Училишни спортски игри „Центар 2015“


Скопје, 27 ноември, 2014 - 9:44 (META) 

Во општина Центар почаа училишните спортски игри „Центар 2015“, а за отворени ги прогласи градоначалникот Андреј Жерновски.

Во текот на целата година, 350 ученици ќе се натпреваруваат во кошарка, ракомет, одбојка, фудбал и во шах.


Државата ќе „наметнува“ социјализација, родителите и наставниците ќе свиркаат


Скопје, 25 ноември, 2014 - 14:14 (META) 

Министерството за образование и наука вчера информираше дека во тек е реализацијата на проектот „Заедничка грижа за правилно насочување на учениците“, која има цел да ги зајакне врските меѓу родителите, учениците и наставниците, преку заеднички активности во училиштето, како што се организирање спортски, културни, забавни и едукативни активности.

Оваа новина веднаш предизвика реакции во јавноста, пред сè од наставниците и од родителите. Тие се затечени од оваа новина и велат дека е само уште еден проект кој им создава дополнителни ангжмани и тоа во слободното време.

– Во ред е да се мисли на таа врска, но мислам дека ова дојде некако одеднаш. Премногу промени истрпевме оваа година, од Кембриџ-програмата до овој проект, а никој не ги прашал ниту родителите, ниту наставниците. Ова можеби е добра идеја, но мора да се воведува етапно и за неа да има широка јавна дебата. Вакви прашања не се решаваат само со допис од Министерството за образование – вели еден родител на ученик во Основното училиште „11 Октомври“ од Скопје.

Од оваа новина затечени се и наставниците, кои велат дека сè уште не го разгледале предлогот и не можат да го коментираат, иако ја нагласуваат дилемата за тоа како може да се воведува дополнителна настава кога во некои училишта во Кичево, Струга и во Охрид, поради немањето греење, не се одржува ниту редовната настава.

– За Владата на Република Македонија и за Министерството за образование и наука, најдобрите интереси на децата се врвен приоритет и токму затоа, овој проект, кој како практика постои, се применува и дава позитивни резултати во многу од земјите со високо развиени образовни системи, се имплементира и во нашата земја – информифраат од МОН.

Социолог Анета Кузевска Поп-Илиоска

Социолог Анета Кузевска Поп-Илиоска

Социолозите, исто така, не знаат за каков проект се работи, освен тоа што го виделе и го прочитале во медиумите.

Според социологот Анета Кузевска Поп-Илиоска, ова е многу сериозна тема за која има и тоа како што да се елаборира.  Таа вели дека образованието е комплексен општествен процес, кој е во тесна врска со воспитувањето и со социјализација и преку кои се обликува и се оспособува целокупната личност на детето за животот во заедницата.

– Кога училиштата, семејствата и општествената заедница ќе работат заедно во поддршка на учењето, тогаш учениците ќе даваат подобри резулатати во училиштето, ќе остануваат подолго во училиштето и ќе го сакаат повеќе училиштето – стои во заклучок од извештајот на Југозападна лабораторија за развој на образованието (Southwest Educational Development Laboratory – 2002), истакнат од  Националната асоцијација за едукација – НЕА (The National Education Association –NEA) во САД. Проектот „Заедничка грижа за правилно насочување на учениците“ подразбира дека го има како цел токму заклучокот од гореспоменатиот извештај – вели Поп-Илисока.

Кога неговиот родителот сериозно ќе ја сфати зададената задача од училиште, тоа за детето, тврди Поп-Илисока, е многу позитивен пример.

– Тоа е еден многу успешен начин да му испратите позитивна порака на вашето дете дека училиштето вреди нешто. Оваа партиципација на родителите ќе ја промени и пасивната улога која сега родителот ја има само како слушател на родителските средби во активен учесник во образовниот процес на своето дете – изјави Поп-Илиоска за новинската агенција „Мета“.

Сепак, таа  никако не се согласува со „крадењето“ на викендот, односно на двата единствени слободни денови кои родителот треба да ги посвети на потесното семејство.

– Сметам дека петдневната наставна програма е доволна за образовниот процес и сè што отстапува од неа ќе биде наметната социјализација, која, како таква, нема да ги постигне очекуваните резултати. За време на викендите, секое семејство, во зависност од своите интерни интереси и навики, треба само да си го креира слободното време и социјалните активности за своето дете – заклучува Поп-Илиоска.

В.Ѓ.


