!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Кривична пријава на Вангеловски бидејќи не дава увид во списите за Грујовски и Бошковски


Скопје, 28 септември, 2017 - 14:20 (META) 

Советот за утврдување на факти му поднесе кривична пријава на претседателот на Врховниот суд, Јово Вангеловски. Кривичната пријава Советот ја поднел бидејќи пред две недели Вангеловски не им дозволи на членовите на комисијата која ги истражува околностите за бегството на Горан Грујовски и на Никола Бошковски, да влезат во Врховниот суд и да извршат увид во списите од предметите „Таргет“ и „Тврдина“.

„Советот за утврдување на факти на седницата одржана на 28.09.2017 година донесе одлука да се поднесе кривична пријава против претседателот на Врховниот суд, Јово Вангеловски. Истиот ден до надлежниот јавен обвинител поднесена е кривичната пријава за сторено кривично дело кое според Кривичниот законик се гони по службена должност“, стои во соопштението од Советот за утврдување на факти и покренување на постапка за утврдување одговорност за судија.

На 13 септември од Советот информираа дека припадниците на судската полиција им кажале на членовите на комисијата дека не ги пуштаат внатре зашто таква наредба добиле од претседателот на Врховниот суд, Јово Вангеловски.

Од Врховниот суд тогаш одговорија дека Советот за утврдување на факти прво треба писмено да го образложи барањето за пристап до списите од предметите „Таргет“ и „Тврдина“, а потоа судот ќе определи време и простор.

Инаку, Комисијата што ја формираше Советот треба да утврди дали судии од Кривичниот, Апелацискиот и од Врховниот суд, кои одлучувале по барањата за притвори на СЈО, ја прекршиле постапката и им овозможиле на поранешниот началник на петтата управа, Горан Грујовски и на Никола Бошковски, вработен во УБК, да побегнат од државата.


Тројца ранети во инцидент во Кичево, меѓу кои и носител на советничка листа


Кичево, 27 септември, 2017 - 23:52 (META) 

Во вооружен инцидент што вечерва се случил во Кичево ранети се три лица, меѓу кои и носителот на независна листа за советници во општината, Алит Абази, пренесува „Телма“.

Напаѓачот, кратко по инцидентот бил приведен од полицијата, а како што потврдиле од МВР за телевизијата, било обезбедно и оружјето од кое било стрелано.

Четириесетгодишниот Абази бил застрелан во слабината, додека Дестан Абдиу, кој учествувал во неговата кампања како шеф на изборниот штаб, и Шабан Далипи, кој било заедно со нив, се ранети во бутот, односно во потколеницата. Абази и Абдиу биле пренесни на скопските клиники, а Далипи бил префрлен во кичевската болница.

Инцидентот се случил на булеварот Ослободување во Кичево, околу 18.50 часот. Полициски екипи вршат увид на местото и ги истражуваат мотивите за нападот.

Според првичните информации, се претпоставува дека нападот врз кандидатот за советник и врз другите две лица не е со политичка заднина, туку дека Абази и напаѓачот имале недоразбирања од претходно и воделе судска постапка.


Врховен суд: Прво да образложат, па после ќе добијат увид во списите за Грујовски и за Бошковски


Скопје, 13 септември, 2017 - 15:59 (META) 

Прво Советот за утврдување на факти писмено да го образложи барањето за пристап до списите од предметите „Таргет“ и „Тврдина“, а потоа Врховниот суд ќе определи време и простор, соопштиле од судот за државната новинска агенција МИА.

Реакцијата на судот следи откако Советот денеска обвини дека на членовите на комисијата која истражува дали судиите кои одлучувале по барањата за притвори на Горан Грујовски и на Никола Бошковски денеска не им било дозволено да влезат во Врховниот суд, по наредба на претседателот на судот Јово Вангеловски.

