Кралството Саудиска Арабија во Република Македонија.

Како што соопшти кабинетот на претседателот, на предавањето на акредитивните писма од страна на новоименуваниот британски амбасадор Рејчел Галовеј, претседателот Иванов оценил дека постои заеднички интерес за натамошно интензивирање на одличните билатерални односи меѓу двете земји посебно во економската соработка и размена.

– Од 1993 година, Македонија и Обединетото Кралство во континуитет градат пријателски релации особено во контекст на британската поддршка и помош за Република Македонија и за нејзиниот пат кон Европската Унија и НАТО. Во оваа свечена пригода би сакал да истакнам дека граѓаните на Република Македонија се посебно благодарни за поддршката што Обединетото Кралство ја дава во остварувањето на македонските стратешки приоритети – рекол претседателот Иванов.

Амбасадорката Галовеј истакнала дека Западниот Балкан е значаен регион за Обединетото Кралство, што го покажале со неодамнешниот Самит во Лондон на којшто беше домаќин нивната премиерка.

– Ние ја зголемуваме нашата поддршка и за Македонија и за регионот со цел да ги поддржиме вашите напори за градење просперитет во безбедно и стабилно соседство. Успехот во овие области ќе биде од корист за Обединетото Кралство и за Европа како целина – рекла амбасадорката Галовеј.

На средбата со новоименуваниот саудиски амбасадор со седиште во Тирана, Абдулмомен бин Мохамед Шараф, македонскиот претседател го потенцирал интересот на Македонија за унапредување на севкупната соработка со Кралството Саудиска Арабија, особено во делот на економската соработка и трговската размена. Претседателот Иванов изразил уверување дека амбасадорот Шараф со своето дипломатско и професионално искуство ќе придонесе во развивањето на билатералните односи меѓу двете земји


Имате поддршка и пријателство од Велика Британија, му пиша Џонсон на Димитров


Лондон, 27 април, 2018 - 15:43 (META) 

Министерот за надворешни работи на Велика Британија, Борис Џонсон, со писмо му ја честиташе на својот македонски колега Никола Димитров 25-годишнината од воспоставувањето на дипломатските односи помеѓу двете земји. Тој ја потврди поддршката и пријателството од Велика Британија и изрази надеж дека партнерството на двете држави ќе биде уште посилно во наредните години.

„Среќен сум што имам можност да одбележам 25 години од воспоставувањето на дипломатските односи помеѓу Британија и Македонија. Во поново време, Велика Британија и Македонија соработуваа на Единбуршкиот самит во 1992 година, кога се решаваа проблеми околу признавањето на вашата земја. Британските мировни трупи стационирани во Македонија помогнаа да се постигне договор за прекин на огнот во 2001 година, а во 2005 година, Велика Британија помогна Македонија да добие кандидатски статус за членство во Европската Унија“, вели тој во писмото.

Џонсон додава дека оваа година ќе биде особено важна за двете земји – Велика Британија се подготвуваа за идната улога надвор од Европската Унија, додека Македонија, вели Џонсон, продолжува со амбициозните реформи и со барање решение за спорот за името со Грција.

„Радосен сум што ја потврдувам поддршката и пријателството од Велика Британија. Значително ја зголемуваме техничка помош на Македонија и едвај чекаме да се видиме на самитот на земјите од Западен Балкан во јули. Се надевам дека нашето партнерство само ќе расте во годините што следат“, се вели во пораката на Борис Џонсон.


Јулија Скрипал се освестила и почнала да зборува


Лондон, 30 март, 2018 - 12:09 (META) 

Здравствената состојба на Јулија Скрипал брзо се подобрува, соопшти синоќа болницата каде што е сместена ќерката на поранешниот руски двоен шпион Сергеј Скрипал.

– Состојбата на Јулија брзо се подобрува и таа веќе не е во критична состојба – соопштија од болницата додавајќи дека нејзиниот татко е во „критична, но стабилна состојба“.

Извори за Би-би-си тврдат дека Јулија е свесна и дека почнала да зборува. Докторите рекле дека таа добива 24-часовна нега и дека добро реагирала на третманот.

Подобрениот здравствен извештај следува откако Русија рече дека ќе преземе мерки кои ќе бидат „откриени наскоро“ како одговор на протерувањето на руските дипломати од страна на Велика Британија, САД, НАТО и многу други западни земји и сојузници.

– Нашите мерки ќе бидат соодветни. Тие во моментов се разгледуваат и мислам дека наскоро ќе бидат откриени. Ќе знаете за формата и содржината на мерките кога сè ќе биде подготвено. Повторувам, тоа ќе се случи наскоро – изјави портпаролката на Министерството за надворешни работи, Марија Захарова.

Сергеј Скрипал и неговата ќерка беа нападнати со нервен агенс во Салисбури на 4 март. Британија ја обвинува Русија дека е одговорна за нападот.


Сугарески и Гарет разговарале за економската соработка меѓу Македонија и Британија


Скопје, 2 февруари, 2018 - 12:11 (META) 

Министерот за транспорт и врски, Горан Сугарески денеска имал средба со амбасадорот на Велика Британија во земјава, Чарлс Гарет, на која го информирал за капиталените проекти што се реализираат во Македонија во делот на инфраструктурата.

„Амбасадорот беше запознаен со проектите што ќе се реализираат во следниот период во делот на патната инфраструктура, изградба на железницата на Коридорот 8, како и за проектите што ги реализира Министерството за транспорт и врски во комуналната инфраструктура и гасификацијата“, стои во соопштението од Министерството.

