Вакцините се безбедни, нивниот квалитет е гарантиран (инфографици)


Скопје, 19 ноември, 2018 - 14:10 (META) 

Имунизацијата на населението е значајна здравствена, социјална и економска придобивка. Вакцините штитат од тешки заразни заболувања, а со тоа се создава колективен имунитет и заштита од епидемии на целата заедница.

Во Македонија, согласно законската регулатива континуираната вакцинација кај децата од 0-18 години е задолжителна. Опфат над 95 отсто може да создаде колективен имунитет и заштита на населението од појава на заразна болест во епидемиска форма. Она што е значајно да се истакне е дека право на секое дете е да биде заштитено и вакцинирано против тешки заразни заболувања, а обврска на родителот е да му го овозможи тоа право.

Невакцинираните деца ги загрозуваат останатите

Епидемиолозите со кои разговаравме нагласуваат дека децата кои не се вакцинирани го загрозуваат здравјето на останатите.

– Оние деца кои имаат намален имунитет заради примарна имунодефициентна болест, малигно заболување, хронична терапија со кортикопрепарати не може да се вакцинираат. Децата кои не се вакцинирани, ги доведуваат во опасност овие деца, Првите не смеат да се вакцинираат зашто кај нив постои контраиндикација за вакцинација, така што децата кои не се вакцинирани ако заболат може лесно да им пренесат болест. Затоа потребно е опфатот на вакцинирани деца да е што поголем, на тој начин ќе се создаде колективен имунитет и ќе се намали можноста децата кои не може да се вакцинираат да заболат – предупредува д-р Катерина Ставридис, епидемиолог во Институтот за јавно здравје.

Последните години државата прави напори за промоција на вакцинацијата во јавноста и зголемување на свесноста за бенефитите од вакцинацијата, но тоа не е доволно.

Да се влијае на свеста во континуитет

Секоја година во Македонија се одбележува Неделата на имунизацијата со бројни активности и настани поврзани со вакцинацијата. Но, тоа не треба да се прави не само во текот на таа недела, туку треба да биде континуиран процес. Иако епидемиолозите се организираат на секаков начин да го намалат отпорот кај родителите, сепак е потребна подобра и поактивна комуникација со родителите. И не само кај родителите, потребно е зголемување на свесноста и на здравствените работници: матичните лекари, педијатарите, гинеколозите за значењето и бенефициите на имунизацијата, како и за безбедноста на вакцините, затоа што тие најдобро може да ја промовираат вакцинацијата.

Безбедноста е гарантирана Вакцините што се користат во државата се квалитетни, а здравствените власти го гарантираат тој квалитет. Првиот човек на ресорот здравство во државата, министерот Венко Филипче во интервју за „Мета“ потенцира дека родителите не треба да се грижат околу безбедноста на истите бидејќи истите тие вакцини што се набавуваат, се користат и во земјите-членки на Европската Унија. – Во целост се гарантира за квалитетот на вакцините, затоа што истите се од реномирани производители од земји на Европска Унија (Франција, Белгија, Бугарија) одобрени производители од страна на СЗО кои ги исполнуваат сите потребни стандарди. Вакцините од производител до краен корисник – децата, се транспортираат, складираат и чуваат на соодветна температура од 2-8 степени. Секоја пратка се прима и проверува од страна на претставници од Министерство за здравство и Агенција за лекови, а Агенцијата за лекови по опсежните анализи издава одобрение за пуштање во промет. Да напоменам дека овие вакцини се употребуваат и во земјите каде се произведуваат – рече Филипче. Да не се одложува вакцинирањето Во Македонија, сепак опфатот со вакцинација не е на задоволително ниво и тоа главно е резултат на лобирањата на антиваксерите кои најчесто не вакцинираат поради недовербата во здравствениот систем, стравот од компликации по примањето на вакцините, како и поради стравот од небезбедноста на вакцините. Дека е тоа така, показател е падот на опфатот со првата доза на МРП вакцината е силно поврзан со влијанието на антивакциналното лоби кое зема засилен замав и во нашата земја, па многу родители или ја одбиваат МРП вакцинацијата или ја одложуваат до постигнување на поголема возраст на своите деца. Податоците до кои дојде „Мета“ покажуваат дека во однос на вакцинацијата со прва доза на МРП вакцина која се дава на возраст од 12 месеци, во 2017 е регистриран опфат од 82,6 oтсто што незначително се разликува во однос на 2016 година кога опфатот бил 82,1 отсто. Но, почнувајќи од 2014 година, се бележи континуирано намалување на опфатот, а последните три години, опфатот со МРП вакцинацијата континуирано е под 90 отсто. За разлика од опфатот со првата доза, опфатот со втората доза кај деца на 6 годишна возраст односно во прво одделение е значително повисок. Во 2017, опфатот со втората доза на МРП вакцината е 97 отсто, кој е повисок од опфатот во 2016 кога бил 93,3 отсто, како и од просечниот опфат за изминатиот петгодишен период кој изнесува 94,8 отсто. Многумина оваа вакцина ја поврзуваат со аутизмот, што можеби е и главната причина зошто се избегнува. Но, студијата направена во 1998 покажала некаква поврзаност со аутизмот е побиена, а трудот во кој била изнесена оваа студија бил повлечен од списанието во кое бил објавен. Оттогаш се направени бројни студии во кои биле споредувани стотици илјади деца кои ја примиле МРП вакцината со деца кои никогаш не ја примиле вакцината, при тоа е утврдено дека ризикот за појава на аутизам е еднаков во двете групи, што ја отфрла теоријата дека МРП вакцината предизвикува аутизам.

