Поминаа 2/3 од патот за промени во Уставот


Скопје, 4 декември, 2018 - 13:22 (META) 

Владејачкото мнозинство до сега успеа да заврши две третини од фазите кои се потребни за да се постигне промената на Уставот со уставни амандмани согласно Договорот од Преспа помеѓу Македонија и Грција. Од вкупно 15 чекори, преостанаа уште 5. Во целокупниот процес, на предлагачот на измените, во овој случај на Владата, во два наврати и е потребно двотретинско мнозинство. Еднаш за да го отвори и еднаш за да го затвори Уставот, процедура која трае неколку месеци.

Пратениците на 19 октомври со двотретинско мнозинство од 80 пратеници донесоа одлука за пристапување кон измена на Уставот односно го отворија Уставот. Изминатите три дена Собранието со мнозинство гласови ги усвои нацрт-амандманите за измената на Уставот и од денеска тие се ставени на јавна дискусија која ја организира предлагчот – во случајов Владата.

Потоа ќе се поднесуваат амандмани на нацрт-амандманите за кои ќе се води претрес во две комисии – Законодавно правната и Комисијата за уставни прашања. Откако Собранието со апсолутно мнозинство од 61 пратеник ќе се изјасни за секој од амандманите на уставните амандмани, се закажува седница за измена на Уставот за која е потребно двотретинско мнозинство која е крајната фаза за изменет Устав.

Одлуката за измена на Уставот, односно за затворање на Уставот, треба да ја донесе Собранието со двотретинско мнозинство гласови од вкупниот број пратеници. Измената на Уставот ја прогласува Собранието. Ова се очекува да се случи до средината на јануари.


Изгласани сите нацрт-амандмани за промена на Уставот, следува јавна расправа


Скопје, 4 декември, 2018 - 9:47 (META) 

Пратениците во Собранието по тридневна расправа ги усвоија четирите нацрт-амандмани за промена на Уставот согласно Договорот од Преспа помеѓу Македонија и Грција.

Утре според најавите, би требало да почне јавната расправа за четирите нацрт амандмани за која се предвидени пет дена, по што Владата ќе треба да ги формулира предлозите за амандманите и да ги врати на усвојување.

На текстот на предлогот на амандманите на Уставот, предлагачот, секој пратеник, работно тело и Владата кога не е предлагач, можат да поднесат амандмани најдоцна осум дена пред седницата на Собранието на која ќе се усвојуваат амандманите на Уставот.

Премиерот Заев вчера од Загреб изрази уверување дека процесот во Парламентот ќе заврши успешно што ќе овозможи брзо членство на Македонија во НАТО и почеток на пристапните преговори со ЕУ.

– Верувам дека до крајот на јануари, Парламентот ќе даде поддршка на Договорот со Грција по што ќе следува и поддршката на Договорот и од страна на Грција, како и на Протоколот за членство на Македонија во НАТО. Веруваме дека Хрватска ќе биде една од првите земји што ќе го потпише Протоколот за членство на Македонија во НАТо и дека Македонија ќе биде 30-тата земја членка на НАТО, рекол Заев на средбата со неговиот хрватски колега Андреј Пленковиќ.


Изгласани два нацрт-амандмани за промена на Уставот, денеска продолжува расправата


Скопје, 3 декември, 2018 - 9:43 (META) 

Во Собранието на Република Македонија денеска продолжува расправата по двата преостанати нацрт-амандмани за уставните измени, согласно Договорот од Преспа.

Синоќа пратениците со 65 гласа „за“, 18 „против“ и 8 воздржани го усвоија нацрт-амандманот со кој одлуките на АСНОМ се заменуваат со Прогласот од АСНОМ и се вметнува Охридскиот рамковен договор. Претходно, пратениците со 67 гласа „за“ го усвоија и нацрт-амандман, со кој се предвидува менување на името Република Македонија со Република Северна Македонија.

Воздржано гласаа осумтемина пратеници од опозицијата кои го поддржаа отворањето на Уставот, условувајќи со процесот на простување и помирување.

Во третиот нацрт-амандман кој се однесува на гаранциите на суверенитетот и територијалниот интегритет на соседните земји, ќе стои „Републиката го почитува суверенитетот, територијалниот интегритет и политичката независност на соседните држави”, а четвртиот и последен се однесува на иселениците и во него Републиката да ги штити правата и интересите на своите државјани кои живеат или престојуваат во странство и ги унапредува нивните врски со татковината, a оти притоа нема да се меша во суверените права на други држави и во нивните внатрешни работи.