– Во време на одржување на јавна седница по повод жалба против пресуда за доживотен затвор, ниту безбедносно ниту технички е можно извршување на активности на Советот – рекле од Врховен суд, додавајќи дека Советот навремено писмено бил известен и дека на неговите претставници ќе им биде определен термин за прием во судот во согласност со прописите.

Од Врховниот суд навеле дека целокупната писмена кореспонденција помеѓу Врховниот суд и Советот за утврдување на факти е доверлива и дека изнесувањето содржини од писмената кореспонденција со ознака „доверливо“ од страна на Советот претставува кривично дело.


Вангеловски не ѝ дозволил на комисијата за Грујовски и за Бошковски да влезе во Врховен


Скопје, 13 септември, 2017 - 13:33 (META) 

На Комисијата која истражува дали судиите од Кривичниот, Апелацискиот и од Врховниот суд, кои одлучувале по барањата за притвори, ја прекршиле постапката и им овозможиле на Горан Грујовски и на Никола Бошковски да побегнат од државата, денеска не ѝ било дозволено да влезе во Врховниот суд и да изврши увид во списите од предметите „Таргет“ и „Тврдина“.

Како што соопштија од Советот за утврдување на факти, кој ја формираше комисијата, минатата недела го информирале Врховниот суд дека денеска ќе вршат увид во документите, но кога пристигнале во судот, судската полиција не ги пуштила да влезат внатре.

Според Советот, припадниците на судската полиција им кажале на членовите на комисијата дека не ги пуштаат внатре зашто таква наредба добиле од претседателот на Врховниот суд, Јово Вангеловски.

„На барање на членовите на Комисијата да им се објасни кој не го дозволува нивниот пристап во судот и извршување на потребното службено дејство – увид во списте на предметите, судската полиција усно објасни дека претседателот на Врховниот суд им наредил да не ја пуштаат Комисијата во судот. Потоа претседателот на Врховниот суд по телефон го повика претседателот на Комисијата и му предочи дека претходно упатил писмо до Советот за факти во кое го известил дека не дозволува да се врши увид во бараните списи, сè додека на судот не му биде доставена основа поради која Комисијата го бара увидот, а потоа тој ќе оценел дали ќе дозволи увид, ќе определел термин и простор каде да биде извршено таквото дејство, со закана дека со ваквиот начин на комуницирање ќе поднесуваме последици“, стои во соопштението од Советот за утврдување на факти.

Оттаму велат дека ваквото однесување Вангеловски претставува спречување на членовите на комисијата во вршењето на нивните овластувања, согласно членот 42 од законот за Советот за утврдување на факти, поради што, како што велат од Советот, ќе поведат кривична постапка против Вангеловски пред надлежен јавен обвинител.

Од Советот напоменуваат дека ова не е првпат Вангеловски и судиите во Врховниот суд да прават опструкции кога биле повикувани од Советот да дадат изјави или да овозможат пристап до информации кои ги има Врховниот суд.

„И денешното однесување на претседателот на Врховниот суд претставува повторување на нивното претходно однесување, односно и понатаму тече опструкцијата“, велат од Советот.


Заврши увидот во избирачкиот список


Скопје, 10 септември, 2017 - 10:20 (META) 

На полноќ истече рокот за јавниот увид во избирачкиот список за локалните избори 2017. Граѓаните тоа можеа да го направат електронски или во просториите на Државната изборна комисија (ДИК) во Скопје и во подрачните оделенија.

Според роковникот на изборни дејства на ДИК, во рок од пет дена по завршување на јавниот увид, Комисијата треба да го достави избирачкиот список до политичките партии кои, пак, во рок од пет дена треба да ги достават своите забелешки до ДИК.

По поднесените барања, ДИК одлучува во рок од три дена, а против решението на ДИК, политичките партии може да поднесат тужба до Управниот суд во рок до 24 часа од приемот на решението. Управниот суд е должен да одлучи во рок од 24 часа од приемот на тужбата.

