!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Вардар го совлада Фенербахче со 2:0


Скопје, 17 август, 2017 - 23:57 (META) 

Македонскиот шампион вечерва на преполната „Телеком арена“ во Скопје го совлада турскиот гигант Фенербахче со 2:0, со што обезбеди голема предност во борбата за пласман во групната фаза од Лига Европа.

Вардар поведе во 20. минута од мечот со голот на Тигран Барсегјан, а конечниот резултат беше поставен во втората минута од судиското продолже на натпреварот, со автоголот на Мехмет Топал, кој во обид да ја врати топката до голманот Идриз Камени, го лобуваше чуварот на мрежата на Фенербахче.

Во финишот на натпреварот Вардар остана со играч помалку, откако капитенот Боби Грнчаров поради два жолти картони беше исклучен, и тој нема да настапи на реваншот закажан за седум дена во Истанбул.

Тимот на Шкендија вечерва доживеа тежок пораз од екипата на Милан. Македонскиот вицешампион во Милано загуби со 6:0.


Изменет сообраќаен режим поради натпреварот помеѓу „Вардар“ и „Фенербахче“


Скопје, 17 август, 2017 - 15:59 (META) 

СВР-Скопје денеска воспостави посебен сообраќаен режим на движење на возила и на пешаци кон Градски стадион, поради вечерашниот натпревар помеѓу фудбалските клубови „Вардар“ и „Фенербахче“, кој ќе почне во 20 часот.

„Идентично на мерките од неодамна одржаниот Суперкуп на УЕФА, се пропуштаат само возила и лица кои имаат посебни акредитации за движење кон стадионот и кон објектите лоцирани во непосредната околина на Градски парк, како и оние лица кои што имаат билети за најавениот фудбалски натпревар“, се вели во соопштението на МВР.


Ракометарите на „Вардар“ пристигнаа на плоштадот Македонија, славењето почна


Скопје, 6 јуни, 2017 - 14:54 (META) 

Десетици илјади граѓани денеска се собраа на плоштадот Македонија во Скопје, каде ги пречекаа европските шампиони во ракомет, ракометарите на „Вардар“.

Час и половина ечеа навивачки и патриотски песни, а се вееја знамињата на ракометниот клуб „Вардар“, на Македонија и со сонцето на Вергина.

Ракометарите пристигнаа во 13.45 часот со двокатен автобус во боите на клубот. Тие беа придружувани од полиција, а кога пристигнаа, добија громогласен аплауз од граѓаните.

На почетокот на манифестацијата, химната на Македонија ја отпеја пејачката Викторија Лоба, а потоа водителите, по претставувањето на кратката историја за клубот, почнаа да ги прозиваат ракометарите на сцената.

Сите истакнаа дека ова е заслужена победа за Македонија и дека сè уште не можат да поверуваат дека успеале да се искачат на ракометниот врв на Европа.

Тренерот на женскиот тим на РК „Вардар“, Гордана Нацева, рече дека не треба да чекаме уште 15 години за да имаме вакви прослави. Таа истакна дека тоа што тимот на „Вардар“ е со меѓународен состав, покажал дека како народ, нација и држава заслужуваме ваква победа. На крајот од својот говор, Нацева ја повика „Пивара Скопје“ да ја смени својата реклама, во која се вели дека некои се радуваат и на четврто место, бидејќи Македонците знаат да се радуваат и на прво место.

Сопственикот на клубот, Сергеј Самсоненко, рече дека пред да заминат да ги одиграат последните натпревари, се договориле да се претставуваат како туристи, кои дошле да се прошетат, за на крај да им покажат дека се дојдени да бидат шампиони.

По говорот на Самсоненко, ракометарите, заедно со насобраните граѓани, заедно запеаја „Ој Вардаре, македонски, ти ја красиш Македонија“.


УХМР: Се зголемува нивото на Охридско Езеро


Скопје, 21 февруари, 2017 - 10:57 (META) 

Нивото на Охридско Езеро е два сантиметри над дозволениот минимум, а значително е намален водостојот на реката Црн Дрим кај Ложани, информира Управата за хидрометеоролошки работи (УХМР).

