Ангеловска-Бежоска: Долгорочен економски раст преку здрави структурни политики


Виена, 28 ноември, 2018 - 12:28 (META) 

Гувернерката на Народна банка Анита Ангеловска-Бежоска учествуваше на панел-дискусијата за улогата на монетарната политика во процесот на реална конвергенција на економиите од Централна, Источна и Југоисточна Европа (ЦИЈИЕ) кон оние од еврозоната, која што се одржа во рамки на годинешната Конференција за европска економска интеграција, организирана од Австриската централна банка.

Таа истакна дека улогата на монетарната политика, првенствено треба да се однесува на превенција од ранливости во економијата и одржување на ценовната и финансиската стабилност, како неопходни предуслови за побрз раст.

„И покрај изразено приспособливата политика во посткризниот период, реалната конвергенција во земјите од регионот на Централна и Југоисточна Европа е забавена, што упатува дека монетарната политика не може да биде супститут за здрави структурни политики кои што се неопходни за зголемување на потенцијалот за долгорочен раст на економиите“, рече Ангеловска-Бежоска.

Таа посочи на постојаното монетарно олабавување во посткризниот период, укажувајќи на поддршката која што централните банки ја даваа кон економскиот раст, преку намалување на каматните стапки и преку обезбедување дополнителна ликвидност.

 

Конференцијата за европска економска интеграција која што изминативе два дена се одржуваше во Виена, Австрија, е еден од најзначајните традиционални настани во централнобанкарската заедница на коишто се дискутира за прашања клучни за европската економија. Годинешново конференциско издание тематски беше посветено на можноста финансиските текови да ѝ помогнат на Европската унија во промовирањето економска, социјална и територијална кохезија и солидарност меѓу земјите членки и воопшто во Европа.

Во Виена, гувернерката Ангеловска-Бежоска оствари и повеќе билатерални средби со гувернери и други високи претставници на неколку централни банки, професори и истражувачи на реномирани универзитети и истражувачки центри, како и со претставници на повеќе меѓународни финансиски институции и организации.


Ангеловска-Бежоска на Конференцијата за европска економска интеграција во Виена


Виена, 26 ноември, 2018 - 11:00 (META) 

Гувернерката на Народната банка, Анита Ангеловска-Бежоска ќе учествува на Конференцијата за европска економска интеграција, која што по петнаесетти пат ја организира Австриската централна банка.

Оваа конференција важи за еден од најзначајните настани во централнобанкарската заедница на кои што традиционално се дискутира за прашања клучни за европската економија. Годинешново издание на Конференцијата, која денеска и утре се одржува во Виена, е со тема „Како да се финансира кохезијата во Европа“.

Гувернери и други високи претставници на повеќе централни банки, професори и истражувачи на реномирани универзитети и истражувачки центри, како и претставници на повеќе меѓународни финансиски институции и организации ќе дискутираат за тоа како може финансиските текови да ѝ помогнат на Европската унија во промовирањето економска, социјална и територијална кохезија и солидарност меѓу земјите членки.

„На панел-дискусијата на која говорник ќе биде гувернерката на НБРМ, акцентот ќе биде ставен на улогата на монетарната политика во ова приближување. Своите видувања на оваа тема, покрај гувернерката Ангеловска-Бежоска ќе ги изложат и гувернерите на централните банки на Романија и Бугарија. Во рамки на Конференцијата ќе се дискутира и за други прашања важни за европската економија, меѓу кои се и прашањата дали и како да се запре деиндустријализацијата во ЦИЈИЕ и во еврозоната. Гувернерката Ангеловска-Бежоска, која меѓу говорниците на Конференцијата е и единствениот висок претставник на институција на земја којашто не е членка на ЕУ, активно ќе се вклучи и во дискусијата за некои од овие прашања“, се вели во соопштението на Народна банка.


Гувернерката на НБРМ учествува на финансискиот форум на „Еурофи“ во Виена


Виена, 5 септември, 2018 - 13:06 (META) 

Гувернерката на Народната банка, Анита Ангеловска-Бежоска учествува на Финансискиот форум организиран од меѓународната организација „Еурофи“ во Виена.

