Двајца полицајци убиени на должност во Сараево


Сараево, 26 октомври, 2018 - 15:20 (META) 

Двајца полицајци биле изрешетани рано утрово во Сараево, додека се обидувале да спречат кражба на автомобил.

Според Адем Зољ, премиер на Сараевскиот кантон, кога полицајците при патрола пристигнале на паркинг во населбата Алипашино Поље околу 4.50 часот и забележале обид за кражба на „голф 6“, крадците веднаш почнале да пукаат на нив со автоматско оружје.

Притоа бил убиен Адис Шеховиќ (46), додека неговиот колега Давор Вујиновиќ (43) во критична состојба бил пренесен в болница, но претпладнево им подлегнал на повредите и покрај извршените операции и обидот за реанимација.

Според некои сознанија крадците потоа избегале кон Источно Сараево, а полицијата на Сараевскиот кантон трага по сторителите во соработка со полицијата од Република Српска.


Во Дебар тројно убиство на сопружници и нивната малолетна ќерка


Дебар, 27 август, 2018 - 9:11 (META) 

Основното јавно обвинителство Гостивар соопшти дека врши увид во приватна куќа во Дебар каде што се пронајдени безживотни тела на три лица.

Според првичните сознанија на обвинителството, станува збор за тројно убиство, а жртвите се семејство – маж, жена и нивната ќерка на возраст од околу 13 години, кои времено живееле во Италија. Сторителот засега е непознат.

Надлежен јавен обвинител е на терен и работи на откривање на сторителот и на утврдување на мотивите. Издадени се серија наредби за прибирање траги од лице место, вештачења и претреси.

Според СВР Охрид, случајот во полиција бил пријавен вчера во 20.45 часот како убиство, а убиените се А.П.(54), неговата сопруга Н.П.(53) и нивната 14-годишна ќерка.


Судењето за „Монструм“ одложено, се разболел судијата


Скопје, 11 јули, 2018 - 11:28 (META) 

Поради болест на судијата Осман Шабани, денешното рочиште на случајот на СЈО „Монструм“, на кое требаше преку видеоврска, со затемнет лик и изменет глас, да се сослуша загрозениот сведок Е1, е одложено, јави „Порталб“.

Родителите и роднините на убиените четири момчиња од Радишани и на рибарот од Црешево, реагираа на одложувањето на судењето, кое треба да продолжи на 22 и 24 август. Тие обвинија дека центар на моќ влијае на судскиот процес, оти во случајот со масакрот биле вмешани шестмина функционери на ДУИ, како и дека судијата Шабани намерно избегнал да дојде поради инструкции од ДУИ, извести „Порталб“.

Случајот е за убиството на Александар Наќевски, Филип Славковски, Цветанчо Ацковски, Кире Тричковски, на возраст од 18 до 21 година, сите од Радишани, и на Борче Стевковски од Црешево, на Смилковско Езеро на 12 април 2012 година.


Убиени 59 Палестинци – масакр на протест против амбасадата на САД во Ерусалим


Ерусалим, 15 мај, 2018 - 9:47 (META) 

Во вчерашните крвави судири во Појасот Газа загинаа 59 Палестинци, а повредени се 2.771, од кои половината имаат прострелни рани. Меѓу загинатите е и едно осуммесечно бебе, кое се задушило од солзавец. Протестите во Газа беа насочени против преместувањето на амбасадата на САД во Ерусалим, како и против десетгодишната блокада на Газа од страна на Израел и Египет.

Многу земји ги осудија постапките на Израел. Палестинските автономни власти побараа итна седница на Советот за безбедност на ОН.

По насилството на границата на Газа и Израел, денеска на палестинските територии и во Источен Ерусалим има генерален штрајк, а почна и тридневна жалост за загинатите.

Сите политички фракции за денеска напладне повикаа на нови протести кај израелските армиски контролни пунктови во Западниот брег.


Седумнаесет застрелани во напад на средно училиште на Флорида


Паркленд, 15 февруари, 2018 - 10:33 (META) 

Најмалку 17 лица се убиени, а голем број се ранети во средно училиште во американската сојузна држава Флорида, при вооружен напад што се случи вчера пред крајот на наставата во во училиштето „Марџори Стоунмен Даглас“ во Паркленд, седумнаесет километри северно од Мајами.

Полицијата соопшти дека напаѓачот е уапсен и дека станува збор за 19-годишниот Николас Круз, поранешен ученик во училиштето, кој се наоѓа во притвор.

Двајца американски сенатори од Флорида, по разговорот со полицијата, пренесоа дека напаѓачот носел гас-маска кога влегол во училиштето носејќи автоматска пушка, кутии со муниција и димни гранати, а потоа го активирал противпожарниот аларм, што довело тоа учениците и персоналот да излезат од училниците во ходниците, пренесуваат светските агенции.

„Таму се случи масакр“, изјави сенаторот Бил Нелсон за „Си-ен-ен“.

Како средношколец, Круз учествувал во воено спонзорирана тренинг програма на американската војска во училиштето, изјавила 19-годишната Џулијан Дејвис, која неодамна дипломирала во истата програма.

Во разговор со „Ројтерс“ Дејвис се присетила на „чудните приказни за ножеви и пушки“ на Круз, додавајќи дека „никој никогаш не го сфаќал сериозно“.

Дванаесет лица се убиени внатре во училишната зграда, две надвор, едно лице на улица, а две подлегнале на повредите во болница, изјави шерифот на округот.

Напаѓачот се предал на полицијата, појасни шерифот, кој на прес-конференција кажа дека ранетите се префрлени во околните болници.

„Ова е страшен ден…ова е катастрофално“, изјави шерифот.

