Град Скопје: Коловозите се целосно чисти, се дорасчистуваат тротоарите


Скопје, 11 јануари, 2019 - 11:32 (META) 

Коловозите на булеварите и магистралните улици кои се во надлежност на Град Скопје се целосно расчистени, а на терен интензивно се работи на чистење на тротоарите и велосипедските патеки од наталожениот снег за да им се овозможи полесно движење на граѓаните, информираат од Град Скопје.

„Во текот на изминатава вечер повторно се поминати сите булевари и улици што се во надлежност на Градот Скопје, а дополнително со сол се поминати и т.н. „критични точки“, пришто беа фрлени 432 тони сол. Снегот го чистеа 60 вработени рачно и со механизација – мултикултиватори, трактори со специјални четки и ножеви за снег, трактори со плуг и патарки за расфрлање на сол. Екипите на ЈП „Паркови и зеленило“ со два камиона, четири машини и останата потребна механизација вршеа расчистување на патеките од снег во зелените површини, тротоарите и  парковите  за олеснето движење на граѓаните“, се вели во соопштението.

Градот Скопје им препорачува на возачите да возат внимателно и да се придржуваат на условите на коловозите, истите да не паркираат на улиците и булеварите, и да овозможат непрекинато движење на возилата на зимската служба.

„Потсетуваме дека во надлежност на Град Скопје се булеварите и одредени градски улици, а преостанатите улици се во надлежност на општините и тие се задолжени за нивно чистење и одржување.Апелираме до граѓаните, куќните совети и сопствениците на деловните објекти да се придржуваат до законската обврска за чистење на снегот од приодите до нивните објекти.JП „Комунала хигиена“ апелира општините да ја реализираат нивната обврска за чистење на улиците кои се во надлежност на општините и апелира за поголема ажурност во оваа област, со цел непрекинато собирање на комуналниот смет“, се додава во соопштението.


Споредните улици и тротоарите останаа неисчистени од снегот


Скопје, 10 јануари, 2019 - 16:50 (META) 

Граѓаните негодуваат што на споредните улици во населбите низ општините не поминала никаква механизација, а и дека работници не го чистат снегот кој денеска цел ден паѓа во Скопје и во целата држава.

На главните сообраќајници во Скопје има остатоци од кашест снег, па движењето е отежнато, споредните улици воопшто не се исчистени, а многу снег има и на тротоарите. Но, освен локалните власти, граѓаните исто така се обврзани да ги исчистат влезовите пред куќите, зградите, пред дуќаните.

Во Извештајот за состојбата на патиштата до 13 часот на Центарот за управување со кризи се вели дека во Скопскиот регион не се проодни патните правци кон повисоките населени места на Скопска Црна Гора, односно селата Брест, Танушевци и Малино во општина Чучер Сандево, а тие села немаат и електрична енергија. Во општина Кисела Вода непрооден е патот од Теферич кон Сопиште.

Од друга страна пак, Град Скопје информираше дека денеска и вчера на сите улици во надлежност на градската управа биле фрлени 355 тони сол.

„Утрово сите булевари и улици кои се во надлежност на Градот Скопје се исчистени и истите се проодни“, тврдат од градот, појаснувајќи дека освен механизацијата за зимско чистење, се вршело и рачно чистење на тротоарите и улиците. За тоа се  ангажирани 80 работници од ЈП „Комунална хигиена“ и ЈП „Паркови и зеленило“. Паралелно со нив, екипи на ЈП „Водовод и канализација“ работат на терен на чистење на сливниците“, се вели во соопштението на Град Скопје.

Граѓани на социјалните мрежи се шегуваат, изразуваат незадоволство од сработеното ( на централно и на локално ниво ) и постираат слики и видеа од проблемите со снегот.


Град Скопје фрлил 355 тони сол на улиците


Скопје, 10 јануари, 2019 - 9:55 (META) 

Од Град Скопје известија дека денеска и вчера поради снегот на сите улици во надлежност на градската управа биле фрлени 355 тони сол.