Избирачкиот список во кој се извршени сите промени од јавниот увид, ДИК го заклучува најдоцна 14 дена по завршениот јавен увид, односно најдоцна до 24 септември. Заклучениот избирачки список ДИК го потпишува најдоцна 15 дена пред денот на одржување на изборите.


Увид во избирачкиот список може да се направи до полноќ


Скопје, 9 септември, 2017 - 16:31 (META) 

На полноќ истекува рокот за јавниот увид во избирачкиот список за локалните избори, закажани за 15 октомври годинава. Увидот се врши во подрачните одделенија и канцеларии на Државната изборна комисија (ДИК), како и на веб-страницата на ДИК.

Според Комисијата, до 6 септември увид во избирачкиот список во подрачните одделенија и канцеларии на ДИК во земјава извршиле 20.081 граѓанин, а преку веб-страницата 148.538 граѓани ги провериле своите податоци.


Увид во избирачкиот список направиле 148.538 граѓани


Скопје, 5 септември, 2017 - 13:49 (META) 

Потребниот број потписи за поднесување независна кандидатура собрале 27 листи на кандидати за градоначалник и 47 листи на кандидати за членови на совети, информираа денеска од Државната изборна комисија.

– Потписи за листи на кандидати за градоначалници се собрани за 22 општини, а потписи за листи на кандидати за советници се собрани во 27 општини. Рокот за поднесување кандидатури истекува на 14 септември на полноќ. Листите се поднесуваат до надлежната општинска изборна комисија – изјави Љупка Гугучевска, портпаролка на ДИК, додавајќи дека досега никој официјално нема поднесено кандидатура.

Од ДИК потсетуваат дека јавниот увид во избирачкиот список трае до 9 септември.

– Вкупно 18.804 граѓани извршиле увид во подрачните единици на ДИК. Комисијата донесе 14 решенија за запишување во списокот, седум за бришење од избирачкиот список и 19 за промена на податоците. На веб-апликацијата на ДИК вкупно увид извршиле 148.538 граѓани – додаде Гугучевска.


ДИК на седница го разгледува извештајот за состојбата во избирачкиот список


Скопје, 20 август, 2017 - 14:20 (META) 

Државната изборна комисија денеска ја одржува 128. седница на која треба да го разгледа и усвои извештајот за утврдување на состојбата во избирачкиот список, за ставање на јавен увид а по повод одржувањето на локалните избори на 15 октомври, информираат од таму.

На седницата исто така треба да се разгледа и усвои предлогот за јавен повик за сите граѓани, за вршење на јавен увид во избирачкиот список.

На дневен ред и е разгледување и освојување на предлог-одлука за отворање на канцеларии на ДИК во седиштата на единиците на локалната самоуправа каде ќе се спроведува јавниот увид и собирањето на потписи за поддршка на листи на кандидати.


Полицаец застрелал двајца малолетници во Струмица, обвинителството врши увид


Струмица, 12 август, 2017 - 12:01 (META) 

Полицаец синоќа со службениот пиштол застрелал двајца малолетници во Струмица, од кои едниот со тешки повреди бил хоспитализиран на Клиниката за анестезија, реанимација и интензивно лекување во Скопје (КАРИЛ), а на другиот му бил извршен оперативен зафат во струмичката болница.

Од Јавното обвинителство соопштија дека денеска надлежен јавен обвинител од ОЈО Струмица ќе продолжи со увидот во близина на Градската капела во Струмица, каде се случил инцидентот.

Според првичните информации, што ги соопшти обвинителството, до инцидентот дошло кога екипи од СВР Струмица се обиделе да го сопрат возилото во кое биле двајцата малолетници, а за кои претходно било пријавено дека се обиделе да извршат кражба на чамец во близина на браната Мантово.

