!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Дилавер Бојку – Леку убиен на плажа во Струга


Струга, 14 август, 2017 - 18:06 (META) 

Контроверзниот струшки бизнисмен Дилавер Бојку – Леку денеска попладне е застрелан на плажата „Аква скај“, потврдија за „Мета“ извори од истрагата.

Непознато лице во 16.45 часот денеска го застрелало Бојку во главата, по што избегал. Бизнисменот веднаш е пренесен во струшката болница, но, според информациите, тој им подлегнал на повредите.

Од МВР засега нема официјална потврда на настанот, а во тек е истрага која треба да открие кој е напаѓачот и кои биле мотивите.

Бојку пред 15 години го доби прекарот „кралот на проституцијата“, а од пред неколку години, по враќањето во Македонија се вклучи во угостителскиот бизнис, земајќи ја под концесија струшката плажа „Аква скај“.


Маж и жена пронајдени застрелани во куќа во Кочани


Кочани, 29 јули, 2017 - 16:30 (META) 

Две безживотни тела вчера биле пронајдени во приземје од куќа во Кочани. Телата ги пронашол С.М. (28), потстанар во куќата.

Според првичните информации, се работи за машко лице со иницијали С.Г., 42-годишен жител на Скопје, и женско лице со иницијали Ј.П., 25-годишна жителка Пробиштип, која исто така била потстанар во куќата.

Двете тела се најдени со прострелни рани во главата. Истрагата е во тек, а телата се предадени на обдукција.


Малолетник убиен на протестите во Венецуела


Каракас, 27 јули, 2017 - 11:51 (META) 

Шеснаесетгодишно момче е убиено за време на демонстрациите против претседателот на Венеција, Николас Мадуро, соопшти обвинителството. Тоа е втора жртва во новиот бран протести.

Обвинителството не го објави името на настраданото момче ниту, пак, детали за околностите под кои го загубило животот.

Претходно беше убиен 30-годишен маж, за време на протестот во Ехида, на западот на земјата.

Со ова вкупниот број на жртвите од почетокот на демонстрациите против Мадуро пред четири месеци достигна 105 лица.
Во земјата во моментов се одвива дводневен национален штрајк по повод планот на власта за одржување гласање за основање уставотворно собрание.

Опозицијата одбива да учествува на таквото гласање и смета дека Мадуро со измените на уставот сака да ја зацврсти својата власт.

САД воведоа санкции против 13 високи претставници на Венецуела, вклучувајќи и мерки за замрзнување на имот и забрана за работење со нив.

Американскиот претседател Доналд Трамп минатата недела најави воведување на поостри економски санкции доколку Мадуро го одржи гласањето, закажано за 30 јули.


Маж претепан до смрт пред продавница во Охрид


Охрид, 24 јули, 2017 - 16:14 (META) 

Маж на возраст од 59-години вчера колабирал и починал во Охрид од повредите добиени во тепачка, извести СВР Охрид. Поради тоа, кривична пријава за убиство е поднесена против Н.С. (79), З.С. (45) и Д.С. (24), сите од Охрид.

Според СВР Охрид, вчера околу 17.30 часот, пред продавница на раскрсницата на улиците Будва и Радојца Новичиќ во Охрид, дошло до расправија помеѓу сега починатиот С.Г. (58) и најстариот од учесниците во тепачката, 79-годишниот Н.С., во која се вклучил и М.Г. (29) синот на починатиот.

Малку подоцна дошло до тепачка, во која се вклучиле и другите двајца пријавени за убиството, кои на починатиот 59-годишник му нанеле тешки повреди на главата.


Кондовец уапсен откако признал дека убил соселанец


Скопје, 18 јули, 2017 - 13:38 (META) 

Дваесет и едногодишно момче од скопското село Кондово, синоќа било уапсено во полициската станица Ѓорче Петров, откако признало дека пред една недела го убило својот соселанец М.M. (57) и го открило местото каде се наоѓа телото, информираше денеска МВР.

Според полицијата, 21-годишниот М.Т. на 11 јули, околу 21.30 часот, во близина на Кондово, го убил М.М., кој во меѓувреме бил пријавен за исчезнат.

