Уставниот суд најави поништување и на гевгелискиот референдум против рудниците


Скопје, 9 ноември, 2018 - 16:06 (META) 

Уставниот суд на седницата одржана на 31 октомври донесе одлука за поведување на постапка за поништување на одлуката на Советот на општина Гевгелија за распишување на референдум за рудниците на Кожуф, информираат за „Мета“ од Уставниот суд, појаснувајќи дека одлуката допрва треба да биде објавена на официјалната веб-страница на Судот.

Оттаму напоменуваат дека во најскоро време ќе се одлучува по овој предмет и, судејќи според искуството со претходни предмети кои се однесуваат на одлуки на локалната самоуправа за отворање на рудници на нивна територија, и оваа одлука ќе биде поништена.

„Постапката е поведена на барање на подносителот ДПТС „Резервоар минералс Македонија“ ДООЕЛ Скопје кој доставил иницијатива за поведување постапка за оценување на уставноста и законитоста на Одлуката за распишување на референдум на локално ниво, донесена од Советот на општина Гевгелија“, вели портпаролката на Уставниот суд, Оливера Филиповска.

Образложението на иницијативата на „Резервоар минералс“ меѓу другото е дека, „минералните суровини како природно богатство претставуваат добра од општ интерес на републиката, без оглед на сопственоста на земјиштето, за нив одлучуваат органите на државната власт, а не органите на локалната самоуправа“.

На референдумот во Гевгелија, кој беше одржан на 23 април 2017 година мнозинството граѓани на Гевгелија се изјаснија против отворање на рудници на територија на општината, по што Советот на општина Гевгелија даде негативно мислење на барањето на „Резервоар минералс“  за продолжување на коцесионерскиот договор за истражување на металични минерални суровини на Кожуф.

„Резервоар минералс“, имаше концесија за детални геолошки истражувања на локалитетот Конско, но по референдумот тогашната Влада не им го продолжи концесискиот договор.

Уставниот суд, со истото образложение на 2 мај ја поништи и одлуката за распишување на референдум на Општина Валандово против рудникот Казандол.

Тогаш од Уставниот суд образложија дека одлуките за референдум се неуставни и незаконити, бидејќи прашањето на концесии не е од локално значење за да може локалната самоуправа да распишува референдум.

Министерот за економија, Крешник Бектеши во август годинава писмено ги информираше градоначалниците од општините во Југоисточна Македонија, каде се планира отворање на десетина нови рудници на метали дека „во законот за минерални суровини како и во законот за концесии и јавно приватно партнерство нема основ за едностран раскин на договорот за концесија од страна на концедентот односно Владата поради реализиран референдум или пак граѓанска иницијатива против започнувањето со експлоатација на веќе доделени концесии за експлоатација на минерални суровини“.

„Уставниот суд се стави на страна на оние кои планираат од Македонија да направат пустелија, да направат геноцид на над 500.000 граѓани“, обвинува активистот на „Спас за Гевгелија“, Ангел Наков.

За утре од 11.30 до 13 часот е планирана прва од најавените блокади на приодните патишта кон и од Струмица, во организација на еколошките здруженија од струмичкиот крај, кои се борат против отворање на рудникот за бакар и злато Иловица.


Уставниот суд ја отфрли иницијативата за оспорување на одлуката за референдум


Скопје, 19 септември, 2018 - 12:16 (META) 

Со 7 гласови „против“ и 2 „за“, Уставниот суд одлучи дека нема уставни пречки во постапката за распишување на референдумот за 30 септември.

Според мнозинството судии, не постои сомнеж за неуставноста и незаконитоста на референдумот.

„Судот не изрази сомнеж за неуставноста и незаконитоста на оспорената одлука“, официјално велат од судот,  објави „Макфакс“.

Иницијативата беше поднесена од „Левица“ и од Светски македонски конгрес. Подносителите сметаат дека одлуката за референдумот не е во согласност со Уставот на РМ, Законот за референдум и другите облици на непосредно изјаснување на граѓаните, како и со воспоставените европски стандарди и добри референдумски практики утврдени од страна на Венецијанската комисија. Тие побараа Уставниот суд целосно да ја поништи одлуката за референдум, а доколку одлуката ја донесе по референдумот, тогаш да ги поништи резултатите.


