!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Трајановски спинува околу неговата ефикасност


Скопје, 29 септември, 2017 - 21:30 (META) 

Градоначалникот Трајановски кој од граѓаните на Скопје го бара третиот мандат има нереализирани крупни проектни ветувања, особено во делот на инфраструктурата и екологијата. Оттука, неговото спротивно тврдење е извртена вистина или спин, пишува „Вистиномер“.

„Еден од кандидатите за нов градоначалнички мандат за Скопје, Коце Трајановски, презентирајќи ја својата програма на отворањето на градскиот изборен штаб, меѓу другото го искажа и следново тврдење што го сметаме за спин: Спин:  Моите програми никогаш не биле ветени, а да не се реализираат. Се надевам дека мојата посветеност и работа на терен веќе ви е позната…

Поединечните проверки што ги правеше „Вистинимер“ во изминатите години, исто така, покажуваат дека има проекти кои биле ветени, а до ден денес не се исполнети и тоа не било кои, туку поголеми и позначајни од областа на инфраструктурата и од областа на животната средина. Така, на пример, не е реализирано ниту едно од ветувањата за подземни улици или надземни крстосници на две нивоа, за што „Вистиномер“ направил проверка“, се вели во написот.

(Целиот текст од „Вистиномер“ можете да го прочитате и да го преземете ТУКА)


Жителите на Дебар Маало утре ќе протестираат за безбедни улици и тротоари


Скопје, 20 август, 2017 - 13:45 (META) 

Жителите на Дебар Маало во Скопје, утре ќе протестираат за безбедни улици и тротоари за пешаци пред Министерство за култура, во 18 часот.

„Окупираните тротоари, неконтролираното градење, нерешениот паркинг-простор и лошиот режим за дотур на роба, го направија маалото небезбедно за живеење“, се вели на фејсбук-страницата „Вратете ни ги тротоарите“.

Настанот е во организација на иницијативата „Во одбрана на Дебар Маало“ која долго време реагира за да се реши сообраќајниот хаос.

На 17 август, во близина на Министерството за култура беше прегазена жена која почина на самото место на несреќата.


Движење Беса: Срамот на Теута Арифи не го покриваат ни чадори


Тетово, 20 јули, 2017 - 15:07 (META) 

Младинскиот форум на Движењето Беса денеска во Тетово изведе герила-акција и постави чадори на дупки на улиците и на дивата депонија на влезот на Тетово. Со тоа го изразија своето негодување за владеењето на градоначалничката Теута Арифи.

– Иако знаеме дека пропаднатите и срамни политики на градоначалничката на Општина Тетово, госпоѓа Теута Арифи, не може да ги покрие ништо, ние, Младинскиот форум на Движењето Беса се трудиме да го покриеме овој срам кој нè покрил бидејќи Тетово се води од една неспособна градоначалничка. Се наоѓаме денеска тука, меѓу овој куп отпад кој се наоѓа во влезот на Тетово, за да ја оствариме оваа симболична активност во знак на револт кон оваа еколошка катастрофа – порачаа младите од Беса.

Тие ја потсетија Арифи на нејзиното ветување дека Тетово ќе го направи најчист град во Македонија.

– Затоа, денеска ние, младината на Движењето Беса, преку оваа симболична акција овој срам ќе го прикриеме со чадори, на ист начин како што таа постапуваше сиве овие години – порачаа младите од Беса.


Општините Сопиште и Чешиново-Облешево добија грантови од ИПА-програмата


Скопје, 22 јуни, 2017 - 12:56 (META) 

Општините Сопиште и Чешиново-Облешево денеска добија грантови во вкупен износ од 237.733 евра од ИПА-програмата на Европската Унија.

– Денеска потпишуваме договори за изградба на детска градинка во Општина Сопиште и за изградба на локални улици и за подобрување на водоснабдувањето во Општина Чешиново-Облешево. Изградбата на инфраструктура во руралните средини е еден од приоритетите на реформската влада. Вложувањата во изградба на градинки, училишта, патишта и во енергетика се вложувања во трајни добра од кои директна корист имаат граѓаните. Тие придонесуваат за одржлив економски и социјален развој и воедно ги намалуваат разликите помеѓу урбаните и руралните заедници – изјави министерот за финансии, Драган Тевдовски.

Тој додаде дека ИПА-програмата за рурален развој е од особена важност за Македонија, при што е предвидено е да бидат доделени 20,7 милиони евра во различни општини во земјава.

Тевдовски рече дека како министер за финансии ќе се заложи да има поголема искористеност на фондовите што Европската Унија ни ги дава на располагање.


Улиците околу градскиот стадион ќе бидат затворени од 15 часот


Скопје, 11 јуни, 2017 - 10:50 (META) 

Министерството за внатрешни работи информира дека од 15 часот ќе воведе посебен сообраќаен режим на возила и на движење на пешаците во непосредна близина на Градскиот парк во Скопје.

Ограничувањето на движењето ќе биде поради одигрувањето на меѓународниот фудбалски натпревар помеѓу репрезентациите на Македонија и на Шпанија со почеток во 20.45 часот.

„Ќе биде ограничено движењето на возилата по булеварот Илинден и по улиците Ристо Шишков, Аминта Трети, Наум Наумовски-Борче, како и по сервисните улици во Градски парк околу фудбалскиот стадион. Ограничувањето нема да важи само за возила кои имаат акредитација за движење по горенаведените сообраќајници за влез кон фудбалскиот објект, а во однос на пешаците ограничувањето нема да важи само за лица кои поседуваат билети за фудбалскиот натпревар“, велат од МВР.