По изгласувањето на нацрт – амандманите, Владата како предлагач на измените треба да организира јавна расправа.


Комисијата за уставни измени ги усвои сите нацрт-амандмани за промена на Уставот


Скопје, 12 ноември, 2018 - 9:43 (META) 

Комисијата за уставни прашања викендов го усвои и четвртиот нацрт амандман со што заврши расправата по нацрт-амандманите на Уставот согласно Договорот од Преспа, помеѓу Македонија и Грција. Пленарната седница на која ќе се разгледуваат нацрт-амандните е закажана за 1 декември 2018 година.

Расправата по амандманите во Комисијата почна на 7 ноември и беше предвидено да трае 12 дена, односно по три дена за секој од предложените амандмани.

Со првиот амандман се предлага замена на зборот Република Македонија со Република Северна Македонија секаде во Уставот, освен во член 36 каде има историски аспект, со вториот во Преамбулата на највисокиот правен акт одлуките на АСНОМ се заменуваат со Прогласот од АСНОМ и се додава Охридскиот рамковен договор, со третиот се додава нов став со кој се декларира почитување на суверенитетот, територијалниот интегритет и политичка независниот на соседните држави, додека со четвртиот амандман се предлага покрај потврдување на македонскиот идентитет, да стои дека Републиката ги штити правата и интересите на своите државјани кои живеат или престојуваат во странство и ги унапредува нивните врски со татковината.

Утврдувањето на нацрт амандманите на Уставот од страна на Собранието е втора фаза од постапката за измена на Уставот. Нацрт амандманите се утврдуваат со просто мнозинство или 61 глас, по што тие одат на јавна расправа.

Конечната одлука за усвојување на амандманите се носи со двотретинско мнозинство или најмалку 80 гласа. За амандманот на Преамбулата на Уставот освен двотретинско, е потребно и Бадентерово мнозинство.


Првиот амандман помина на Комисијата за уставни прашања со 10 гласа „за“


Скопје, 8 ноември, 2018 - 13:06 (META) 

Заврши расправата за првиот од предложените амандмани за промена на Уставот. Членовите на Комисијата за уставни прашања со 10 гласа „за“ и 5 „против“ го изгласаа амандманот 33.

Овој амандман гласи: Во Уставот зборовите „Република Македонија“ се заменуваат со зборовите „Република Северна Македонија“, а зборот „Македонија“ се заменува со зборовите „Северна Македонија“, освен во член 36.

Во продолжение на комисиската седница, премиерот Зоран Заев го образложи следниот, 34-ти, амандман за кого сега ќе се расправа.

Инаку, расправата предвидена за еден амандман може да трае најмногу три дена. Комисијата за уставни прашања вчера ги започна седниците за амандманите.

Координаторот на пратеничката група на ВМРО-ДПМНЕ, Никола Мицевски, предложи посебен амандман за заштита ако не помине договорот во Грција.

Тој рече дека иако Владата најавила дека тоа ќе биде содржано во уставниот закон, сепак треба да се вметне и во нацрт-амандманите. Мицевски образложи дека потребата за посебниот амандман доаѓа поради опасноста Македонија да биде државата која решила да се самоукине, ако Грција не го ратификува договорот или од кои било причини процесот не успее.

Мицевски апелираше до сите пратеници да размислат бидејќи по завршување на уставните измени Република Македонија немало повеќе да постои.


Бошњаковски: Химната нема да се менува, АСНОМ ќе остане во преамбулата на Уставот


Скопје, 7 ноември, 2018 - 13:38 (META) 

АСНОМ останува во преамбулата на Уставот, и наместо еднаш ќе биде спомнат двапати. Останува Прогласот на АСНОМ со сите донесени одлуки, рече денеска на прес-конференција владиниот портпарол Миле Бошњаковски, оценувајќи ги како неточни информациите што се шират по социјалните мрежи.

Одговарајќи на новинарски прашања, Бошњаковски нагласи дека во однос на амандманот 35, измените кои ќе бидат направени во член 3 се гаранција дека границите на Република Македонија се трајни и непроменливи.

