!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Петте кандидати за Гостивар ветија транспарентност и решенија за проблемите


Гостивар, 6 октомври, 2017 - 17:22 (META) 

На дебатата од карванот „Живот во Македонија“ (#Debatpernime), кој го организираат „Порталб“, „Калѕо“, „Вистиномер“ и телевизијата „Арт“, во Гостивар петте кандидати за градоначалник на општината, секој посебно, ветија решавање на сите проблеми на граѓаните.

Во дебатата водена од новинарката Јета Џара, Арбен Таравари од Алијанса за Албанците, Асаф Адеми од Беса, Невзат Бејта од ДУИ, Себајдин Изири од ДПА и Шпат Исеини од коалицијата на Национална демократска преродба и Унитети зборуваа за своите решенија за горливите проблеми во општината.

Беше ветено решавање на проблемите со депонијата Русино, но и на инфраструктурните проблеми, а за булеварот Браќа Ѓиновци беше кажано дека ќе се прошири. Беше нагласено и дека на Гостивар, наместо казина на секој чекор, му се потребни библиотека и театар во Домот на културата.

Речиси сите кандидати ветија дека ако го освојат мандатот, ќе работат транспарентно.

Дебатата од карванот „Живот во Македонија“ вечерва ќе се одржи во Кичево.


Наместо денеска, Уставниот суд ќе одржи седница в понеделник да се прости со Гошева


Скопје, 26 октомври, 2016 - 10:45 (META) 

Наместо во вообичаениот термин (секоја среда во 9 часот), Уставниот суд ја закажа следната седница за разгледување на иницијативи за понеделник, 31 октомври.

Официјално не е познато зошто е оваа рокада во термините, но извесно е дека седницата е закажана за понеделник, на последниот ден од мандатот на актуелната претседателката на Уставниот суд, Елена Гошева.

Веќе од 1 ноември, на претседателското столче ќе седне нејзиниот наследник, судијата Никола Ивановски, кој на оваа позиција беше избран во понеделникот минатата недела.

Ивановски од својата претходничка, која останува судија во Уставниот суд, ќе го наследи жешкиот костен со иницијативата за оценување на уставноста и на законитоста на Законот за Специјално јавно обвинителство (СЈО), која веќе една година е во фиоките на судот и досега сè уште не се нашла на дневен ред, и покрај бројните повици од опозицијата и од невладиниот сектор.

Уставните судии, на чело со Ивановски, исто така ќе треба да одлучуваат и по иницијативата за оценување на уставноста и на законитоста на решението на претседателот на Собранието, Трајко Вељаноски, за распишување на предвремените парламентарни избори закажани за 11 декември, што вчера ја поднесе партијата на Гзим Острени, Унитети.

Ниту една од овие две иницијативи, според интернет-страницата на судот, не е на дневен ред на седницата в понеделник.

На агендата се седум иницијативи, едно барање за заштита на права и еден предлог за одлучување.


Унитети на Уставен суд ја оспори одлуката за распуштање на Собранието


Скопје, 25 октомври, 2016 - 13:31 (META) 

Партијата Унитети на Гзим Острени, денеска до Уставниот суд достави иницијатива за поведување постапка за оценување на уставноста и на законитоста на решението за распишување предвремени избори од претседателот на Собранието.

Зуљфи Адиљи, пратеник на Унитети, рече дека со оваа иницијатива се оспорува решението за предвремени парламентарни избори закажани за 11 декември бидејќи без балансирање на изборните единици се кршел член 22 од Уставот, кој гарантира еднаквост на избирачкото право, како и член 51 од Уставот.

Од партијата додаваат и дека ВМРО-ДПМНЕ и ДУИ намерно ја оставиле шестата изборна единица да има огромни отстапувања во бројот на гласачите.

Претходно, од истата причина, одлуката за распуштање на Собранието ја оспори и Народното движење за Македонија на Јанко Бачев.


Унитети, Движењето за реформи во ДПА и НДП направија предизборна коалиција


Скопје, 19 октомври, 2016 - 19:09 (META) 

Унитети, Движењето за реформи во ДПА и Националната демократска преродба денеска потпишаа договор за предизборна коалиција.

Партиите се согласиле за заедничка листа и платформа и бараат една од главните државни функции да им следува на Албанците, односно претседател на Собранието, премиер или шеф на државата.

Лидерите најавија дека нивната коалиција ќе биде отворена и за други организации и партии кои досега не биле застапени во Собранието.


Гзим Острени ја официјализираше новата политичка партија Унитети


Скопје, 3 октомври, 2015 - 14:21 (META) 

Поранешниот началник на Генералштабот на ОНА, генерал Гзим Острени, актуелниот пратеник Зулфи Адели и уште неколку поранешни функционери на третиот ешалон на ДУИ, денеска ја официјализираа новата политичка партија, Унитети.

– Идеите на нашите партии се контролирани од ВМРО-ДПМНЕ и со обидот да се обезбеди монопол за себе, Албанците се чувствуваат несигурни за прашања за кои гласаа претставници. Охридскиот договор не се имплементира бидејќи тие се заколнале дека ќе бидат лојални на државните органи. Цениме дека албанските парламентарни партии се вазали на ВМРО-ДПМНЕ. Нашата цел е создавање нова алтерантива за понатамошниот демократски развиток во Македонија. Ние ќе работиме на градење меѓуетничка доверба и на воспоставување граѓанска држава – рече Острени.