ВМРО-НП: Да се каже колку точно ученици Албанци и Македонци има во Бутел


Скопје, 25 ноември, 2014 - 13:03 (META) 

ВМРО – Народна партија со внимание ги следи новинарските коментари на телевизија „Алсат-М“ за состојбите во училиштето „Арсениј Јовков“ во скопската општина Бутел, а се однесува на бројот на учениците и на нивната етничка припадност.

„Телевизија „Алсат“ тврди дека во десетте македонски паралелки учат во просек помалку од 20 ученици, а две паралелки дури воопшто и не постојат. Згора на тоа, голем дел од учениците што учат на македонски наставен јазик се Албанци, Турци и од други етнички заедници. Од друга страна, се укажува на несоодветни услови за изведување на наставата во шестте паралелки на албански наставен јазик, каде што учат по повеќе од 40 ученици во паралелка. Исто така, се наведува дека барањата на родителите Албанци за надминување на оваа неповолна и вештачки создадена ситуација за нивните деца, редовно се игнорираат од училишниот одбор, директорот, градоначалникот на општина Бутел, Петре Латиновски, и, како најповикан, градоначалникот на Град Скопје, Коце Трајановски“, се вели во соопштението од ВМРО – Народна партија.

ВМРО – Народна партија од надлежните и, посебно, од градоначалникот на Скопје, Коце Трајановски, бара да се прикаже вистинската состојба и итно да се разреши овој проблем бидејќи, во спротивно, може да се прошири и да добие интензитет.

„ВМРО – Народна партија предлага, ако постојат вакви и слични состојби во други училишта низ Република Македонија, да не се прикриваат од локалните власти. Само со вистинско презентирање на бројот на учениците, нивната етничка припадност и со еднакви услови за сите ученици, може да се доведе до решавање на проблемите на задоволство на сите засегнати страни. Во спротивно, криво прикажаните демографски состојби, движења и насоки во Република Македонија, можат да бидат искористени за незаслужено фаворизирање на нечија етничка доминантност, што, по правило, носи несакани последици за иднината на државата. Колку побргу станеме свесни за сето ова, толку подобро за нас“, се вели во соопштението.


Ќе се реализира проектот „Заедничка грижа за правилно насочување на учениците“


Скопје, 24 ноември, 2014 - 15:28 (META) 

Министерството за образование и наука информира дека во тек е реализацијата на проектот „Заедничка грижа за правилно насочување на учениците“, кој е дел од програмата за работа на Владата на Република Македонија и чијашто единствена цел и фокус се учениците, нивното правилно насочување и придонес кон социо-културолошкиот развој, преку факултативна интеракција и преку дружење со родителите и со наставниците.

Проектот, се вели во соопштението од МОН, овозможува зајакнување на врската родител – ученик – наставник, што, пак, значи зајакнување на воспитната компонента преку заеднички активности во училиштето, односно преку организирање спортски, културни, забавни и едукативни активности.

„Активностите кои ги предлагаат Министерството за образование и наука и Бирото за развој на образованието и кои не се задолжителни, се организираат во вид на отворени денови во работната недела или викенди исполнети со соодветни активности, како, на пример, организирање спортски натпревари меѓу екипи составени од ученици, родители и од наставници, како и мешани екипи, организирање на музички настани, еколошки денови, заеднички излет на родителите, наставниците и на учениците во некое околно место на училиштето, организирање базари по повод одредени празници, заеднички посети на национални музеи, галерии и слично“, стои во соопштението.

Одлука за тоа кога ќе се реализира одредена активност, се вели подолу во соопштението, носат училиштата, во договор со родителите кои прифатиле да дадат поддршка и да се приклучат на овие факултативни активности.

„За Владата на Република Македонија и за Министерството за образование и наука, најдобрите интереси на децата се врвен приоритет и токму затоа, овој проект, кој како практика постои, се применува и дава позитивни резултати во многу од земјите со високо развиени образовни системи, се имплементира и во нашата земја. Интересот е голем и се потврдува со големата вклученост на учениците, родителите и на наставниците во бројните, веќе реализирани активности“, стои во соопштението од МОН.


ОУ „Лазо Ангеловски“ го освои првото место на натпревар за противпожарна заштита


Скопје, 24 ноември, 2014 - 13:38 (META) 

Екипата на ОУ „Лазо Ангеловски“ го освои првото место во категоријата кадети на регионалниот квиз-натпревар за противпожарна заштита, кој се одржа на 19 ноември 2014 година во просториите на „Даре Џамбаз“.

Како победничка на ниво на Град Скопје, екипата на ова училиште ќе учествува на државниот противпожарен квиз-натпревар што ќе се одржи во декември, во Кочани, во организација на Противпожарниот сојуз на Македонија.

