Тевдовски: Шест општини ќе добијат 290 милиони денари за инфраструктура


Скопје, 5 септември, 2018 - 14:04 (META) 

Mинистерот за финансии Драган Тевдовски потпиша договори со градоначалниците на Кавадарци, Кисела Вода, Илинден, Центар Жупа, Желино и Студеничани за подобрување на 20 километри патна мрежа и реконструкција на основно училиште.

Станува збор за 290,7 милиони денари средства за инфраструктурни проекти преку Проектот за подобрување на општински услуги, кој го спроведува Министерството за финансии во соработка со Светска банка. Директен бенефит од овие проекти ќе имаат преку 25.000 граѓани и 70 компании во индустриската зона во Илинден.

Тевдовски најави и дека Министерството за финансии набргу ќе објави нов јавен повик до општините преку Проектот за подобрување на општинските услуги.

-Ќе ги повикам сите општини да аплицираат со капитални проекти на новиот јавен повик на Проектот за подобрување на општински услуги, кој Министерствто за финансии ќе го објави до крајот на месецот. За распределба има околу 8 милиони евра, што значат повеќе километри локален пат, комунална инфраструктура, градинки и други значајни проекти за општините и граѓаните. Ги охрабрувам градоначалниците да аплицираат за овие средства и преку проекти да обезбедат подобри општински услуги за своите сограѓани и за развој на општината – рече Тевдовски.

Проектот за подобрување на општинските услуги Министерството за финансии го спроведува со поддршка на Светска банка и на Европската унија преку ИПА. Само во изминатата година беа спроведени над 70 капитални проекти во повеќе од 40 општини.


Општините ќе може да искористат 6,5 милиони евра за инфраструктура и градинки


Скопје, 13 август, 2018 - 9:34 (META) 

Општините ќе можат да аплицираат за 6,5 милиони евра за капитални проекти преку Проектот за подобрување на општински услуги – МСИП, информираат од Министерство за финансии. Општинските власти треба да подготват предлог-проекти со кои ќе аплицираат на јавниот повик, кој Министерството за финансии ќе го објави во септември и истиот ќе го спроведува.

Тој е поддржан од Светска банка со вкупен фонд од 81,1 милион евра и ИПА-грант средства за рурален развој од ЕУ во износ од 14,6 милиони евра. Целта на проектот е да ги подобри услугите кои ги дава општината на граѓаните, како и капацитетите на општинската администрација за имплементирање на проектите.

Во рамки на проектот се финансираат општински проекти како изградба и реконструкција на систем за водоснабдување, канализација и одведување отпадни води, локална патна инфраструктура, енергетска ефикасност, изградба на детски градинки, зелени пазари, инфраструктура во индустриска зона и слични проекти.

– Илјадници граѓани во Македонија добиваат подобри услуги од својата општина благодарение на овој проект. Годишно, тоа се десетици километри нови или реконструирани локални улици, изградена или реконструирана водоводна мрежа, реконструирани речни корита, градинки, културни домови, општински згради итн. Ова се реални проекти, со реални вредности за граѓаните – вели министерот за финансии Драган Тевдовски.

Само преку овој проект, на годишно ниво – од јуни 2017 до јуни 2018 година, реализирани се 72 капитални проекта во 41 општина.


Странските заинтересирани за соработка со домашните компании, но им треба поддршка


Скопје, 9 јули, 2018 - 13:14 (META) 

Стопанската комора на Македонија ги споила домашните и странските компании кои би можеле да соработуваат, а најголем интерес за соработка пројавиле компаниите од автомобилската индустрија, информираше денеска Јадранка Аризанковска од Стопанската комора на Македонија.

Таа додаде дека на домашните компании им треба поддршка и помош за градење капцитети за да може да се реализира соработката.

Од комората очекуваат 10 до 15 компани да поминат конкретна теоретска обука, а во пет да бидат спроведен таканаречени индивидуални „инхаус“ обуки во следниве два месеца.