Полициска екипа ноќеска, околу полноќ, на посоченото место во близина на Кондово го пронашла телото на М.М., каде веднаш бил извршен увид во присуство на јавен обвинител.


Уште едно лице починало од пукањето во Бутел, причините за инцидентот и понатаму непознати


Скопје, 2 јули, 2017 - 16:54 (META) 

Скопската полиција сè уште ги истражува причините и работи на расчистување на случајот во кој 84-годишниот П.Т., жител на населбата Бутел, вчера во својот дом пукаше во сопругата, нивната ќерка и во внукот, а потоа се самоуби.

Триесет и двегодишниот внук, од сериозноста на повредата, почина на самото место, а како што соопшти денеска полицијата, утрово во Клиничкиот центар во Скопје починала и сопругата на П.Т. Нивната ќерка, која, исто така, беше хоспитализирана во Ургетниот центар, и понатаму се наоѓа во животна опасност.

Како што информираат од МВР, вчера околу 12.40 часот од засега неутврдени причини, П.Т. со својот пиштол „берета“, кој го поседувал со дозвола, првин испукал еден куршум кон својата 78-годишна сопруга и ја погодил во грлото, а потоа пукал во нивната 58-годишна ќерка, која ја погодил во главата.

„Неговиот внук Т.С. (32), откако влегол во ходникот од куќата, од страна на П.Т. бил погоден во пределот на главата при што поради тежината на огнострелната повреда починал на самото место. Потоа П.Т. со пиштолот си пукал во главата и се самоубил“, стои во информацијата на полицијата за случајот.

По наредба на јавен обвинител телата на починатите се пренесени во Институтот за судска медицина, за обдукција.


Осумдесет и четиригодишен скопјанец ги застрелал сопругата, ќерката и внукот


Скопје, 1 јули, 2017 - 15:03 (META) 

Осумдесет и четиригодишен скопјанец попладнево, околу 13 часот, пукал во својот дом и ги застрелал сопругата, нивната ќерка и внукот, а потоа се самоубил, јавува „Телма“.

Полицијата го потврдила инцидентот, кој се случил на улицата Хо Ши Мин, во општина Бутел. Застреланиот внук, кој бил на 32-годишна возраст, според првичните информации, им подлегнал на повредите на самото место, а сопругата на скопјанецот и нивната 58-годишна ќерка во критична состојба биле префрлени во Ургентниот центар.

Во тек е увидот на надлежните служби на местото на убиството.


ОЈО врши увид на две локации каде се пронајдени 4 починати лица


Скопје, 25 јуни, 2017 - 13:42 (META) 

Увидни екипи раководени од дежурен јавен обвинител од Основното јавно обвинителство – Скопје вршат увид во куќа во Ѓорче Петров, каде што претпладнево биле пронајдени тела на две починати лица, соопштија од ОЈО.

„Веднаш по завршувањето на увидот, екипите ќе се упатат кон селото Глумово, каде што се пронајдени телата на уште две лица. Според првичните информации, двата настани се поврзани, а сите починати лица биле во крвно сродство“, известија од Обвинителството.

Исто така, како што посочуваат оттаму, првичните сознанија на истрагата укажале дека меѓу починатите лица е и едно за кое постои сомневање дека ги лишило од живот другите пред да си го одземе животот.

Во настаните уште едно лице е повредено и како што известуваат од Обвинителството, тоа е хоспитализирано и врз него е извршена хируршка интервенција.

Во меѓувреме, до увидот, локацијата во селото Глумово ја обезбедуваат полициски екипи.

Јавниот обвинител издал наредби за прибирање на сите траги и материјални докази пронајдени на местото, кои подоцна ќе бидат испратени на вештачење.

„Телата на починатите лица ќе бидат предадени на обдукција. Интензивно се работи на расветлување на настанот и на утврдување на мотивите“, соопштија од Основното јавно обвинителство.