„Утрово сите булевари и улици кои се во надлежност на Градот Скопје се исчистени и истите се проодни“, тврдат од градот, појаснувајќи дека освен механизацијата за зимско чистење, се вршело и рачно чистење на тротоарите и улиците. За тоа се  ангажирани 80 работници од ЈП „Комунална хигиена“ и ЈП „Паркови и зеленило“. Паралелно со нив, екипи на ЈП „Водовод и канализација“ работат на терен на чистење на сливниците.

Градот Скопје им препорачува на возачите да возат внимателно и да се придржуваат на условите на коловозите, истите да не паркираат на улиците и булеварите, и да овозможат непрекинато движење на возилата на зимската служба.

Истовремено, упатен е апел до граѓаните, куќните совети и сопствениците на деловните објекти да се придржуваат до законската обврска за чистење на снегот од приодите до нивните објекти.

JП „Комунална хигиена“ апелира општините да ја реализираат нивната обврска за чистење на улиците кои се во надлежност на општините, со цел непрекинато собирање на комуналниот смет.


За да се намали сообраќајниот метеж: Користете јавен превоз или возете велосипед


Скопје, 30 ноември, 2018 - 11:38 (META) 

Републичкиот совет за безбедност на сообраќајот на патиштата за да се намали сообраќајниот метеж во градовите им препорачува на граѓаните да користат јавен превоз секогаш кога можат, да возат велосипед, а кога веќе управуваат со автомобил, да ги почитуваат сообраќајните правила и по можност со еден автомобил да се превезуваат повеќемина.

„Истражувањата покажуваат дека патувањето со јавен превоз е побезбедно и поефтино, отколку користењето на автомобил. Покрај тоа, јавниот превоз нуди можност за одмор, дружење и создавање нови познанства“, велат од РСБСП.

Во препораката за пешачење или возење велосипед, од советот велат дека најголем дел од релациите што секојдневно ги поминуваме во урбана средина, се на растојание до 5 километри. Дополнително, потсетуваат на логиката на тоа повеќе луѓе да се организираат и да се патуваат со едно возило до иста дестинација.

„Намалете ја брзината и држете безбедно растојание. Сообраќајниот метеж  изнудува грешки од возачите. Затоа намалете ја брзината и држете безбедно растојание, со цел да бидете во можност да избегнете несакани ситуации. Останете смирени и не возете слалом. Нервозата, нетрпеливоста и слалом возењето, дополнително го зголемува сообраќајниот метеж и го загрозува безбедното одвивање на сообраќајот.Не користете звучни сигнали непотребно. Звучниот сигнал создава нервоза и паника кај останатите учесници во сообраќајот и создава притисок кој води до непромислено однесување во сообраќајот“, велат од РСБСП.


Тетовци се жалат на нечисти улици, за власта состојбата е задоволителна


Тетово, 15 октомври, 2018 - 10:34 (META) 

Граѓаните на Тетово се жалат дека споредните улици во градот не се мијат и чистат колку што е потребно, а локалните власти велат дека улиците се одржуваат секој ден и нивната состојба е задоволителна.

Граѓаните коишто ги контактира „Порталб.мк“, велат дека споредните улици се нечисти поради ниското ниво на одржување од страна на властите, но и поради жителите, кои фрлаат отпадоци насекаде низ градот.

– Не можам да кажам дека улиците се чисти, имаме отпадоци, одговорноста е на општината, но и на граѓаните бидејќи се многу неодговорни. Гледам како се фрлаат отпадоци, но и да сакаш да ги фрлиш како што треба, нема можност бидејќи нема ниту една корпа за отпадоци – вели тетовецот Венхар Исени за „Порталб.мк“.

