!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Андреевски: Увозот на струја ќе ги чини граѓаните 4,2 милиона евра


Скопје, 13 јануари, 2017 - 15:57 (META) 

Неверојатни 4,2 милиона евра ќе ги чини граѓаните увозот на електрична енергија и тоа само за период од две недели, од 7 јануари заклучно до 22 јануари, истакна денеска претседателот на Комисија за енергетика на СДСМ, Митко Андреевски.

Тој истакна дека „ако РЕК Битола, ТЕЦ Неготино и ТЕЦ Осломеј работеа, немаше да има ризик од останување без струја“.

– Срамно, безобразно и несовесно од страна на менаџментот на ЕЛЕМ е да нè убедува дека снегот што ќе се стопи напролет, ќе нè спаси од ново поскапување на струјата – изјави Андреевски.


СДСМ: Kолку ќе платиме за струјата што треба да ја увеземе следната недела


Скопје, 12 јануари, 2017 - 15:17 (META) 

„Ситуацијата со недостиг на струја е сериозна, ќе се увезува струја и следната недела. Ќе се одлеваат нови милиони евра народни пари за скапиот увоз“, се вели во соопштение на СДСМ.

Во него се додадава дека е распишан нов тендер за увоз на струја за периодот од 14 до 22 јануари.

– Ова на денешната прес-конференција го сокри директорот на АД ЕЛЕМ, Христијан Мицоски. Ако за пет дена плативме 2 милиона евра за увезена струја, колку ќе платиме за струјата што треба да ја увеземе во следните осум дена – прашуваат од партијата преку соопштението.


Мицкоски: Дефектот во РЕК Битола е отстранет, состојбата со струјата е стабилна


Скопје, 12 јануари, 2017 - 12:25 (META) 

Дефектот во РЕК Битола е отстранет и електраната сега работи со полн капацитет, инофрмираше денеска генералниот директор на АД ЕЛЕМ, Христијан Мицкоски.

Според него, земјава во најстудените денови ги задоволила потребите од електрична енергија со 80 отсто од домашно производство.

– И покрај временските услови, успеавме навреме да ги испорачаме потребните количества електрична енергија. Граѓаните не треба да се грижат, така ќе биде и во наредните денови – нагласи Мицкоски.

Тој додаде дека периодот што следува е поволен поволен, бидејќи снегот што се топи ќе ја намали цената на струјата во регионот.

Увозот на струја засега се реализира единствено преку Србија.


Ковачевски: РЕК Битола е во нова хаварија, увезената струја ни однесе 2 милиони евра


Битола, 10 јануари, 2017 - 15:43 (META) 

Според последните информации, не само што не е поправен еден од блоковите на РЕК Битола, туку има дополнителна хаварија, односно пукнати се цевки, изјави денеска пратеникот и претседател на општинската организација на СДСМ од Битола, Васко Ковачевски.

Тој на прес-конференција истакна дека „ова му се случува на комбинатот, иако се дадени неколку стотици милиони евра пари на граѓаните за наводни поправки и за ремонти“.

– РЕК Битола произведува речиси 80 проценти од струјата во Македонија. Поради неодговорните политики на досегашната власт, којашто 10 години се занимава со криминални тендери, не работат други енергетски капацитети, како ТЕЦ Осломеј, ТЕЦ Неготино – изјави Ковачевски.

Тој додаде дека засега проблемот се решава со многу скап увоз на струја, што до вчера граѓаните ги чинеше околу половина милион евра, само за два дена. Притоа информираше дека распишан е нов тендер за интервентен увоз на струја за денеска и за утре.

– Цената е огромна, повеќе од 600 проценти повисока од одобрената од Регулаторната комисија за енергетика. За вечер е набавена увозна струја по цена од неверојатни 220 евра по мегават-час и тоа ќе ги чини граѓаните 155.000 евра. Увезената струја за утре и за задутре ќе ги чини граѓаните 1.286.000 евра. За пет дена, поради несериозната власт, граѓаните ќе платат речиси 2.000.000 евра – додаде Ковачевски.


СДСМ: Со скапиот увоз на струја, граѓаните за два дена се оштетени за 300.000 евра


Скопје, 9 јануари, 2017 - 14:12 (META) 

СДСМ ја повикува власта во заминување да престане да крие информации од граѓаните за реалниот ризик, домаќинствата да останат без струја, се вели во соопштението на СДСМ.

