!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Орбан обезбедува „прибежиште за прорускиот лузер Груевски“, алармира унгарска партија


Будимпешта, 9 ноември, 2017 - 10:39 (META) 

Виктор Орбан не само што се вклучи во кампањата на поддржуваниот од Русија поранешен премиер на Македонија, Никола Груевски, туку и сака нему и на врвните луѓе до него да им овозможи прибежиште во Унгарија, што во целост е против вредностите на само на ЕУ, туку и во Унгарија, алармира Виктор Сигетвари, претседател на Националниот политички совет на „Еѓит“ (Заедно), унгарската проевропска политичка партија, која има пратеник во Европскиот парламент, а на последните локални избори во Унгарија освои стотици советнички места во општините.

Сигетвари вели дека во последните неколку месеци владата на Орбан и неговата партија сториле се за да ја воскреснат политичката кариера на поранешниот македонски премиер, Никола Груевски.

„Овој план, за среќа, не успеа, но унгарскиот премиер и неколку политичари учествуваа во кампањата во Македонија. Сепак, Орбан не успеа да му помогне на пропаднатиот македонски политичар, кој сакаше да го дестабилизира Балканот под руско влијание, да постигне успех на локалните избори. Никола Груевски сега, заедно со луѓето околу него, сака да најде пријателство и прибежиште во Унгарија, иако пасошот му е одземен поради обвинувања за корупција. Спротивно на националните интереси на земјава и на нејзината балканска стратегија би било репресивниот режим на Орбан да прими проруски политичари во Унгарија, заедно со припадници на разузнавачкиот сектор на земјата. Вознемирувачко е што унгарската влада сака да помогне на македонски политичар што служи на руски интереси и е на погрешната страна на европската интеграциска перспектива и е против историјата и сопствениот народ“, пишува Сигетвари.


Меркел: Неприфатливо е Унгарија да ја игнорира пресудата за бегалците


Берлин, 12 септември, 2017 - 14:08 (META) 

Германската канцеларка Ангела Меркел оцени дека е неприфатливо Унгарија да ја игнорира пресудата на Европскиот суд на правдата, според која Будимпешта мора да ги прифати бегалците во рамки на програмата на Европската Унија за нивно релоцирање.

– Неприфатливо е една влада да рече дека не ја интересира пресудата на Европскиот суд на правдата – вели Меркел за денешното издание на весникот „Берлинер цајтунг“.

Прашана дали тоа значи дека Унгарија мора да ја напушти ЕУ, Меркел одговори дека тоа значи дека е „погодено особено важно европско прашање“.

– Европа за мене е место во кое владеат законите – рече Меркел и додаде дека прашањето ќе биде разгледано на самитот на ЕУ во октомври.

Европскиот суд на правдата минатата недела го отфрли барањето на Унгарија и на Словачка да бидат изземени од програмата на ЕУ за задолжителни квоти за релоцирање бегалци кои стигнале од Грција и од Италија во други земји на ЕУ.

Унгарскиот премиер Виктор Орбан рече дека нема да го промени својот став, без разлика на пресудата на Европскиот суд на правдата.


Македонски државјани повредени во сообраќајка кај Будимпешта


Будимпешта, 26 август, 2017 - 18:02 (META) 

Пет македонски државјани се повредени во сообраќајна несреќа во близина на автопатот М5, во близина на Будимпешта, соопшти денеска портпаролот на бугарското Министерство за надворешни работи, Иван Димов, повикувајќи информации на бугарската амбасада во Будимпешта, која е во контакт со унгарските власти.

„Во сообраќајната незгода учествувале автомобил „мерцедес“ со бугарски регистерски ознаки и возило „форд“ со германски регистерски ознаки. Мерцедесот, поради дупната гума се наоѓал во лентата за итни случаи, кога во него, со голема брзина удрил фордот. Како последица на судирот, четворица патници од „фордот“ и еден од „мерцедесот“ се повредени. Жртвите се македонски државјани“, пишува Димов.

Засега нема официјална потврда за несреќата од македонското МНР – се чекаат детални информации од македонската амбасада во Унгарија.


Нова дипломатска војна – Унгарија го повлекува амбасадорот од Холандија


Будимпешта, 25 август, 2017 - 12:28 (META) 

Унгарија го врача амбасадорот од Хаг „на консултации“ после острите критики кои холандскиот амбасадор во Будимпешта ги упати кон унгарската влада.

– Унгарија го повика на консултации својот амбасадор во Холандија – соопшти шефот на унгарската дипломатија, Петер Сијарто.

Холандскиот амбасадор, Гајус Шелем, кој го завршува својот мандат во Будимпешта, во интервју за еден унгарски неделник ги спореди методите на премиерот Виктор Орбан со оние на „муслиманските терористи“.


Стефановиќ: Не постои жица што ќе ги сопре мигрантите


Белград, 4 јули, 2017 - 11:59 (META) 

Поединечните решенија на некои земји како Унгарија, не го решаваат проблемот со мигрантите, туку само го продлабочуваат, порача министерот за внатрешни работи на Србија, Небојша Стефановиќ, откако вчера владата на Унгарија објави дека наредила пробно да се пушти во употреба новата „умна“ ограда на границата со Србија, која има струја под напон од 900 волти, за која тврди дека не може да повреди човек.