Тетовци имаат можност да пријават потреба од чистење на улиците на фиксниот број 044 331 167, но и на бесплатниот телефонски број – 0800 808 10. Но граѓанин вели дека имаат тешкотии да ги контактираат локалните органи, кога имаат потреба да побараат чистење и миење на одредени улици.

– Уличната чистота не е на потребното ниво на кое треба да биде. А кога има улици кои треба да се мијат и исчистат, не можеме да стапиме во контакт со јавното претпријатие. Тоа се случува особено во текот на викендите – вели Абедин Селмани.

Директорот на Јавното комунално претпријатие „Тетово“, Џелал Цека, вели дека улиците се чистат секојдневно и дека чистотата на улиците е на задоволително ниво. Апелира до граѓаните да бидат внимателни и да не фрлаат отпадоци.

– Улиците во градот на Тетово секојдневно се чистат, во текот на третата смена се ангажирани 12 вработени кои ги чистат главните улици на градот и булеварите, а во текот на денот ги одржуваат парковите. Миењето на улиците се врши во текот на ноќните часови, за што се наменети две цистерни. Мислам дека нивото на чистота во улиците е на задоволително ниво, но секогаш апелираме до граѓаните да не фрлаат ни догорчиња од цигари ниту пак отпадоци по улиците – вели Цека за „Порталб.мк“.


Викендов посебен сообраќаен режим во Скопје поради три настани


Скопје, 5 октомври, 2018 - 15:07 (META) 

Поради улична трка, автомобилистички натпревар и марш во рамки на кампања, во двата дена на викендот во Скопје ќе бидат затворени неколку важни улици и ќе има посебен сообраќаен режим, соопшти МВР.

За меѓународниот натпревар во автомобилизам „Скопје 2018“ во организација на АКК Примо АВЈ – Скопје и утре и задутре во периодот од 7 до 17 часот ќе биде затворен дел од булеварот Гоце Делчев, како и блиските сообраќајници. Трката ќе се одржува на потегот од крстосницата кај Мавровка сè до железничкиот надвозник кај поранешен Скопски саем, но и на улицата Беласица  пред него сè до кружниот тек кај хотелот Континентал. Посебен режим ќе има на блиските сообраќајници.

Исто така, поради уличната трка на 10 километри  „Скопје трча 10К 2018“ во организација на Сојузот на спортови на Скопје, задутре од 7.30 до 11 часот ќе биде затворен булеварот Илинден на потегот од крстосницата со булеварот Климент Охридски до крстосницата со улицата Никола Парапунов. И во овој случај, посебно ќе биде регулиран режимот на сообраќај на сообраќајниците во непосредна близина на трасата.

Во организација на здружението „Борка – За секој нов ден“ задутре во времето од 10 до 15 ќе се одржи марш во рамки на кампањата за борба против рак на дојка, насловена „Напред розово 2018 – чекори против ракот на дојка“. Поради тоа, ќе има посебен сообраќаен режим на делот на булеварот Илинден кај Зоолошката градина и стариот дел на Градски парк сè до крстосницата кај Фонтана, појаснуваат од МВР.


Фрлени 30 тони сол на скопските улици


Скопје, 10 декември, 2017 - 11:51 (META) 

Откако утрово беа регистрирани првите врнежи на снег во СКопје оваа сезона, по што екипите на зимската служба на Град Скопје веднаш излегоа на терен и превентивно интервенираа на булеварите и магистралните улици кои се во надлежност на Градот, информира градската управа.

Притоа превентивно на повеќе сообраќајници и критични точки биле растурени околу 30 тони сол.  Зимската служба на Град Скопје во моментов има залиха од сол во депоата на јавното претпријатие „Улици и патишта” од околу 1.300 тони и во тек е тендерската постапка за набавка на уште 3.000 тони сол.

