За милионскиот грабеж во НЛБ, поднесени обвиненија против осум лица


Скопје, 7 јули, 2017 - 14:11 (META) 

Основното јавно обвинителство – Скопје до Основен суд Скопје 1 поднело обвиненија против осум лица, вработени во НЛБ, за кражбата на околу три милиони евра од трезорот на банката. Со обвиненијата се побарани и мерки за обезбедување присуство, односно за првите тројца обвинети е побарано продолжување на притворот, а за едно лице е определена мерка за претпазливост.

Обвинителството утврдило дека во периодот од 31 март до 8 април годинава првите четворица обвинети, искористувајќи ја својата работна позиција, украле 400.000 швајцарски франци и 375.000 евра. На 10 април се украдени два милиона  швајцарски франци и 270.000 евра, за што беше уапсен вработениот Бобан С.

Првообвинетиот се гони за затајување сторено повеќепати, како и за тешка кражба. Исто е обвинението и за второто лице, но со квалификација помагање. Третиот обвинет се товари за тешка кражба со помагање, а четвртиот за соизвршителство во затајување. Пропишаните казни за тешка кражба се од три месеци до десет години затвор, додека за затајување од една до десет години.

Другите четворица обвинетите се товарат за несовесно вршење на должностите со што ја овозможиле кражбата. Двајца се товарат за несовесно работење во подолг период, а другите двајца за еднократно сторено кривично дело. Во согласност со Кривичниот законик, предвидена казна за ова кривично дело е затвор од шест месеци до три години, како и задолжителна парична казна за сторителите.


Украдени пиштоли во Штип и во скопски Илинден


Штип, 27 февруари, 2017 - 16:03 (META) 

Во две кражби во Штип и во скопската населба Илинден се украдени два пиштоли, извести МВР. Случаите во полиција биле пријавени вчера.

Во првиот, според сопственикот на стан на улицата Широк дол во Штип, во период од петокот до вчера, засега непознат провалник преку гаражата прилепена до зградата, дошол до кујнскиот прозорец кој насилно го отворил и влегол во станот. Оттаму украл пиштол, марка „чешка зброевка“ калибар 9 милиметри, телевизор и разновидна бижутерија, а потоа излегол од станот и провалил во подрум преку вратата, по што украл разен алат и заминал.

Во вториот случај, во периодот помеѓу саботата навечер до половина час по полноќ во неделата, засега непознат сторител провалил во куќата на 55-годишен жител на скопската населба Илинден. Таму првин ги одвртел светилките пред влезната врата, потоа со посебен алат насилно ја отворил влезната врата и од куќата одзел пиштол „црвена застава“, 33 куршуми за пиштол калибар 9 милиметри и разновиден златен накит, по што заминал.

Полицијата работи на откривање на двајцата провалници.


Заев ќе става бројчаник за враќање на украдените пари како на Тајмс сквер


Скопје, 4 февруари, 2016 - 11:48 (META) 

Лидерот на опозицијата, Зоран Заев, вчера, одговарајќи на прашање во емисијата „Нова дебата“ на „Нова ТВ“ за тоа дали постои план за лоцирање и за враќање на сите народни пари, рече дека кога ќе дојде на власт СДСМ, ќе изгради споменик на кој ќе се покажува колку народни пари се вратени во буџетот.

„Јас, колку што знам, станува збор за околу пет милијарди евра од 2007 година. Според постојните закони во Македонија, предвидено е од кривично дело, докажано со судска пресуда, каде што има украдени пари или имот, ако се пронајдат, тие да се конфискуваат. На триумфалната капија ќе поставиме бројчаник и кога Агенцијата за запленет имот ќе продаде имот и ќе врати пари во буџетот, бројчаникот ќе заврти. Тоа ќе биде споменикот со кој ние ќе придонесеме кон сите споменици во централниото јадро на нашиот главен град. Тоа е доказот дека сè што е украдено ќе се врати во оваа држава. Јас верувам дека има можности за да се соберат докази и за да се врати голем процент од она што е украдено“, рече Заев.

Ваков сличен бројчаник има во Њујорк, во близина на Тајмс сквер, но и интернет-страница на која се одбројува националниот долг на САД, кој моментално е околу од 19 трилиони долари.

Бројчаник што го одбројува германскиот национален долг има и во Берлин.


Ловечки пушки и 1.000 парчиња муниција украдени од куќа во скопско Долно Коњари


Скопје, 20 јануари, 2016 - 14:49 (META) 

Непознат сторител од куќа во скопското село Долно Коњари, сопственост на Љ.Х. (52), украл неколку ловечки пушки и околу 1.000 парчиња муниција за нив, информираат од МВР.

Кражбата се случила меѓу 15 и 19 јануари, а сторителот, според полицијата, одзел ловечки карабин со оптички нишан, малокалибарска пушка со калибар 22 милиметри, ловечка пушка со калибар 20 милиметри и околу 1.000 парчиња миниција за нив.

Полицијата презема мерки за пронаоѓање на сторителот.


Хакерски напад на САД: Украдени личните податоци на најмалку 21,5 милиони луѓе


Вашингтон, 10 јули, 2015 - 11:50 (META) 

Хакерите што упаднаа во базата на податоци на САД ги украле личните податоци на најмалку 21,5 милиони луѓе, соопштиле владини преставници, пренесуваат светските медиуми.

Најновите информации, објавени денеска, покажуваат дека загриженоста кај властите на САД во врска со инцидентот се зголемува, бидејќи само пред еден месец беше соопштено дека, според тогашните процени, во хакерскиот напад биле украдени личните податоци на 4,2 милиони актуелни и поранешни службеници на федералната влада.

Станува збор за бројка која е петпати поголема од првичната, а меѓу оние чии податоци се украдени се апликанти за државна работа, федерални контрактори и повеќе од еден милион нивни соработници и партнери, соопштиле од канцеларијата за менаџмент на персоналот (ОПМ).

За хакерскиот напад, кој се случи во април оваа година, главен осомничен е Кина. Меѓутоа властите во Пекинг јавно ги отфрилија сите обвинувања за наводна вмешаност.

Упадот во базата на податоци предизвика серија сослушувања во Конгресот на САД и остри критики за состојбата со сајбер-одбраната на САД.

Политичари од двете страни бараат шефицата на ОПМ, Кетрин Аркилета, веднаш да биде разрешена.