– Проектот треба да резултира со пет компании кои ќе склучат договори за одредена соработка дали за нов производ или услуга што домашните компании можат да ја испорачаат – рече Аризанковска.

Според анализите на Комората македонските компании имаат потреба од поддршка во делот на креирање нов производ, воведување нови технолошки процеси или преструктуирање на веќе постојните, воведување стандарди што ги бараат странските компании, но и нови менаџмент решенија и техники.

Стопанска комора вложува големи напори за едуцирање на компаниите за да можат сами да аплицираат за ЕУ-фондови.


Анкета: Властите не се консултираат со граѓаните за квалитетот на јавните услуги


Скопје, 21 јуни, 2018 - 15:53 (META) 

За прекумерната бирократија (red tape) во јавната администрација, 48 отсто од граѓаните од Западен Балкан мислат дека во последните две години постојат иницијативи или напор од страна на нивните влади со цел да се поедностават административните процедури за граѓаните и бизнисите. Овој став го делат мнозинството граѓани во Косово (57 проценти), но само 28 проценти во Босна и Херцеговина, додека во Македонија, овој став го делат 51 процент.

Ова го покажува анкетата насловена „Истражување на јавната перцепција за административните услуги во земјите од Западен Балкан” која е првата регионална анкета посветена на обезбедување на услуги, спроведена во Албанија, Босна и Херцеговина, Косово, Македонија, Црна Гора и Србија.

Во рамките на оваа анкета се покажува дека само 43 проценти од широката јавност во шестте земји од Западниот Балкан мислат дека со текот на времето е олеснет пристапот до јавната администрација.

Само околу една третина од граѓаните ширум регионот потврдуваат дека во последните две години администрацијата го земала предвид нивното мислење за тоа како да се подобрат административните услуги, движејќи се од 13 проценти во Босна и Херцеговина до 44 проценти во Албанија, а во Македонија, ова мислење е застапено со 29 проценти.

Покрај тоа, една третина од популацијата во регионот се согласува дека, како корисници на административни услуги, имаат можност да го искажат своето мислење во однос на квалитетот на услугите кои ги добиваат – движејќи се од 15 проценти во Босна и Херцеговина до 36 проценти во Македонија и 38 проценти во Косово.

„Без механизми кои обезбедуваат повратни информации, невозможно е било која власт да знае што мислат граѓаните за конкретни аспекти на обезбедувањето на услугите и кои подобрувања сметаат дека се потребни, а сепак како даночни обврзници, тие ги финансираат тие услуги” , вели Симонида Кацарска, директорка на Институтот за европска политика.

Податоците од анкетата исто така откриваат низок степен на јавна свест за достапноста на е-услуги ширум регионот, движејќи се од 19 проценти во Босна и Херцеговина до 53 проценти во Македонија.

.Анкетата покажува дека само 35 проценти од испитаниците кои се запознаени со е-услугите достапни во нивните држави, велат дека во последните 2 години, „секогаш” успеваат да ја добијат услугата која ја побарале онлајн.


Балканска конференција на мали и средни претпријатија се одржува во Софија


Софија, 7 јуни, 2018 - 13:46 (META) 

Денеска во Софија се одржува втората Балканска конференција на малите и средни претпријатија (МСП), во хотелот „Хилтон“.

Претставници на Бугарско-македонскиот бизнис клуб, како и нивни фирми-членки се официјални гости на овој настан.

„Бугарско-македонскиот бизнис клуб нуди различни услуги на своите членови.БМБК го поддржува развојот на бизнисот на своите членови во сите сектори на економијата. Во одредени сектори, тие имаат значително искуство и контакт мрежа“, информираат од таму.

Гости на настанот се и претставници на бугарските власти, Европскиот парламент, Европската комисија, амбасадори, други претставници на локални и европски деловни организации и трговски комори.


