Ахмети – Пломп: Сите кои сакаат интеграција во ЕУ и НАТО ќе го поддржат референдумот


Тетово, 17 август, 2018 - 15:29 (META) 

Сите оние кои сакаат интегрирана Македонија во НАТО и Европската Унија ќе го поддржат референдумот на 30 септември, вклучувајќи ја и опозицијата, бидејќи евроатланската интеграција на земјата е исто така нивна програмска определба, истакнал лидерот на Демократската унија за интеграции Али Ахмети на средбата со амбасадорот на Холандија во Македонија, Ваутер Пломп.

Во соопштението од ДУИ се наведува дека Ахмети и Пломп разговарале за евроатланската интеграција, референдумот на 30 септември, владеењето на правото и борбата против корупцијата, како и регионалните случувања.

Ахмети го информирал холандскиот амбасадор за подготовките на ДУИ за успешно заокружување на евроатлантскиот пат преку спроведувањето на референдумот и уставните измени.

Во врска со реформите, владеењето на правото, борбата против корупцијата и организираниот криминал, како што се посочува во соопштението, ДУИ воспостави уникатна практика во земјава, повикувајќи ги и поддржувајќи ги органите да ги истражат сите наводи за корупција и истовремено ги охрабрува другите партии да го сторат истото.

„Ахмети заклучи дека единствен начин за регионот е помирување и целосна евроатланска интеграција со европските стандарди“ се наведува во соопштението од ДУИ.


Пломп најави експертска помош од Холандија за Македонија


Скопје, 16 август, 2018 - 14:37 (META) 

Премиерот Зоран Заев денеска имаше средба со амбасадорот на Кралството Холандија Ваутер Пломп на која била изразена поддршка на политиките што водат кон евро-атлантски интеграции на Република Македонија.

– Очекувам мнозинството граѓани да гласаат за евро-атлантска иднина на Република Македонија на претстојниот референдум – рекол премиерот Заев, соопшти владината прес-служба.

На средбата, како што се наведува во соопштението, е констатирано дека е од голема важност секој граѓанин и политички субјект да ја има предвид и личната одговорност за историскиот момент што отвора економски и безбедносни перспективи за нашата држава и за граѓаните на Република Македонија.

„Во разговорот е изразено очекување дека Македонија ќе продолжи со реформските процеси, посебно во делот на правосудството, што ќе придонесе во евроинтеграцискиот процес. Холандскиот амбасадор во оваа насока најави експертска помош од Холандија за Македонија. Исто така изразено е и очекување дека Македонија во скоро време ќе стане 30-та земја членка на НАТО“, се посочува во соопштението.

Заев, како што стои во соопштението, на средбата му се заблагодарил на амбасадорот Пломп „за принципиелната поддршка од Кралството Холандија на демократските процеси во Република Македонија, вклучувајќи ја и поддршката на принципиелно ниво на актуелниот политички процес значаен за членство на Македонија во ЕУ и НАТО“.


На традиционалното искачување на Титов Врв учествувале 800 планинари


Тетово, 30 мај, 2018 - 16:39 (META) 

Планинарски Клуб „Љуботен“ од Тетово, на 26 и на 27 мај го организираше традиционалното искачување на Титов Врв, по триесет и седми пат.

Од клубот информираа дека, на овој настан имало 800 учесници, 14 планинарски клубови од Македонија и 17 од регионот.

Настанот официјално го отворил холандскиот амбасадор Ваутер Пломп, кој искажал особена чест што присуствува на овој настан и е дел од искачувањето на Титов Врв.

Планинарски клуб „Љуботен“ ја поддржа иницијативата на планинарско-еколошкото друштво „Аргентус моунт“ за реконструкција на кулата на Титов Врв, со тоа што сите учесници ги информираше за акцијата за пренесување на песок до врв.

И оваа година традиционалното искачување беше дел од прославата за Денот на Европа, организирано од страна на Канцеларијата на Европска унија во Македонија.


Пломп: Холандија ќе продолжи да ѝ биде пријател и партнер на Македонија


Скопје, 29 мај, 2018 - 12:19 (META) 

Холандија отсекогаш била и ќе продолжи да биде пријател и партнер на Македонија и да ја поддржува нејзината евроатланска интеграција врз основа на строг и правичен пристап, изјави холандскиот амбасадор Ваутер Пломп на прашањето од „Макфакс“ откако во јавноста беше објавен нон-пејперот.

