!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Просечната нето-плата во септември изнесувала 23.229 денари


Скопје, 22 ноември, 2017 - 15:57 (META) 

Просечната месечна исплатена бруто-плата по вработен во септември 2017 изнесува 34.127 денари, додека просечната нето-плата изнесува 23.229 денари, а во овој месец 1 отсто од вработените не зеле плата. Просечната плата, односно и нејзиниот бруто-износ и нето-износот биле поголеми за 4,6 отсто отколку во истиот месец во 2016 година, соопшти Државниот завод за статистика.

Зголемувањето во периодот од една година најмногу се должи на порастот на просечната плата во секторот уметност, забава и рекреација, каде бруто-платата се зголемила за  26,3 отсто, а нето-платата се зголемила за 32,1 отсто.

Просечната плата, и бруто и нето, во септември годинава пораснала и во однос на претходниот месец, односно август годинава, што повторно се должи на зголемувањето на платите во секторите уметност, забава и рекреација, со 13,8 отсто пораст на бруто-платата, односно 17,1 отсто на нето-платата.


Конкурс за манифестацијата „Нов културен бран“


Скопје, 31 јули, 2017 - 9:59 (META) 

Министерството за култура денеска на својата веб-страница ќе ги објави условите и формуларите за пријавување на општини, здруженија на граѓани, асоцијации, неформални групи и автори од областа на културата и на уметноста за манифестацијата „Нов културен бран“.

Таа ќе се реализира од крајот на август до крајот на октомври годинава,  односно сè до исцрпување на средствата за реализација на манифестацијата.

„Цел на манифестацијата е да се обезбеди деметрополизација и децентрализација на културата, дисперзија во локалните средини и збогатување, омасовување и раздвижување на културната понуда во сите региони на Македонија. За разлика од претходниот пристап со манифестацијата „Топол културен бран“, на која право за аплицирање со проекти за културни настани имаа само општините, со овој повик, право на аплицирање со проекти и со идеи за манифестацијата ќе имаат здруженија на граѓани, асоцијации, неформални групи и автори од областа на културата и на уметноста, кои ќе треба да понудат квалитетна, естетски профилирана и вредносно издржана понуда, со која ќе внесат посвежи идеи и поиновативни пристапи во креирањето на културата, како и нови и современи форми во создавањето и во презентирањето на културниот и на уметничкиот продукт“, порачува Министерството за култура.


Просечната нето-плата во март изнесувала 22.445 денари


Скопје, 22 мај, 2017 - 13:42 (META) 

Просечната месечна исплатена нето-плата по вработен, во март 2017 изнесувала 22.445 денари, а бруто-платата изнесувала 32.999 денари објави Државниот завод за статистика.

Просечната плата во март била повисока за 1,8 проценти во однос на истиот месец лани.

Ваквото зголемување се должи, пред сè, на зголемувањето на просечната месечна исплатена нето-плата по вработен во секторите финансиски дејности и дејности на осигурување (7,5 проценти), рударство и вадење на камен (7,2 проценти) и уметност, забава и рекреација (6,7 проценти).

Во март 2017 година, 1,3 отсто од вработените во Македонија не примиле плата.


Изложба во Охрид за историјатот на украсувањето велигденски јајца во Русија


Охрид, 7 април, 2017 - 12:12 (META) 

Изложба насловена „Историјат на украсување и на бојадисување велигденски јајца во Русија од древноста до колекцијата ’Фаберже’“, денеска ќе биде отворена во НУБ „Григор Прличев“ во Охрид.

Изложбата е посветена на празникот Велигден, а посетителите ќе имаат можност да слушнат и предавање за историјата и за современите тенденци на уметноста на украсување јајца.

Исто така, публиката ќе може да учествува во работилницата за уметничко украсување велигденски јајца.


Денеска се одбележува Меѓународниот ден на театарот


Скопје, 27 март, 2017 - 12:31 (META) 

Денеска се одбележува Меѓународниот ден на театарот на тој начин што ќе се играат претстави и ќе се чита пораката посветена на сценската уметност.

Автор на светската порака е француската актерка, Изабел Ипер, а македонската порака ја напиша Благој Мицевски, костимограф, режисер, уметнички директор на Народниот театар од Битола.

-Не постои театарот поради нас, туку ние постоиме благодарејќи му нему. Театарот е силен. Тој се спротивставува и преживува сè војни, цензури, сиромаштија – вели Ипер во пораката.