Покрај солта и ладниот асфалт, зимската служба ќе ја користи и механизацијата на јавното претпријатие „Улици и патишта“ составена од 16 разновидни возила и машини, а на располагање е и механизацијата на останатите јавни градски претпријатија. Дополнително, обезбедена е и техничка поддршка од компанија која на зимската служба во текот на сезоната  и става на располагање 15 специјални возила – камиони за зимско одржување на улиците, информира Град Скопје.


Во шест скопски општини отстрaнети 2.754 кубни метри смет


Скопје, 8 декември, 2017 - 10:43 (META) 

Екипите на јавните градски претрпијатија досега ги исчистија улиците и јавните површини во општините Аеродром, Бутел, Гази Баба, Кисела Вода, Центар, Чаир и во Шуто Оризари и оттаму отстранија 2.754 кубни метри смет, информираат од Град Скопје.

Последниве два дена акцијата се спроведува во Општината Карпош, а во текот на наредните денови работите ќе се преселат во општините Ѓорче Петров и Сарај.

„Целта на оваа голема акција е чистење и миење на улиците од прашината што со години се таложи и претставува една од краткорочните мерки за намалување на загадувањето во градот. Екипите на јавните градски претпријатија, засилени со дополнително ангажираните работници, деновиве ги метеа и ги миеја градските улици и булевари, ги расчистуваа јавните површини од отпадоци, ги отстрануваа дивите депонии, ги чистеа шахтите, сливниците и канализациската мрежа, ги кастреа гранките на дрвјата и го чистеа зеленилото“, се вели во соопштението на Град Скопје.

Со оваа голема акција за чистење, опфатени се сите 10 општини во Скопје. Акцијата се очекува да трае околу 20 дена. По завршувањето на чистењето на улиците, работните активности ќе продолжат на кејот на реката Вардар.

За оваа акција Град Скопје ангажираше неколку стотини невработени лица, кои се повикани во соработка со Министерството за труд и социјална политика и со Агенцијата за вработување.


Трајановски спинува околу неговата ефикасност


Скопје, 29 септември, 2017 - 21:30 (META) 

Градоначалникот Трајановски кој од граѓаните на Скопје го бара третиот мандат има нереализирани крупни проектни ветувања, особено во делот на инфраструктурата и екологијата. Оттука, неговото спротивно тврдење е извртена вистина или спин, пишува „Вистиномер“.

„Еден од кандидатите за нов градоначалнички мандат за Скопје, Коце Трајановски, презентирајќи ја својата програма на отворањето на градскиот изборен штаб, меѓу другото го искажа и следново тврдење што го сметаме за спин: Спин:  Моите програми никогаш не биле ветени, а да не се реализираат. Се надевам дека мојата посветеност и работа на терен веќе ви е позната…

Поединечните проверки што ги правеше „Вистинимер“ во изминатите години, исто така, покажуваат дека има проекти кои биле ветени, а до ден денес не се исполнети и тоа не било кои, туку поголеми и позначајни од областа на инфраструктурата и од областа на животната средина. Така, на пример, не е реализирано ниту едно од ветувањата за подземни улици или надземни крстосници на две нивоа, за што „Вистиномер“ направил проверка“, се вели во написот.

(Целиот текст од „Вистиномер“ можете да го прочитате и да го преземете ТУКА)


Жителите на Дебар Маало утре ќе протестираат за безбедни улици и тротоари


Скопје, 20 август, 2017 - 13:45 (META) 

Жителите на Дебар Маало во Скопје, утре ќе протестираат за безбедни улици и тротоари за пешаци пред Министерство за култура, во 18 часот.

„Окупираните тротоари, неконтролираното градење, нерешениот паркинг-простор и лошиот режим за дотур на роба, го направија маалото небезбедно за живеење“, се вели на фејсбук-страницата „Вратете ни ги тротоарите“.

Настанот е во организација на иницијативата „Во одбрана на Дебар Маало“ која долго време реагира за да се реши сообраќајниот хаос.

На 17 август, во близина на Министерството за култура беше прегазена жена која почина на самото место на несреќата.