Во првиот квартал, БДП со пораст од 0,1 отсто


Скопје, 7 јуни, 2018 - 12:32 (META) 

Домашниот бруто-производ во првиот квартал годинава забележал стапка на пораст од 0,1 процент, објави Државниот завод за статистика. 

Во првото тримесечје од 2018 година, најголем пораст е забележан во секторите уметност, забава и рекреација од 12,1 отсто, трговија на големо и трговија на мало, поправка на моторни возила и мотоцикли, транспорт и складирање, објекти за сместување и сервисни дејности со храна од 10,5 отсто и стручни, научни и технички дејности, административни и помошни услужни дејности од 8,5 отсто.

Финалната потрошувачка на домаќинствата, вклучувајќи ги непрофитните институции кои им служат на домаќинствата, во првото тримесечје од 2018 година, номинално растел за  четири отсто, а нејзиното учество во структурата на домашниот бруто- производ изнесува 64,3 отсто.


Тевдовски: Лани имаме рекордна искористеност на ИПА-средствата


Куманово, 30 мај, 2018 - 15:09 (META) 

Минатата година имаме рекордна сума искористени ИПА-средства, истакна министерот за финансии Драган Тевдовски, кој се обрати на ставањето во употреба на надградениот и осовремен граничен премин Табановце, како дел од кампањата „ЕУ за тебе“.

Тој рече дека искористеноста на европските фондови кои ни се на располагање, е неколкукратно повеќе, во споредба со претходните години.

– Во 2017, за проекти од ИПА-фодовите се искористени 83,2 милиони евра. Тоа е два и пол пати повеќе од 2016 година, кога се исплатени 32 милиони евра. Повеќе е и во споредба со 2015 година, кога се исплатени 51 милион и 2014 со 31 милион искористени ИПА-средства – истакна Тевдовски.

Во август лани, Владата направила план за подобрување на користењето на ИПА. Тој, како што рече Тевдовски, предвидува поголема политичка посветеност, одредување на приоритетни проекти, подобра екипираност и следење на правилата и препораките на ЕУ.

Осврнувајќи се на денешниот настан, Тевдовски истакна дека со проекти како модернизацијата и проширувањето на еден од најфрекфентните гранични премини, се подобруваат услугите на Царинската управа кон граѓаните и фирмите.

-Со неговата модернизација и надградба, очекуваме значително да се забрза протокот на возила и да се намали времето на задржување на граничниот премин. Ова значи дека граѓаните и превозниците помалку ќе чекаат при премин, а услугата која ќе ја добиваат ќе биде подобра – рече Тевдовски.

Тој додаде дека кон подобрување на услугата дополнително придонесува Транзитниот компјутеризиран систем кој овозможува движењето на стоките кон и од ЕУ и ЕФТА државите да се одвива со еден документ во електронска форма.

Модернизираниот и проширен граничен премин Табановце е проект поддржан од ИПА-средства и предвидува изградба на две нови ленти за товарни возила, надградба и модернизација на објектите. Ова ќе придонесе кон подобрување на капацитетот на граничниот премин кој сервисира 25 отсто од вкупниот број на премини на товарни возила во земјава.

На настанот обраќања имаа и премиерот Зоран Заев, евроамбасадорот, Самуел Жбогар и директорот на Царинската управа, Ѓоко Танаскоски.


Град Скопје ќе основа ново претпријатие за енергетика


Скопје, 30 мај, 2018 - 14:41 (META) 

На денешната седница, Советот на Град Скопје основа ново акционерско друштво кое ќе се занимава со енергетски дејности.

„Со оваа одлука, Градот Скопје ја утврдува потребата од основање на акционерско друштво за вршење на овие дејности за подрачјето на Град Скопје за снабдување со природен гас и топлинска енергија, како дејности од јавен интерес од локално значење. Со цел брзо и ефикасно приклучување на системот на централно греење и започнување на процесот на гасификација на градот, граѓаните на Скопје во претстојната грејна сезона ќе можат да почнат да ги користат услугите на новото претпријатие за вршење на енергетски дејности“, се вели во соопштението.

