!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Ковачевски: Буџетот ќе биде донесен најдоцна до 23 декември


Скопје, 8 декември, 2017 - 11:31 (META) 

Буџетот за 2018 година може да биде донесен најдоцна до 23 декември, изјави за „Мета“ пратеникот на СДСМ, Васко Ковачевски, кој претседаваше со Комисијата за финансирање и буџет.

Тој додаде дека се чека претседателот на Собранието, Талат Џафери, да се врати од Соединетите Американски Држави, околу 15 декември, и во тој период да ја закаже пленарната седница на која ќе се расправа за буџетот за следната година.

– Расправата во Собранието треба да трае до пет работни дена. Ако претседателот Џафери ја закаже седницата околу 18 декември и опозицијата учествува во расправата, најдоцна до 23 декември буџетот ќе биде донесен. Доколку опозицијата не учествува, донесувањето на буџетот може да биде и порано – изјави Ковачевски.

По завршување на расправата за предлог-буџетот на Комисијата за финансирање и буџет, тој утре ќе се најде пред Законодавно-правната комисија во Собранието, која амандманите треба да ги разгледа од правен аспект. Потоа предлог-буџетот ќе се врати во Владата, која во рок до пет дена треба да го врати во Собранието.

-Утре, штом Законодавно-правната комисија ќе го разгледа предлог-буџетот од правен аспект, тој се враќа во Влада, која може да направи дополнувања по однос на шесте прифатени амандмани. Законскиот рок за дополнувањата во Влада пет дена. Потоа буџетот се враќа во Собрание – додаде Ковачевски.

Комисиската расправа за предлог-буџетот се одвиваше без опозицијата, а пратениците прифатија четири амандмани на ВМРО-ДПМНЕ и два на Беса, што се однесуваат на субвенции за печки на пелети, ТИР-зоната во Куманово, изградба на колекторски систем во Неготино, решавање на проблемот со депонијата во Струга, изградба на детски парк во Нерези, Општина Карпош.


Комисиската расправа за буџетот закажана за 11 часот, останаа уште 100 амандмани


Скопје, 7 декември, 2017 - 9:15 (META) 

Третото продолжение на 12. седница на Комисијата за финансирање и буџет, на која се води амандманска расправа за предлог-буџет за 2018 година, е закажано за во 11 часот. Останаа уште околу 100 аманмани за кои пратениците треба да расправаат.

Вчера, второто продолжение на седницата заврши околу 21 часот и беа разгледани околу 170 амандмани од вкупно 279, кои се предложени од ВМРО-ДПМНЕ и од Беса.

На расправата, на која не учествуваа пратениците од опозицијата, беа прифатени шест амандмани, четири од ВМРО-ДПМНЕ и два од Беса, додека осум беа повлечени од  пратениците на Беса, кои учествуваа во расправата.

Според пратеникот на СДСМ, Јован Митревски, прифаќањето на амандманите на опозицијата значи дека власта сака да биде конструктивна и да соработува со нив.

– Предложените амандмани ги делиме на добри и на лоши, а не од кого се предложени. Потребно е да се разгледат добрите предлози и за нив да се одвојат пари од предлог-буџетот – рече Митревски.

Комисијата ги прифати амандманите што се однесуваат на субвенции за печки на пелети, ТИР-зоната во Куманово, изградба на колекторски систем во Неготино, решавање на проблемот со депонијата во Струга, изградба на детски парк во Нерези, Општина Карпош.

Васко Ковачевски, кој претседава со Комисијата за финансирање и буџет, во изјава за „Мета“ рече дека амандманската расправа може да заврши и денеска, односно побргу од предвидениот рок од 10 дена, бидејќи законот го дозволува тоа.


Разгледани 170 амандмани за предлог-буџетот, расправата продолжува утре во 11 часот


Скопје, 6 декември, 2017 - 21:01 (META) 

На второто продолжение на 12. седница на Комисијата за финансирање и буџет, кое продолжи и по 18 часот, беа разгледани околу 170 амандмани на предлог-буџетот, од вкупно 279, кои се предложени од ВМРО-ДПМНЕ и од Беса.

