ВМРО-ДПМНЕ поднесе иницијатива до Уставен суд за Законот за јазици


Скопје, 21 јануари, 2019 - 15:08 (META) 

ВМРО-ДПМНЕ поднесе иницијатива до Уставниот суд за оцена на уставноста на Законот за јазици, откако минатата недела иницијатива поднесе и професорот Јове Кекеновски. Според партијата, Законот е донесен на насилнички начин од страна на власта, со газење на Уставот, законите и процедурите за донесување и објавување на законите.

Генералниот секретар на ВМРО-ДПМНЕ, Игор Јанушев вели дека Указот за прогласување на законот за двојазичност е објавен само со потпис на Талат Џафери и без потпис на претседателот на државата – Ѓорѓе Иванов, што, како што рече, е во целосна спротивност на Член 75 од Уставот, кој предвидува указите за прогласување на законите задолжително да се потпишуваат од Претседателот на Република Македонија.

– На указот на Законот за двојазичност стои единствено потписот на Талат Џафери, кој се потпишал во име на претседателот на држава – иако на претседателот на државата, ниту му престанала функцијата, ниту бил спречен да ја врши, што е уште една незаконитост спротивна на Член 82 од Уставот. Тоа значи дека во конкретниов случај не е исполнет ниту еден од условите указот да биде потпишан од Џафери во име на претседателот на државата – изјави Јанушев.

Тој додаде дека Законот за двојазичност е во целосна спротивност со амандманот 5 од Уставот на Република Македонија, кој вели дека „На целата територија на Република Македонија и во нејзините меѓународни односи, службен јазик е македонскиот јазик и неговото кирилско писмо.“

– Со Законот за двојазичност – македонскиот јазик се изедначува со секој друг јазик кој го зборуваат 20 отсто од граѓаните на Република Македонија и со тоа македонскиот јазик од кохезивен фактор во општеството се претвора во еден од двата службени јазици, што е незаконски и противуставно. Дополнително власта врши прекршување и при носењето на законот, бидејќи Законот за двојазичност е закон кој уредува и прашања за употреба на јазикот во судските постапки и органите на државната управа и општините, кои според Член 98 и Член 119 од Уставот се носат со двотретинско мнозинство – рече Јанушев.

ВМРО-ДПМНЕ бара од Уставниот суд донесување на времена мерка – запирање на извршувањето на поединечните акти или дејствија што се преземаат врз основа на Законот за двојазичност и Указот за прогласување на истиот.

– Апелираме до Уставниот суд да одлучува со најголема итност, почитувајќи ги Уставот и воспоставените практики од минатото и да донесе одлука со која ќе се укине Законот за двојазичност – рече Јанушев.


Влада: Иванов ја злоупотреби функцијата за да ја блокира демократијата


Скопје, 15 јануари, 2019 - 15:03 (META) 

Владата порача дека ја поддржува одлуката Законот за јазиците и Законот за ратификацијата на Преспанскиот договор да бидат објавени во Службен весник со потпис на претседателот на Собранието, Талат Џафери, имајќи го, како што се вели, „предвид прекршувањето на Уставот од страна на претседателот Ѓорге Иванов“.

„Донесувањето на Законот за употреба на јазиците и Законот за ратификација е во целосна надлежност на Собранието на Република Македонија. Иванов беше должен да го потпише указот за прогласување на двата закони, а кога тој одлучува да го крши Уставот, неопходно е да се преземат мерки кои се во согласност со Уставот за да продолжи да функционира парламентарната демократија“, порача Владата.

Во соопштението се вели дека според член 51, став 2 од Уставот, секој е должен да ги почитува Уставот и законите, па и претседателот на државата.

„Претседателот на државата е должен да го потпише указот за прогласување на законите што ги носи Собранието, доколку тие по втор пат се донесат со потребното мнозинство во законодавниот дом, односно Собранието. И двата закона, Законот за употребата на јазиците во Република Македонија и Законот за ратификација на Договорот од Преспа, се усвоени по втор пат со потребното мнозинство во Собранието на Република Македонија. Законот за употреба на јазиците во март оваа година, а Законот за ратификација на Договорот од Преспа на 5 јули, исто така оваа година. Согласно уставните одредби, а поради неизвршување на обврските на претседателот на државата, на претседателот на Собранието на Република Македонија единствено што му преостана е да ја исполни должноста што произлегува од Членот 52 од Уставот, согласно кој  законите што по втор пат се донесени со потребното мнозинство во законодавниот дом треба да бидат објавени во „Службен весник на РМ“, 7 дена по нивото донесување“, се вели во соопштението.