Меѓународниот ден е проект инициран од Интернационалниот театарски институт (ИТИ), меѓународно здружение на УНЕСКО основано со цел да се поврзат театарските работници и за полесен проток на информации помеѓу нив.


Уникатни графики изработени во техниката укијое, изложени во Струга


Охрид, 23 март, 2017 - 13:43 (META) 

Изложба на колор-принтови од дрворези работени во јапонскиот стил укијое, од некои од најзначајните јапонски уметници, отворена е во музејот „Д-р Никола Незлобински“ во Струга.

Стилот укијое се појавува во 17 век и произлегува од потребите за истражување во уметноста.

Од уметниците што применуваат ваква техника било барано да ги претставуваат убавите куртизани покрај темите со сумо-борби или портрети на воини.

Изложбата е во рамките на проектот „Мрежа на музеи“ (MuseumLINK).


Просечната месечна нето-плата изнесува 23.457 денари


Скопје, 22 февруари, 2017 - 13:36 (META) 

Просечната месечна исплатена нето-плата  во декември 2016 изнесувала 23.457 денари, а бруто-платата 34. 374 денари, објави Државниот завод за статистика.

Платата во декември 2016 година во однос на истиот месец во 2015 година е зголемена за 3,3 проценти.

Ваквото зголемување се должи, пред сè, на зголемувањето на просечната месечна исплатена нето-плата во секторите уметност, забава и рекреација (55,8 проценти), информации и комуникации (9,6 проценти) и градежништво (7,7 проценти).

Во декември 2016 година, 1,6 отсто од вработените во Македонија не примиле плата.


Просечната нето-плата во ноември била 22.380 денари


Скопје, 24 јануари, 2017 - 14:18 (META) 

Просечната месечна нето-плата во ноември лани изнесувала 22.380 денари, додека просечната бруто-плата била 32.877 денари, покажуваат податоците на Државниот завод за статистика.

Зголемувањето на просечната месечна исплатена нето-плата во ноември 2016 година, во однос на ноември 2015 година за 1,8 отсто се должи, пред сè, на повисоката исплатена нето-плата по вработен во секторите рударство и вадење камен за 10,5 проценти, уметност, забава и рекреација за 8 проценти и градежништво за 7,3 проценти.

Во ноември 2016 година, 1,4 отсто од вработените не примиле плата.

 

 


Денеска во Собранието ќе биде доделена државната награда „Св. Климент Охридски“


Скопје, 8 декември, 2016 - 10:37 (META) 

Денеска напладне во Собранието на Република Македонија ќе биде доделена државната награда „Свети Климент Охридски“ за 2016 година. Наградата е највисоко признание за долгогодишни остварувања и придонес во областа на воспитанието, образованието, културата, уметноста, здравството, заштитата и на унапредувањето на човековата околина и социјалната дејност од јавен интерес.

Наградата, во областа на воспитанието и образованието, годинава ќе му биде доделена на фолклористот Марко Китевски, а во областа на културата и уметноста наградата ќе ја добијат музичкиот уметник Гордана Јосифова-Неделковска, скулпторот Жарко Башески, поетесата Весна Стојчевска и театарската критичарка и публицистка Лилјана Мазова.

Денеска во Македонија се одбележува државниот празник 8 Декември – Денот на свети Климент Охридски, ученик на светите браќа Кирил и Методиј и прв македонски книжевник, духовник и учител.


Германската сликарка Габриеле Шафартцик изложува во Охрид


Охрид, 3 јуни, 2016 - 10:59 (META) 

Во организација на НУ „Завод и музеј“ од Охрид, од вечерва, со почеток во 20 часот, во галеријата „Робевци“, изложба ќе има германската сликарка Габриеле Шафартцик.

Нејзината колекција е избор на слики изработени во техниката масло на платно од најнов циклус наречен „Тера инкогнита“.

Габриеле Шафартцик е родена 1964 година во Бремен, Германија. Студирала на Универзитетот „Георг-Август“ во Готинген, Германија, и на Академијата за ликовни уметности во Краков, Полска.

Учествувала на меѓународни ликовни колонии во Албанија, Босна и Херцеговина, Египет, Индија, Косово, Македонија, Црна Гора и во Турција. Нејзини дела се наоѓаат во јавни и во приватни колекции во Германија и во други земји.

Делата на Габриеле Шафартцик ќе бидат изложени сè до 16 јуни.