Едукација и повеќе вакцинални тимови на терен

Што се однесува до опфатот на вакцинација, бројките од извештајот за имунизација на Институтот за јавно здравје покажуваат дека има разлика во одредени општини која е значителна. Она на што треба да се работи е подобра информираност и едукација на населението од полезноста на вакцините, како и работа на терен во смисла на повеќе тимови за вакцинација.

Она што е потребно се што повеќе превентивни тимови на терен со цел да се зголеми колективниот имунитет. Во моментов постои недостиг на кадар и недоволна вклученост на нови вакцинални тимови, на кои укажуваат епидемиолозите. За да се зголеми опфатот, потребна е и поголема контрола од институциите, но и континуирано и навремено снабдување со вакцини.

Пишува: Антонија Поповска


Во Охрид започна вакцинацијата против сезонски грип


Охрид, 5 ноември, 2018 - 15:46 (META) 

Во Центарот за јавно здравје Охрид од утринава веќе започна вакцинацијата против сезонски грип. Од Центарот информираат дека набавени се вкупно 4.000 дози вакцини.

Објаснуваат дека станува збор за четиривалентна најнова вакцина против грип, од холандско и француско потекло која штити од четири видови инфлуенца и е според препораките на Светската здравствена организација.

Првиот човек на центарот, Сашо Точков вели дека од оваа година категоријата граѓани кои се постари од 65 години, а имаат пензија пониска од 14.480 денари или воопшто да не примаат пензија, вакцината ќе ја добијат бесплатно. Претходно овие лица ќе мора преку својот матичен лекар и системот „Мој термин“ да закажат термин за имунизација, да добијат упат, па потоа дојдат во центарот и да се вакцинираат.

За сите останати вакцината чини 650 денари. Имунизацијата се врши во просториите на Центарот за јавно здравје и во подрачните единици, секој работен ден од 08 до 14 часот.


За три години, тројно се намалени пријавите за несакани реакции од вакцини (инфографик)


Скопје, 31 октомври, 2018 - 13:54 (META) 

За три години, тројно е намален бројот на пријави од граѓани за несакани реакции од вакцините, покажува евиденцијата на Институтот за јавно здравје. Во 2015 година, регистрирани се 48 пријави за несакани ефекти од вакцини, додека во 2016 се регистрирани 16, а во 2017 само 13 пријави.

Значителното намалување на несаканите реакции може да се поврзе со воведувањето на поливалентните вакцини од пред три години. Со поливалентните вакцини компонентата на ацелуларната вакцина против голема кашлица ја замени целуларната вакцина која во минатото била причина за повеќе од 90 отсто несакани реакции после вакцинацијата, во исто време се намали и бројот на убоди, а со тоа е намалена и можноста за локална реакција на местото на апликација на вакцината.

Опфатот со вакцината против хуман папилома вирусот (ХПВ) која беше воведена во 2009 година,  досега во просек за сите години наназад, е 48 отсто. Според бројките во извештајот за имунизација, може да се заклучи дека ХПВ вакцината има најнизок опфат од сите вакцини. Вакцината е безбедна според епидемиолозите, но како и сите медицински средства може да предизвика несакани реакции кои се ретки и обично многу лесни, локални реакции како болка, црвенило и оток на местото на убодот.