Уставните судии расправаат за уставноста и законитоста на референдумот


Скопје, 19 септември, 2018 - 10:59 (META) 

Уставниот суд ја почна седницата на која треба да се одлучува за уставноста и законитоста на Одлуката за распишување на референдум, донесена од Собранието на Република Македонија на 30 јули 2018 година.

На седницата присуствуваат претставници на политичката партија „Левица“ и од Светскиот македонски конгрес, кои се подносители на иницијативите, а судија известител е Елена Гошева која го образложува предметот.

Подносителите сметаат дека одлуката за референдумот не е во согласност со Уставот на РМ, Законот за референдум и другите облици на непосредно изјаснување на граѓаните, како и со воспоставените европски стандарди и добри референдумски практики утврдени од страна на Венецијанската комисија.

Тие бараат Уставниот суд целосно да ја поништи одлуката за референдум, а доколку одлуката ја донесе по референдумот, тогаш да ги поништи резултатите.

Гошева рече дека има услови судот да поведе постапка за оценување на уставноста на одлуката и да се донесе временска мерка за стопирање на активностите поврзани со референдумот. Како свои аргументи таа наведе неколку спорни елементи кои според неа се противуставни, меѓу кои дека прашањето е збунувачко, дека не може да се распише консултативен референдум за стапување во воени сојузи, дека граѓаните не може да се одлучат, на пример ДА за НАТО, НЕ за ЕУ или слично.

Уставниот судија Осман Кадриу смета дека одлуката не може да се каже дека е незаконска бидејќи е донесена со мнозинство гласови од законодавните органи. Тој додаде дека задолжителен референдум се одржува за членство во сојузи, излез од сојуз или промена на границите, но, како што рече тој, ЕУ не е сојуз, додека НАТО е политички и воен, но не и државен сојуз.

– Не се согласувам со поднесоците и го молам Уставниот суд да не продолжи кон оценка за уставноста на референдумот – рече во дел од своето излагање уставниот судија, Дарко Костадиновски.


Уставен суд ќе одлучува за референдумот


Скопје, 19 септември, 2018 - 9:56 (META) 

На денешната седница Уставниот суд треба да се произнесе за иницијативите за референдумот што ги поднесоа „Левица“ и  Светскиот македонски конгрес, со кои се бара поништување на одлуката за референдумот и времено да бидат стопирани активностите поврзани со него.

Подносителите сметаат дека одлуката за референдумот не е во согласност со Уставот, Законот за референдум и, како и со воспоставените европски стандарди и добри референдумски практики утврдени од страна на Венецијанската комисија. Бараат Уставниот суд целосно да ја поништи одлуката за референдум, а доколку одлуката ја донесе по референдумот, тогаш да ги поништи резултатите.

Судот може да ја прифати или отфрли иницијативата, или пак, да прогласи за ненадлежен. Известител е судијката Елена Гошева и, како што се дознава неофицијално, таа во рефератот предлага Уставниот суд да поведе постапка за преиспитување на уставноста на одлуката и воведување времени мерки, што значи прекинување на сите подготовки за спроведување на референдумот, активностите на ДИК, на Владата, на Собранието и целата кампања.

Министерот за надворешни работи Никола Димитров вчера порача оти е голема одговорноста во овој момент, кое било тело, дури и Уставниот суд клучот да го земе од рацете на граѓаните.

На прес-конференцијата со германскиот колега Хајко Мас, рече дека на ниво на аргументи има две тези. Првата е дека ни треба посебен задолжителен референдум за стапување во сојуз со други држави. Таа уставна одредба, како што појасни, се однесува кога се пренесува суверенитет.

– Точно е дека за членство во ЕУ ќе имаме една таква работа, но тоа нема да се случи утре, ќе поминат неколку години – нагласи Димитров.

Тој смета дека одредбата се однесува главно на стапување во сојуз со други држави во смисла на федерација или конфедерација. Вели дека за НАТО, која е меѓународна владина организација, таа одредба не е релевантна.


Уставен суд на 19 септември ќе одлучува за уставноста на одлуката за референдум


Скопје, 13 септември, 2018 - 16:09 (META) 

Судиите од Уставниот суд следната недела на 19 септември на закажаната седница со почеток од 9.30 часот ќе ги разгледуваат инцијативите за оценување на уставноста и законитоста на Одлуката за распишување на референдум донесена од Собранието на 30 јули оваа година.

Девет уставни судии треба да одлучат дали ќе поведат постапка за оценка на уставноста на Одлуката за референдум која ја изгласа Собранието, по што доколку биде прифатена, ќе оди на гласање.

