!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Владата го усвои предлог-буџетот за 2018 година


Скопје, 9 ноември, 2017 - 23:05 (META) 

Владата на вечерашната седница го усвои предлог-буџетот на државата за 2018 година и донесе заклучок предлогот за буџетските трошоци за наредната година да го достави на дебата и усвојување во Собранието, соопшти владината прес-служба.

На седницата е усвоен и предлог-законот за извршување на буџетот за 2018 година. На предлог на Министерството за финансии Владата го разгледала и го усвоила и документот за фискалната стратегија на државата за периодот 2018-2020 година.

Според податоците што министерот за финансии, Драган Тевдовски ги презентираше пред јавноста, граѓанските организации и пред претставниците на стопанските комори, буџетот за 2018 година тежи 3,4 милијарди евра, а буџетскиот дефицит е планиран на 2,7 проценти од домашниот бруто-производ.

Најголеми реакции во јавноста и кај стручната фела предизвика планираното зголемување на акцизата за нафтата за три денари. Тевдовски го бранеше ваквото решение тврдејќи дека зголемувањето на акцизата нема да ја зголеми инфлацијата.

Министрите на вечерашната седница го усвоиле и предлог-законот за изменување на Законот за задолжителни нафтени резерви.

На седницата биле разгледани и предлог-измените на Законот за персоналниот данок на доход, според кои граѓаните веќе нема да имаат обврска да поднесуваат даночна пријава, односно тоа ќе го прави Управата за јавни приходи (УЈП), а граѓаните ќе треба само да ги потврдат или корегираат информациите во пријавата.


Владата на Бугарија го одобри договорот за добрососедство со Македонија


Софија, 26 јули, 2017 - 14:54 (META) 

Владата на Република Бугарија на денешната редовна седница го одобрила текстот на договорот за пријателство, добрососедство и за соработка со Република Македонија, соопшти прес-службата на бугарската влада.

– Потпишувањето на договорот за пријателство, добрососедство и за соработка со Република Македонија е израз на желбата на Бугарија да изгради модерни добрососедски односи засновани на европските вредности – изјавил бугарскиот премиер Бојко Борисов.

Според Борисов, посетата на премиерот на Македонија, Зоран Заев, на Софија и изразениот став кон заедничката историја е прв чекор во напорите за изградба на нов дух во односите со соседите.

– Европската Унија го оцени договорот како прв чекор и како нов почеток за развој на европската перспектива на Република Македонија – рече Борисов, кој додаде дека со потпишувањето на договорот ќе биде отворена нова страница во односите меѓу двете земји и ќе се воспостават пријателски односи.


Собранието ја продолжи кризната состојба до јуни 2017 година


Скопје, 13 октомври, 2016 - 15:44 (META) 

Собранието денеска го усвои предлогот на Владата и ја продолжи кризната состојба на јужната и на северната граница, поради мигрантската криза, до 30 јуни 2017 години.

Владата, како што беше наведено во предлогот за продолжување на кризната состојба, на 5 октомври го усвоила записникот на Управувачкиот комитет за координација и управување во системот за управување со кризи, во кој била наведена потребата ваквата состојба наместо до 31 декември годинава, да трае, односно да се продолжи до јуни следната година.

Продолжувањето на кризната состојба, според образложението, е за да се обезбеди „континуитет во вршењето на активностите од страна на силите на Армијата на Република Македонија (АРМ) и безбедносните сили на Министерството за внатрешни работи (МВР), во функција на обезбедување, заштита и чување на државната граница, како и врз основа на извештајот за направена процена и сеопфатна анализа“.

Кризната состојба поради мигрантската криза беше воведена кон крајот на август минатата година, кога десетици илјади мигранти од подрачјата зафатени со војни на Блискиот Исток и во Северна Африка транзитираа низ територијата на земјава на пат кон западноевропските земји.

Собранието на барање на Владата неколкупати го продолжуваше траењето на кризната состојба. Претходно ваква одлука беше досена на 18 март годинава, со која вонредната состојба на јужната и на северната граница беше предвидено да трае до 31 декември 2016 година. Со денешното гласање во Собранието, таа е продолжена уште за шест месеци.


Владата го усвои Законот за азил, на ред е Собранието


Скопје, 16 јуни, 2015 - 10:28 (META) 

На синоќешната седница, Владата ги усвоила предлог-измените на Законот за азиланти и привремена заштита, по итна постапка, изјави за „Мета“ портпаролот на Владата, Александар Ѓорѓиев.

Законот е испратен во Собрание и, како што информираат од Владата, ќе биде разгледуван на првата наредна седница, која ќе се одржи во текот на оваа или идната недела.

Извори од Собрание за „Мета“ велат дека седницата на која ќе се разгледуваат измените на Законот, кој ќе биде донесен по итна постапка, е закажана за понеделник следната недела.

На седницата, било формирано координативно тело – работна група, составена од министрите за внатрешни работи, за надоврешни работи, министерот за здравство, труд и социјална политика и за локална самоуправа.

Координативното тело кое ќе ја следи состојбата со мигрантите, уште денеска ќе го има својот прв состанок, а за деталите се очекува да информира во текот на денот.

Претставниците на министерствата во работната група, ќе заседаваат на дневна основа сè додека трае кризата со мигрантите.

Со предложните измени во Законот за азил и привремена заштита, „му се овозможува на странецот на граничен премин или во внатрешноста на територијата на Република Македонија пред полициски службеник на МВР да искаже намера дека ќе поднесе барање за признавање право на азил и да биде упатен во рок од 72 часа да поднесе барање за признавање право на азил пред овластено службено лице на Одделението за азил во просториите на Прифатниот центар за баратели на азил“.