Тевдовски: По 10 години, јавниот долг е ставен под контрола


Скопје, 21 мај, 2018 - 14:35 (META) 

Отплатени се дел од старите долгови, зголемена е рочноста на издадените државни хартии од вредност, намалена е каматната стапка и зголемена е довербата кај инвеститорите, истакна министерот за финансии Драган Тевдовски, кој учествуваше на јавната дискусија на Економскиот факултет насловена „Јавните финансии на крстопат“.

Тој додаде дека за прв пат после повеќе од 10 години, јавниот долг е ставен под контрола и подобрена е структурата преку зголемена рочност и пониски каматни стапки. Владата планира постепена буџетска консолидација, со буџетски дефицит од 2 отсто на среден рок.

-Зголемена е и довербата на инвеститорите ако се земе предвид дека е издадена еврообврзница со историски најниска каматна стапка од 2,75 отсто како и државна обврзница со рочност 30 години. Зголемената доверба се гледа и од извештаите на кредитните агенции, како на пример „Фич“ кој го подобри изгледот за рејтингот на земјата – истакна Тевдовски.

Во своето излагање на Економскиот факултет, министерот најави реформи во јавните финансии до крајот на годинава. Согласно Акцискиот план за спроведување на Програмата за реформи во управување со јавните финансии годинава ќе се подготви законската регулатива за нов систем за јавни набавки, за повеќегодишно буџетирање и предпополнета даночна пријава за олеснување на обврските на даночните обврзници.

Во насока на зголемување на транспарентноста како една од најкрупните реформи која ќе се спроведе е објавување на Трезорот на веб-страна, односно целосен увид на јавноста во сите расходи на државната каса во реално време.

– Досега се преземени 15 чекори за зголемувањето на увидот на јавноста во јавните финансии. Тие чекори се однесуваат на објавување на извештаи кои досега не се објавувале, зголемување на фрекфенција на објавување на податоците, јавна дебата за буџетот, подобрување на веб-страницата на Министерството за финансии, јавно достапна платформа Отворени одатоци на Бирото за јавни набавки, изработка на граѓански буџети и приклучување на Македонија кон меѓународниот стандард за владини статистики на ММФ – истакна Тевдовски.


Жена и 17-годишно момче загинале во пожар во Битола


Битола, 29 јануари, 2018 - 14:23 (META) 

Во семејна куќа во Битола рано утрово избувнал пожар во кој, според првичните информации настрадале жена и 17-годишно момче, соопшти Јавното обвинителството.

Оттаму информираат дека надлежен обвинител од ОЈО Битола врши увид на местото, заедно со екипа од Министерството за внатрешни работи и Противпожарната служба.

„Надлежниот јавен обвинител издаде наредби за фотографирање и обезбедување на местото на настанот, како и за вршење на сите потребни вештачења во насока на откривање на причините за пожарот. Издадена е наредба за обдукција на пронајдените тела и се преземаат други дејствија неопходни за расветлување на случајот“, стои во соопштението.

За помалку од еден недела, ова е втора ваква трагедија. На 25 јануари во пожар во куќа на улицата Гоце Делчев во Тетово животите ги загубија 38-годишна жена и нејзините четири деца.


Целосно изгоре куќа во струмичко Дукатино поради неисправен оџак


Струмица, 28 јануари, 2018 - 12:57 (META) 

Во пожар вчера целосно изгорела куќа во селото Дукатино, Струмичко, сопственост на 34-годишниот З.Р., соопшти полицијата.

Пожарот избувнал вчера ноќ, околу 2.20 часот, а бил изгаснат од територијалната противпожарна бригада.

Во пожарот нема повредени лица.

Увид на местото извршиле екипи од Секторот за внатрешни работи Струмица и од Дирекцијата за заштита и спасување.

Според полицијата, пожарот избувнал поради неисправен оџак поставен помеѓу детската и спалната соба.