Претходно, екипата на ОУ „Лазо Ангеловски“ го освои првото место на традиционалниот 30. квиз-натпревар за противпожарна заштита во Општина Аеродром, за учениците од основните училишта на нејзината територија.
Противпожарните квиз-натпревари се организираат за да се подигне противпожарната култура и знаење кај младата популација, а преку нив непосредно да се влијае и врз возрасните.


Нападнати ученици во „Михајло Пупин“ во Скопје


Скопје, 20 ноември, 2014 - 12:27 (META) 

Вчера, околу 16 часот, двајца ученици, М.М. (17) и К.А. (16), во скопското средно училиште „Михајло Пупин“, физички го нападнале соученикот Ф.А. (15).

„По преземени мерки, случајот е расчистен, а на напаѓачите им се издадени платни налози за наплата на глоба за сторен прекршок по член 12 од ЗППЈРМ“, соопшти МВР.


Скратени часови за учениците во Струга и во Кичево


Струга, 14 ноември, 2014 - 12:49 (META) 

Струшките основни училишта „Јосип Броз Тито“ и „Браќа Миладиновци“ и нивните подрачни центри во селата Лабуништа, Ливадишта и Радолишта сè уште се без струја поради неисплатени долгови.

Поради тоа часовите за учениците од овие училишта се скратени по 15 минути.

Повеќе, пак,  од 1.200 ученици од Кичево веќе трета недела не следат настава затоа што училиштата нема со што да се затоплуваат.


Бомбашки напад во училиште во Нигерија, најмалку 48 ученици загинаа


Потискум, 10 ноември, 2014 - 12:13 (META) 

Во денешната експлозија на бомба, во средно училиште во градот Потискум, североисточна Нигерија, загинаа најмалку 48 ученици.

– Бомбата експлодирала за време на утринскиот собир на учениците, пред почетокот на наставата. Експлозијата погоди многу ученици, но не можам да кажам колку бидејќи сега ги евакуираме жртвите во болница која е оддалечена само сто метри – изјави еден наставник.

Ученици од Општо-научното средно училиште во Потискум, во нигериската сојузна држава Јобе, истакнаа дека околу 2.000 ученици присуствувале на утринскиот собир кога експлодирала бомбата во ходникот. Најверојатно, бомбата била внесена во ранец.

Сè уште никој не презеде одговорност за нападот.


Тепачка помеѓу ученици во „Зеф Љуш Марку“ во Скопје


Скопје, 8 ноември, 2014 - 14:26 (META) 

Во средното училиште „Зеф Љуш Марку“ во Скопје синоќа околу 18 часот  се степале неколку ученици.

Полицијата интервенирала, по што нарушувањето е расчистено, а по целосно документирање на случајот, на четири лица ќе им бидат издадени платни налози за сторен прекршок.


ВМРО-ДПМНЕ: Со Кембриџ-програмата сме лидери во регионот


Скопје, 7 ноември, 2014 - 16:10 (META) 

Од оваа година нови наставни програми и учебници добија учениците од прво до трето одделение, за што, многупати информиравме дека вложени се 148 милиони денари, или околу 2,4 милиони евра, а не 12 милиони евра, реагираат од владејачката партија ВМРО-ДПМНЕ на прес-конференцијата на СДСМ.

„Од 1 септември 2014 година, Република Македонија стана единствената земја во регионот којашто го воведува образовниот систем „Кембриџ“, во делот на основното образование. Тоа е најкрупната образовна реформа којашто се реализира во нашата земја од нејзиното осамостојување и претставува многу голема болка за членовите на СДСМ, кои впрочем и никогаш и ништо не понудија пред граѓаните за унапредување на состојбите во која било општествена сфера, а најмалку во образованието“, се вели во соопштението од ВМРО-ДПМНЕ.

Оттаму додаваат дека пред воведувањето на програмата, направена е сеопфатна анализа и добра подготовка, дека наставните програми и учебници на „Кембриџ“ содржат нов концепт на изучување на математиката и на природните науки, поголемо научно истражување од страна на наставникот и на учениците. Со реализирањето на овие наставни програми, велат, ученикот се става во центарот на образовниот процес.

„Целосното заокружување на реформата во делот на основното образование е предвидено со почетокот на учебната 2016/2017 година, кога ќе бидат воведени наставните програми и учебници за учениците од 7 до 9 одделение. И ниту една прес-конференција на СДСМ нема да нè поколеба да истраеме во намерата“, додаваат од партијата.