ВМРО-НП бара укинување на приватните пензиски фондови


Скопје, 12 февруари, 2018 - 12:24 (META) 

ВМР -Народна партија бара итно укинување на приватните пензиски фондови, односно откажување од т.н. втор столб и враќање кон единствен државно гарантиран пензиски систем.

Ставот на партијата на Љубчо Георгиевски е во рамките на дискусиите за реформа на пензискиот систем, што се отвора деновиве, а која, според партијата, оти во два правци – да се зголемат годините за пензионирање на граѓаните и второ, да се зголеми процентот на придонесите на платите.

„Сакаме да потсетиме дека оваа реформа со втор пензиски столб и беше наметната на Македонија, но и на цела Источна Европа од страна на Меѓународниот монетарен фонд (ММФ) и Светската банка без никаква сериозна поткрепа во економијата“, стои во соопштението на ВМРО-НП.

Од партијата додаваат дека денесе во цела источна Европа се води дискусија за промашеноста на пензиските реформи, а Романија е веќе во завршна фаза за укинување на овој тип наметнати решенија.


ДУИ најави амандман за укинување на патните трошоци на сите функционери


Скопје, 23 јануари, 2018 - 13:12 (META) 

Пратеникот на ДУИ, Џеват Адеми на комисиската расправа за финансирање и буџет најави дека пратеничката групa на ДУИ ќе поднесе амандман за укинување надоместокот за патни трошоци на сите функционери.

Според него, новинарите немале други теми и им вршеле атак на пратениците и ги направиле „дежурни виновници“.

– Ајде на овој начин да ги испровоцираме другите функционери и да не сме ние на мета постојано. Да се жртвуваме, за новинарите да не пишуваат за нас – рече Адеми.

На Адеми му реплицираше независниот пратеник кој е дел од владејачката коалиција, Павле Богоевски кој се согласи со него, но вели дека ова решение е само привремено.

Предлогот на власта за кратење на патните трошоци денеска се најде пред членовите на комисијата за финансирање и буџет, а веќе утре е ставен на дневен ред и на законодавно- правната комисија и комисијата за политички систем.

Со измените се предвидува надоместокот кој пратениците го добиваат за секој поминат километар, зависно од цената на горивото, од досегашните 30 отсто да се намали на 20 отсто.


Делави: Ќе има последици ако се укине специјалниот суд на Косово


Приштина, 17 јануари, 2018 - 13:37 (META) 

Амбасадорот на САД во Косово, Грег Делави денеска изјави дека пратениците во косовското собрание кои ја поддржаа иницијативата за укинување на специјалниот суд за воени злосторства извршени од припадници на Ослободителната војска на Косово (ОВК), како и политичарите кои ја ја предводеа, ќе се соочат со последици доколку иницијативата успее.

Обраќањето на Делави во врска со специјалниот суд е одржано во очи денешниот состанок на претседателството на косовското собрание на кој треба се одреди дневниот ред за следната седница, пренесува „Радио Слободна Европа“.

Барањето на пратениците за укинување на специјалниот суд за воени злосторства и понатаму е на сила.

Амбасадорот Делави изјави дека посветеноста на Косово на правосудството и на иднината е под голем ризик поради иницијативата, додавајќи дека специјалниот суд е важен за Косово и дека САД ќе направат се судот да го спроведе својот мандат.

За обидите за укинување на специјалниот суд, Делави рече дека станува збор за „ужасен пример на сопствен интерес над заедничкото добро и интересите на Косово како држава“.

– Косово не може да биде држава во која неказнивоста е норма. Прифаќањето на таква реалност значи враќање во ерата на Милошевиќ против која се бореа генерации на Косово – рече Делави.

Тој во иметот на американската амбасада изрази сочувство на семејството Ивановиќ поради убиството на Оливер Ивановиќ, еден од лидерите на косовските Срби. Делави изјави дека неговото убиство е „трагедија за Косово“ и дека „никој не треба да го користи ова злосторство за политички цели“.


Блокирана одлуката на Трамп за укинување на програмата за помош на младите имигранти


Вашингтон, 10 јануари, 2018 - 10:34 (META) 

Американскиот судија Вилијам Алсап синоќа привремено ја блокирал одлуката на администрацијата на претседателот на САД, Доналд Трамп за укинување на програмата која ги штити младите имигранти од депортација.

Како што пренесуваат светските агенции, Алсап го одборил барањето на сојузната држава Калифорнија и на другите тужители да се спречи укинувањето на програмата која ги штити децата кои со родителите илегално дошле во САД, се додека не бидат завршени судските постапки по тужбите на засегнатите.