Обвинител врши увид во куќата во Тетово, каде загинаа мајка и нејзините деца


Тетово, 25 јануари, 2018 - 10:55 (META) 

Надлежниот обвинител од Основното јавно обвинителство – Тетово врши увид во двокатната куќа на улица Гоце Делчев во Тетово, каде што ноќеска избувнал пожар при што, според првичните информации, настрадале жена и четири деца.

„Надлежниот обвинител во моментов е на местото на настанот и во соработка со увидната екипа од Полициската станица – Тетово и Противпожарната служба врши увид. Обвинителот повика тим за форензика од Скопје и екипа на ЕВН кои треба да помогнат во утврдување на околностите и причините за пожарот. Издадена е наредба за обдукција на пронајдените тела и се преземаат други дејствија неопходни за расветлување на случајот“, информираат од Обвинителство.


Такси-возач загина во верижен судир на булевар Србија


Скопје, 29 декември, 2017 - 11:03 (META) 

Едно лице загина, а друго е тешко повредено во сообраќајна несреќа што ноќеска, околу еден часот по полноќ се случила на булеварот Србија во Скопје, а во која учествувале повеќе возила.

Како што информираат од МВР, несреќата се случила кога автомобил, марка „ауди а4“, управувано од 28-годишниот Ѓ.Д. се судрил со возило „пежо 206“, а потоа преку тревникот преминало на коловозните ленти од спротивата насока, по што удрило во оградата на бензинска пумпа, а потоа во такси-возило. По незгодата, аудито се запалило и целосно е опожарено.

Во незгодата загинал возачот на такси-возилото, 58-годишниот Т.Ј. Тешка телесна повреда – фрактура на колено, била констатирана кај сопатникот во „аудито“, 21-годишниот Б.М. од селото Сопиште.

Увид на местото извршиле јавен обвинител и екипа од СВР Скопје. По наредба на јавниот обвинител телото на починатиот било предадено на обдукција.

Поради несреќата, сообраќајот на булеварот Србија, на делот од крстосницата со булевар Јане Сандански до крстосницата со булевар Трета Македонска Бригада, бил во прекин во двате насоки од 1.30 часот до 5.30 часот.


Спасовски нема да ги потпише законите ако не гарантираат заштита од прислушување


Скопје, 1 декември, 2017 - 14:41 (META) 

Прво да заврши увидот и стручната јавност и граѓаните да го дадат своето мислење, а потоа законот за новата агенција за прислушување (Оперативно-техничка агенција – ОТА) и новиот закон за следење на комуниакциите ќе одат на усовјување во Владата и во Собранието.

Ова на денешната прес-конференција го изјави министерот за внатрешни работи, Оливер Спасовски, одговарајќи на новинарско прашање кога очекува овие закони да бидат усвоени во Собранието.

– Законите за ОТА и за следење на комуникациите се наоѓаат на Единствениот национален електронски регистар на прописи на Македонија (ЕНЕР) за увид од страна на јавноста. Тие треба да бидат на ЕНЕР 20 дена за да ги чуеме мислењата на стручната, научната јавност и на граѓаните. Кога ќе бидат подготвени конечните текстови, врз основа на мислењата на стручната, научната јавност и на граѓаните, ќе ги разгледаме на седница на Владата, а потоа ќе ги доставиме до Собранието – рече Спасовски.

Тој нагласи дека нема да ги потпише текстовите на законите доколку во нив не се гарантира заштитата од можни злоупотреби на системот.

– Јас го кажав мојот став уште во 2015 година и стојам на тој став. Сè додека не поминат сите дебати околу овие законски решенија, сè додека во јавноста не се прифати дека ова е вистинското решение што ќе обезбеди заштита од злоупотреба на системот за прислушување, нема да потпишам таков закон – изјави Спасовски.


Запален автомобил во населбата Ѓорче Петров


Скопје, 23 ноември, 2017 - 13:54 (META) 

Ноќеска, околу еден часот по полноќ, бил запален автомобил на паркиралиште на улицата Борис Сарафов, во скопската населба Ѓорче Петров, информира МВР.

Станува збор за возило марка „опел астра“, сопственост на 38-годишниот Г.Т. од Скопје. Од полицијата велат дека засега не се познати причините за опожарувањето на возилото, кое целосно изгорело.