Досега во Институтот не се пријавени несакани реакции предизвикани од оваа вакцина. Вакцината против ХПВ се употребува во многу земји во светот, но кај нас одзивот за вакцинација е се` уште слаб.

Ако се погледнат подетално бројките од извештајот на Институтот за јавно здравје, се забележува дека вкупниот опфат со две дози вакцина против заболувања причинети од ХПВ во државата изнесува 48 отсто. Опфатот се движи од 12,1 отсто во Битола, до 100 отсто на територијата на само неколку подрачни единици – Кавадарци, Св. Николе, Берово, Виница, Делчево, Пехчево, Кратово, Дебар и Пробиштип. Опфат понизок од вкупниот опфат во земјата (48 отсто) е регистриран во Тетово, Гостивар, Струмица, Охрид, Скопје и Битола.

Maкедонија е една од првите земји во регионот кои ја имаат воведено во редовниот календар за вакцинација.


Во последните четири години опфатот со МРП вакцината е под 90 отсто


Скопје, 26 октомври, 2018 - 12:47 (META) 

Падот на опфатот со првата доза на МРП вакцината (против морбили, паротитис и рубеола) е силно поврзан со влијанието на антивакциналното лоби кое зема засилен замав и во нашата земја, па многу родители или ја одбиваат МРП вакцинацијата или ја одложуваат до поголема возраст на своите деца.

Ако се погледнат бројките од извештајот за имунизација кој го прави Институтот за јавно здравје, се забележува дека во однос на вакцинацијата со прва доза на МРП вакцина, која се дава на возраст од 12 месеци, во 2017 е регистриран опфат од 82,6 oтсто, што незначително се разликува во однос на 2016 година кога опфатот бил 82,1 отсто.

Но, почнувајќи од 2014 година, се бележи континуирано намалување на опфатот, а последите три години, опфатот со МРП вакцинацијата континуирано е под 90 отсто.

За разлика од опфатот со првата доза, опфатот со втората доза кај деца на 6 годишна возраст, односно во прво одделение е значително повисок. Во 2017, опфатот со втората доза на МРП вакцината е 97 отсто, што е повеќе од 2016 година, кога опфатот бил 93,3 отсто, како и од просечниот опфат за изминатиот петгодишен период, кој изнесува 94,8 отсто.

Што се однесува до поврзаноста на оваа вакцина со аутизмот, студијата што во 1998 покажала некаква поврзаност со аутизмот е побиена, а трудот во кој била изнсена оваа студија бил повлечен од списанието во кое бил објавен. Оттогаш се направени бројни студии во кои биле споредувани стотици илјади деца кои ја примиле МРП вакцината со деца кои никогаш не ја примиле вакцината, при тоа е утврдено дека ризикот за појава на аутизам е еднаков во двете групи, што ја отфрла теоријата дека МРП вакцината предизвикува аутизам.

„Мета“ веќе пишуваше дека колективниот имунитет во државата е „опаднат“, а министерот за здравство Венко Филипче веќе најави мерки за зголемување на опфатот со вакцинација.

– Согласно Акцискиот план, приоритетни области за дејствување, во кои е вклучена и нашата држава се набавка на квалитетни вакцини, ефикасна контрола врз процесот на имунизација, пристапност до вакцините и континуирана промоција и едукација на бенефитите од вакцинацијата – изјави министерот.


Колективниот имунитет „опаднат“, државата со вакцини ќе го зголемува (инфографик)


Скопје, 18 октомври, 2018 - 10:20 (META) 

Минатата година, опфатот на вакцинација на ниво на држава бил помал од 95 отсто, колку што е препораката на Светската здравствена организација, освен за „бе-се-же“ (БСГ) вакцината, покажуваат последните бројки на Институтот за јавно здравје. Има 2.800 деца на возраст од 13 месеци кои не ја примиле „ем-ер-пе“ (МРП) вакцината, а дури 2.400 од нив се од Скопје. Опфатот на вакцинирани со оваа вакцина е само 66 отсто.

– Разликата во вакцинацијата е значителна. Тоа се должи на повеќе фактори кои што ги прават ваквите разлики, а се однесуваат на информираноста на населението односно дезинформираноста за безбедноста на вакцините – вели Злате Мехмедовиќ, директор на Здравствен дом.

Министерот за здравство Венко Филипче за „Мета“ веќе најави мерки за зголемување на опфатот со вакцинација.