Доколку Уставниот суд ги прифати иницијативите, може да ја поништи Одлуката за распишување на референдум веднаш или да донесе времена мерка до одлучување, со што се суспендираат сите поединечни дејствија и акти со цел, а заради спречување на штетните последици по Буџетот и даночните обврзници, правата и слободите и внатрешниот правен поредок на земјата.


Левица поднесе иницијатива за оценување на уставноста на одлуката за референдумот


Скопје, 8 август, 2018 - 13:36 (META) 

Политичката партија Левица денеска поднесе иницијатива за оценување на уставноста и законитоста на одлуката за распишување на референдум донесена од страна на Собранието на Република Македонија.

Одлуката, според паријата, по неколку точки не е во согласност со Уставот, Законот за референдум, како и со воспоставените европски стандарди и добри референдумски практики утврдени од страна на Венецијанската комисија.

Левица бара Уставниот суд целосно да ја поништи одлуката за референдум со ретроактивно правно дејство.

– Бидејќи во иницијативата се бара времена мерка, тоа значи дека иницираме итна постапка и очекуваме Уставниот суд веднаш по годишните одмори, а тоа значи пред референдумот да се произнесе. Во случај да не се произнесе можно е постфестум да ги поништи резултатите – рече Димитар Апасиев од Левица.

Апасиев вели дека одлуката на Собранието ги нема сите потребни седум елементи, меѓу кои образложение, а не е наведен ниту видот на референдумот. Референдумското прашање го нарече „прашање стапица“.

– Првата формална причина е тоа што одлуката ги нема сите седум задолжителни елементи што по Законот за референдум мора да ги има. Таа нема образложение и го нема целиот назив за актот по којшто се гласа, туку е даден само скратен назив на актот и исто така не е предвидено гласање на одделни гласачки ливчиња, онака како што тоа го бара законот – рече тој.

Левица, според него, ја побива оваа одлука бидејќи во неа исто така не е наведен видот на референдумот што е суштински елемент на одлуката.

– Не знаеме дали станува збор за претходен или за дополнителен референдум и не знаеме дали станува збор за факултативен или за задолжителен референдум. И оттука е невозможно да се оцени правната последица од успехот или неуспехот на референдумот што го повредува начелото на правна сигурност – рече Апасиев.

Третата причина поради која што Левица ја спори оваа одлука е референдумското прашање.

– Тоа е прашање стапица коешто е забрането и со нашиот закон и со европските стандарди односно и со Венецијанскиот кодекс на добри практики за референдуми – вели Апасиев. Според него, вака поставеното собраниско прашање има осум можни одговори, а законот дава можност само за два.

Левица ќе го бојкотира референдумот за името, но според нејзиниот претставник тие ќе побараат од ДИК да им биде овозможено да го набљудуваат изјаснувањето. Според Апасиев, вчера објавената анкета на МЦМС дека мнозинство граѓани ќе излеат на референдумот е лажна, а референдумот го поддржуваат само 14 отсто од граѓаните.


Обвинителството ги отфрли кривичните пријави на Тодор Петров против уставни судии


Скопје, 2 јули, 2018 - 15:54 (META) 

Основното јавно обвинителство (ОЈО) Скопје ги отфрлило кривичните пријави поднесени против судии од Уставниот суд од страна на Тодор Петров, претседател на Светскиот македонски конгрес (СМК). Петров ги товари судиите дека ја злоупотребиле службената положба и направиле самовластие со тоа што не постапиле по трите иницијативи што гој ги поднел, со кои барал поништување на законот за Специјалното јавно обвинителство, поништување на изборот на претседателот на Собранието Талат Џафери и поништување на Одлуката за стапување на Македонија во членство на Северноатланската Алијанса – НАТО.

„Надлежен јавен обвинител од Основното јавно обвинителство Скопје утврди дека нема основано сомнение дека осомничените ги сториле кривичните дела за кои беа пријавени, по што донесе Решение за отфрлање на кривичните пријави. Утврдено дека во Уставниот суд веднаш по приемот на иницијативите, а согласно на Деловникот за работа на Уставниот суд, се оформени предмети по кои во континуитет се преземани дејствија од судско-аналитички карактер, барани се податоци потребни за одлучување по предметот и вршено е споредбено истражување на нормативните решенија и  уставно судски одлуки. Проверена е и уставно-судската практика како елемент кој се зема предвид при одлучувањето на Уставниот суд“, соопштија од ОЈО Скопје.

