Ќе се подобрува инфраструктурата за собирање на отпадните води во Скопје


Скопје, 13 јуни, 2018 - 15:44 (META) 

Градоначалникот на Град Скопје, Петре Шилегов заедно со министерот за животна средина и просторно планирање, Садула Дураки, евроамбасадорот Самуел Жбогар и францускиот амбасадор Кристијан Тимоние, денеска присуствувааа на почетокот на проектот за подобрување на инфраструктурата за собирање на отпадните води во Скопје, во населбата Ново Лисиче.

-Испуштањето отпадни води во Вардар, влијае на квалитетот на водата и на живиот свет во неа. Со реализација на овој проект ќе овозможиме заштита на реката од загадување преку затворање на неколку испусти на отпадни води што директно се излеваат во Вардар. Со изградбата на колекторите на двете страни на реката Вардар до 2020 година, ќе се создадат и главните предуслови за изградба на централна пречистителна станица за градот Скопје. Граѓаните на Скопје по завршување на изградбата конечно ќе добијат пречистителна станица во согласност со европските директиви, а воедно и контрола и третман на водата што се испушта во реката Вардар. Целта на проектот е да се намалат ризиците од загадување и да се подобри севкупната чистота на градот – рече Шилегов.

Тој додаде дека ќе се подигне квалитетот на водата во реката Вардар и дополнително ќе се придонесе за заштита на подземните води во Скопската котлина, што се користат за наводнување и за пиење.


Водостојот на Вардар зголемен во однос на просекот за мај


Скопје, 16 мај, 2018 - 11:17 (META) 

По вчерашните врнежи, од УХМР информираат дека денеска водостојот на Вардар е зголемен во однос на вчера, но и во споредба со просекот за мај.

Најновите хидролошки мерења покажуваат дека кај Јегуновце нивото на Вардар е зголемено за 46 сантиметри, кај Зајчев Рид за 16 сантиметри и кај Велес за 19 сантиметри.

Над просекот за мај зголемени се и водостоите на Вардар кај Демир Капија, на Пчиња кај Катлановска Бања, а пониски се нивоата на Треска, Крива Река, Брегалница, Црна Река и Сатеска.

Кај езерата денеска нема промени во споредба со вчерашниот ден.


Бејли, Герет, Пломп, Османи и граѓани собираа ѓубре на кејот на Вардар


Скопје, 26 април, 2018 - 16:17 (META) 

Холандскиот амбасадор Ваутер Пломп, амбасадорот на Велика Британија Чарлс Герет и американскиот амбасадор Џес Бејли, заедно со вицепремиерот Бујар Османи денеска на кејот на Вардар зад Луна паркот го чистеа расфрланиот смет во еко акцијата, која трета година по ред ја организира амбасадата на Кралството Холандија заедно со „Пивара“ и „Пакомак“.

Ова е трета по ред волонтерска еко-акција што ја организираат „Пивара“, „Пакомак“ и Амбасадата на Холандија. Во претходните две акции беа исчистени брегот и водите на езерото Матка, како и кејот на реката Вардар, на кој и годинава се собираше целокупниот сув отпад. Годинешната акција е воедно и дел од активностите за одбележување на Денот на Кралот – националниот празник на Холандија.

– Се радувам што оваа година имавме можност да го одбележиме нашиот голем национален празник и со ваква акција. Го споивме убавото со корисното и уште еднаш се обидовме да го дадеме својот придонес за намалување на загадувањето кое е голем проблем за луѓето и за природата. Единствен ефикасен начин за трајно надминување на овој проблем е повеќе работа, посветеност и соработка меѓу јавниот сектор, компаниите и граѓаните. Со нашиот денешен ангажман сакаме да покажеме дека секој од нас може да даде личен пример за другите и да го поттикне решавањето на кој било проблем – истакна холандскиот амбасадор.

Целокупната логистичка поддршка за соодветен транспорт, селектирање и рециклирање на собраниот отпад ја обезбеди „Пакомак“.


Тимови на Холандија, САД и Британија утре ќе го чистат кејот на Вардар


Скопје, 25 април, 2018 - 10:34 (META) 

Амбасадата на Кралството Холандија заедно со „Пивара Скопје“ и „Пакомак“ во утре на пладне ќе организира твит-ап за чистење на кејот на реката Вардар. Во акцијата за чистење на кејот од ѓубре и смет досега се пријавиле тимови од амбасадите на САД и на Велика Британија, соопштија од холандската амбасада.

Од амбасадата велат дека по трет пат организираат акција за чистење, и дека годинава акцијата се совпаѓа со одбележување на Денот на кралот Вилем Александер.

Американскиот амбасадор Џес Бејли на „Твитер“ објави дека тимот од неговата амбасадата е среќен што може да се вклучи во активностите за чистење, организирани од неговиот колега Ваутер Пломп од амбасадата на Холандија.

Во претходните две акции организирани од холандската амбасада, се чистеше ѓубре и смет од кејот на Вардар и кај Езерото Матка. Во овие акции покрај вработените од амбасадата редовно учествува и амбасадорот на Холандија Ваутер Пломп, а во минатогодишната акција за чистење на Матка се вклучи и британскиот амбасадор Чарлс Гарет.

Пред неколку години холандската амбасада организираше и чистење на Маврово.


Водостоите на реките двојно повисоки за просекот во март


Скопје, 30 март, 2018 - 11:10 (META) 

Водостоите на сите реки се зголемени, а двојно повисоки од денешниот просек за март се нивоата на Треска кај Македонски Брод и Сатеска кај Ботун.

Според информациите на УХМР, пониски нивоа на водостоите има на Брегалница и Црна Река. Зголемувања на нивоата има и на Охридското, Преспанското и Дојранското Езеро.