Проблемот го направил Иванов со тоа што ја злоупотребил положбата и се заканувал да го блокира функционирањето на демократијата, обвинува владата.

„Владата смета дека со оваа постапка претседателот на Собранието ј запре тенденцијата една церемонијална постапка на Претседателот на државата да се претвори во преседан кој се закануваше да го блокира функционирањето на системот и тоа со кршење на Уставот“, се вели во владиното соопштение, во кое се порачува дека претседателот на државата, не е законодавно тело.


Груби: ВМРО-ДПМНЕ први да постават двојазична табла на своето седиште


Скопје, 15 јануари, 2019 - 12:53 (META) 

Пратеникот на ДУИ и претседател на собраниската Комисија за европски прашања, Артан Груби, на прес-конференција во Собранието порача дека Законот за јазиците денеска стапува на сила и дека ВМРО-ДПМНЕ треба да се надмине себеси и да биде првиот фактор што ќе постави двојазична табла.

Тој рече дека институциите веднаш треба да се придружуваат до законските одредби и да ги применат. Нагласи дека, за разлика од претходното законско решение, новото предвидува формирање на Инспекторат што ќе ја контролира примената на Законот.

-Сите институции во земјава мора да го почитуваат Законот. Нелегитимниот претседател во заминување има уште два месеци во неговата канцеларија. Прочитајте ги законите, Уставот и Деловникот. Објавата на Законот за јазиците во „Службен весник“ е според законот. Да појаснам тој има законска обврска да го потпише само прогласот на законот, додека самиот закон се потпишува од претседателот на Собранието. Објавата на законот заедно со законот за ратификација на договор со Грција е целосно согласно законите. Сметаме дека Иванов и ВМРО-ДПМНЕ треба да се надминат и да бидат први кои ќе напишат ВМРО-ДПМНЕ пред нивното седиште и на албански јазик – рече Груби.

Претседателот Иванов пак во писмена изјава денеска порача дека постапката да се објават двата закона е основа за кривично гонење.

„Со доставувањето на овие два закона во Службен весник е прекршен член 75 од Уставот на Република Македонија, додека објавувањето на законите е направено незаконски и претставува основа за кривично гонење“, стои во обраќањето.

Шефот на државата вели дека сега на потег се Уставниот суд, Обвинителството и судот.


Иванов: Законот за јазиците и ратификацијата се објавени противуставно


Скопје, 15 јануари, 2019 - 12:38 (META) 

Објавувањето на Законот за употреба на јазиците и на Законот за ратификација на спогодбата од Преспа во Службен весник без потпис на указ од Претседателот на Република Македонија се противуставни, порача претседателот на државата, Ѓорге Иванов во писмено обраќање.

Тој вели дека постапката да се објават двата закона е основа за кривично гонење.

„Со доставувањето на овие два закона во Службен весник е прекршен член 75 од Уставот на Република Македонија, додека објавувањето на законите е направено незаконски и претставува основа за кривично гонење“, стои во обраќањето.

Претседателот Иванов вели дека сега на потег се Уставниот суд, Обвинителството и судот.

„Ова е момент кој ќе покаже дали во Република Македонија постои Уставен суд, дали функционира обвинителството, дали има независно судство и дали постои владеење на правото“, вели Иванов.

Шефот на државата, исто така, во завиена форма се обраќа и до претставниците на меѓународната заедница, порачувајќи дека поддржувањето на ваков преседан би нанело штета на правото и правната држава.

„Се прашувам, дали високите претставници на меѓународната заедница, кои ја поддржуваат оваа владина коалиција, ќе се јават и ќе го поддржат овој начин на донесување на закони? Дали ќе ги поддржат овие преседани, што носат несогледливи последици и штета по правото и правната држава и дали вакви преседани применуваат во сопствените држави?“, стои во дописот до медиумите.


Новите амандмани на Уставот објавени во „Службен весник“


Скопје, 14 јануари, 2019 - 16:08 (META) 

Амандманите од 33 до 36, заедно со Уставниот закон за нивно прогласување, коишто со 81 глас „за“, беа усвоени на 75-тата седница на Собранието во петокот, се објавени во 6-от број на „Службен весник“ во оваа година, односно на 12 јануари 2019 година.

