Заев: Дали има мнозинство ќе се види на гласањето, но нема поткуп


Скопје, 9 октомври, 2018 - 12:34 (META) 

Не се нудат пари на пратениците за да гласаат за уставните измени, а најдобрата опција во моментот е Собранието, а не предвремени избори, порача премиерот Зоран Заев пред новинарите денеска.

Тој рече дека дали има двотретинско мнозинство за да се направат уставните измени ќе се види дури во процедурата во парламентот, но изрази оптимизам дека може да се постигне мнозинство. Сепак, Заев негираше дека има уцени и обиди за поткуп на пратениците.

– Може да верувам дека имаме двотретинско мнозинство, а може да верувам и да немаме, но тоа ќе да се види преку дебата во комисиите, на пленарната седница во Собранието и на крај на гласањето.Јас разговарав лично со пратениците и видовме дека има прогресивна маса која е доволно сериозен мотив. Овие денови парламентот се надевам ќе има дебата. Морам да ги отстранам шекулациите за пари и незгодни состојби, ова мора да е благопријатна состојба. Секој пратеник е еднакво важен – рече Заев.

Во одговор на новинарско прашање, тој повтори дека избори ќе има само ако не се постигне договор, бидејќи нема друг начин за обезбедување на двотретинско мнозинство за носење на уставните измени кои произлегуваат од Договор со Грција.


Тетовец креирал лажен „Фејсбук“ профил заради уцена


Тетово, 25 јуни, 2018 - 14:18 (META) 

Тетовец креирал лажен профил на „Фејсбук“ на женско лице од Тетово, објавил компромитирачка фотографија од неа, а потоа ја уценувал да стапи во интимен контакт со неа. Поради тоа, односно поради сторено кривично дело злоупотреба на лични податоци, СВР Тетово поднело кривчна пријава против 30-годишниот С.Т., кој делото го сторил во април годинава.


„Јадран филм“: Тозија нè уценуваше и бараше поткуп


Скопје, 2 февруари, 2018 - 14:09 (META) 

Хрватската куќа „Јадран филм“, продуцент на серијата „Македонија“, со која Горјан Тозија в.д. директорот на Агенцијата за филм, го раскина договорот набргу по неговото стапување на функција, го обвини Тозија дека ја уценувал и барал поткуп.

Според „Јадран филм“, тоа што на судењето по тужбата за незаконско раскинување на договорот Горјан Тозија не се појавил, а поканата за рочиштето се вратила во судот како неуредна, претставува свесно одолговлекување на постапката и негово индиректно признание на вината. Според продуцентската куќа, единствено Управниот одбор на Агенцијата за филм, а не в.д. директорот, можел да го раскине договорот.

Потегот на Тозија, според продуцентот, е предизвикан од одбивањето на предлогот на Тозија, кој барал поткуп и уценувал.

„Горјан Тозија предизвика штета од огромни размери злоупотребувајќи ја својата позиција за сопствени интереси. Дополнително тој од службените тела ја сокрил понудата со која Јадран филм нуди  гаранција на за секој денар вложен од Агенцијата за филм за серијата „Македонија“. Таа понуда и понатаму стои“, се вели во соопштението од продуцентот, кој вели дека сепак ќе ја сними серијата.

Тозија го раскина договорот со образложение дека иако за време на претходниот директор на Агенцијата за филм исплатила однапред 1,1 милиони евра за серијата, а до септември минатата година не ги доставила 14. епизоди.


Испраќал фотографии од поранешна девојка на нејзини блиски и ја истепал


Скопје, 17 ноември, 2017 - 13:53 (META) 

Скопјанка на возраст од 41 година вчера во полиција пријавила дека поранешното момче испратило нејзини интимни фотографии на нејзината ќерка и на нејзина пријателка, како и дека дошол на нејзиното работно место и ја удрил со тупаница.

Малтретираната жена случајот го пријавила вчера, иако, како што рекла в полиција, подолго време била жртва на гневот на напуштениот љубовник.

СВР Скопје го истражува случајот.

Како што стои во полицискиот билтен, Л.Е. пријавила дека откако во мај годинава ја раскинала тригодишната љубовна врска со скопјанецот З.П. (32), тој почнал да ѝ се заканува по телефон и да ги следи неа и ќерката, а потоа и ги извршил заканите, но жената не пријавила досега од страв.