– Не постојат жици што ќе ги сопрат луѓето, тие наоѓаат начин да поминат. Тоа не е решение, туку создава проблем на цела Европа. Не постои решение само за една земја, туку треба да се најде решение што сите ќе го примениме – рече Стефановиќ гостувајќи на телевизијата „Пинк“.

Тој нагласи дека во Србија во моментот има помалку од 6.000 мигранти и дека српските прифатни центри се доволни за таа бројка луѓе.


ЕК поведе прекршочни постапки против Унгарија, Полска и Чешка


Брисел, 13 јуни, 2017 - 20:49 (META) 

Европската комисија одлучи да поведе прекршочни постапки против Унгарија, Полска и Чешка затоа што овие земји членки не ги исполниле своите обврски поврзани со прифаќањето бегалци.

Еврокомесарот за миграција, Димитрис Аврамопулос, соопшти дека Комисијата веќе една година испраќа повици за солидарност и за исполнување на законските обврски за релоцирањето бегалци од камповите во Грција и во Италија. На крајот, како што рече тој, откако Европската комисија сфати дека нејзините напори се залудни, одлучи да преземе правни чекори против овие членки.

– Овие три земји ништо не направија по ова прашање. Унгарија ниту се обврза дека ќе преземе бегалци ниту, пак, некого прифати. Полска се обврза, но не прифати никого, а Чешка не направи ништо во последната година – порача еврокомесарот.

Во Европската комисија наведуваат дека повеќето земји членки на ЕУ се согласиле дека релокацијата на бегалци е можна само доколку постои политичка волја.


Унгарија доби закон за контрола на странските донации во граѓанскиот сектор


Будимпешта, 13 јуни, 2017 - 19:11 (META) 

Унгарскиот парламент денеска усвои закон за граѓански здруженија кои се финансираат од странство.

Законот, за кој гласаа пратеници од владејачката коалиција под водство на премиерот Виктор Орбан, предвидува здруженијата кои добиваат повеќе од 26.200 американски долари годишно од странство да ги пријават во судот. Со законот се предвидува организациите во своите печатени и интернет-публикации да ги објават своите финансии од странство.

Невладините организации исто така мора да ги наведат сите странски спонзори кои им даваат повеќе од 1.800 долари годишно.

Во амандманите на законот се вметнати некои од препораките на Виенската конвенција, но повеќето спорни прописи се задржани. Критичарите сметаат дека законот е дел од напорите на Орбан за замолчување на неистомислениците и за зајакнување на контролата над јавните дискусии.


Унгарска вечер утре во Прилеп


Прилеп, 29 март, 2017 - 10:21 (META) 

Унгарска вечер ќе се одржи утре во Центарот за култура „Марко Цепенков“ во Прилеп. Настанот се организира во соработка со Амбасадата на Унгарија во Македонија.

Во 18.30 часот, во ликовниот салон ќе биде отворена историската изложба „Унгарците во логорите од Советскиот Сојуз 1944-1956“ во спомен на годината на унгарските политички затвореници депортирани на принудна работа. Изложбата ќе ја отворат амбасадорот на Унгарија во Македонија, Ласло Иштван Дукс, директорката на Домот на Унгарците, Кристина Чиба, и прилепскиот градоначалник, Марјан Ристески.

Веднаш потоа, од 19 часот, во големата сала, концерт ќе одржат Аги Херцку и нејзината група „Банда“, кои ветуваат енергичен настап.


Аврамопулос ја повика Унгарија да ги почитува правилата за азил


Будимпешта, 28 март, 2017 - 15:03 (META) 

Еврокомесарот за миграција, Димитрис Аврамопулос, денеска ја повика Унгарија да се однесува во согласност со правилата на ЕУ за постапување со азилантите.

Аврамопулос на состанок со унгарските власти истакна дека експертите ќе расправаат за да осигураат дека новите унгарски правила за бегалци ќе бидат во согласност со правилата на ЕУ.

Во меѓувреме, унгарскиот Хелсиншки комитет, кој ги застапува правата на подносителите на барања за азил, рече дека привремената уредба на Европскиот суд за човекови права ја спречува Унгарија да испрати осум тинејџери и една жена која е во поодмината фаза за бременоста, во контејнерските кампови на границата.

Новите унгарски прописи, кои денеска стапија на сила, предвидуваат задржување на сите баратели на азил во контејнерски кампови на границата, што наиде на критики од ОН, како и од адвокатите што се занимаваат со човековите права.


Меркел: Засега нема санкции за Унгарија и за Полска


Берлин, 26 март, 2017 - 16:50 (META) 

Германската канцеларка Ангела Меркел се надева дека напнатоста помеѓу Европската Унија и земјите членки, како што се Полска и Унгарија, ќе биде решена со дијалог.

Таа додаде дека заканата со финансиски санкции не би била погодна засега.
Канцеларката изјави дека Европската комисија треба да разговара со членките за суштината на нивните забелешки, иако не ги наведе експлицитно Полска и Унгарија.

– Не мислам дека заканите сега би биле добри. Не би сакала да се заканувам денеска, но би сакала да видам почитување на владеењето на правото во Европа како што треба да биде – рече Меркел.