Со овие измени на Уставот, името на земјава по стапувањето на сила на Преспанскиот договор ќе биде Република Северна Македонија. Преспанскиот договор ќе стане официјален откако ќе биде ратификуван во Парламентот на Грција.

 


Заев: Ова беше татковинска акција, донесовме голема, одговорна и историска одлука


Скопје, 12 јануари, 2019 - 13:26 (META) 

Премиерот Зоран Заев, во денешното пладневно обраќање, на еден ден по гласањето во Парламентот за измените на уставот во врска со Договорот со Грција, им се заблагодари на пратениците за големата и одговорна одлука и на сите за, како што рече, оваа „татковинска акција“.

Тој вели дека оваа одлука ќе значи дека кон НАТО и ЕУ, Северна Македонија ќе пристапи како полноправна членки, а земјата ќе биде и економски силна.

– Одлуката во Парламентот е одлука против изолација, несигурност и сиромаштија, одлука што им дава сила на младите да бидат рамо до рамо со европските врсници – рече Заев.

Тој очекува Договорот да биде ратификуван и од грчкиот Парламент, а потоа Грција да го потпише протоколот за пристапување кон НАТО, за да бидеме 30 членка на Алијансата.

– Ја подготвивме почвата и засадивме семе, но секој знае дека тоа е само чекор до плодна жетва и резултати – вели Заев.

Премиерот побара од опозицијата постојано да ја потсетуваат власта на своите одговорности, но и опозицијата да биде одговорна.

Што се однесува до повикот на лидерот на ВМРО-ДПМНЕ за предвремени избори, Заев не ја отфрли идејата, но рече дека тоа прашање ќе се отвори на партиските тела и за тоа ќе се разговара, па ќе ја извести јавноста.

Заев обраќањето го заврши со зборовите „Да живее Македонија, да живее Република Северна Македонија“.


Мицкоски побара вонредни парламентарни избори заедно со претседателските


Скопје, 11 јануари, 2019 - 20:43 (META) 

Во првата изјава по усвојувањето на измените на Уставот во Собранието со 81 глас „за“, лидерот на опозициската ВМРО-ДПМНЕ, Христијан Мицкоски, побара распуштање на Собранието и одржување на вонредни парламентарни избори заедно со претседателските избори.

Мицкоски рече дека не ја поддржува промената на Уставот за промена на уставното име и дека со договорот од Преспа се нанесува огромна штета и неправда.

– ВМРО-ДПМНЕ бара веднаш распуштање на парламентот и одржување на вонредни парламентарни избори заедно со претседателските избори, според законските прописи, и врз основа на минатото искуство, и на овие избори ВМРО-ДПМНЕ ќе победи – рече Мицкоски.


Кирацовски тврди дека има минимум 80 пратеници кои ќе гласаат за уставни измени


Скопје, 9 јануари, 2019 - 12:48 (META) 

Генералниот секретар на СДСМ и пратеник Александар Кирацовски денеска на прес-конференција во Собранието информираше дека власта обезбедила поддршка од минимум 80 пратеници за усвојување на уставните измени.

–Со иницирање на уставните измени, Македонија станува дел од ЕУ и НАТО. Често ме прашуваат дали обезбедивте двотретинско мнозинство. Јас таа фраза, обезбедени пратеници, не сакам да ја користам, туку имам информации дека минимум 80 пратеници, впрочем и нешто над 80 пратеници, се уверија дека иднината на Македонија е единствено во НАТО и ЕУ. А, тоа е условено со Преспанскиот договор и уставните измени, што треба да се случат најдоцна до петок неделава- рече Кирацовски.

Седницата на која ќе се расправа за уставните измени се очекува да почне во 16 часот, без учество на ВМРО-ДПМНЕ.


Почнува финалната фаза од собраниската процедура за уставните измени


Скопје, 9 јануари, 2019 - 9:51 (META) 

Собранието денеска напладне на 75 пленарна седница ќе ја почне расправата за утврдување на предлог-амандманите од Уставот со што треба да се заокружи процесот за спроведување на Договорот од Преспа помеѓу Македонија и Грција за решавање на спорот за името.

На седницата пратениците ќе го гласаат и Уставниот закон за спроведување на амандманите за измена на Уставот.

