!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Еден загинат и 19 повредени во насилствата на протестот на ултрадесничарите во Вирџинија


Шарлотсвил, 13 август, 2017 - 10:48 (META) 

Најмалку едно лице загинало, а 19 се повредени во насилствата меѓу белите националисти и контра-демонстрантите што се случија синоќа во градот Шарлотсвил, во американската сојузна држава Вирџинија, јавуваат светските медиуми.

Од засега непознати причини вечера се урнал и хеликоптер на полицијата во Вирџинија, ангажиран за надгледување на судирите, при што загинале двајца полицајци.

Загината жена и повредените лица настрадале во моментот кога автомобил влета во група демонстранти, кои протестираа против маршот на ултрадесничарите. Дваесетгодишниот Џејмс Филдс од Охајо, кој е осомничен дека го управувал автомобилот, е притворен под сомнение за убиство од втор степен. Федералното истражно биро (ФБИ), како што пренесува „Би-би-си“, отворило истрага за случајот.

Неколку илјади бели расисти, неофашисти и други ултрадесничарски групи од сите делови на САД вчера се собраа во Шарлотсвил бесни поради одлуката на градските власти да се отстрани споменикот на генералот на конфедерацијата од американската граѓанска војна (1861 – 1865), Роберт Ли.

Американскиот претседател, Доналд Трамп ги повика граѓаните на САД да ја надминат омразата и нетрпеливоста и да спречат вакви насилни протести.

„Сите мораме да се обединиме против омразата. Во Амарика нема место за вакво насилство. Да бидеме сите како едно“, напиша Трамп на својот твитер-профил.

Гувернерот на Вирџинија, Тери Меколиф изјавил дека има само една порака до белите националисти кои донесоа хаос во Шарлотсвил – „да си заминат дома“.


Меркел: Нема толеранција за оние кои искажуваат омраза кон мигрантите


Дрезден, 26 август, 2015 - 20:40 (META) 

Канцеларката Ангела Меркел денеска ги повика германските граѓани да застанат против, како што ги нарече „срамните“ протести против мигрантите кои доаѓаат во земјата, јавуваат медиумите. Пораката германската канцеларка ја соопшти за време на нејзината посета на новиот центар за азиланти во Хајденау, близу Дрезден, кој минатиот викенд беше цел на напади и немири предизвикани од припадници на ултра-десничарските организации во земјата.

За време на денешната посета, германската канцеларка била вербално нападната од група крајно-десничарски демонстранти кои извикувале „предавник“ кон неа.

Германија се соочува со зачестени напади на центрите за азил, поради големиот број на мигранти кои пристигаат во земјата.

„Нема да има толеранција за оние луѓе кои го доведуваат во прашање достоинството на другите, нема толеранција за оние кои не сакаат да помогнат онаму каде е потребна правна и човечка помош“, изјавила Меркел за медиумите по посетата на центарот, додавајќи дека Германија се соочува со „огромен предизвик“.

Според извештаите, Германија се очекува годинава да прими 800.000 барања за азил, повеќе од било која друга земја членка на Европската унија.