На средбата се разговарало и за актуелните состојби во соработката меѓу двете земји, при што акцентот бил ставен на зголемувањето на економската соработка меѓу Македонија и Велика Британија.


Меј договори економска соработка со Кина вредна 13 милијарди долари


Шангај, 2 февруари, 2018 - 11:01 (META) 

Британската премиерка, Тереза Меј договори економска соработка со Кина вредна 13 милијарди долари, јавуваат светските агенции.

Британија се обидува повторно да се наметне како глобален трговски играч, по одлуката да го напушти членството во Европската Унија, а Кина е на врвот на листата на држави со кои Лондон сака да има договор за слободна трговија, коментираат агенциите.

Говорејќи во Шангај, Меј рекла дека Британија сака да помогне во остварувањето на визијата на кинескиот претседател, Кси Џинпинг во поглед на глобализацијата, како и за поголема отвореност на кинеската економија.

– Додека излегуваме од ЕУ бараме шанса да станеме што повеќе свртени кон надворешната трговија и да ги продлабочиме трговските односи со светот, вклучително и со Кина – изјавила Меј.

Подготвеност за унапредување на односите меѓу двете земји изразил и кинескиот претседател, Кси Џинпинг.

Договорените бизниси и инвестиции во вредност од 13 милијарди долари ќе отворат повеќе од 2.500 нови работни места во Велика Британија.


ЕУ и нуди на Британија „транзициски статус-кво“ без право на глас


Брисел, 29 јануари, 2018 - 16:31 (META) 

Европската Унија денеска се одлучи да и понуди на Велика Британија 21-месечен транзиционен период по Брексит, односно по излегување на земјата од Унијата, за време на кој ќе се задржи „статус-кво“ во нејзиното членство, но без можност за гласање.

На министрите на ЕУ им требаа две минyти сите да го поддржат заедничкиот став, чиј нацрт го претставија бриселските функционери, напиша на „Твитер“ Сабине Вејанд, заменичка на главниот преговарач на ЕУ за Брексит, Мишел Барние, што значи дека сите преостанати 27 земји-членки на ЕУ се единствени во позицијата кон преговорите за излегување на Британија од ЕУ.

Понудата е, како што напиша Вејанд „статус-кво транзиција без институционално претставување која ќе трае од денот на Брексит до 21 декември 2020 година“.

Според ставот на ЕУ, во текот на транзициониот период, целото законодавство на ЕУ ќе продолжи да важи и за Велика Британија како да е земја-членка. Промените во законодавството на ЕУ што ги усвоиле институциите, телата, канцелариите и агенциите на ЕУ во тој период исто така ќе се применуваат во Велика Британија.

Исто така, ќе се применуваат сите постојни регулаторни, буџетски, надзорни, судски и извршни инструменти и структури на ЕУ, вклучувајќи ја и надлежноста на Судот на правдата на Европската Унија.

Во однос на институциите и телата на Унијата, Велика Британија, како веќе трета земја, повеќе нема да учествува во институциите и во одлучувањето на ЕУ.

„Велика Британија повеќе нема да присуствува на состаноци на експертски групи на комисии, комисии или други слични ентитети каде што земјите-членки се застапени“, стои во документот и се додава дека може да има исклучоци од случај до случај, каде Британија ќе може да биде поканета да учествува, но без право на глас.


Туск: ЕУ е отворена за можноста Велика Британија и натаму да остане членка


Брисел, 16 јануари, 2018 - 19:10 (META) 

Европската Унија е отворена за можноста дека Велика Британија ќе го промени ставот за Брексит и ќе остане дел од Унијата, рече претседателот на Европскиот совет, Доналд Туск, во Европскиот парламент.

Туск изјави дека доколку владата на Велика Британија остане на својата одлука да ја напушти ЕУ, Брексит со сите свои негативни последици ќе стане реалност во март 2019 година.

-Се разбира, оставаме и простор нашите британски пријатели да го променат мислењето. Ние овде на континентот не сме го промениле мислењето и натаму сме отворени за вас – рече Туск.

Претседателот на Европската комисија, Жан-Клод Јункер, рече дека се надева оти пораката на Туск ќе биде јасно слушната во Лондон.


Меј го покани Заев на самитот за Западен Балкан во Лондон


Скопје, 22 декември, 2017 - 13:16 (META) 

Амбасадорот на Велика Британија во земјава, Чарлс Гарет на денешната средба на премиерот Зоран Заев му ја предал поканата од британската премиерка, Тереза Меј за самитот за Западен Балкан, што ќе се одржи во Лондон во јули следната година, а во рамките на Берлинскиот процес, соопшти владината прес-служба.

Меј во поканата наведува дека целта на самитот во Лондон е да се поддржат земјите од Западен Балкан во регионалната соработка и добрососедските односи, заложби договорени на самитот во Трст во јуни оваа година.

Фокусот на самитот во Лондон ќе биде ставен на меѓусебното поврзување на државите, енергетиката, дигитализацијата и претприемништвото, а во делот на безбедноста, на справувањето со корупцијата, организираниот криминал, движењето на луѓе и стоки, тероризмот и насилниот екстремизам.

Премиерот Заев на средбата со Гарет истакнал дека Македонија ќе даде активен придонес во сите важни прашања што ќе бидат тема на самитот.

На состанокот Заев и Гарет разговарале и за важноста на потребните внатрешни реформски процеси, посебно во делот на независноста на правосудството и владеењето на правото.