Малолетниците на два пати ја избегнале полициската патрола и не застанале, а потоа биле пресретнати од друго полициско возило на споредниот пат кај Градската капела. Од обвинителството велат дека и понатаму се работи на расветлување на начинот на кој дошло до пукањето.

„Едното малолетно лице со посериозни повреди и прострелна рана во градниот кош уште синоќа беше префрлено на Клиниката за анестезија, реанимација и интензивно лекување во Скопје, додека над вториот малолетник е извршен оперативен зафат во болницата во Струмица и тој се наоѓа во добра општа состојба“, стои во соопштението на Јавното обвинителство.

Во увидот се вклучени екипи од Одделот за криминалистичко-технички испитувања и вештачења при Министерството за внатрешни работи од Скопје, а издадени биле и наредби за анализа на биолошки траги, балистичко вештачење, како и вештачење на папиларните линии (отисоци од прсти) подигнати на местото.

Од сите инволвирани во инцидентот биле земени примероци од крв и урина и парафински ракавици, а полицаецот од чие оружје било пукано е задржан во полициската станица во Струмица.

Во текот на денот, во Основното јавно обвинителство Струмица ќе бидат сослушани сведоци на настанот.


Димитров: Јавноста ќе има увид во договорот со Бугарија кога и официјално ќе стане договор


Скопје, 20 јули, 2017 - 21:19 (META) 

Јавноста ќе има увид во договорот за добрососедство со Бугарија кога тој ќе биде официјално потпишан и даден на ратифкација во Собранието на Република Македонија, изјави министерот за надворешни работи, Никола Димитров, во интервју за „Телевизија 24“.

Како што изјави шефот на македонската дипломатија, во моментов станува збор за нацрт-текст на договор, кој за да стане договор, првин треба да биде потпишан.

– За да биде договор, првин треба да се потпише, а сè дотогаш станува збор за нацрт-текст. Јавноста ќе има доволно време да дебатира, да разговара (за договорот со Бугарија). Многу е тешко тоа да се објави пред потпишување. Ние од осамостојувањето на Македонија, од 1991 година, немаме таква видлива инволвираност на Собранието и на опозицијата во една ваква работа. Уставните процедури се: има преговарачки тимови, се преговара, се усогласува текст, тој текст се усвојува од Владата, се потпишува договорот и потоа станува договор кој потоа оди на ратификација во Собранието. Тука има многу време за дебата и во јавноста и со опозицијата – рече Димитров.

Во врска со барањето на пратениците од ВМРО-ДПМНЕ за свикување итна и јавна седница за договорот со Бугарија, Димитров рече дека за тоа нема ниту уставна, ниту законска обврска и ја обвини опозцијата дека сака да го „урне договорот“.

– Ако имате работа со опозиција која дава сигнали дека сака ова да го урне, тоа значи дека треба многу внимателно да се однесувате со нив – рече Димитров.

Прашан дали во договорот стои „македонски јазик“, министерот за надворешни работи рече дека пишува „македонски јазик“, како што пишува и во Декларацијата од 1999 година, која, како што нагласи, е во основаната на договорот.

– Ќе се види таму дека сите наши важни прашања, и во однос на народот и во однос на јазикот и во однос на посебноста, се заштитетни во рамките на основата што ја дава Декларацијата од 1999 година. Државен интерес на Македонија е од Бугарија да направи пријател и поддржувач. Се разбира дека тоа треба да биде на една достоинствена основа. Јас Софија ја напуштив со чиста совест и со чувство дека извлековме максимум што можеше да се извлече во дадените околности. Многу е лицемерно тие што ја создадоа потребата за ваков договор, да бидат главните негови рецензенти и критичари – нагласи Димитров.

Шефицата на бугарската дипломатија, Екатерина Захариева, денеска во интервју за „Бугарската национална телевизија“ (БНТ) изјави дека Софија нема намера да води нови преговори за текстот на договорот за добрососедство со Македонија, додавајќи дека текстот е финализиран.