За два месеци сајтот на Владата ќе биде тријазичен – македонски, албански и англиски


Скопје, 20 март, 2018 - 14:37 (META) 

Владата очекува за два месеци да ја подготви својата официјална веб-страница и на албански и на англиски јазик.

„Според досегашната динамика и план, очекуваме веб-страната на владата за два месеци да почне со објава на содржини на албански и англиски јазик“, одговорија од владината прес служба на прашањето на „Portalb.mk“ зошто веб-страницата е само на македонски јазик.

Од владата велат дека „во тек е процес на подготовка и обезбедување технички услови за квалитетна изработка на верзија на веб-страницата на влада на албански и на англиски јазик. Во моментов се преведуваат статичните содржини на веб страницата. До овој момент преведени се и објавени неколку клучни документи како: програма на Влада за 2017-2020, План 3-6-9 и извештајот за 100 дена Влада“.

Од вчера веб-страницата на Собранието целосно функционира на четири јазици – македонски, албански, англиски и француски.

Веб страницата на претседателот Ѓорге Иванов е на македонски и на англиски јазик.


Веб страницата на Владата недостапна, Бошњаковски вели проблемот бил „технички“


Скопје, 12 февруари, 2018 - 10:39 (META) 

Веб страницата на Владата на Република Македонија во моментот е падната и е недостапна, но се очекува наскоро проблемот да се реши.

Vlada

 

Владиниот портпарол Миле Бошњаковски, на прашање од „Мета“, појасни дека причината е „технички проблем“ и дека веб страницата наскоро повторно ќе биде во функција.


Владиниот сајт блокиран поради „технички проблеми“


Скопје, 10 ноември, 2017 - 17:15 (META) 

Веќе трет ден интернет страницата на Владата или не се отвора или ако тоа се случи, потребни се долго чекање и повеќе обиди.

Иако се појавија шпекулации за наводен хакерски напад, владиниот портпарол Миле Бошњаковски вели дека станува збор за технички проблеми, кои не се посебно сериозни.

Неделава, албански хакери, кои се претставуваат како „Aнонимус Албанија“ тврдеа дека ги хакирале интернет страниците на Основниот суд Скопје 1 и на Врховниот суд на Република Македонија, а нападнале серија грчки и српски веб-сајтови, како владини, така и на медиумски портали.


„Македонска пошта“ воведе следење на пратките преку интернет


По големиот број забелешки во изминативе неколку години за загубени пратки со производи нарачани преку интернет од странство, „Македонска пошта“ воведе систем за следење на пратките преку веб-сајтот на компанијата.

„Сите граѓани што купуваат од странски продавачи пристигнувањето на својата пратка во „Македонска пошта“ и реализирањето на доставата веќе може да ги следат преку системот за следење пратки на „Македонска пошта“, поставен на веб-сајтот, информира денеска „Македонска пошта“.

Со тоа, како што тврдат од компанијата, ќе се зголеми сигурноста на овие поштенски пратки во обид да се елиминираат сите сомневања за намерно или ненамерно губење на пратките од интернет-нарачка во „Македонска пошта“.

Сепак, на сајтот на компанијата се уште нема прецизно објаснување што се треба да се направи за да може да се следи пратката.