Амандманите за измена на Уставот се донесуваат со двотретинско мнозинство гласови од вкупниот број пратеници.

Oдредбите што се однесуваат на правата на припадниците на заедниците, Собранието ги донесува со двотретинско мнозинство гласови од вкупниот број пратеници во кое мора да има мнозинство гласови од вкупниот број пратеници кои припаѓаат на заедниците што не се мнозинство во Република Македонија.

По прогласувањето на амандманите на Уставот, започнува постапката за донесување на уставен закон за спроведување на Уставот.

Уставниот закон се донесува со двотретинско мнозинство гласови од вкупниот број пратеници. По донесувањето на уставниот закон Собранието донесува одлука за прогласување на уставниот закон со двотретинско мнозинство гласови од вкупниот број пратеници.

Со првиот амандман се предвидува во Уставот зборовите „Република Македонија“ да се заменат со зборовите „Република Северна Македонија“, а зборот „Македонија“ се заменува со зборовите „Северна Македонија“, освен во членот 36, кој има историски апсект и се однесува на „посебните социјални права на борците од Антифашистичката војна и од сите националноослободителни војни на Македонија”.

Со вториот амандман во Преамбулата на Уставот па зборовите „одлуките на АСНОМ“ се заменуваат со зборовите „Прогласот од Првото заседание на АСНОМ“ и се додава Охридскиот рамковен договор.

Во третиот амандман се наведува дека „Републиката го почитува суверенитетот, територијалниот интегритет и политичката независност на соседните држави“, а четвртиот се однесува на иселениците и во него се предвидува републиката да ги штити правата и интересите на своите државјани кои живеат или престојуваат во странство и ги унапредува нивните врски со татковината, a оти притоа нема да се меша во суверените права на други држави и во нивните внатрешни работи.


Преамбулата ќе се измени, Заев и Села се договориле за поддршка на уставните измени


Скопје, 8 јануари, 2019 - 17:05 (META) 

По денешната средба во скопскиот хотел „Холидеј Ин“ со премиерот и претседател на СДСМ, Зоран Заев, лидерот на Алијанса за Албанците (АА), Зијадин Села порача дека со Заев постигнале договор пратениците од оваа партија да гласаат за измената на Уставот.

Тој ече дека на инсистирање на Алијансата, во преамбулата на Уставот ќе се отстрани подвојувањето на граѓаните.

– Средбата беше во духот на договор и компромис. Зборувавме околу барањата кои ги има Алијансата за Албанците. Јас со задоволство можам да тврдам денеска, и се надевам дека така ќе биде и наредните денови и со гласањето во Собранието, дека од денеска нема да имаме две категории на граѓаните, како што беше досега. Значи, не „граѓани, како и другите“, туку ќе има само граѓани и ќе продолжува со македонскиот народ, дел од албанскиот народ, турскиот народ и т.н. Ова го кажувам со задоволство дека како партија дадовме придонес сите граѓани да бидат попретставени и повеќе да се чувствуваат рамноправни со сите други граѓани. Стоиме како АА на ставот дека Македонија треба да биде членка на НАТО и ЕУ. Од друга страна, има и работи во кои во принцип се согласуваме, но треба да се бараат начини како тоа да се изведе. Ние како Алијанса за Албанците нема да кренеме раце од нашето барање за албанскиот јазик да биде дефиниран како албански јазик, а не како „друг јазик“. За ова уште не сме постигнале договор и компромис – рече Села.

Премиерот Заев исто така изрази задоволство што е постигната спогодба и потврди дека ќе има бришење на некои зборови од преамбулата, за да не се создава впечаток дека некои граѓани тука се привремено.

– Да изразам задоволство од конструктивните разговори и чувствителноста што АА ја покажува и кон македонскиот народ. Досега во предлог-амандманите е прифатен предлогот на АА и Зијадин Села да се тргне делот „кои живеат во границите“ за да не биде дека граѓаните Албанци, Роми, Власи, како времено да се тука. Денеска го тргнавме и она другото „граѓани“, зашто од технички аспект е дуплирано, „граѓани“ стои двапати и така правиме чувство дека сите сме еднакви пред Уставот. Сега во преамбулата ќе стои „македонскиот народ и дел од албанскиот народ, дел од турскиот народ, и т.н“ – рече Заев.