– Согласно Акцискиот план, приоритетни области за дејствување, во кои е вклучена и нашата држава се набавка на квалитетни вакцини, ефикасна контрола врз процесот на имунизација, пристапност до вакцините и континуирана промоција и едукација на бенефитите од вакцинацијата – изјави министерот.

Опфатот на вакцинација со МРП е мал заради стравот дека вакцината има врска со појава на аутизам. Родителите ја одложуваат, чекајќи децата да прозборуваат и проодаат, па потоа ги носат на вакцина.

Здравствените власти во неколку наврати досега потенцираа дека нема причини за одложување на оваа вакцина затоа што има научни докази дека вакцината нема врска со аутизам.
Најмалку вакцинирани деца против морбили има во Скопје. Лекарите упатија апел до родителите дека и оваа вакцина е безбедна и со години се употребува, нема причина да ја одложуваат вакцинацијата.

Филипче нагласи дека во целост се гарантира за квалитетот на вакцините, затоа што истите, како што рече, се набавуваат од реномирани производители од земји на Европска унија (Франција, Белгија, Бугарија) одобрени производители од страна на СЗО кои ги исполнуваат сите потребни стандарди.

Тој во интервјуто за „Мета“ истакна дека вакцините од производител до краен корисник – децата, се транспортираат, складираат и чуваат на соодветна температура од 2 до 8 Целзиусови степени.

– Секоја пратка се прима и проверува од страна на претставници од Министерство за здравство и Агенција за лекови, а Агенцијата за лекови по опсежните анализи издава одобрение за пуштање во промет. Да напоменам дека овие вакцини се употребуваат и во земјите каде се произведуваат – рече тој.


Вируси и бактерии ги напаѓаат децата во градинките и оние со намален имунитет


Скопје, 17 октомври, 2018 - 10:44 (META) 

Од идната година се очекува да станат задолжителни пневмококната и „рота“ вакцината. Бактеријата „стрептококус пнеумоние“ предизвикува неколку заболувања особено кај малите деца – инфекции на увото, синусите, воспаление на белите дробови, но и тешки компликации како воспаление на мозочните обвивки (менингитис), вели Александра Грозданова професорка на Фармацевтскиот факултет и претседателка на Националниот комитет за имунизација.

– Децата до двегодишна возраст и новороденчињата се од особен ризик за појава на овие заболувања. Често оваа инфекција се јавува кај децата кои одат во градинки, како и деца со намален имунитет. Пневмококната вакцина е во редовен календар за имунизација во многу држави во светот, вклучувајќи државите од западна Европа, но и Словенија, Бугарија и Србија – вели Грозданова.

Календарот за имунизација ќе се осовремени и во однос на „Ди-те-пер“ (ДТП) вакцината (дифтерија, тетанус и пертусис). Според стариот календар на седумгодишна возраст се даваше „Ди-те адултна“ вакцина (дифтерија и тетанус) вакцина и „орална полио вакцина“ (ОПВ) .

– Со новиот календар на шестгодишна возраст наместо овие вакцини, ќе се дава ДТП- ИПВ (комбинација на вакцина против дифтерија, тетанус и пертусис со инактивна полио вакцина). На овој начин се вклучува ацелуларна вакцина против пертусис (која не дава несакани реакции, на место на укинатата ДТП на четиригодишна возраст) и инактивна полио вакцина на место на орална полио вакцина, според препораката на СЗО- орална полио да премине во инактивна полио. Според стариот календар на 14 годишна возраст се даваше ДТ вакцина (дифтерија и тетанус) и орална полио вакцина. Со новиот календар на 14 годишна возраст ќе се дава ДТ- ИПВ (комбинирана вакцина дифтерија, тетанус и инактивна полио вакцина) и се заменува оралната полио со инактивна полио вакцина – вели Грозданова.

Инаку, вирусот „рота“ предизвикува проблем кај децата до две години со изразена дијареа и други компликации.

„Рота“ вирусите се причинители за околу 25 отсто од заболувањата со дијареи кај децата до петгодишна возраст.


Државата со кампањи ќе ги убедува родителите да вакцинираат


Скопје, 12 октомври, 2018 - 11:16 (META) 

Министерството за здравство, со кампањи ќе се бори против антиваксерите. Планирано е да се преземат низа активности со кои ќе се едуцираат родителите за важноста на вакцинацијата и потребата од имунизација.