– Реалноста е дека Македонија се соочува со недостиг од струја и како што вчера предупредивме, денеска е распишан тендер за нов интервентен увоз на струја. Како што објавивме вчера, на Божиќ бил распишан првиот тендер за итен увоз на струја за 7 и за 8 јануари. За претходните два дена набавена е струја по цена за 36 проценти повисока од увозната цена дозволена од Регулаторната комисија за енергетика. Со тоа граѓаните за два дена се оштетени 300.000 евра – се додава во соопштението на СДСМ.

Оттаму велат дека „да работеа блоковите на РЕК Битола, за чии поправки граѓаните платија стотици милиони евра, сега ќе имаа струја и немаше да бидат оштетени ни денар“.

– Вистината е дека да не е увозот од странство, домаќинствата ќе останат и без струја и без греење на овој поларен студ. Ако земјите од регионот, што сега ѝ даваат струја на Македонија, почнат политики на штедење струја поради студениот бран, граѓаните, семејства со деца, ќе останат без струја – се додава во соопштението на СДСМ.


ЕЛЕМ: СДСМ манипулира со податоците за производство и за увоз на електрична енергија


Скопје, 8 јануари, 2017 - 18:36 (META) 

СДСМ се обидува да ја манипулира јавноста со тези и со податоци за производството на електрична енергија, конзумот и увозот кои немаат врска со реалноста, заради ситни дневно-политички поени и ги извртува информациите искажани на денешната прес-конференција на АД ЕЛЕМ за електро-енергетските состојби во Македонија, стои во реакцијата на ЕЛЕМ на соопштението на СДСМ.

Според компанијата, неосновани се обвинувањата од СДСМ дека АД ЕЛЕМ кажало оти цената на набавената електрична енергија за потребите на тарифните потрошувачи изнесува 40 евра за еден мегават-час.

– Напротив, на денешната прес-конференција, АД ЕЛЕМ детално информираше по која цена е набавената електрична енергија, периодот за кој е набавена, како и за постапката која е спроведена согласно сите востановени пазарни правила, утврдени од Регулаторната комисија за енергетика. Впрочем, цените, количествата и периодот за набавка уште во текот на вчерашниот ден транспарентно се објавени на веб-страницата на АД ЕЛЕМ – се вели во соопштението на компанијата.

Оттаму потсетуваат дека со одлука на менаџментот на АД ЕЛЕМ во ноември и во декември минатата година, не само што немало увоз, туку била реализирана продажба на вишоци на електрична енергија по повисоки цени, а со додадената вредност што била остварена се набавува електрична енергија во период со екстремни временски услови, кога и побарувачката и потрошувачката на електрична енергија во Европа е на највисоко ниво.

– Повторуваме дека станува збор за набавка на електрична енергија по поволна цена, со оглед на фактот што поради екстремните временски услови и проблемите со производните капацитети со кои се соочуваат многу земји од Југоисточна Европа, други енергетски системи во регионот набавуваат електрична енергија и по цени од 100 евра за мегават час, се наведува во соопштението.

Воедно, се нагласува дека не станува збор за интервентен увоз, туку за набавка спроведена согласно сите правила и процедури донесени од Регулаторната комисија за енергетика.


СДСМ: Нема доволно струја, ЕЛЕМ интервентно увезува 36 проценти поскапа струја


Скопје, 8 јануари, 2017 - 16:20 (META) 

СДСМ денеска соопшти дека струја се увезува веќе три дена, а не само четири часа во текот на вчерашниот ден.

„Лага е дека има струја. Лага е дека нема интервентен увоз на струја. Лага е дека е набавена струја за само четири часа од вчерашниот ден. Лага е дека набавената струја чини 40 евра за мегават-час, како што изјавија на прес-конференција претставниците на власта во заминување во државната компанија ЕЛЕМ“, соопштија од СДСМ и притоа приложија документи од увозот.

Од партијата истакнуваат дека Македонија е оставена без потребните количества домашна струја.

„Вчера, на Божиќ, власта во заминување, за да го покрие скандалот, распишала интервентен увоз на струја. Во документот во прилог, точка три, каде се зборува за трошокот за прекуграничен капацитет, може да се види дека станува збор за интервентен увоз на струја. Струја не се барала само за синоќа, од 20 до 24 часот, туку се барала струја и за денеска, 8 јануари, и за утре, 9 јануари, како што може да се види од документот“, се вели во соопштението.

Од СДСМ истакнуваат дека набавената струја е со неверојатно висока цена, која ја надминува горната граница за увоз.