Оттаму велат дека просечниот водостој за февруари на Црн Дрим е 123 сантиметри, а вчера изнесувал 20 сантимтери. Големо намалување на водостојот има и реката Сатеска, каде вчера биле измерени два сантиметри, а вообичаено за овој период од годината е 16 сантиметри.

Пониски нивоа се иземерени и на Вардар кај Демир Капија, Пчиња кај Катланово, Крива Река кај Крива Паланка, додека повисоки од просечните се на Вардар кај Јегуновце, Треска кај Македонски Брод и на Брегалница кај Штип.


Амбасадорот Пломп учествуваше во еко–акција за собирање отпад на кејот на Вардар


Скопје, 14 октомври, 2016 - 16:36 (META) 

Холандскиот амбасадор Ваутер Пломп и вработените и раководството на „Пивара Скопје“ и на компанијата „Пакомак“, исчистија повеќе од три километри од кејот на реката Вардар во Скопје.

– Како вљубеник во природата и планинар, забележувам дека загадувањето е голем проблем кој ги загрозува овие природни убавини. Единствен начин да се реши овој проблем е заеднички пристап на државните институции, бизнис-секторот и на граѓаните, а тоа е и причината поради која мојот тим и јас сме тука денеска, за со нашиот мал придонес да поттикнеме големи промени – изјави Пломп.

Во рамки на акцијата собран е целокупниот сув отпад, кој понатаму ќе биде селектиран и рециклиран, со што ќе се обезбеди негов соодветен третман.


СДСМ: Поплавите се случија само поради неодговорноста на Груевски и на Трајановски


Скопје, 4 септември, 2016 - 14:15 (META) 

Дамјан Манчевски, потпретседател на СДСМ, и Љупчо Николовски, член на извршниот одбор на партијата, денеска на прес-конференција обвинија дека поплавите што се случија на почетокот на минатиот месец, се случија поради неодговорноста на поранешниот премиер, Никола Груевски, и на градоначалникот на Град Скопје, Коце Трајановски.

– Наместо да се освести, Груевски упорно продолжува да го гради „тркалото на лудоста“ од 19 милиони евра. Ако овие пари беа наменети за инфраструктурни објекти за заштита од поплава, оваа катастрофа немаше да ни се случи. За никогаш да не ни се повторат вакви штети од поплави, ние ќе изградиме ефикасен систем за одбрана на Скопје од големи води. Ќе ги уредиме сливните подрачја, ќе ги исчистиме речните корита и каналскиот систем. Ќе го заштитиме Скопје од порои. Ќе ја санираме скопската обиколница, за да не ги поплавува куќите на жителите од Стајковци и од другите населени места – рече Манчевски.

Тој додаде и дека во руралните места ќе го зголемат процентот на покриеност со атмосферска канализација, од 18 на 40 отсто.

Николовски рече дека ќе воведат забрана за изградба на какви било објекти во Вардар.


Тепачка меѓу навивачки групи од Црна Гора и од Македонија – 12 повредени, двајца потешко


Гостивар, 21 февруари, 2016 - 21:09 (META) 

Дванаесет повредени е билансот од физичката пресметка меѓу навивачите на фудбалскиот клуб Шкендија и на ракометниот клуб Будуќност од Црна Гора. Инцидентот се случил попладнево кај Сушички мост, кој се наоѓа меѓу Мавровска крстосница и планинскиот премин Стража.

Според полициски информации, инцидентот настанал откако навивачите на Шкендија, кои оделе на фудбалски натпревар во Кичево, почнале да фрлаат тврди предмети кон навивачите на Будуќност, кои со два автобуси се превезувале до Скопје, каде оделе да го бодрат нивниот тим против екипата на Вардар.

Двајца од вкупно 10 повредени навивачи од Црна Гора, добиле тешки телесни повреди.