Поради уцена притворен државниот секретар за транспорт на Романија


Букурешт, 14 ноември, 2017 - 10:08 (META) 

Обвинителите од Националната антикорупциска управа на Романија, вчера под обвинување за уцена го притворија Нинел Церцел, државен секретар во Министерството за транспорт на Романија.

Случајот на антикорупционерите е поврзан со  инцидент од 31 октомври годинава, кога во еден од вагоните на воз натоварен со амониум нитрат избил мал пожар, а Министерството за транспорт и националната компанија ЦФР Марфа не го третирале случајот како сериозен инцидент, велат обвинителите.

Следниот ден Церцел побарал од менаџерот на Центарот за транспорт за зоната Брашов да си даде оставка ако не сака да биде отпуштен, иако инцидентот со возот не се случил на територија под негова надлежност. Државниот секретар за транспорт на менаџерот му рекол и дека ако си даде оставка, нема да се поведе дисциплинска постапка против него, а ќе стане советник во Советот на општина Брашов и подоцна пак ќе добие работно место во компанијата ЦФР Марфа. Но, менаџерот не го прифатил тоа и пријавил.

Церцел сега е во 30-дневен притвор, а премиерот Михај Тудосе го разреши од функцијата.


Германската полиција испитува осомничен за оставање затруена храна во супермаркетите


Штутгарт, 30 септември, 2017 - 12:50 (META) 

Германската полиција испитува осомничен за оставање затруена бебешка храна во супермаркетите, со намера да изнуди 10 милиони евра за себе, јави „Дојче Веле“.

Кај Тибинген, јужно од Штутгарт, вчеравечер бил уапсен 55-годишен маж, по дојава од граѓани. Тој е во притвор, соопшти полицијата, која претходно објави фотографија од осомничениот трујач, направена со надзорна камера.

Сепак, полицијата апелираше потрошувачите и понатаму внимателно да ги разгледуваат пакувањата и безбедносните фолии на продуктите што сакаат да ги купат и да информираат ако најдат нешто сомнително.

Изнудувачот пред известно време преку електронско писмо испратено до полицијата се заканил дека ќе остава затруена храна во германските супермаркети ако не му бидат исплатени повеќе од 10 милиони евра. Во средината на месецов полицијата пронашла пет теглички храна за бебиња во кои бил ставен етилен гликол, безбојна течност без мирис кој се користи за производство на антифриз, кој при конзумација може да предизвика оштетувања на бубрезите и мозокот и да доведе до смрт. Тегличките биле најдени во супермаркет во Фридрихсхафен, јужна Германија, а на снимките од камерите полицијата видела маж како ги остава.

Уценувачот се закануваше дека ќе остава храна во супермаркети низ цела Германија. Полицијата досега добила 650 дојави, но до вчера ниедна не била потврдена.


Почна расправата за Законот за јазиците, ВМРО-ДПМНЕ обвини дека ДУИ го уценува СДСМ


Скопје, 14 септември, 2017 - 14:21 (META) 

На почетокот на расправата на пленарна седница во Собранието за предлог-законот за употреба на јазиците, пратеникот на ВМРО-ДПМНЕ, Илија Димовски, обвини дека со овој закон ДУИ го уценува СДСМ пред локалните избори закажани за 15 октомври.

– Законот за јазици се носи во пресрет на локалните избори и претставува политичка уцена од ДУИ кон СДСМ, со која треба да се покријат сите скандали, уцени и неостварени ветувања кон албанското население. Членовите на овој закон се неуставни и излегуваат од Рамковниот договор – рече Димовски на самиот почеток на расправата за законот за јазиците.

На ова му реплицираше Бранко Манојловски од ДУИ, кој рече дека проблемот не е јазикот туку проблем е националната омраза.

– Вие многу се борите со законот, а нема проблем со тоа. Јазикот мора да се реши, сакале вие или не. Исфрлете ја националната омраза и бидете луѓе за момент. Нема нестабилност на Македонија ако јазикот е проблем. Слаба е државата ако јазикот е проблем. Смирете се и мислите малку со глава и како луѓе, а не како Македонец или Албанец – вели Манојловски.

Петре Шилегов од СДСМ ја обвини опозицијата дека се обидува да добие политички поени со сензитивни теми и дека од предлог-законот прават „баба рога“.

– Се направи „баба рога“ од нешто што никој не го спомнува. Тоа беше тиранаската платофрма, сега е законот за јазиците, а утре ќе се најде нова тема со која ќе ги плашите граѓаните за уништување на нашата земја за да се ќари дневен политички поен. Секој што смета дека одредени законски решенија се спротивни на Уставот може да поведе постапка пред Уставен суд и сите ќе мора на тоа да се покориме. Никој не мора да учи јазик кој што не го сака. Никој нема да биде казнет ако не говори албански јазик – нагласи Шилегов.

