!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ: Убијците на Мартин Јанушев имаат заштита од највисокиот врв на власта


Скопје, 17 ноември, 2017 - 19:52 (META) 

„Никој 15 дена не знае ни каде се наоѓа, ни кој му помогнал да избега на убиецот на Мартин Јанушев. Така е затоа што очигледно криминалците инволвирани во оваа егзекуција имаат заштита од највисокиот врв на власта. Така е затоа што криминалците беа ослободувани и обработуваа за СДСМ и сега институциите се блокирани и не смеат да ги гонат“, вели ВМРО-ДПМНЕ во реакција на денешната изјава на министерот за внатрешни работи, Оливер Спасовски, дека е познат идентитетот на убиецот.

„На Оливер Спасовски му беа потребни две недели да излезе со некакво име за наводниот сторител на ладнокрвното убиство и да ја убедува јавноста дека токму за него имал „несоборливи докази“. Оливер Спасовски нема несоборливи докази, туку си ја има само мувата на капата затоа што убиецот и сите негови помагачи се шетаат слободно и ја поминаа границата благодарение на помошта што им беше дадена, а целата јавност во рок од половина час знаеше кој е сторител“, се вели во соопштението.


ВМРО-ДПМНЕ: Цели три дена не е фатен убиецот на фудбалерот, исчезна и Спасовски


Скопје, 5 ноември, 2017 - 18:32 (META) 

„Убиецот на младиот фудбалер Мартин Јанушев за овие три дена можеше да избега и да стигне каде сака! Убиецот на младиот фудбалер Мартин Јанушев за овие три дена можеше да се засолни каде било, да бара алиби и да се обиде да ја префрли вината на некое трето лице“, порача Александар Нацев на партиска прес-конференција во седиштето на ВМРО-ДПМНЕ.

Тој праша зошто МВР молчи и не соопштува ништо за истрагата.

– Прашањето што се поставува во моментов гласи, кој му ја дава оваа предност на убиецот и зошто тој добива ваков третман? Зошто нема потерница? Каде се снимките од безбедносните камери? Зошто се крие со каков автомобил се движеле? Министерството за внатрешни работи го нема. Исчезна и Оливер Спасовски, кој љубеше да држи прес-конференции за мачки што гребеле автомобил. Граѓаните се загрижени за сопствената безбедност заради неефикасноста на полицијата командувана од кадри на СДС. Сè поголеми се и сомнежите дека намерно се одолгжува со истрагата – рече Нацев.

На прес-конференцијата одговори СДСМ. Владејачката партија порача дека наместо да шири нови лажни вести, ВМРО-ДПМНЕ треба да ги остави надлежните институции да ги расчистат сите инциденти.

„Сокривањата, заштитата и заташкувањата убиства, инциденти и криминал што беа одлика на владеењето на ВМРО-ДПМНЕ, завршија со ослободувањето и со професионализацијата на државните институции. Надлежните институции постапуваат во согласност со законите и ги расчистуваат сите инциденти без разлика на тоа кои се извршителите“, стои во соопштението на СДСМ.


Скопјанец го убил татко си со нож


Скопје, 7 септември, 2017 - 12:45 (META) 

Четириесет и едногодишниот скопјанец И.Т. синоќа со нож го убил својот татко во нивниот дом во населбата Црниче.

Полицијата била повикана од нивна сосетка, на улицата Чедомир Кантарџиев во Скопје, која пријавила дека соседите се тепаат. Кога пристигнале полицајците, на прагот на дневната соба го пронашле избоден Љ.Т. (68), а лекарот од итна медицинска помош констатирал смрт.

Како што соопшти СВР Скопје, сопругата на Љ.Т. изјавила дека додека со сопругот седеле во дневната соба, дошол нивниот син, ја откорнал влезната врата и влегол, по што ја избркал од собата. Потоа почнал да го влече татко си и во еден момент го избодел со нож. Осомничениот потоа заминал и по извесно време се пријавил во Ургентниот центар „Мајка Тереза“ каде побарал помош, бидејќи имал расеченица на десната рака.

Осомничениот И.Т. е приведен и задржан во полициската станица во Кисела Вода, а по наредба на јавен обвинител, телото на убиениот е однесено на обдукција.


„Газета експрес“: Тројца Косовци убиени во Минхен


Приштина, 23 јули, 2016 - 14:44 (META) 

Тројца Косовци, еден млад маж и две девојки, се меѓу жртвите од вчерашниот напад во Минхен при кој животот го загубија девет лица, а 16 се ранети.

Според порталот „Газета експрес“, во Минхен настрадале 21-годишниот Дијамант Заберѓа, чија смрт ја потврдил неговиот татко на „Фејсбук“.

Претходно, во текот на ноќта се дозна за уште две косовски жртви во минхенскиот трговски центар: Сабина Суљај, за која нема податоци за возраста и 14-годишната Армела Сегаши.

Напаѓачот подоцна беше пронајдени мртов, откако најверојатно се самоубил, а неговите мотиви засега не се познати.


