Поднесено обвинение за убиството на Никола Саздовски


Скопје, 11 септември, 2018 - 13:41 (META) 

Обвинителен акт за убиство е поднесен денеска против двајцата осомничени за свирепото претепување на Никола Саздовски во Автокоманда на 29 јуни годинава, соопшти  Основното јавно обвинителство Скопје. Исто така, за нив е побарано продолжување на притворот.

Истражната постапка против третиот осомничен, кој се смета за соизвршител, е прекината поради тоа што е во бегство. Против него се распишани домашна и меѓународна потерница, и кога ќе биде приведен, истрагата ќе продолжи, велат од обвинителството.


Загрозениот сведок во „Монструм”: Слушнав истрели пред да ги видам телата


Скопје, 31 август, 2018 - 10:53 (META) 

Пред да ги види телата на четирите убиени момчиња кај Смиљковското Езеро, загрозениот сведок Е1 слушнал и повеќе истрели, рече тој на денешното судско рочиште за случајот „Монструм”. Сепак сведокот потенцираше дека не видел кој пукал, а прашан зошто сега првпат кажува дека слушнал истрели, рече дека не бил прашан.

Адвокатот Насер Рауфи реагираше дека сведокот досега сведочел осум пати, а се до минатото рочиште не кажал дека видел тела или дека слушнал истрели. Специјалната обвинителка Фатиме Фетаи реплицираше дека тоа е така зашто сега првпат му се поставени такви директни прашања.

На 12 април 2012 кај скопското Смиљковско Езеро беа убиени Филип Славковски, Александар Наќевски, Цветанчо Ацковски и Кире Тричковски (на возраст од 18 до 21 година), сите од Радишани, Скопје, и 45-годишниот рибар Борче Стевковски од Црешево.


ОЈО: Се уште нема осомничен за тројното убиство во Дебар


Гостивар, 27 август, 2018 - 15:00 (META) 

Надлежен јавен обвинител од Основното јавно обвинителство Гостивар издал наредба за обдукција на тричленото семејство – маж, жена и нивната 14-годишна ќерка кои беа убиени во Дебар. Обвинителот издал и наредба за вештачење на сите траги и материјални докази пронајдени на лице место, информираат од ОЈО.

„По наредба на јавниот обвинител беа земени парафински ракавици и беше извршен претрес во домовите на неколку лица со кои жртвите во последниот период поинтензивно контактирале, но се уште нема осомничен извршител на кривичното дело. Дополнително, ќе бидат детално сослушани сите лица кои ги познавале жртвите и кои би можеле да помогнат за расветлување на случајот“, велат од ОЈО.


ОЈО делото за смртта на Саздовски го преиначи од „насилство“ во „убиство на свиреп начин“


Скопје, 17 јули, 2018 - 15:08 (META) 

Основното јавно обвинителство за смртта на младиот Никола Саздовски – Саздо тројцата осомничени лица ќе ги гони за кривичното дело „убиство на свиреп начин“, дело кое досега пред преквалификацијата се водеше како „насилство“.

Од ОЈО информираат дека ваквата одлука на јавниот обвинител следи откако во текот на истражната постапка биле обезбедени вербални и материјални докази, односно биле испитани повеќе сведоци, бил прибавен обдукцискиот протокол од Институтот за судска медицина, криминалистика и медицинска деонтологија, а особено по изготвеното судско-медицинско вештачење извршено по наредба на јавен обвинител од страна на истиот институт.

„Ова вештачење беше доставено во обвинителството на 16 јули 2018 година и од него неспорно произлегува динамиката на кривично-правниот настан во смисла на видот и карактерот на здобиените повреди кај лицето Н.С., а се утврдува и причинско-последичната врска на нанесените повреди и нивното влијание на смртниот исход. Одлуката за преквалификација на кривичното дело можеше да се донесе само откако јавното обвинителство ги обезбеди сите релевантни докази, меѓу кои и судско медицинското вештачење, и откако ги утврди фактите кои произлегуваат од тие докази“, велат од Обвинителство.

За третиот осомничен кој се уште е недостапен ќе биде распишана домашна и меѓународна потерница.

Надлежниот јавен обвинител, додаваат од ОЈО, во текот на истражната постапка продолжува да презема и други истражни дејствија, меѓу кои ќе издаде и наредба за медицинско психијатриско вештачење на двајцата осомничени.