Алсап рекол дека адвокатите кои ја поддржуваат програмата јасно покажале дека младите имигранти можат да сносат озбилна и неповратна штета доколку судот би донел поинаква одлука. Судијата, исто така, рекол дека адвокатите имаат големи шанси да успеат во тие судски постапки.

Инаку, програмата заштитува околу 800.000 лица кои се доведени во САД илегално како деца или дошле со своите семејства кои останале во САД и по истекот на визите. Програмата вклучува стотици илјади млади на факултетска возраст, кои медиумите во САД ги нарекуваат „Сонувачи“ (Dreamers).

Програмата ја иницираше поранешниот американски претседател, Барак Обама во 2012 година.

Американскиот министер за правда, Џеф Сешонс во септември, минатата година објави дека програмата ќе биде постепено укината, наведувајќи дека поранешниот претседател Обама ги пречекорил своите овластувања кога го применил во 2012 година, заобиколувајќи го Конгресот.


ВМРО-ДПМНЕ бара судот да ги ослободи притворените за 27 април


Скопје, 2 јануари, 2018 - 11:04 (META) 

Десетици неосновано притворени граѓани наместо со своите семејства новата година ја поминаа во ладни ќелии, велат од опозициската ВМРО-ДПМНЕ и реагираат на продолжениот притвор на осомничени за насилствата во Собранието од 27 април.

Од партијата велат дека притворените се „жртви на политички прогон, кои ја чувствуваат инквизицијата на 21 век на сопствена кожа“.

„Притворените граѓани се лишени од загарантираните човекови права, а постапката против нив е противзаконска и неоснована уште од самиот почеток. Непочитувањето на законите при нивното притворање, го потврди и Народниот правобранител. Факт кој остана премолчен од ОЈО и судот“, стои во соопштението од ВМРО-ДПМНЕ.

Оттаму бараат од судот да ги „согледа правните аргументи и фактичката состојба“ и да ги укине притворите.

„Судот како гарант на законитоста во постапката е должен да се издигне над притисокот. Судот има шанса да му стави крај на политичкиот прогон и да ја одбрани демократијата. Судиите треба да знаат дека ваква политичка конструкција ќе биде осудена од сите меѓународни фактори и Европскиот суд за човекови права (ЕСЧП)“, порачуваат од ВМРО-ДПМНЕ.


Стејт департментот бара од Косово да не се укинува специјалниот суд за воени злосторства


Вашингтон, 30 декември, 2017 - 12:44 (META) 

Американскиот Стејт департмент изрази длабока загриженост поради обидите на косовскиот парламент да го укине законот за новоформираниот специјален суд за воени злосторства, кој треба да им суди на команданти на Ослободителната војска на Косово (ОВК) за злосторства извршени за време на конфликтот од 1998 до 2000 година.

Вчера и Амбасадата на САД во Приштина соопшти дека го оценува како прогрешен ставот на косовските власти за укинување на специјалниот суд.

– Ги повикуваме политичките водачи на Република Косово да останат посветени на работата на специјалниот суд и да не го менуваат раководството и овластувањата на судот. Секретарот Тилерсон кажа дека потрагата по правда на Балканот сè уште не е завршена и ние остануваме посветени на тоа жртвите да ја добијат правдата. Аплаудираме на моралната храброст на косовското раководство кое го донесе законот и уставниот амандман во 2015 година и овозможи овој суд да се формира. Силно ги повикуваме сегашното косовско раководство и членовите на парламентот да не го поништуваат ова достигнување со мешање во судот сега, или во иднина – изјави портпаролката на Стејт департментот, Хедер Нојерт.

Повикот на САД доаѓа откако пратеници од косовските партии предводени од поранешни команданти на ОВК, кои ја предводат владејачката коалиција, поднесоа барање за укинување на законот со кој беше формиран судот. Косовскиот претседател Хашим Тачи, кој беше главен командант на ОВК за време на војната, најави дека тој ќе ја потпише одлуката за расформирање на специјалниот суд, доколку таа биде донесена во парламентот.

Покрај Тачи, поранешни команданти на ОВК се и актуелниот премиер на Косово, Рамуш Харадинај и неговиот брат Даут Харадинај, поради што се шпекулира дека тие би можеле да се соочат со обвиненија за воени злосторства.


Советот за утврдување на факти бара да не биде укинат до Нова година


Скопје, 22 ноември, 2017 - 15:10 (META) 

Советот за утврдување на факти, кој треба да биде укинат со предлог-закон, бара од Собранието и од Министерството за правда престанокот на работа да важи од први јануари 2018 година, а не со денот на објавување на новото законско решение во „Службен весник“.