Обама: Масакрот во Орландо е чин на терор и на омраза


Орландо, 13 јуни, 2016 - 10:38 (META) 

Американскиот претседател, Барак Обама, го осуди најголемиот масакр во современата историја на САД, во кој 50 луѓе беа убиени во клуб за хомосексуалци во Орландо на Флорида, нарекувајќи го чин на терор и на омраза.

– Сега знам доволно за да можеме да кажеме дека тоа е чин на терор и на омраза. Но, никаков акт на терор и на омраза не може да го промени она што сме – изјави американскиот претседател Барак Обама, во кусата изјава која директно беше пренесувана од Белата куќа.

Нападот за кој е осомничен 29-годишниот Американец од авганистанско потекло, Омар Садик Матин, за кој џихадистичката сунитска организација Исламска држава ја презеде одговорноста, нарекувајќи го Матин свој борец, се случи во време кога во САД се заострува реториката во однос на прашањата за хомосексуалците и за муслиманите, во прв ред поради претседателската трка.

Кандидатот на Републиканската партија, милијардерот Доналд Трамп, кој по низата исламистички напади во Европа и во САД предизвика бурни дебати со идејата на муслиманите привремено да им се забрани влез на американска територија, по нападот во Орландо порача дека бил во право во врска со радикалниот исламистички тероризам.

Трамп побара оставка од претседателот Обама доколку не сака да го користи терминот радикален исламски тероризам, кој често го употребува американката десница. Обама, пак, одбива да ја употреби оваа терминологија, со образложение дека со тоа би стигматизирал цела една заедница.

Обама оцени дека Федералното истражно биро (ФБИ) постапило исправно што ја почна истрагата за тероризам, иако мотивите на убиецот сè уште не се целосно јасни.

Напаѓачот Матин, роден во Њујорк, кој во последниот период живеел на Флорида, дејствувал сам и е застрелан во престрелката со полицијата по тричасовната заложничка драма во ноќниот клуб во центарот на Орландо.

Според сознанијата на американските телевизиски мрежи „Си-ен-ен“ и „Ен-би-си њуз“, Матин, наводно, изразил лојалност на Исламската држава во текот на повикот до бројот на службата за итни ситуации. Новинската агенција „Амак“, тесно поврзана со џихадистите, исто така, тврди дека тој е борец на Исламска држава. Претходно, на повеќе твитер-профили што ги користат исламските радикали беше објавена негова фотографија со потврда дека тој е извршителот на масакрот во Орландо.

Според последните информации во медиумите во САД, бројот на жртвите се движи меѓу 49 и 53, а има речиси стотина ранети и повредени. Поради овој напад, министерот за внатрешна безбедност на САД, Џек Џонсон, и минстерката за правда, Лорета Линч, го откажаа учеството на министерската седница предвидена во Пекинг.


Сириската војска го уапси Булдожер, озлогласениот убиец на ИД


Дамаск, 2 јуни, 2016 - 11:19 (META) 

Сириската војска објави снимка од уапсениот припадник на Исламска држава, познат под прекарот Булдожер.

Како што пренесуваат светските медиуми, џелатот кој ширел страв и кој на видеоснимките се гледа како егзекутира заробеници, е уапсен во Сирија.

На снимките што се појавија на интернет, Булдожер е гол до појасот, со рацете врзани зад грб, сместен во товарниот дел на камионет.


Во Париз убиен маж кој со нож сакал да влезе во полициска станица


Париз, 7 јануари, 2016 - 14:21 (META) 

Маж вооружен со нож, кој се обидел да влезе во полициската станица во Париз, денеска бил убиен од француската полиција.

Полициските служби известија дека напаѓачот на себе носел појас полн со експлозив.

Според очевидец, во улицата Гут дор се слушнале две-три пукотници, а потоа улицата била блокирана од полицијата.

Според друг очевидец, напаѓачот на себе имал некој вид елек, кој најверојатно бил со експлозив и извикувал „Алах е голем“, додека се обидувал да нападне полицаец.


Млад кичевец избодел свој сограѓанин


Охрид, 20 ноември, 2014 - 11:27 (META) 

Полициската станица од Кичево поднесе пријава против С.А. (22) од овој град, поради постоење основи за сомневање за обид за убиство. На пријавениот му е одредена мерка притвор во траење од 30 дена, по што е испратен во казнено-поправната установа во Тетово, соопшти портпаролот на СВР во Охрид, Стефан Димоски.

Кривичното дело е извршено на 18 овој месец, околу 17 часот, на улицата Маршал Тито во Кичево, во близина на џамијата во кичевската населба Бела Кула, каде пријавениот се обидел од живот да го лиши С.Ф. (19), нанесувајќи му со остар предмет две убодни рани во пределот на грбот, по што избегал од местото на настанот и го оставил повредениот.

На настанот му претходела средба на притворениот С.А. со повредениот С.Ф., по која настанала жестока караница, во која во еден момент се случил нападот и нанесувањето на убодните рани. Набргу на повредениот С.Ф. му е укажана медицинска помош во општата болница во Кичево, а С.А. со брза интервенција на полициските службеници е пронајден.

Полициската станица од Кичево презема дополнителни мерки за расчистување на овој случај.