УХМР за викендов најавува врнежи од дожд и топење на снежната покривка што дополнително ќе ги зголеми водостоите.


Се намалува водостојот на реките, но е повисок од просекот за март


Скопје, 9 март, 2018 - 9:55 (META) 

Водостојот на Вардар денеска е понизок од вчера, но се уште е над просекот за март, покажуваат најновите хидролошки мерења.

Кај Јегуновце и кај Велес денеска нивото на Вардар е за 20 сантиметри пониско од вчера, кај Зајчев Рид е за четири сантиметри пониско. На исто ниво како вчера е водостојот на Вардар кај Демир Капија.

За 17 сантиметри е намалено и нивото на Треска кај Македонски Брод, а пониски во однос на вчера се и водостоите на скоро сите реки во државата. Исклучок се Брегалница, Крива Река и Црн Дрим кај кои е забележано минимално зголемување на водостоите.


УХМР: Вардар излеан локално, внимателно движење покрај реките


Скопје, 7 март, 2018 - 16:45 (META) 

Водостоите на реките се зголемени, а поради променливото време и честите промени на температурата, топењето на снегот продолжува со променлив интензитет, информираат од Управата за хидрометеоролошки работи (УХМР).

Од таму додаваат дека во горните текови на реките, се очекуваат постепени намалувања и стагнација, а низводно по теченијата, зголемување на водостојот.

– Предупредуваме на внимателно движење покрај реките и суводолиците. Треба со внимателност да се пристапува на местата каде нема насипи и каде речните брегови се ниски и без заштита. Ова се однесува на течението низводно од Скопје и Таорската клисура, низводно од Велес и Демир Капија и Гевгелиско-валандовскиот крај. На хидролошките станици Велес и Демир Капија веќе има одредени покачувања – велат од УХМР.

Во делови од горните текови на Вардар, Треска и Црна се уште постојат локални излевања и поплавени површини. Има и високи водостои на Пчиња, Сатеска и Бабуна.


Можни се излевања на реките, сообраќајот на неколку правци е отежнат


Скопје, 4 февруари, 2018 - 10:30 (META) 

Поради свлечиште на патниот правец Кичево – Битола кај село Белица, сообраќајот се одвива по една коловозна лента, а екипите на ЈП „Македонија пат“ со механизација работат на расчистување и нормализација на сообраќајот, информираат од АМСМ.

Од таму додаваат дека, сообраќајот на патниот правец Кичево – Охрид, помеѓу селата Подвис и Попоец се одвива по една коловозна лента, поради вода на патот.

Од УХМР информираат дека, водостоите се особено зголемени во горниот дел на Вардар и нејзините притоки во Полошко, горниот дел на Треска и нејзините притоки, Радика и нејзините притоки, Црн Дрим и притоките, Сатеска и притоките, Голема река, Брајчинска и останатите реки во Преспанско.

Поради високите водостои на водотеците, можна е појава на локални излевања кај реките во северозападните и западните делови и појава на заезерени површини во рамниците.

И во Скопје, водостојот на хидролошките станици е релативно високо, но под граница на излевање од малото корито, сепак поради стеснувањето во делот каде се гради мостот од панорамското тркало, можно е да се јават локални излевања. УХМР предупредува на внимателно движење покрај реките и суводолиците.

УХМР: Водостоите на реките под просекот за јануари


Скопје, 4 јануари, 2018 - 10:42 (META) 

Водостоите на реките Вардар кај Јегуновце, Сатеска кај Ботун и на Црна Река кај Новаци се повеќе од двојно пониски од просекот за јануари, покажуваат податоците на Управата за хидрометеоролошки работи (УХМР).

Водостоите на речиси сите реки се пониски во однос на вчера, а зголемување на водостоите има на Вардар кај Демир Капија, Пчиња кај Катлановска Бања, Брегалница кај Берово и Црн Дрим кај Ложани.

Нивоата на Охридското, Преспанското и Дојранското езеро се во рамки на јануарскиот просек.


Шилегов: Дождовите покажаа дека „Скопје 2014“ е небезбеден за граѓаните и за градот


Скопје, 4 декември, 2017 - 15:04 (META) 

Галиите, насипите и градежниот шут во реката Вардар ја намалуваат проточноста на коритото и со тоа сериозно ја загрозуваат заштитата од поплави на градот Скопје, изјави денеска Петре Шилегов на прес-конференција пред градилиштето на т.н. панорамско тркало.

– Последните дождови покажаа дека мегаломанскиот проект „Скопје 2014“ станува реална опасност за безбедноста на граѓаните на Скопје и за нивните имоти. Состојбата на подрумите на објектите во и околу реката Вардар јасно покажува дека залудно се потрошени милионските суми за изградба на овие објекти. Насобраниот отпад Град Скопје уште денеска го расчистува. Екипи составени од повеќе институции утврдуваат протокол за тоа што ќе се случи понатаму со панорамското тркало, чија изградба е запрена бидејќи тоа на градот не му треба. Договорот со изведувачот „Бетон“ е сторниран, за работите што се досега изведени „Бетон“ е навремено платен – рече Шилегов.

На прашањето дали Скопје оваа година ќе биде украсено за новогодишните празници, Шилегов рече дека завршила јавната постапка, дека е потпишано решението и дека украсувањето ќе чини околу 5 милиони денари.

Шилегов нагласи дека Скопје е подготвено за првиот снег, но дека во моментов нема доволно сол за целата сезона.

– Имаме определени резерви сол. Во тек е постапка за дополнување на резервите затоа што тие не се доволни да ја покријат целата сезона. Механизацијата на јавните претпријатија е во целост подготвена, така што и денеска да почне да врне снег, ние нема да бидеме изненадени – додаде Шилегов.