– Го забележуваме напредокот што македонските институции во текот на изминатата година го направија во спроведувањето на реформите, меѓу другото и во областа на владеење на правото. Во овој момент е важно да се види понатамошно одржување и продлабочување на овие реформи преку континуирано спроведување на новото законодавство. На 26 јуни Советот за општи работи на Европската Унија ќе решава за препораката на Европската комисија за почеток на преговорите – се вели во писмениот одговор од холандскиот амбасадор.

Тој вели дека Холандија ги следи интензивираните преговори со Грција за решавање на прашањето со името и дека искрено се надева дека наскоро ќе биде постигнато заемно прифатлив договор. Пломп додава дека Холандија ќе продолжи да ја поддржува Македонија со обезбедување финансиска помош и експертиза во некои од најважните области, како што се владеењето на правото, човековите права и доброто владеење.

Претходно и од Амбасадата на Франција изјавија дека заклучоците за Македонија изнесени во нон-пејперот не се конечни, и дека ставот на Франција ќе биде дефинитивно утврден во договор со нејзините европски партнери, откако предлозите за почнување на преговорите од страна на Комисијата содржани во извештајот за Македонија и за Албанија ќе бидат проучени од страна на Советот (општи работи) на 26 јуни, а потоа за нив ќе одлучи Европскиот совет во текот на истиот месец.


Бејли, Герет, Пломп, Османи и граѓани собираа ѓубре на кејот на Вардар


Скопје, 26 април, 2018 - 16:17 (META) 

Холандскиот амбасадор Ваутер Пломп, амбасадорот на Велика Британија Чарлс Герет и американскиот амбасадор Џес Бејли, заедно со вицепремиерот Бујар Османи денеска на кејот на Вардар зад Луна паркот го чистеа расфрланиот смет во еко акцијата, која трета година по ред ја организира амбасадата на Кралството Холандија заедно со „Пивара“ и „Пакомак“.

Ова е трета по ред волонтерска еко-акција што ја организираат „Пивара“, „Пакомак“ и Амбасадата на Холандија. Во претходните две акции беа исчистени брегот и водите на езерото Матка, како и кејот на реката Вардар, на кој и годинава се собираше целокупниот сув отпад. Годинешната акција е воедно и дел од активностите за одбележување на Денот на Кралот – националниот празник на Холандија.

– Се радувам што оваа година имавме можност да го одбележиме нашиот голем национален празник и со ваква акција. Го споивме убавото со корисното и уште еднаш се обидовме да го дадеме својот придонес за намалување на загадувањето кое е голем проблем за луѓето и за природата. Единствен ефикасен начин за трајно надминување на овој проблем е повеќе работа, посветеност и соработка меѓу јавниот сектор, компаниите и граѓаните. Со нашиот денешен ангажман сакаме да покажеме дека секој од нас може да даде личен пример за другите и да го поттикне решавањето на кој било проблем – истакна холандскиот амбасадор.

Целокупната логистичка поддршка за соодветен транспорт, селектирање и рециклирање на собраниот отпад ја обезбеди „Пакомак“.


Амбасадата на САД загрижено праша: Има ли идеи за намалување на загадувањето?


Скопје, 14 декември, 2017 - 20:19 (META) 

Амбасадата на САД во Македонија денеска изрази загриженост поради големата загаденост на воздухот во Скопје и во земјава.

Во својата објава на социјалните мрежи „Фејсбук“ и „Твитер“ од aмбасадата прашаа „кои се вашите идеи за почист воздух во Македонија“.

„Загадувањето на воздухот во Скопје денеска беше толку големо што едвај можеше да се види амбасадата! Кои се вашите идеи за почист воздух во Македонија?“ напишаа од Амбасадата на САД на „Фејсбук“ и на „Твитер“.

Загриженост за енормната загаденост на воздухот изрази и амбасадорот на Холандија во земјава, Ваутер Пломп.

„Постои дилема: дали да се користи автомобил и да се придонесе на загадувањето или да се земе велосипед и тоа да се вдишува. Денеска за прв пат се обидов со маска“, напиша Пломп на „Твитер“.


Бектеши и Пломп разговарале за економската соработка помеѓу Македонија и Холандија


Скопје, 31 јули, 2017 - 14:51 (META) 

Министерот за економија, Крешник Бектеши, денеска се сретнал со холандскиот амбасадор, Ваутер Пломп, при што разговарале за туризмот, земјоделството и за инвестициите во обновливи извори на енергија.

Бектеши изјавил дека земјоделството и инвестициите во обновливи извори на енергија се две гранки на економијата, многу важни за нашата земја, па размената на искуства со Холандија би била од огромна помош.