Од Советот денеска соопштија дека во понеделникот доставиле барање до Собранието и до координаторите на пратеничките групи од Министерството за правда, предлог-законот за укинување на инстутуцијата да биде дополнет со член во кој јасно ќе се наведе дека новото решение ќе почне да се применува од почетокот на следната година.

Оттаму велат дека ако на членовите и на вработените во Советот им престане мандатот, односно работниот однос, со објавувањето на законот во „Службен весник“, не може да биде извршено примопредавање на нивните предмети и архивата во Судскиот совет, бидејќи во предлог-законот „воопшто не е определен разумен рок во кој овие обврски треба да бидат завршени“.

„Освен обврските околу примопредавањето на предметите и архивата, законот со кој се укинува Советот се носи при крај на календарската година, поради што сите вработени и членовите на Советот ќе бидат оштетени при остварувањето на нивните права од Законот за пензиско и инвалидско осигурување, како и статусот на вработените на кои сè уште им трае договорот за вработување“, стои во соопштението од Советот за утврдување на факти и за поведување постапка за утврдување одговорност на судија.


Собранието го изгласа укинувањето на Советот за јавни набавки


Скопје, 9 ноември, 2017 - 19:45 (META) 

Собранието денеска ги донесе измените на Законот за јавни набавки по скратена постапка, со кои се укинува Советот за јавни набавки.

Министерот за финансии, Драган Тевдовски пред пратениците рече дека Советот не успеал да ги оствари целите поради кои бил формиран и дека со неговото укинување ќе се отстранат бирократските процедури, кои како што рече, не само што не придонесуваат да се спречи можноста од злоупотреби, туку доведуваат до блокирање на институциите и оневозможување тие да ги даваат неопходните услуги на граѓаните.

– Според оценките на Европската комисија, измените во последните години пред се воведувањето на Советот за јавни набавки доведоа до значително оддалечување на законот од европските регулативи и практики за јавни набавки – рече Тевдовски, кој најави дека министерството работи на нов закон за јавни набавки во кој ќе бидат применети европските практики.

Пратеникот од ВМРО-ДПМНЕ, реагираше на тоа што измените се носат по скратена постапка и рече дека нема да дадат поддршка на „вакво ад-хок решение кое отвара простор за нови проблеми“.

Пратениците од парламентарното мнозинство рекоа дека укинувањето на Советот е оправдано. Пратеникот од СДСМ, Васко Ковачевски рече дека нивниот став да нема Совет за јавни набавки го дели и Европската Унија, која во извештајот за 2015/2016 година јасно навела дека треба да се подобри ефикасноста наспроти актуелните состојби.


Владата го утврдила текстот на одговорите на прашалникот на ЕУ за напредокот на Македонија


Скопје, 3 ноември, 2017 - 19:39 (META) 

Владата на денешната 35. седница го разгледала и го утврдила текстот за придонесот на Македонија кон извештајот на Европската комисија, соопшти владината служба за информирање. Текстот се однесува на прашалникот на Европската Унија за утврдување на напредокот на земјата во евроинтеграцискиот процес.

Исто така, на денешната седница Владата го почнала процесот за измени и дополнувања на Законот за јавни набавки, со кој се предвидува преиспитување на улогата на Советот за јавни набавки, како и можно укинување.

Министерот за финансии, Драган Тевдовски, пак, пред денешната седница на Владата беше дециден дека Владата ќе го укине Советот за јавни набавки, бидејќи со неговото воспоставување, јавните набавки станале покомплицирани и се одвивале во подолг рок од предвидениот.


Психолошкиот тест отпаѓа како услов за јавните службеници и функционери


Скопје, 5 октомври, 2017 - 16:44 (META) 

Со голем број предлог-закони за измена на постојните, власта се подготвува за исфрлање на психолошкиот тест и на тестот за интегритет како услови за вработување раководни лица и службеници во јавната администрација и во јавните установи, се гледа при прелистувањето на Единствениот национален електронски регистар на прописи на Република Македонија (ЕНЕР).

Истовремено, во сертификатите за познавање англиски јазик, потребни за вработување во јавниот сектор или за поставување на раководна позиција, ќе се внесе и сертификатот АПТИС, кој, според кажаното во образложенијата достапни на ЕНЕР, е поевтин и полесно достапен од другите што ги предвидува Законот за административни службеници како услов за вработување.

Поради исфрлањето на психолошкиот тест и на тестот за култура, ќе се менуваат неколку десетици закони, а во Собранието тие би стасале по завршувањето на локалните избори.

Психолошкиот тест и тестот на интегритет беа воведени во 2013 година, а беа критикувани од опозицијата и од дел од јавноста како непотребни и бесмислени.