Тој потенцираше дека по ниеден основ нема да се чепка државната химна, ниту ќе се вршат интервенции во нејзиниот текст.

Владата во моментов воопшто не разговара за какви било кадровски промени. Фокусирана е на реформскиот процес и на имплементацијата на Преспанскиот договор, на членство во ЕУ и НАТО, рече владиниот портпарол Мухамед Хоџа.

Бошњаковски соопшти дека до 2023 година треба да биде отворен граничниот премин „Маркова нога“ меѓу Македонија и Грција, а целиот проект, вклучувајќи ги сите неопходни инфраструктурни активности, се проценува дека ќе чини 4,6 милиони евра.

Според него, допрва ќе се прецизира како ќе работи овој граничен премин, дали исто како останатите, но извесно е дека ќе располага со потребната инфраструктура.

– Средствата за граничниот премин ќе бидат обезбедени преку билатералната програма за прекугранична соработка 2014-2020 година – рече Бошњаковски.


Комисиската расправа за нацрт-амандманите на Уставот почнува денеска


Скопје, 7 ноември, 2018 - 10:21 (META) 

Собраниската Комисија за уставни прашања денеска ќе ја започне расправата за четирите нацрт-амандмани на Уставот што ги достави Владата согласно Договорот од Преспа, со што започнува втората фаза од постапката за уставни измени. Расправата може максимум да трае 12 дена односно по три дена за секој амандман. Пленарната седница на која ќе се разгледуваат нацрт-амандманите, претседателот на Собранието Талат Џафери ја закажа за 1 декември.

Нацрт амандманите се утврдуваат со просто мнозинство или 61 глас, за разлика од последната фаза за усвојување на амандманите, за што повторно ќе биде потребно двотретинско мнозинство или поддршка од најмалку 80 пратеници.

Премиерот Зоран Заев во петокот на прес-конференцијата во Владата соопшти дека четирите амандмани се едноставни, немаат ништо спорно и се во согласност со меѓународните стандарди и заслужуваат поддршка од сите пратеници во име на интеграцијата во ЕУ и во НАТО.

Првиот амандман се однесува на замената на зборовите Република Македонија со Република Северна Македонија, согласно Преспанскиот договор. Вториот амандман е за преамбулата на Уставот, каде одлуките на АСНОМ се заменуваат со Прогласот од Првото заседание на АСНОМ и се додава Охридскиот рамковен договор. Во третиот амандман се додава дека „земјата го почитува суверенитетот, територијалниот интегритет и политичката независност на соседните држави“. Со четвртиот амандман се укажува на тоа дека државата ги штити правата и интересите на своите државјани кои живеат или престојуваат во странство и ги унапредува нивните врски со татковината.


На 1 декември пленарна седница за нацрт-амандманите за промена на Уставот


Скопје, 2 ноември, 2018 - 14:31 (META) 

Седницата за нацрт-амандманите за промена на Уставот согласно Договорот од Преспа, кои Владата ги објави денеска, ќе се одржи на 1 декември.

В среда, пак, на 7 ноември, нацрт-амандманите ќе се најдат пред пратениците на Комисијата за уставни прашања. Според Деловникот, претресот во матичните комисии може да трае најмногу три работни дена по текстот на нацртот на секој амандман одделно.

Собранието на пленарна седница со апсолутно мнозинство гласови од вкупниот број пратеници, односно со 61, го утврдува нацртот на секој амандман на Уставот одделно.

Потоа следува јавна дискусија за нацрт-амандманите, по што се поднесуваат амандмани на нацрт-амандманите за кои ќе се води претрес исто така во две комисии. Откако Собранието со апсолутно мнозинство од 61 пратеник ќе се изјасни за секој од амандманите на уставните амандмани, се закажува седница за измена на Уставот за која е потребно двотретинско мнозинство која е крајната фаза за изменет Устав.


Канческа – Милевска: Власта ги прифати нашите предлози за амандманите


Скопје, 2 ноември, 2018 - 12:24 (META) 

Власта ги прифати нашите барања за нацрт-амандманите за измена на уставот. Баравме амандман со кој ќе се гарантира македонскиот идентитет во Уставот, со обврска на републиката да го штити културното и историското наследство на македонскиот народ. Второто наше барање е доколку Грција не го ратификува Договорот и повторно блокира, да има поништување на сите уставни амандмани, рече Координаторката на независната пратеничка група на ВМРО-ДПМНЕ, Елизабета Канческа – Милевска.