„Во рамки на Форумот, фокусот е ставен на актуелни прашања поврзани со макроекономските и системските предизвици, можностите кои што произлегуваат од воведувањето нови технологии и развојот на одржливи финансии, дискусии околу развојот на алтернативно финансирање во рамки на ЕУ, и прашања поврзани со евроинтеграцијата. Во контекст на последното прашање, посебен акцент е ставен на оптимизирањето на банкарската унија, улогата на дигитализацијата за интегрирани финансиски услуги, практичните аспекти на процесот на Брегзит, но и на прашањата за приоритетите во однос на развојот на финансиските пазари и финансиската поддршка за инвестирање во земјите на Централна, Источна и Југоисточна Европа. Последното прашање ќе биде разгледано на панел-дискусија, на којашто активно учество како излагач ќе има и гувернерката Ангеловска-Бежоска “, соопштуваат од Народна банка.

Осврт на гувернерката Ангеловска-Бежоска за финансиските и инвестициските предизвици во регионот на ЦИЈИЕ е објавен и во специјалното издание на магазинот на „Еурофи“, подготвено по повод одржувањето на овој форум, значаен во глобални рамки.

„Еурофи“ е организација која претставува платформа за размена на ставови и за дискусија помеѓу претставниците на секторот за финансиски услуги и на институциите носители на политики во однос на прашања поврзани со регулативата и супервизијата на финансискиот систем, како и прашања од поширок економски контекст.


Гувернерката Ангеловска – Бежоска учествува на Годишното генерално собрание на БИС


Цирих, 22 јуни, 2018 - 13:12 (META) 

Гувернерката на Народната банка Анита Ангеловска – Бежоска, денеска и утре, во Швајцарија учествува на два настана на Банката за меѓународни порамнувања (БИС), важни за развојот на меѓународната соработка во областите на монетарната и финансиската стабилност и за унапредување на комуникацијата меѓу централните банки за клучните теми кои што го засегаат централнобанкарското работење на глобално ниво, информираат од НБРМ.

„Денеска, таа учествува на 17. годишна конференција на оваа најстара меѓународна финансиска институција, на која, во Цирих, гувернери и експерти од централните банки, високи претставници на Светската банка и Меѓународниот монетарен фонд (ММФ) и универзитетски професори и истражувачи дискутираат на тема „Десет години по Големата финансиска криза: што е сменето?“. Претпладневните сесии на Конференцијата беа посветени на карактеристиките на новиот глобален финансиски систем и на прашањето дали во изминативе десет години, на светско ниво, се промени инфлацискиот процес ‒ начинот на формирање на цените, нивната динамика и фундаменталните врски со нивните главни детерминанти. Попладнево, учесниците ќе дискутираат за тоа дали сега, по завршувањето на кризата, глобалниот финансискиот систем е поотпорен на шокови од претходно“, соопштуваат од НБРМ.

Во текот на утрешниот ден, гувернерката ќе учествува на 88. годишно генерално собрание на БИС, коешто секоја година се одржува во Базел. На Собранието ќе учествуваат високи претставници на шеесетте централни банки и монетарни институции коишто членуваат во БИС и имаат право на глас и учество на ваквите собири, меѓу кои е и НБРМ.

Гувернерката Ангеловска-Бежоска ќе го искористи учеството на Собранието и за билатерални средби со повеќе гувернери на централни банки коишто се членки на БИС, заради унапредување на позицијата на НБРМ во меѓународната централнобанкарска заедница.


РСС: Само осум отсто од граѓаните во земјите во регионот учествувале на јавни протести лани


Виена, 11 јуни, 2018 - 11:31 (META) 

Учеството на јавноста во креирањето на политиките на земјите од Западен Балкан е тема на конференција која се одржува од денеска во Виена, на која учествуваат раководители на одели од министерствата за правда, министерствата за администрација и јавна управа и министерствата за европски интеграции на земјите од регионот.

Конференцијата ја организираат Регионалниот совет за соработка (РСС) заедно со Регионалната школа за јавна управа и Центарот за истржување на јавната управа од Австрија.