Прв распит кај обвинител на притворените за претепувањето на Никола Саздовски


Скопје, 11 јули, 2018 - 15:52 (META) 

На однапред договорен термин во Скопското обвинителство, за насилство со тешки телесни повреди врз Никола Саздовски кој подоцна почина од повредите, денеска дојдоа на прв распит осомничените двајца Б. Б. (20), С. Д. (21), јави СДК.

Ова е првпат тие да дојдат во Обвинителството.

Асмир Алилспахиќ, адвокатот на второосомничениот, рече дека тој првпат се гледа денеска со осомничените како нивни бранител. На новинарско прашање дали ќе се преквалифукува првичното кривично дело насилство со тешки телесни повреди, адвокатот рече дека е уште рано да се каже било што. Тој вели дека е убеден оти Обвинителството најпрофесионално ќе ја истера оваа истрага, и апелираше овој случај со трагична загуба на семсјството на починатото момче да не се злоупотребува во политички или какви било други цели и скриени намери на поедницни и групи.

Никола Саздовски (21) од Скопје беше брутално претепан на 29 јуни околу 17.30 часот во Скопје на автобуска постојка на булевар Александар Македонски во Автокоманда. Тој од повредите почина завчера на КАРИЛ.


Ангеловски: Напаѓачите на починатото момче се во притвор и ќе одговараат


Скопје, 9 јули, 2018 - 14:28 (META) 

Насилникот е насилник, без разлика на неговата етничка припадност, во државата постојат закони, функционира правната државата и одговорните за нападот врз Н.С. (21), кој изутрината почина во комплекс клиниките „Мајка Тереза“ ќе одговараат пред законот, изјави денеска портпаролот на МВР, Тони Ангеловски.

Нагласи дека МВР експресно го расчистило случајот и сторителите се приведени и одредена им е мерка притвор. Тој додаде дека целокупниот материјал и сите докази се доставени до надлежното јавно обвинителство, ОЈО-Скопје.

Ангеловски посочи дека МВР не е надлежно да одговара дали постои можност случајот да се преквалификува од „насилство“ во „убиство“ и оти за тоа е надлежно обвинителството.

На 29 јуни на автобуска постојка на булеварот „Александар Македонски“ три лица на возраст од 19, 20 и 21 година го нападнале Н.С., по што тој е пренесен во Ургентниот центар во Скопје.

На 2 јули, Секторот за внатрешни работи Скопје поднесе кривична пријава против Б.Б.(20), С.Д.(21) и Ј.Љ.(19), сите од Скопје за сторено кривично дело „насилство“. По преземени мерки, од страна на полициски службеници, прво и второпријавениот се лишени од слобода.

Ангеловски појасни дека по третопријавениот се трага.


Исчезнат српскиот новинар Цветковиќ, кој истражуваше за убиството на Ивановиќ


Белград, 14 јуни, 2018 - 11:57 (META) 

Новинарот Стефан Цветковиќ од Бела Црква, кој го истражувал убиството на српскиот политичар на Косово, Оливер Ивановиќ исчезнал синоќа, јавуваат српските медиуми.

Министерството за внатрешни работи на Србија соопштило дека полицијата во Бела Црква го пронашла паркираниот автомобил за кој е утврдено дека го користел новинарот и дека е распишана потрага по него. За овој случај било известено и надлежното обвинителство.

Очевидците сведочат дека автомобилот бил со отворена врата и дека покрај него биле пронајдени лични предмети на Цветковиќ.

„Исчезнувањето на новинарот е повеќе од загрижувачко и очекуваме полицијата итно да утврди што навистина се случило“, изјавиле за агенцијата „Бета“, претседателите на Независното здружение на новинари на Србија, Славиша Лекиќ и Независното друштво на новинари на Војводина, Недим Сејдиновиќ.

„Ако се покаже дека навистина е киднапиран, тоа ќе биде загрижувачки знак дека влегуваме во нова опасна фаза по безбедноста на новинарите во Србија“, изјави Сејдиновиќ.

Цветковиќ во февруари во Белград одржа прес-конференција насловена „Колку чини ликвидацијата на северот на Косово“ и покажа и фотографија на лица кои наводно биле вмешани во ликвидацијата на Ивановиќ, и тврдеше дека тој атентат бил платен 40.000 евра.