Во него се додава дека, друштвото, заради вршење на дејностите за снабдување со природен гас и топлинска енергија, ќе основа едно или повеќе трговски друштва на начин и во форма потребна за вршењето на дејностите во согласност со закон.

Управувањето на Друштвото се организира според двостепениот систем на управување, преку управен и надзорен одбор. Работите од надлежност на Собранието на Друштвото ќе ги врши Советот на Град Скопје, како единствен основач.


Анѓушев: Новиот закон за енергетика ќе штити од неконтролиран раст на цените на струјата


Скопје, 4 мај, 2018 - 13:56 (META) 

На денешната јавна расправа за предлог- законот за енергетика во Собранието, вицепремиерот за економски прашања Кочо Анѓушев порача дека овој закон се носи за доброто на граѓаните и дека обезбедува конкурентност во енергетскиот сектор.

„Овој Закон обезбедува конкурентност, а кога постои конкурентност има и бенефит за крајните корисници, бидејќи со зголемена конкуренција се подобрува квалитетот на услугите и се намалуваат цените“, рече Анѓушев.

Механизмот на изборот на универзален снабдувач, кој ќе биде избран во јавна постапка, обезбедува заштита на граѓаните, како крајни потрошувачи на енергенсите.

„Мораме да се заштитиме од можноста цените неконтролирано да растат. Тоа во овој закон е направено квалитетно, во делот на електричната енергија, каде што е воведен универзалниот снабдувач кој ќе биде избран на јавен повик, со дефинирани критериуми “, дополни Анѓушев.

Преку спроведување на законот се овозможува поддршка за обновливите извори на енергија. Со овој Закон, преку воведување на премиум тарифите се дава можност за отворање нови локации за изградба на фотоволтаични централи, при што државата ќе објави тендери за премиуми, а инвеститорите ќе имаат можност произведената струја да ја продаваат на слободен пазар.

Тој додаде дека Владата ќе го реализира проектот за изградба на нови ветерните електрани, додека се постигне моќност од 150 мегавати, што е во согласност со студијата за одржливост во рамките на енергетскиот систем на Македонија.


„Македонија сообраќај“ нема лиценца, затоа не сообраќа на релација Скопје – Солун


Скопје, 4 февруари, 2018 - 16:32 (META) 

Министерството за транспорт и врски информираше дека превозникот „Македонија сообраќај“ не сообраќа на релацијата Скопје – Солун, бидејќи нема лиценца.

„На превозникот „Македонија сообраќај“, поради нередовно одржување на возната линија Скопје – Солун, пред повеќе од три години му е одземена дозволата за превоз на патници на линијата Скопје – Солун. По две жалбени постапки од страна на оваа компанија, Министерството за транспорт и врски, му ја одзема дозволата за вршење на превоз на патници на релација Скопје-Солун. Во период на водење на жалбената постапка, важноста на дозволата била продолжувана, бидејќи решението за одземање на дозволата не било правосилно, а дозволите важеле до 31 јануари 2017 година. Превозникот „Македонија сообраќај“ не аплицирал за нова дозвола“, се вели во соопштението на министерството.

Во него се додава дека, во овој момент тече жалбената постапка пред Управниот суд и се додека се води управната постапка, Министерството за транспорт и врски, согласно законските прописи, не може да преземе дејства. Партнер-фирмата од Грција редовно ја одржува линијата Скопје-Солун, а истата аплицирала за продолжување на важност на дозволата и ги има исполнето сите законски услови за тоа.

Министерството за транспорт и врски апелира до сите заинтересирани компании да се пријават на претстојниот повик за распределба на автобуските линии во внатрешниот и меѓународниот сообраќај, со цел да се обезбедат навремени и квалитетни сообраќајни услуги за граѓаните.