Димовски обвини дека парламентарното мнозинство не сака да има дебата за овој закон и дека тоа е причината што законот има европско знаменце, на што реплицираше координаторот на пратеничката група на СДСМ, Томислав Тунтев, дека сè е предмет на јавна дебата затоа што се работи за едно од есенцијалните човекови права.

Пратениците ја користат паузата за ручек од еден час, а расправата ќе продолжи во 15 часот.


ВМРО-ДПМНЕ: СДСМ е уценета партија, а цената ќе ја плати Македонија


Скопје, 1 март, 2017 - 10:03 (META) 

„Прифаќањето на платформата од Тирана е класична уцена. СДСМ е уценета партија, но трагедијата е во тоа што цената на крајот ќе ја платат Република Македонија и македонскиот народ“, велат од ВМРО-ДПМНЕ во соопштение.

„Затоа ВМРО-ДПМНЕ му понуди на СДСМ да ја отфрлат уцената и платформата од Тирана и да се откаже од редефинирање на Република Македонија и од нејзино трансформирање од мултикултурна во бинационална држава. Во таков случај ВМРО-ДПМНЕ се обврза дека ќе го поддржи Заев и СДСМ да формираат влада, иако не беа поразени на изборите“, се вели во партиското соопштение.

Од ВМРО-ДПМНЕ додаваат дека СДСМ треба да ги отфрли заканите и уцените однадвор пред кои се наоѓа Македонија и дека секое редефинирање на државата не им е во прилог ниту на Албанците, ниту на Ромите, Босанците, Власите, Србите, Турците, а најмалку на Македонците.


Државниот обвинител на Албанија го обвини амбасадорот на САД во Тирана за уцена


Тирана, 2 февруари, 2017 - 14:42 (META) 

Државниот обвинител на Албанија, Адријатик Љаља, го обвини амбасадорот на САД во Тирана, Доналд Лу, за „недипломатски напади и уцени“.

Обвинението доаѓа откако Лу го обвини Љаља дека ги опструира реформите во правосудството, што е еден од условите за почеток на преговорите за влез на Албанија во ЕУ.

Љаља рече дека Лу „го нападнал на целосно недипломатски начин“ и дека „се служи со уцени, во обид да иницира истрага за згаснати меѓународни компании“.

Лу неодамна го обвини Љаља дека „јавно и гласно говори против реформи во правосудството“ и дека го крши уставот со „нетранспарентниот избор на членови на правосудниот совет“.

ЕУ бара од Албанија да спроведе реформи во правосудството, да ја искорени корупцијата и да обезбеди политичка независност на судиите и на обвинителите затоа што владините институции ги избираат членовите на правосудните тела.

Албанија во 2014 година стекна кандидатски статус за влез во ЕУ, а реформите на правосудството се еден од клучните услови за почеток на преговорите за членство.


Лица од дневен весник уценувале претставник на ДИК


Скопје, 1 декември, 2016 - 14:09 (META) 

Претставник на ДИК ноќеска, во 00.45 часот во СВР Битола во пријавил кривично дело уцена.

Како што соопшти МВР, претставникот на комисијата вчера во 16.33 часот, додека со уште две лица патувал кон Битола, поради надзор за печатење избирачки материјал, добил телефонски повик на својот службен мобилен телефон. Лицето што му се јавило и му се претставило дека е од дневен весник, го прашало зошто ја одбил понудата за печатење на кандидатските листи за пратеници за претстојните парламентарни избори во весникот.

„Пријавителот одговорил дека имал подобра понуда од друг дневен весник. При разговорот, пријавителот забележал дека разговара на интерфон, при што во разговорот се вклучило друго лице, кое се претставило како главен и одговорен уредник на дневниот весник. Истиот му рекол дека не смеел да биде против објавувањето на кандидатските листи, а воедно му се заканил со компромитирање на личноста, со објавување лаги и невистини во весникот доколку не се објават листите во нивниот весник. Лицето му упатувало и разни погрдни и навредливи зборови и истакнало дека доколку не му билe вратени 20.000 евра, претставникот на ДИК ќе бил даден на суд“, стои во соопштението од МВР.

Полицијата презема мерки за целосно расчистување на случајот.