Холандскиот амбасадор потврдил дека Македонија останува посакувана туристичка дестинација за Холанѓаните и изрази интерес за развивање на долгорочен план за Охридскиот Регион, со оглед на фактот што бројот на холандските туристи е зголемен, а тоа налага потреба и за зголемување на бројот сместувачките капацитети.


Поповски го информирал амбасадорот Пломп за планираните медиумски реформи


Скопје, 28 јули, 2017 - 15:12 (META) 

Министерот без ресор задолжен за комуникации, отчетност и за транспарентност, Роберт Поповски, денеска се сретна со холандскиот амбасадор, Ваутер Пломп.

На средбата било разговарано за актуелната состојба во медиумската сфера, како и за најавата за реформи во законската регулатива во медиумскиот сектор.

Амбасадорот Пломп бил запознаен со детали од предлозите за измени во Законот за аудио и аудио-визуелни медиумски услуги.

Министерот Поповски уште еднаш нагласил дека со задолженијата што му се дадени од страна на Владата, да биде одговорен за транспарентноста и за отчетноста, се пополнува празнината помеѓу добивањето исклучиво технички информации од државните јавни сервиси и потребата од вистински суштинска содржина која ѝ е потребна на јавноста за детално да ја следи работата на Владата.

„Амбасадорот Пломп ги оцени најавените реформи како неопходни и изрази интерес за повеќе средби со министерот Поповски, во насока на поинтензивна соработка со Амбасадата на Кралството Холандија за поддршка во медиумските реформи во Македонија“, информираат од Владата.


Пломп: Постои видлив ентузијазам во државата од работата на новата Влада


Скопје, 27 јуни, 2017 - 21:00 (META) 

Премиерот Зоран Заев денеска се сретна со амбасадорот на Холандија, Ваутер Пломп, кој во име на холандскиот премиер Марк Руте, му честиташе за стапувањето на должноста.

Холандскиот амбасадор, како што соопштуваат во кабинетот на премиерот, изразил големо задоволство од изборот на новата Влада и од нејзината посветеност на реформите.

Премиерот најавил инклузивни политики во државата, со активна вклученост на граѓанското општество и на опозицијата, како и подобрување на добрососедските односи.

– Очекуваме тоа да придонесе Република Македонија наесен да добие чиста препорака за почеток на преговори со ЕУ и отворање на вратите за членство во НАТО – рече Заев.

Амбасадорот Пломп оценил дека постои видлив ентузијазам во државата од работата на новата Влада во првиот месец од формирањето и изрази уверување дека таквиот начин на работа ги отвора перспективите на Република Македонија и на нејзините граѓани.


Пломп: Прв приоритет на новата Влада треба да биде подобрување на животот на граѓаните


Скопје, 11 јуни, 2017 - 10:27 (META) 

„Новата Влада треба да ги одреди своите приоритети, но ако ме прашувате мене, јас би рекол дека првиот приоритет треба да биде подобрување на животот на сите граѓани во државата“, вели амбасадорот на Холандија во Македонија, Ваутер Пломп, во неделното интервју за „Радио Слободна Европа“.

Како приоритети, амбасадорот исто така ги спомна и владеењето на правото, отчетноста, инклузивноста и генерално спроведувањето на реформите што ќе овозможат Македонија да влезе во Европската Унија и во НАТО.

„Сите реформи кои се потребни за прием во ЕУ не треба да се спроведат примарно заради Унијата, туку заради доброто на самите граѓани. Македонија има многу пријатели, вклучувајќи и земји членки на ЕУ. И јас сум многу горд што мојата земја Холандија е ваш партнер веќе 26 години“, вели Пломп.

Тој додаде дека Македонија долго време беше во чекалницата на НАТО, многу од реформите биле завршени и дека приемот во НАТО може да биде побрз и тоа е значајно охрабрување.

Во однос на решавањето на спорот со Грција за името, Пломп додаде дека со изборот на новата влада има нов импулс и се отвораат нови можности. Смета дека е во интерес на меѓународната заедница да помогне и да ги поддржи овие напори.

За работата на СЈО истакна дека треба да му се дозволи да ја исполни важната улога што му беше доделена.

„Не се работи само за одржување избори и за избор на нова влада, туку и за утврдување на вистината за тоа што се случило и за утврдување на одговорноста, затоа што јас силно верувам дека политиката на неказнивост само ќе ја пролонгира политичката криза“, додаде Пломп.

Во однос на подобрување на состојбата со медиумите, амбасадорот истакна дека потребна е дискусија со претставниците на медиумите, разгледување на моменталната состојба и спроведување на постојните закони.