На расправата, на која не учествуваа пратениците од опозицијата, беа прифатени шест амандмани, четири од ВМРО-ДПМНЕ и два од Беса, додека осум беа повлечени од пратениците на Беса, кои учествуваа во расправата.

Според пратеникот на СДСМ, Јован Митревски, прифаќањето на амандманите на опозицијата значи дека власта сака да биде конструктивна и да соработува со опозицијата.

– Предложените амандмани ги делиме на добри и на лоши, а не според тоа од кого се предложени. Потребно е да се разгледат добрите предлози и за нив да се одвојат пари од предлог-буџетот – рече Митревски.

Комисијата ги прифати амандманите што се однесуваат на субвенции за печки на пелети, ТИР-зоната во Куманово, изградба на колекторски систем во Неготино, решавање на проблемот со депонијата во Струга, изградба на детски парк во Нерези, Општина Карпош.

Васко Ковачевски, кој претседава со Комисијата за финансирање и буџет, денеска за „Мета“ изјави дека амандманската расправа може да заврши и утре, односно побргу од предвидениот рок од 10 дена, бидејќи законот го дозволува тоа.

Ковачевски го закажа продолжението на седницата за утре во 11 часот.


Ковачевски: Комисијата за буџет може и утре да ја заврши работата


Скопје, 6 декември, 2017 - 13:44 (META) 

Општиот претрес на предлог-буџетот за 2018 година на Комисијата за финансирање и буџет заврши и попладнево продолжува амандманската расправа. Денеска е седмиот ден од комисиската расправа и остануваат уште три дена до законскиот рок од 10 дена, до кога расправата за предлог-буџетот треба да заврши во матичната комисија.

– Ако завршиме побргу со расправата по однос на амандманите, кои се 279, тогаш може да завршиме и побргу од предвидениот рок, 10 работни дена. Во законот се вели „до 10 работни дена“, но не мора да бидат 10. Бидејќи пратениците на опозицијата не присуствуваат на комисиската расправа, амандманите само ќе ги читаме и по нив ќе се произнесува владин претставник. Не можам да предвидам како ќе оди, но можно е да завршиме и утре. И пратениците на Беса имаат поднесено амандмани, а тие се присутни на комисиската расправа – изјави за „Мета“ Васко Ковачевски, кој претседава со Комисијата за финансирање и буџет.

Министерот за финансии, Драган Тевдовски, денеска изјави дека „цврсто верува оти буџетот ќе се донесе“.

– Гледам дека работата на Комисијата се одблокира. За мене е важно што таму има дебата, а лично би бил среќен ако на Комисијата за финансирање и буџет се вклучи и опозицијата – изјави Тевдовски.


Комисиската расправа за буџетот почна без пратениците од ВМРО-ДПМНЕ


Скопје, 5 декември, 2017 - 13:40 (META) 

Првото продолжение на 12. седница на Комисијата за финансирање и буџет почна во 13.20 часот, откако пет пати беше одложувана. На седницата не учествуваат пратениците на ВМРО-ДПМНЕ.

Со комисијата претседава пратеникот на СДСМ, Васко Ковачевски, кој на почетокот рече дека бил овластен од претседателот на Собранието, Талат Џафери, да ја води оваа седница.

Пратеникот на СДСМ, Јован Митрeвски, ги повика пратениците на ВМРО-ДПМНЕ да се вратат на седницата за да имаат, како што рече, „суштинска дебата за овој значаен документ“.

– Пратениците на ВМРО-ДПМНЕ треба да дојдат да се вклучат во дискусијата за буџетот и да ги бранат многуте амандмани што ги предложија. Доколку донесат таква одлука, во секој момент претседателката на комисијата, Лилјана Кузмановска, може да дојде и да продолжи да ја води дебатата, која треба да биде суштинска. Поминаа шест дена, а за комисиска расправа се предвидени 10 дена – рече Митревски.