Таа порача дека за Македонија може многу да се направи само со „соработка, позитивна енергија и позитивна мисла, ни треба обединување“, а за собраниското тело помирување, поранешната министерка за култура појасни дека до претседателот на Собранието е поднесена иницијатива за негово формирање.

– Се надевам в понеделник ќе имаме координација во оваа насока и ќе заземеме став како ќе се води и која ќе биде методологијата. Сериозно е ова тело и сериозно треба да се пристапи и сите да се вклучиме со цел да одиме во насока на помирување и во насока на зацврстување на односите. Очекувам дека ќе земат учество во телото и пратениците на ВМРО-ДПМНЕ и коалицијата – изјави таа.

Првиот нацрт амандман, предложен од независните пратеници кои во Собранието влегоа како членови на ВМРО-ДПМНЕ, ќе биде вграден во членот 49 од Уставот и ќе гласи: Република Македонија ќе го штити, гарантира и негува историското и културното наследство на македонскиот народ, појасни Канческа – Милевска.

– Второто наше барање беше прифаќање одредба на Уставот со која ќе се гарантира дека доколку Грција не го ратификува договорот и ги попречи интеграциите ќе има безуслсовно поништување на сите прифатени уставни амандмани кои произлегуваат од договорот од Преспа. За мене е ова многу важно и нашето барање е прифатено – рече таа.


Заев: Уставот ќе се менува со четири амандмани, во нив е и Охридскиот договор


Скопје, 2 ноември, 2018 - 11:50 (META) 

Владата низ инклузивен и транспарентен процес изготви текст за четири нацрт-амандмани за промена на Уставот согласно Договорот од Преспа, информираше премиерот Зоран Заев на прес-конференција во Владата.

-Првиот амандман ќе биде замена на името Македонија со Северна Македонија во целиот Устав, освен во членот 36 каде има историски аспект. Вториот се однесува на Преамбулата на Уставот, каде одлуките на АСНОМ се заменуваат со прогласот од Првото заседание на АСНОМ и се додава Охридскиот рамковен договор за да биде конститутивен елемент на државата. Во третиот амандман се додава само еден став, а тоа е Републиката го почитува суверенитетот, територијалниот интегриет и политичката независност на соседните држави, што дава посилни гаранции за трајност и неповредливост на границите со Грција, иако се однесува за сите соседи. Во четрвтиот амандман покрај потврдување на македонскиот идентитет стои дека Републиката ги штити правата и интересите на своите државјани кои живеат или престојуваат во странство, и ги унапредува нивните врски со татковината – рече Заев.

На новинарско прашање зошто ја променил одлуката Охридскиот рамковен договор да биде дел од Уставот, премиерот рече дека низ дебата со пратениците одлучиле кога веќе се отвора Уставот, да се додаде и тој важен документ, кој и онака е веќе вграден во Уставот.

– Охридскиот рамковен договор и до сега бил целосно вграден во Уставот, а аргументацијата што беше дадена во дебата со пратениците и во Владата беше дека коа се отвора веќе Уставот редот е да биде вграден и насловот на Рамковниот договор како конститутивен елемент затоа што тој е дел од нашиот Устав и затоа пресековме дека треба да остане – рече Заев.

На прашањето што беше спорно со АСНОМ за да се менува тоа во Уставот, Заев вели дека сега Уставот ќе се осврнува на прогласот на АСНОМ, наместо на одлуките на АСНОМ затоа што, ако не се направи промената, тоа би предизвикало одредени проблеми во одредени можни идни времиња на соработка помеѓу Македонија и Грција.

– Тоа е така затоа што дел од одлуките на АСНОМ велат „Македонци од Грција и Бугарија обединете се“. Тоа не е пријателство. Прогласот го нема тој дел и се осврнуваме на него затоа што збори за единството во државата, за демократијата за државотворноста, за слободата и човековите права и тоа е фер пристап за градење пријателство – смета Заев.

Премиерот рече дека стручната академска јавност оценила дека нацрт-амандманите се во согласност со меѓународното право, додаде дека целосниот текст ќе биде објавен и апелираше да продолжи процесот на инклузивен дијалог.