– Еден беше повреден во пределот на главата, му беше укажана помош тука и потоа беше испратен во Скопје за понатамошни испитувања. Уште еден беше повреден во грбот, наводно од камења. Беше во потешка состојба и беше испратен на клиника во Скопје. Деветмина други, со помали повреди по лицето и по телата, се прегледани тука, по што се пуштени на домашно лекување – изјави д-р Бекир Зеќири од гостиварската болница.

На повреди се пожалиле и двајца навивачи од Шкендија, но по укажаната помош во болницата во Кичево, пуштени се на домашно лекување.

Полицијата допрва ќе истражува како дошло до инцидентот, по што ќе следуваат соодветни мерки.


Скопјанец се удави во Вардар


Скопје, 23 август, 2015 - 15:01 (META) 

На кејот на Вардар, во близина на спортска сала „Јане Сандански“, вчера Случајни минувачи вчера во близина на спортската сала „Јане Сандански“забележале машко лице на возраст од околу 60 години како се дави во реката Вардар.

Минувачите успеале да го извадат лицето од реката и со Брза помош пренесено е на токсикологија каде починало.

Утврден е идентитетот на лицето, а се работи за И.Т.(79) од Скопје.


МВР: Посебен сообраќаен режим за натпреварот меѓу Вардар и Апоел


Скопје, 20 јули, 2015 - 16:37 (META) 

Министерството за внатрешни работи (МВР) утре, 20 јули, ќе воведе посебен сообраќаен режим на дел од сообраќајниците во центарот на Скопје, а во пресрет на фудбалскиот натпревар меѓу екипите на Вардар и на Апоел од Никозија, Кипар, кој се игра во рамките на квалификациите за Лига на шампиони.

Како што информираат од МВР, мерките се преземаат поради големиот интерес за меѓународниот фудбалски натпревар, кој утре, со почеток во 20 часот, се игра на Националната арена „Филип Втори“.

„Почнувајќи од 17 часот, ќе биде затворен за сообраќај потегот од крстосницата на улиците Аминат Трети – Јордан Хаџикостантинов-Џинот кон фудбалскиот стадион, при што кон стадионот ќе се пропуштаат само возила со посебни пропусници. Во периодот по 18.30 часот, во зависност од интензитетот на сообраќајот, ќе се ограничи приодот со возила од булеварот Илинден кон стадионот, односно на крстосниците во должина на булеварот Илинден ќе се врши селективно пропуштање на возила кон стадионот. Во попладневните часови ќе се преземаат мерки за расчистување на сообраќајниците и на паркиралиштата околу стадионот, како и дислоцирање на затекнатите возила“, стои во соопштението на МВР.

Оттаму информираат дека навивачката група на Вардар, „Комити“, како зборно место од каде ќе тргне кон стадионот го одредила платото пред соборниот храм „Свети Климент Охридски“.

За време на движњето кон Градски парк, полицијата ќе го регулира и пренасочува сообраќајот.

Од МВР апелираат до „сите граѓани, учесници во сообраќајот да бидат трпеливи, да ги почитуваат правилата и прописите, да се однесуваат совесно и хумано, грижејќи се како за сопствената така и за безбедноста на другите учесници во сообраќајот, како и да ги паркираат возилата на дозволените паркиралишта“.


Познати противниците на ЖРК Вардар во Лига на шампиони


Скопје, 26 јуни, 2015 - 20:17 (META) 

Ракометарките на Вардар ќе играат во Ц-групата во Лигата на шампионите против дански Митјиланд, со Хипо од Австрија и, веројатно, со унгарски Ѓер. Македонскиот ракометен шампион го избегна европскиот шампион Будуќност во групната фаза од Лигата на Шампиони.

Тимот на Вардар две сезони по ред го освојува третото место.

Пласман во втората фаза ќе изборат најдобрите три тима од секоја група.

Фазата по групи во Лигата на шампионките ќе почне на 16 октомври, додека втората фаза ќе почне на 8 јануари 2016 година. Четвртфиналето е од 1 април, а натпреварите на финалната четворка се на 7 и на 8 мај во Будимпешта.