Со општата комисиска расправа за буџетот, почнаа и општите партиски препирки


Скопје, 27 ноември, 2017 - 15:58 (META) 

Дали буџетот за 2018 година е развоен или не, зошто новата власт нема доволно странски инвестиции и не ги зголемува пензиите и платите, кој за што се задолжувал и колку пари сега треба да се враќаат, беше содржината на дискусиите во општата расправа во собраниската Комисија за финансирање и буџет денеска до паузата.

Откако министерот за финансии, Драган Тевдовски, го изложи предлог-буџетот, прва за збор се јави претседателката на комисијата, Лилјана Кузмановска, која рече дека во него нема ниту една нова инвестиција или договор со нов инвеститор, туку само продолжување на проекти почнати од претходната власт на ВМРО-ДПМНЕ. Таа забележа и дека нема пари за зголемувањето на пензиите од 5 отсто, како и за тоа што нема да има зголемување на плати во јавните институции, освен за образованието, здравството и за одбраната.

Пратеникот Васко Ковачевски од СДСМ рече дека буџетот за следната година е и „граѓански и развоен“, за разлика од трошењето на претходната власт која, како што рече, оставила многу долгови.

– Почнува економска стабилизација на државата, повеќе пари се насочуваат кон граѓаните, се создаваат напори за поголеми плати. Педантно и одговорно ќе се трошат парите на граѓаните, оти ова се пари на граѓаните и со него ќе се остваруваат основните функции на државата. Граѓаните ќе кажат на следните избори дали се исправни политиките – рече тој.

На ова реплицираше Драган Цуклев од ВМРО-ДПМНЕ, кој рече дека е нормално да не се очекуваат спектакуларни резултати, но дека новата власт давала токму такви изјави.

Општата расправа на комисијата треба да продолжи во 15.30 часот.


ЕЛЕМ: СДСМ лаже, ископот во Суводол се одвива непречено


Скопје, 19 јуни, 2017 - 17:08 (META) 

Државната компанија за производство на електрична енергија ЕЛЕМ ги демантира тврдењата на пратеникот на СДСМ, Васко Ковачевски, кој обвини дека е целосно скината приемната лента на одложниот транспортер на багерот „банваген 5.500“ и дека лентата и багерот се надвор од употреба.

Oд компанијата велат дека ископот се одвива непречено, а на транспортерот се вршел рутински зафат кој нема да трае повеќе од три дена, односно се менуваат механички делови.

„СДСМ продолжува да шири лаги и дефетизам. Граѓаните на Република Македонија и вработените на АД ЕЛЕМ се сериозно загрижени од непознавањето на материјата од страна на СДСМ.  Ковачевски очигледно повторно не е информиран. Доколку дојде во РЕК Битола ќе се увери дека ископот се одвива непрекинато. Се работи за рутински зафат на транспортерот, односно замена на механички делови, зафат кој нема да трае повеќе од три дена. Транспортерот очекуваме да биде целосно функционален во текот на утрешниот ден, најдоцна во среда наутро“, се вели во демантот.

Што се однесува на обвинувањето од Ковачевски за блокот 2 на РЕК Битола, од ЕЛЕМ велат дека тој се ремонтира „во согласност со однапред  утврдената динамика на работата на компанијата“.


Ковачевски: Уште една хаварија во рудникот Суводол


Скопје, 19 јуни, 2017 - 16:09 (META) 

„Во РЕК – Битола повторно дојде до хаварија. Во рудникот Суводол, на одложниот транспортер на багерот „банваген 5.500“, дојде до оштетување на приемната лента, односно до нејзино целосно кинење. Лентата е надвор од употреба, а со тоа надвор од употреба е и багерот“, изјави денеска на прес-конференција пратеникот на СДСМ, Васко Ковачевски.

Тој информираше дека со оваа хаварија надвор од употреба се четири багерски единици.