Постапката по две иницијативи е во тек во Уставниот суд, додека за иницијативата за поништување на Одлуката за стапување на Република Македонија во членство на Северноатланската Алијанса – НАТО е одлучувано на седница на уставниот суд, при што е донесено Решение за неповедување на постапка за оценување на уставноста и законитоста.


Радев: Партнерството меѓу уставните судови на Бугарија и Македонија е во духот на Договорот за пријателство


Софија, 4 јуни, 2018 - 15:40 (META) 

Бугарскиот претседател Румен Радев денеска прими делегација на Уставниот суд на Република Македонија предводена од претседателот на судот, Никола Ивановски, соопшти прес службата на претседателот.

Според Радев, партнерството меѓу уставните судови на Бугарија и Македонија е важен чекор за развојот на билатералните односи во духот на Договорот за пријателство, добрососедство и соработка меѓу двете држави.

Бугарскиот претседател посочил дека со потпишување на Договорот за добрососедство Бугарија и Македонија на сите земји од регионот им дадоа пример како проблемите можат да се надминат во име на дијалогот и разбирањето, а соработката меѓу уставните судови на двете држави го дава својот придонес.

– Важно е да покажеме дека овој договор функционира и притоа ние да се водиме од неговиот дух. Уставниот суд е гарант за владеењето на законот, а тоа е меѓу најважните услови за членството во Европската Унија. Уставните судови можат корисно да соработуваат и да го разменуваат своето искуство – изјавил Радев.

Радев ја искористил можноста да ги повика и мултидисциплинарните комисии на двете држави, што се занимаваат со решавање на отворените прашања меѓу Бугарија и Македонија, да ја добијат неопходната поддршка во својата работа.

Претседателот на Уставниот суд на Македонија, Никола Ивановски, го запознал бугарскиот претседател со работата, компетенциите и надлежностите на Уставниот суд. Тој се заблагодарил за сестраната поддршка на Бугарија како претседател на Советот на ЕУ и особено во однос на евроатлантската перспектива на Македонија.


Заев и Иванов денеска ќе разговараат околу предлогот за нов гувернер на НБМ


Скопје, 7 мај, 2018 - 10:42 (META) 

На барање на премиерот Зоран Заев, денеска ќе се одржи втора средба со претседателот Ѓорге Иванов за усогласување на ставовите околу изборот на гувернер на Народната банка.

– Верувам дека по пат на кохабитацијата и дијалогот кој што го имаме ќе изнајдеме решение. Правото е апсолутно на претседателот да предложи, но правото е и на парламентарното мнозинство да избере гувернер. Оваа институција мора да ја држиме професионална. Разговараме за експертски решенија, не за партиски решенија, кои што и понатаму би ја чувале монетарната политика стабилна, затоа што и нас како Влада тоа ни е од голема важност за да можеме да ги креираме другите економски политики – изјави Заев одговарајќи на новинарски прашања.

Тој вели дека за предлогот на Иванов се информирал од медиумите.

– Како за предлозите за Уставен суд, така се случи и со предлогот за гувернер на НБРМ, се информиравме од медиумите – додаде Заев.

Од кабинетот на претседателот Иванов инфомираа дека претседателот, предлогот за гуврернер го доставил до Собранието на 27 април 2018 година.


Уставниот суд одлучи дека референдумот за „Казандол“ бил неуставен


Скопје, 2 мај, 2018 - 13:41 (META) 

Уставниот суд на денешната седница ги поништи одлуките за распишување референдум за рудникот „Казандол“ за експлоатација на минерални суровини, донесени од Советот на општина Валандово на 3 и 10 јули 2017 година.

Според Судот, одлуките за референдум се неуставни и незаконити, бидејќи прашањето на концесии не е од локално значење за да може локалната самоуправа да распишува референдум.

Подносител на иницијативата е поранешниот градоначалник на општина Валандово, Николче Чурлиновски.

Тој во јули минатата година го забрани референдумот за рудници во Валандово. Референдумот, кој беше на иницијативата „Спас за Валандово” по тримесесечни обиди за закажување, сепак се одржа на 20 август, но не успеа оти немаше доволна излезност.

На денешната седница беше поведена постапка за оценка на уставноста и законитоста на одлуката за распишување референдум на локално ниво, донесена од Советот на Општина Дојран, која се однесува „за“ или „против“ отворање рудници во нивната општина.