Шест години по убиството на Нешковски, обидот за прикривање уште актуелен


Скопје, 6 јуни, 2017 - 12:50 (META) 

Денеска е шестгодишнината од протестите против полициската бруталност што избувнаа по убиството на Мартин Нешковски вечерта на 5 јуни 2011 година, за време на прославата на изборната победа на ВМРО-ДПМНЕ.

Специјалното јавно обвинителство на почетокот на минатата година го презеде во своја надлежност случајот за убиството на Нешковски, кој, како што информираат оттаму, сè уште е во предистражна постапка.

Инаку, полицаецот Игор Спасов, кој беше осуден на 14 години затвор за убиството на Нешковски, е првиот кој беше на распит во Специјалното јавно обвинителство во февруари минатата година.

Овој случај стана предмет на работа на СЈО бидејќи убиството на Мартин Нешковски беше дел од прислушуваните разговори што лидерот на СДСМ, сега премиер, Зоран Заев, ги објави во текот на 2015 година.

Од „29. бомба“ што Заев ја објави на 5 мај пред две години, се појавија индиции и сомневања дека тогашното раководство на Министерството за внатрешни работи и вработени во МВР, меѓу кои и Дејан Митровски-Урко, поранешниот личен телохранител на тогашниот премиер Никола Груевски, се обиделе да го сокријат убиството на Нешковски од јавноста.

– Еве уште една вистина дека ни загубен живот нема никаква цена за власта (на ВМРО-ДПМНЕ) и како некој сакаше да ја скрие вистината за Мартин Нешковски – рече Заев при објавувањето на „бомбата“, по што илјадници граѓани излегоа на протест пред Владата и дојдоа во судир со полицијата, која подоцна, до доцна вечерта приведуваше демонстранти по уличките во центарот на Скопје, а упадна и во Градската библиотека „Браќа Миладиновци“.

Денеска е шестгодишнина и од апсењето на лидерот на Обединети за Македонија, Љубе Бошкоски, во акцијата „Кампања“, уште еден случај за кој СЈО отвори истрага под името „Тортура“. Во овој случај осомничени се седум лица, припадници на полициската едница „Алфа“, меѓу кои и командантот на единицата, Ивица Анчевски-Пуки. Тие се товарат за мачење и друго сурово, нечовечко или понижувачко постапување и казнување. Според СЈО, нечовечкото апсење тие го сториле за да му удоволат на поранешниот директор на УБК, Сашо Мијалков.

Овој случај СЈО го презеде од Основното јавно обвинителство Скопје. Останува неизвесно дали случајот „Тортура“ ќе се најде пред суд, откако вчера истече рокот од 18 месеци, во кој СЈО требаше да поднесе обвиненија за случаите што ги презеде од основните јавни обвинителства.

Инаку, Бошковски за случајот „Кампања“, односно за нелегално финансирање изборна кампања, беше осуден на пет години затвор. Тој ја отслужи казната и излезе од затвор на средината од минатата година.


По 23 години МВР ја заврши најдолгата потрага по бегалец од затвор


Скопје, 25 мај, 2017 - 17:12 (META) 

Македонската полиција извести дека со екстрадицијата на македонскиот државјанин Д.М. од Италија во Македонија на крајот од минатиот месец, Секторот за меѓународна полициска соработка на МВР ја завршил најдолгата потрага по бегалец во историјата на македонската полиција, која траела цели 23 години еден месец и 14 дена.

Според соопштението на полицијата, на 12 јануари 1989 година Д.М. со соучесник извршиле брутално убиство на маж со секира, кого потоа го искасапиле. На 19 јуни 1989 година тогашниот Окружен Суд во Битола ги осудил Д.М. на 15 годишна а соучесникот на 12 годишна затворска казна за убиство.

На 14 март 1994 година Д.М., избегал додека бил на викенд отсуство од затворот „Идризово“. Следниот ден е распишана меѓународна потерница, како и меѓународната потрага, која траеше цели 21 година, 8 месеци и 12 денови, до неговото апсење во Италија на 27 ноември 2015 година.

По двегодишната екстрадициона постапка тој е спроведен во КПУ Идризово каде што треба да ја одлежи затворската казна изречена во 1989 година.