„Ако на ова се додаде и фактот дека вториот блок на Комбинатот е во застој и дека во последните пет години не се правени ремонти на блоковите на термоелектраните, тогаш со право може да се заклучи дека состојбата со РЕК – Битола е алармнтна. Ваквата состојба со најголемиот енергетски комбинат во Македонија е последица на долгогодишното неодговорно работење на раководствата, кое во изминатите години беше проследено со низа скандали и коруптивни зделки за кои се поведени и бројни кривични постапки“, додаде Ковачевски.


ЕЛЕМ и ВМРО-ДПМНЕ: Сè е чисто во тендерот за ископ на јаглен за РЕК „Битола“


Скопје, 7 април, 2017 - 17:30 (META) 

ЕЛЕМ и ВМРО-ДПМНЕ попладнево реагираа на денешната прес-конференција на Васко Ковачевски од СДСМ, велејќи дека новиот тендер за избор на фирма за ископ на јаглен и јаловина во РЕК „Битола“ е според прописите и законите.

Ковачевски обвини дека тендерот со фирмата „Марковски компани“  е склучен без претходно да биде објавен оглас.

„АД Електрани на Македонија најодговорно тврди дека сите постапки кои се спроведени се транспарентни и во согласност со законите. Во конкретниот случај, тендерската постапка за избор на фирма за ископ на јаглен и јаловина во РЕК „Битола“ е спроведена по итна постапка откако за тоа е добиено одобрение од Советот за Јавни Набавки, што јасно говори дека се почитувани сите законски регулативи“, се вели во реакцијата на ЕЛЕМ.

Компанијата порачува дека на јавен увид ќе ја стави целата документација поврзана со постапката за избор на најповолен понудувач и очекува јавно извинување од Ковачевски.

ВМРО-ДПМНЕ пак обвини дека нема да успее обидот на Ковачевски „со пласирање клевети да ги прикрие криминалите на Зоран Заев и злосторничкото здружение околу него“.

„Ниту Сашо Мијалков, ниту ВМРО-ДПМНЕ имаат каква било поврзаност со договорот на РЕК Битола или со фирмата која што го добила тендерот. Со пласирање на ваквите лаги Васко Ковачевски нема да му помогне на Зоран Заев да го протурка на мала врата распродавањето на највисоките државни и национални интереси. Криминалецот Заев е прочитан. Криминалецот Заев е минато. Народот му застана на пат“, се вели во реакцијата на ВМРО-ДПМНЕ.


Ковачевски: Нов тендер од 5 милиони евра за фирма блиска до Мијалков


Скопје, 7 април, 2017 - 16:28 (META) 

Додека Груевски смислува насилни сценарија и работи на поделба на граѓаните, на 2 март оваа година склучен е нов договор за ископ на јаглен и на јаловина во РЕК Битола со битолската фирма „Марковски компани“, во висина од 290 милиони денари или речиси 5 милиони евра, рече пратеникот на СДСМ, Васко Ковачевски, на прес-конференција во Собранието.

– Договорот е склучен во постапка со преговарање без претходно да биде објавен оглас. Фирмата е во сопственост на битолчанецот Борче Марковски, од неодамна конзул на Белорусија, инаку во јавноста познат како близок пријател на Сашо Мијалков. Фирмата „Марковски компани“ од 2008 година до денес има добиено тендери во РЕК Битола во износ поголем од 60 милиони евра. Оваа фирма е тесно поврзана со највисокото раководство на ВМРО-ДПМНЕ – вели Ковачевски.

Според Ковачевски, поради ваквите и слични милионски тендери, цената на струјата постојано се зголемува, а сметката за тоа ја плаќаат граѓаните.

– Пратениците на ВМРО-ДПМНЕ со блокадата на Собранието овозможувуваат да продолжат бизнисите на Груевски, а спречуваат да се формира нова реформска влада, која ќе се грижи за потребите на граѓаните. А по промените ќе има и ревизија на работењето на досегашната власт и ќе има одговорност за сите направени злоупотреби – додава Ковачевски.