За „Мета“, министерот за здравство, Венко Филипче вели дека е подготвена комуникациска и едукативна стратегија со која преку социјалните медиуми, градинките и училиштата, ќе се допре до родителите.

– Сакаме да им посочиме проверени и научно потврдени извори на информации во врска со имунизацијата. Преку општините и локалната самоуправа се планираат јавни дебати и трибини каде што сме спремни да одговориме на прашањата на родителите. Исклучително важна ни е соработката со медиумите и на тоа посветуваме големо внимание. Тие се нашиот партнер и сојузник во правилниот начин на информирање, достапноста на точни и проверени податоци и секако објективна критика ни е потребна. Само со едукација и презентирање на точни факти можеме да ги победиме анти-вакциналните кампањи и да го подигнеме опфатот на имунизација – вели Филипче.

Инаку, како што веќе е познато, а потсетува министерот, две постари вакцини се заменети со нови и современи.

– За сето ова да го овозможиме го зголемивме буџетот за имунизација за 70 отсто. Факт е дека последните две-три години опфатот постепено опаѓа, како резултат на антивакциналните кампањи, што е глобален проблем, а не само кај нас. Со овој опфат не се обезбедува колективен имунитет и можно е појава на претходно искоренети заболувања. Токму затоа, имунизацијата е еден од приоритетите на Министерството за здравство, имајќи предвид дека инвестицијата во превентивата има докажана клиничка, социјална и фармакоекономска оправданост – додава Филипче.


Филипче: Квалитетот на вакцините е загарантиран, вакцинирајте ги децата


Скопје, 9 октомври, 2018 - 12:57 (META) 

Вакцинацијата е тема која секогаш предизвикува дискусија во јавноста. Од една страна, се антиваксерите кои не вакцинираат своите деца главно поради недоверба во здравствениот систем, а од друга страна, се оние родители кои редовно вакцинираат.

Во услови кога има тренд на намалување на бројот на деца кои се вакцинираат, разговаравме со министерот за здравство Венко Филипче, кој во ова интервју за „Мета“ открива дали ќе ја промени политиката околу задолжителноста на имунизацијата, за квалитетот на вакцините, а упатува и препораки за родителите.

Според последните бројки на Институтот за јавно здравје, има намалување на бројот на вакцинирани деца.

Имате ли идеја како да ја промените ваквата слика?

Имунизацијата е значајна здравствена, социјална и економска придобивка. Вакцините нѐ штитат од тешки заразни заболувања, а со тоа се создава колективен имунитет и заштита од епидемии на целата заедница. Токму во насока на потенцирање на важноста на имунизацијата на глобално ниво, на Министерскиот форум на министрите за здравство (во февруари годинава) заедно со министрите од 12 земји на Југоисточна Европа (ЈИЕ) ја потпишавме изјавата за намери за важноста на имунизацијата, која претставува основа врз која се зајакнуваат и зголемуваат заедничките активности, потребата од јакнење на системот за имунизација, партнерството и соработката, како интегрален дел од здравствениот систем на земјите од ЈИЕ. Процесот на имунизација е интегрален дел од добриот и функционален здравствен систем и е во согласност со Акцискиот план за вакцинација во Европа 2015-2020, како и Програмата на СЗО 2020. Согласно Акцискиот план, приоритетни области за дејствување, во кои е вклучена и нашата држава се набавка на квалитетни вакцини, ефикасна контрола врз процесот на имунизација, пристапност до вакцините и континуирана промоција и едукација на бенефитите од вакцинацијата. Сакам да потенцирам дека еден од главните приоритети на Министерството за здравство е комплетно осовременување на Календарот за имунизација, со воведување нови вакцини, кои заштитуваат од стрептокока и од рота вируси, кои се причинители на тешки заболувања проследени со компликации кои најчесто се јавуваат кај малите деца до 5 годишна возраст. Новиот календар е комплетно усогласен со препораките на СЗО, во областа на имунизацијата. Дополнително, две постари вакцини ги менуваме со нови и современи. За сето ова да го овозможиме го зголемивме буџетот за имунизација за 70%. Факт е дека последните две-три години опфатот постепено опаѓа, како резултат на антивакциналните кампањи, што е глобален проблем, а не само кај нас. Со овој опфат не се обезбедува колективен имунитет и можно е појава на претходно искоренети заболувања. Токму затоа, имунизацијата е еден од приоритетите на Министерството за здравство, имајќи предвид дека инвестицијата во превентивата има докажана клиничка, социјална и фармакоекономска оправданост.