Огнот, како што додаваат од МВР, делумно зафатил и автомобил „даеву матиз“, сопственост на Н.С. (35), кое било паркирано до „опелот“.

Поражот го изгаснала екипа на скопската противпожарна бригада.

Увид на местото ќе се врши во текот на денот.


Човечко тело во распаѓање пронајдено во канализациска шахта во Сопиште


Скопје, 7 ноември, 2017 - 13:08 (META) 

Вчера, околу пладне, во полициската станица во Кисела Вода, било пријавено дека при изведување градежни работи на локацијата „Сончев град“ во селото Сопиште, во канализациска шахта било откриено човечко тело во напредна фаза на распраѓање, информираат денеска од МВР.

Екипа на СВР Скопје извршила увид на местото, а по наредба на јавен обвинител телото било предадено на обдукција.

Од МВР велат дека се работи на идентификација на телото и на целосно расчистување на случајот.


Кривична пријава на Вангеловски бидејќи не дава увид во списите за Грујовски и Бошковски


Скопје, 28 септември, 2017 - 14:20 (META) 

Советот за утврдување на факти му поднесе кривична пријава на претседателот на Врховниот суд, Јово Вангеловски. Кривичната пријава Советот ја поднел бидејќи пред две недели Вангеловски не им дозволи на членовите на комисијата која ги истражува околностите за бегството на Горан Грујовски и на Никола Бошковски, да влезат во Врховниот суд и да извршат увид во списите од предметите „Таргет“ и „Тврдина“.

„Советот за утврдување на факти на седницата одржана на 28.09.2017 година донесе одлука да се поднесе кривична пријава против претседателот на Врховниот суд, Јово Вангеловски. Истиот ден до надлежниот јавен обвинител поднесена е кривичната пријава за сторено кривично дело кое според Кривичниот законик се гони по службена должност“, стои во соопштението од Советот за утврдување на факти и покренување на постапка за утврдување одговорност за судија.

На 13 септември од Советот информираа дека припадниците на судската полиција им кажале на членовите на комисијата дека не ги пуштаат внатре зашто таква наредба добиле од претседателот на Врховниот суд, Јово Вангеловски.

Од Врховниот суд тогаш одговорија дека Советот за утврдување на факти прво треба писмено да го образложи барањето за пристап до списите од предметите „Таргет“ и „Тврдина“, а потоа судот ќе определи време и простор.

Инаку, Комисијата што ја формираше Советот треба да утврди дали судии од Кривичниот, Апелацискиот и од Врховниот суд, кои одлучувале по барањата за притвори на СЈО, ја прекршиле постапката и им овозможиле на поранешниот началник на петтата управа, Горан Грујовски и на Никола Бошковски, вработен во УБК, да побегнат од државата.


Тројца ранети во инцидент во Кичево, меѓу кои и носител на советничка листа


Кичево, 27 септември, 2017 - 23:52 (META) 

Во вооружен инцидент што вечерва се случил во Кичево ранети се три лица, меѓу кои и носителот на независна листа за советници во општината, Алит Абази, пренесува „Телма“.

Напаѓачот, кратко по инцидентот бил приведен од полицијата, а како што потврдиле од МВР за телевизијата, било обезбедно и оружјето од кое било стрелано.

Четириесетгодишниот Абази бил застрелан во слабината, додека Дестан Абдиу, кој учествувал во неговата кампања како шеф на изборниот штаб, и Шабан Далипи, кој било заедно со нив, се ранети во бутот, односно во потколеницата. Абази и Абдиу биле пренесни на скопските клиники, а Далипи бил префрлен во кичевската болница.

Инцидентот се случил на булеварот Ослободување во Кичево, околу 18.50 часот. Полициски екипи вршат увид на местото и ги истражуваат мотивите за нападот.

Според првичните информации, се претпоставува дека нападот врз кандидатот за советник и врз другите две лица не е со политичка заднина, туку дека Абази и напаѓачот имале недоразбирања од претходно и воделе судска постапка.