„Набавена е струја по цена од 59,3 евра за мегават-час! Тоа е 36 проценти повеќе од дозволената цена за увоз од страна на Регулаторната комисија за енергетика во последната одлука (38 евра/МWh). Интервентната набавка на струја за само два дена ги чини граѓаните 300.000 евра“, стои во соопштението.

Директорот на ЕЛЕМ, Христијан Мицковски, денеска соопшти дека електроенергетската состојба е стабилна и оти се задоволуваат сите потреби на потрошувачите.

Мицкоски истакна дека ЕЛЕМ во целост ги има ставено на располагање сите свои производствени капацитети кои работат, а оти хидроелектраните се во резерва. Доколку дојде до зголемување на потребите на потрошувачите, Мицковски рече дека компанијата ќе ги ставени во функција и хидроелектраните за да одговорат на потребите на потрошувачите.

Мицковски потврди дека во текот на вчерашниот ден извршиле интервентен увоз на струја поради дефект на блокот 3 од РЕК Битола, кој е случил утрото помеѓу Бадник и Божиќ, во 3.45 часот.


Македонските компании ќе користат позитивни искуства од унгарските


Скопје, 23 ноември, 2016 - 14:09 (META) 

Системот „Хунгарикум“ кој ги обединува и промовира националните автохтони унгарски производи и услуги, беше презентиран пред претставници на македонски компании во хотелот „Гранд плаза“.

Целта на оваа конференција организарана од Сојуз на стопански комори на Македонија, во соработка со Амбасадата на Унгарија во Македонија и со Министерството за земјоделство на Унгарија, е да се презентираат позитивните примери, да се направи размена на искуства, како и бизнис-соработка помеѓу унгарските и македонските компании.

Заменикот на државниот секретар во Министерството за земјоделство на Унгарија, Лоранд Иштван Сакали, истакна дека под „Хунгарикум“ спаѓаат 60 унгарски национални вредности, специфични производи, но и значајни личности кои оставиле свој печат во историјата на Унгарија.

Трговската размена помеѓу Македонија и Унгарија се зголемува така што унгарскиот извоз се зголемил за 20 проценти, а македонскиот за повеќе од 160 проценти.

На годишно ниво, трговската размена помеѓу Македонија и Унгарија се движи околу 100 милиони евра.


Андреевски: Струјата е поскапена за 100 проценти од 2006 година досега


Скопје, 2 ноември, 2016 - 15:55 (META) 

„Плаќаме повисоки сметки за електрична енергија за повеќе од 100 проценти денес во однос на 2006 година. Причина за тоа се криминалните политики на оваа власт во енергетскиот сектор, со кои се збогатија енормен број луѓе блиски до неа, на сметка на граѓаните“, изјави претседателот на Комисијата за енергетика на СДСМ, Митко Андреевски, на денешната прес-конференција.

Тој на прес-конференцијата прикажа сметка од 2006 година во која за потрошена електрична енергија биле потребни 622 денари, а денес за истото количество потрошена електрична енергија потребни се 1.820 денари.

– Тоа е повеќе од двојно бидејќи во неа власта вметна и други ставки што ја оптоварија финалната цена. Во 2011 година, оваа власт ја укина евтината струја и нè убедуваше дека тоа ќе значи  поголемо домашно производство, намален увоз на електрична енергија и намалени трошоци за електрична енергија.Фактите го покажуваат спротивното. Има пад на домашното производство на електрична енергија од цели 25 проценти. Имаме зголемен увоз на електрична енегрија за 38 проценти – изјави Андреевски.

Тој додаде дека во македонските електрани работат надворешни фирми, со високи профити.

– Увозот не електрична енергија е на ниво од 200 милиони евра годишно. Секое семејство, секој еден од нас ги плаќа тие договори. Тоа е еквивалнтно на 100 евра по жител годишно – додаде тој.


Протестни концерти во Албанија целосно цензурирани од медиумите


Тирана, 2 ноември, 2016 - 11:31 (META) 

Протестни концерти на албански пејачи и на артисти, кои се противат на изградба на електрани и на увоз на отпад, се одржаа во Националниот парк Валбона и во Тирана, но тие беа целосно игнорирани од главните албански медиуми.

На протестот кој се одржа во Тирана минатата недела присуствуваа неколку илјади граѓани.

Артистите извикуваа „Не допирајте ја Валбона“ и „Да не се увезува отпад во Албанија“.