Што сакавте да кажете во политичката кампања од неодамна, кога рековте – Во ЕУ за најквалитетни вакцини за сите деца?

Во врска со креативата која беше објавена на мојот „Фејсбук“ профил, поврзана со поддршка на референдумот, конкретно со мојата желба за влез на Македонија во ЕУ, би сакал да појаснам дека флоскулата „Во ЕУ за најквалитетни вакцини за сите деца“ значи дека со влез во големото семејство здравствениот сектор ќе биде на истиот колосек како и државите од ЕУ. Можеби зборовите не беа најсреќно одбрани и искомбинирани на креативата. Одговорно тврдам дека вакцините во Македонија се со висок квалитет и за тоа не станува збор. Станува збор за следење на напредокот, развојот и квалитетот на живот кој го имаат државите – членки на ЕУ, зад кои ние, во овој момент, каскаме.

Дали Министерството за здравство ќе ја менува политиката околу задолжителноста на вакцинацијата?

Согласно законската регулатива континуираната вакцинација кај децата од 0-18 години е задолжителна. Опфат над 95 отсто може да создаде колективен имунитет и заштита на населението од појава на заразна болест во епидемиска форма. Право на секое дете е да биде заштитено и вакцинирано против тешки заразни заболувања, обврска на родителот е да му го овозможи тоа право, а грижа на заедницата е навремено обезбедување квалитетни и безбедни вакцини.

Што им порачувате на родителите, дали вакцините во Македонија се безбедни?

Во целост се гарантира за квалитетот на вакцините, затоа што истите се од реномирани производители од земји на Европска Унија (Франција, Белгија, Бугарија) одобрени производители од страна на СЗО кои ги исполнуваат сите потребни стандарди. Вакцините од производител до краен корисник – децата, се транспортираат, складираат и чуваат на соодветна температура од 2-8 Целзиусови степени. Секоја пратка се прима и проверува од страна на претставници од Министерство за здравство и Агенција за лекови, а Агенцијата за лекови по опсежните анализи издава одобрение за пуштање во промет. Да напоменам дека овие вакцини се употребуваат и во земјите каде се произведуваат.


Вакцините во Македонија се безбедни, нема место за паника, вели Филипче


Скопје, 23 август, 2018 - 15:34 (META) 

Во Македонија се внесуваат безбедни и проверени вакцини. Нема место за паника. Вакцините се европски и сигурни, рече министерот за здравство, Венко Филипче и истакна дека вакцинацијата е најдобрата инвестиција во здравјето.

Министерот рече дека во календарот за имунизација за 2019 година воведени се уште две вакцини со европски и светски квалитет.

-Моментално во потполност се гарантира за квалитетот на вакцините, затоа што истите се од реномирани производители од земји на Европската Унија – Франција, Белгија, Бугарија)одобрени производители од страна на СЗО кои ги исполнуваат сите потребни стандарди – рече Филипче.

Според него, загрижувачки е податокот дека во земјата паѓа опфатот со вакцинација за одредена болест.


ДСЗИ: На аџилак во Мека само со примени вакцини


Скопје, 1 август, 2018 - 17:25 (META) 

Државниот санитарен и здравствен инспекторат (ДСЗИ) ги предупредува муслиманите кои ќе патуваат на аџилак во Мека дека според Законот за заштита на населението, ќе мора да патуваат во групи не помали од 40 лица, како и да ги имаат примено соодветни вакцини.

Групите аџии од земјава ќе може да излезат и во неа да влезат само преку скопскиот аеродром и граничниот премин „Деве Баир“.

Организаторите на патувањата на аџилак треба да ангажираат најмалку еден лекар за групата, а претходно во ДСЗИ да се достават лиценца или лиценци на лекарите. Исто така, во Инспекторатот мора да достават и список на патници со податоци за година на раѓање, адреса и место на живеење и број на пасош и број на лична карта. Покрај тоа, мора да се достави и Извештај за патувањето, со датуми на поаѓање и враќање, како и листа на земји и гранични премини преку кои ќе се минува.

Сите аџии мора да имаат вакцинална книшка со доказ за примена вакцина против менингококов менингит, и тоа да биде завршено десет дена пред тргнувањето на аџилак. Вакцининирањето се врши во центрите за јавно здравје во градовите.

По враќањето од аџилак, лицата ќе мора да се јават на здравствен надзор во центрите за јавно здравје.