8.500 учесници од 51 држава денеска трчаа на „Виз ер скопски маратон“


Скопје, 7 мај, 2017 - 15:22 (META) 

На „Виз ер скопски маратон 2017“, кој денеска се одржа низ скопските улици, трчаа 8.500 учесници од 51 држава, што е рекорден број, информираа организаторите.

Промоторки на маратонот годинава беа близначките од Естонија, Леила, Лина и Лили, кои трчаа и на маратонската трка на Олимписките игри во Рио. На маратонот денеска беа победнички на трката од 21 километар.

„Секоја година ги следевме искуствата на другите метрополи во кои се организира ваков спортски настан и затоа секоја година воведувавме иновативни решенија кои нè доближуваат до поголемите маратони во светот“, истакна директорот на „Виз ер скопски маратон“, Кире Синадиновски.


Општина Струмица: Обвинителството на Зврлевски лаже


Струмица, 14 март, 2017 - 15:48 (META) 

Секретарот на Општина Струмица, Кирил Парталов, денеска ги отфрли како лажни наводите од истрагата што Јавното обвинителство за гонење организиран криминал и корупција ја отвори против „висок функционер на Општината“ поради злоупотреба на службената положба.

– Лага е дека за асфалтирање на една иста улица во општина Струмица биле распишани четири посебни договори, поради што Јавното обвинителство под раководство на Марко Зврлевски, придружник по балови на Сашо Мијалков, одлучило да спроведе истражна постапка за висок функционер во Општина Струмица. Не е точно дека се работи за една улица, туку се работи за четири посебни улици. Улиците дури и не се наоѓаат во непосредна близина. За нив е извршена посебна проценка при што е утврдена поединечна вредност за секоја улица и нивната вредност поеднинечно не надминува 5.000 евра – рече Парталов.

Тој истакна дека нема ништо незаконско во постапката што ја спровела Општината и дека целокупната нејзина документација е јавна.


Игор Коруноски е нов директор на „МЖ-Транспорт“


Скопје, 26 февруари, 2017 - 17:16 (META) 

Директорот за одржување влечни средства, Игор Коруноски, е новиот директор на „Македонски железници-Транспорт“. Владата го назначи на местото на Никола Костов кој пред неколку дена си поднесе оставка.

Состојбата во железничкиот сообраќај сè уште не е решена, па патничките и товарните возови веќе една недела не сообраќаат поради штрајкот на вработените кои си ги бараат заостанатите плати.

Владата обезбеди 70 милиони денари за „МЖ – Транспорт“, но според претставниците на синдикатот, тие не се доволни за исплата на заостанатите плати.

Затоа, како што велат, размислуваат за радикализација на штрајкот и да продолжат да штрајкуваат низ улиците и пред зградата на Владата.


Снегот, мразот и поларната температура ги уништија тетовските улици


Тетово, 2 февруари, 2017 - 22:23 (META) 

Големи дупки и вдлабнатини се појавија по тетовските улици откако деновиве се истопија снегот и мразот, кои на некои коловози воопшто не беа отстранети. Граѓаните велат дека дупките се појавуваат секоја година отприлика на истите улици и места. Бараат што поскоро да се санираат.

– Ги испокршивме автомобилите по мразот и снегот, сега и дупки со појавија. Овие дупки како што гледаме се појавуваат на истите места секоја година во зимскиот период. Властите ги санираат, ама тие пак се појавуваат. Најверојатно не се санираат како што треба – вели еден возач.

Од општинскиот сектор за сообраќај и патишта, велат дека појавувањето на дупките е вообичаена појава во зимскиот период.

– По зимскиот период и поларната температура имаме дупки и тоа е вообичаена појава. Ние како сектор имаме план и програма и според неа ќе почнеме со санирање на дупките, кога ќе дозволат временските услови – изјави Хусеин Демири, раководител на секторот за сообраќај и патишта при Општина Тетово.

Ударните дупки најмногу ги има на булеварите Благоја Тоска и Индустриска.


Град Скопје: Ноќеска и утрово фрлени 155 тони сол на булеварите и на улиците


Скопје, 19 јануари, 2017 - 11:12 (META) 

Екипите на зимската служба на Град Скопје во текот на ноќта и утрово до 7 часот фрлиле 155 тони сол на градските булевари и улици, особено на критичните места. Како што информираат од Град Скопје, нивните екипи и понатаму се на терен и го расчистуваат снегот и мразот од улиците и од тротоарите.

Возилата на зимската служба интервенирале на сите мостови, клучки, надвозници, подвозници и на високите зони кон Водно, Пржино и Железара, како и на сите други места во главниот град, означаени како „црни точки“.

„Зимската служба на Градот будно ја следи состојбата на терен и ќе интервенира според потребите. Градот Скопје им препорачува на возачите да возат внимателно и да се придржуваат на условите на коловозите. Потсетуваме дека во надлежност на Град Скопје се булеварите и одредени градски улици, а преостанатите улици се во надлежност на општините и тие се задолжени за нивно чистење и одржување“, велат од Град Скопје.

Оттаму апелираат до граѓаните, куќните совети и до сопствениците на деловните објекти да се придржуваат до законската обврска за чистење на снегот од приодите до нивните објекти.