Целта на Конференцијата е да се подигне свеста кај властите во земјите од Западен Балкан (ЗБ) за зголемување на стандардите за вклучување на јавното мислење при креирањето на политиките што ги спроведуваат владите и нивните министерства. Притоа ќе биде дискуирано и околу неодамна усвоената Препорака за учество на јавноста во креирањето политики на ЗБ, донесена од министри на шесте земји од регионот.

На Конференцијата, како што соопшти РСС, ќе се претстави и дистрибуира цел сет на повеќејазични материјали за информирање на јавноста и подигање на свеста – леток со Препораката, видео материјал и брошура, со цел анимирање на јавноста околу оваа проблематика.

Според истражувањето на јавното мислење што го спроведува РСС секоја година – Балкански барометар 2017, само осум отсто од граѓаните во земјите во регионот учествувале на јавни протести, пет отсто јавно ги коментирале владините одлуки на социјалните мрежи, а само 3 отсто учествувале во јавни расправи.


Груби на конференција во Софија за бугарското претседавање со ЕУ


Скопје, 19 јануари, 2018 - 10:06 (META) 

Претседателот на собраниската Комисија за европски прашања, Артан Груби, од 20 до 22 јануари 2018 година, ќе учествува на конференција на претседателите на комисиите за европски прашања на земјите-членки и на земјите-кандидати за членство во Европската Унија – КОСАК, во Софија, Бугарија.

На конференцијата, како што информираат кабинетот на Груби, ќе стане збор за програмата и приоритетите на бугарското претседателство со Европската Унија во првата половина од 2018 година, за што свое обраќање ќе има министерката за бугарското претседателство со Советот на ЕУ, Лилјана Павлова. Во рамките на конференцијата е предвидена и сесија на која ќе се расправа за иднината на Европската Унија од аспект на глобалната улога на ЕУ.

„На конференцијата, Груби ќе има свое обраќање пред високиот форум на претставници од сите национални парламенти на Европската Унија каде што ќе говори за високиот приоритет на бугарското претседателство, посветен на европската перспектива на Западниот Балкан во ЕУ. За време на конференцијата, Груби ќе оствари средби со своите колеги од парламентите на земјите кои се членки на Унијата, а ќе се сретне и со колегите од регионот“, стои во соопштението.


Вучиќ: Убиството на Ивановиќ е терористички акт, бараме учество во истрагата


Белград, 16 јануари, 2018 - 14:18 (META) 

Претседателот на Србија, Александар Вучиќ денеска изјави дека убиството на Оливер Ивановиќ, еден од лидерите на косовските Срби, е терористички акт и дека Србија ќе бара да учествува во истрагата на Косово.

– За Србија ова е терористички акт и така ќе се однесуваме кон него – изјави Вучиќ на прес-конференцијата по седницата на Советот за национална безбедност на Србија.

Тој рече дека е испратено писмо до УНМИК и Еулекс со барање државните органи на Србија да учествуваат во спроведуавњето на истрагата на Косово.

Вучиќ изјави дека очекува Обвинителството за организиран криминал на Србија денеска да отвори предистражна постапка, додавајќи дека доколку не биде одобрено барањето за учество, Србија ќе води посебна истрага.

Српскиот претседател ги предупреди „сите во Приштина и во некои други центри на моќ“ да не помислуваат да го искористат убиството на Ивановиќ како причина за да „стават чизма на северот на Косово“.

Тој наведе и дека Србија добро ги разбрала заканите на претседателот на косовското собрание, Кадри Весељи, кого нарече „вистинскиот господар на Косово“.

– Вистинските господари на Косово не се Тачи и Харадинај, туку Кадри Весељи кој зборува дека Албанците нема да се запрат се до Ниш. Ние ги разбравме таквите закани и добро ги сфативме, како и молчењето на оние кои требаше веднаш да реагираат. Нашиот одговор е дека нема да стигнат до Ниш, можат да го посетат како туристи, а да доаѓаат со војска, тоа нека го заборават – рече Вучиќ, додавајќи дека во една земја која дејствува во рамките на КФОР постои идеја да ги прекинат заедничките контроли на административната линија со војската на Србија.


Јужна Кореја ѝ предложи преговори на Северна Кореја за учество на ЗОИ 2018


Сеул, 2 јануари, 2018 - 12:41 (META) 

Јужна Кореја денеска ѝ предложи на Северна Кореја на 9 јануари да одржат преговори на кои делегациите на двете земји ќе разговараат за можно учество на Северна Кореја на Зимските олимписки игри (ЗОИ) оваа година.