Рускиот новинар Бабченко, кој беше силен критичар на Путин е убиен во Киев


Киев, 30 мај, 2018 - 12:53 (META) 

Рускиот новинар, Аркади Бабченко e убиен во Киев во својот стан, соопшти украинската полиција и наведе дека најверојатно бил мета поради работата што ја работел.

Неговата сопруга го пронашла ранет и повикала служба за Итна медицинска помош, но тој починал по пат.

Шефот на киевската полиција изјавил дека „прва и најочигледна верзија“ е дека врз Бабченко било пукано поради неговите професионални активности.

Претставникот на Организацијата за европска безбедност и соработка (ОЕБС) за слобода на медиумите на неговиот твитер-профил напиша дека е згрозен од убиството на Бабченко и ги повика украинските власти итно да спроведат истрага.

Tекстовите на Бабченко предизвикуваа големи реакции во Русија, а во еден од нив напиша дека не жали поради смртта на рускиот хор кој настрада во авионска несреќа во декември 2016 година. Поединци бараа да му се одземе руското државјанство.

Тој ја напушти Русија во 2017 година, изјавувајќи дека добива закани и дека се плаши дека може да биде уапсен. Лани тој се пресели во Киев и работеше за телевизијата „АТР“.


Обвинение против 13 лица за убиството во Мала Речица


Скопје, 23 мај, 2018 - 12:11 (META) 

Основното јавно обвинителство Тетово поднесе обвинение против 13 лица за учество во вооружениот инцидент во Мала Речица, во кој на 5 април годинава беше убиен кумановецот Наип Реџепи, а двајца беа повредени.

Против четири лица е поднесен обвинителен акт со предлог за продолжување на мерката притвор, со кој едно лице се товари за убиство и за неовластено изработување, држење, посредување и тргување со оружје. Три лица се товарат за обид за убиство и за неовластено изработување, држење, посредување и тргување со оружје. Надлежен јавен обвинител до Основниот суд Тетово предложи на тројцата обвинети кои се уапсени, како и на еден обвинет кој и натаму е во бегство да им биде продолжен притворот до правосилноста на пресудата против нив.

Против останатите девет лица Основното јавно обвинителство Тетово поднесе обвинителен предлог за учество во тепачка. За осуммина обвинети е доставен предлог за определување мерки на претпазливост, додека за едно лице е предложен притвор до правосилност на пресудата, бидејќи станува збор за државјанин на Република Албанија.

„Во текот на истрагата, јавниот обвинител утврди дека обвинетите лица биле дел од две меѓусебно спротивставени групи, кои по претходен договор и заради претходна меѓусебна нетрпеливост, со возила дошле на местото на инцидентот во Мала Речица. Петмина, меѓу кои и починатото лице, биле вооружени со пиштоли, по што дошло до меѓусебна вербална расправија која прераснала во тепачка и употреба на огнено оружје. Освен пиштоли, во тепачката биле користени бејзбол палки, секира, нож и други предмети“, соопшти обвинителството.


Прекршен е законот со преквалификацијата на убиството на Алмир, велат обвинители


Скопје, 16 март, 2018 - 14:27 (META) 

Вчерашната одлука на Основниот суд во Куманово за преквалификација на случајот на Алмир Алиу е непрофесионално, неразумно и кршење на законот. Ова го велат активистите за човекови права, професорката Мирјана Најческа и директорката на Хелсиншкиот комитет, Уранија Пировска, додека Народниот правобранител Иџет Мемети не се смета за надлежен да го коментира случајот, бидејќи според него “тоа не е неговата работа “, пишува „Порталб.мк“.

На вчерашната одлука на обвинителството, случајот од “убиство” да се преквалификува во сообраќајка, реагираа обвинителите Ферат Елези, Башким Бесими, Џелал Бајрами и Исмаил Даршишта и ја нарекоа „скандалозна“.

Одлуката за повторување на случајот на Алмир Алиу помина без широка дебата во медиумите, дури и за неа немаше реакција од ниту една од политичките партии. Нов протест на граѓанската иницијатива “Правда за Алмир” е најавен за 21 март.

Инаку, вчера во Основниот суд во Куманово, на барање на обвинителката задолжена за случајот на Алмир, Сузана Кусиѓерска, беше одлучено повторно да го квалификува случајот од “убиство” во “сообраќајка“.

На обвинетиот Бобан Илиќ не му е опредлена мерка на претпазливост и тој вчера излезе од затворот во Шуто Оризари.