Ваквиот предлог доаѓа откако севернокорејскиот лидер Ким Џонг-ун изјави дека ја разгледува можноста за испраќање на екипи на Зимските олимписки игри во Пјонгчанг во Јужна Кореја во февруари.

Тој рекол дека двете страни треба итно да се состанат и да разговараат за ваквата можност, пренесува „Би-би-си“.

Јужнокорејскиот претседател Мун Џае-ин дека ваквата понуда ја смета како „шанса за кршење на мразот“ за подобрување на односите.

На состанокот на Владата денеска, Мун Џае-ин, исто така навел дека нуклеарната програма на Северна Кореја ќе биде во позадината на било какви преговори кои се однесуваат на спортот.


Опозицијата и понатаму нема да учествува во работата на Собранието


Скопје, 27 декември, 2017 - 18:29 (META) 

Пратениците на ВМРО-ДПМНЕ и понатаму нема да учествуваат во работата на Собранието, потврдил за телевизија „Телма“ привремениот координатор на пратеничката група, Влатко Ѓорчев.

Опозицијата ќе продолжи да ја бојкотира работата на законодавниот дом, бидејќи била револтирана од денешната одлука на Кривичниот суд во Скопје со која им се продолжи притворот за нови триесет дена на пратениците Крсто Мукоски, Сашо Василевски и Љубен Арнаудов, на поранешниот министер за внатрешни работи и директорот на Бирото за јавна безбедност Митко Чавков, организаторите на протестите на „За заедничка Македонија“ Игор Дурловски, Борис Дамовски, Богдан Илиевски и на уште шестнаесет лица осомничени за насилствата во Собранието од 27 април, оваа година.

Ѓорчев образложи дека и покрај подадената рака од страна на новиот претседател на ВМРО-ДПМНЕ, Христијан Мицкоски, новата одлука за продолжување на притворот, одмагала на политичкиот дијалог.

„Одговорноста за состојбите е во партијата на власт, тие го креираат амбиентот во државата. На утрешната седница нема да учествуваме, во околности какви што имаме сега. Очекуваме конструктивен пристап од власта, да покаже добра волја и нормална комуникација. Новото раководство на партијата нека биде повод за нов почеток. Консултациите со СДСМ ќе продолжат, но ако се влоши позицијата и состојбата на прогонетите, тогаш комуникацијата помеѓу двете партии ќе биде во еднонасочна улица“, изјави Ѓорчев.

Премиерот Зоран Заев, денеска рече дека очекува што побрзо опозицијата да се врати во Собранието, за заеднички да работат на реформите кои државата ќе ја придвижат кон ЕУ и НАТО.

Тој додаде дека пратеничките прашања утре во Собранието се за пратениците на опозицијата.

– Пратеничките прашања утре во Собранието се за пратениците од опозицијата, ако не дојдат, седницата ќе трае кратко. Немам намера, долго да одговарам на прашањата на пратениците од власта, иако, и тие имаат можност да постават прашања. Ако пратениците на опозицијата не дојдат утре, се надевам дека ќе се појават на седницата по Нова година, закажана на 9 јануари – рече Заев.


ВМРО-ДПМНЕ нема да учествува на седницата за избор на јавен обвинител


Скопје, 15 декември, 2017 - 12:31 (META) 

Пратеничката група на ВМРО-ДПМНЕ нема да учествува на денешните три собраниски седници меѓу кои е и седницата за избор на нов државен јавен обвинител, изјави пратеничката на ВМРО-ДПМНЕ, Ане Лашкоска.

– Нема да учествуваме поради тоа што парламентарното мнозинство не создава и не сака да создаде демократски услови за работа, затоа што се врши политички прогон на политички неистомисленици, со апсење на пратеници, со апсење на уметници, со апсење на луѓе кои што си ја сакаат Македонија – вели Лашкоска.

Таа потенцираше дека пратеничката група редовно има активности и средби со амбасадорите на кои што ги информираат за актуелната политичка ситуација и додаде дека и понатака ќе продолжат со ваквите активности.