Објавена е снимка направена од локален репортер, на која се гледа како полицијата го приведува напаѓачот, облечен во црвена маичка.

Средното училиште веднаш по нападот е затворено, а учениците се криеле кај стигнале – под работните маси, плакари или ги забарикадирале вратите, додека не дошла полицијата да ги спаси.

Многумина од нив мислеле дека станува збор за вежба, бидејќи кратко пред пукањето го слушнале противпожарниот аларм.

Претседателот на САД, Доналд Трамп, изрази сочувство по повод нападот на Флорида, додавајќи дека „ниту едно дете, професор, ниту било кој друг не смее да се чувствува небезбедно во американските училишта“.

Белата куќа ја откажа редовната прес-конфренција по извештаите за нападот. Претседателот Трамп разговарал со гувернерот на Флорида, Рик Скот и напиша дека Белата куќа соработува со полицијата „околу ужасниот напад“.

Сенаторот на Флорида, Марко Рубио на „Твитер“ порача дека нападот е „осмислен и изведен за да страдаат што повеќе лица“.


Ученик уби двајца во средно училиште во САД


Луивил, 24 јануари, 2018 - 11:57 (META) 

Двајца мртви и 17 ранети и повредени е епилогот на крвавиот напад што вчера се случил во средното училиште Маршал Каунти во Бентон, во американската држава Кентаки. Нападот го извршил 15-годишен ученик, а жртвите се негови врсници.

Според полицијата, убиецот, кој не е идентификуван, бил уапсен 15-тина минути по нападот во кој животите ги загубија една девојка и едно момче.

Напаѓачот пукал во група ученици, пред почетокот на наставата, и погодил 14 ученици, меѓу кои биле и убиените. Другите петмина биле повредени при бегањето.


Најмалку 38 жртви во самоубиствен бомбашки напад во Багдад


Багдад, 15 јануари, 2018 - 10:19 (META) 

Најмалку 38 луѓе се убиени и уште 105 се повредени во двојниот бомбашки напад во средиштето на Багдад, втор во последните три дена. Двата напади уследија по неколкуте седмици релативен мирна состојба во главниот град на Ирак.

– Двајца самоубијци активираа експлозив кој го носеле на плоштадот Ал-Тајаран во центарот на Багдад – изјави генералот Сад Ман, портпарол на оперативната команда која ги координира војската и полицијата.

Плоштадот Ал-Тајаран е поприлично живо место во центарот на Багдад, а таму се собираат мајстори-надничари, во потрага по работа. Двајцата напаѓачи-самоубијци носеле елеци наполнети со експлозив.

 

 


Нови девет загинати во протестите во Иран


Техеран, 2 јануари, 2018 - 13:13 (META) 

Девет лица ги загубиле животите во текот на ноќта во новата рунда протести во повеќе ирански градови. Стотици луѓе се уапсени, а предизвикана е и голема материјална штета, јави иранската државна телевизија.

Повеќе од 100 луѓе се уапсени од полицијата ноќеска, во петтата ноќ на непрекинати протести.

Шест демонстранти загинале во судир со безбедносните сили откако ја нападнале локалната полициска станица во градот Чахдеријан. Уште две лица, меѓу нив и еден член на Револуционерната гарда загинале во регионот на Исфахан, а еден полицаец загинал во Наџафабад откако бил застрелан со ловџиска пушка.

Севкупно, од избувнувањето на протестите во четвртокот минатата недела, досега загинале најмалку 21 лица во земјата.

Мали групи демонстранти се појавиле на улиците на Техеран синоќа, но полицијата бргу ги сузбила.

Во неколку градови беа одржани и про-режимски демонстрации.


Хамас испука ракети, Израел бомбардираше од воздух, двајца Палестинци загинаа


Ерусалим, 9 декември, 2017 - 17:21 (META) 

Двајца Палестинци се убиени во судирите со израелската војска во Газа, а од почетокот на судирите биле повредени 1.100 луѓе, соопшти палестинското Министерство за здравство. Судирите продолжија вчера и денеска, како ескалации на муслиманското востание по признавањето на американскиот претседател Доналд Трамп на Ерусалим за главен град на Израел.

Израелските војници застрелале 30-годишен маж близу Кан Јунес, додека учествувал во протест на оградата со која израелските територии се одделени од палестинските. Друг 54-годишен Палестинец бил, исто така, убиен во судирите вчера. Израелската војска рече дека стотици Палестинци тркалале запалени гуми и фрлале камења на војниците кои биле од другата страна на границата.

Израелските одбранбени сили соопштија дека израелските авиони нападнале четири објекти кои припаѓаат на Хамас – палестинската исламистичка група која ја контролира Газа, како одговор на ракетите кои беа испукани во Јужен Израел од Газа.

Палестински извори тврдат дека при воздушните напади биле ранети најмалку 15 лица.

Според израелските власти, бомбардирани се  две локации за производство на оружје, складиште за оружје и воено соединение.

Претходно израелската армија соопшти дека ракета лансирана од Појасот Газа синоќа го погодила израелскиот град Здерот, без да наведат каква материјална штета е нанесена и дали има жртви.


Избеган затвореник и баран криминалец од Србија, биле убиените од менувачницата


Скопје, 4 декември, 2017 - 15:08 (META) 

Основното јавно обвинителство Скопје соопшти дека во соработка со МВР е идентификуван и вториот разбојник што беше убиен во средата минатата недела, при обид да ограби менувачница во скопската населба Кисела Вода.

Тој е  граѓанин на Србија, по кого поради претходно сторени кривични дела била распишана потерница.

Според првичните сознанија на јавното обвинителство, македонскиот државјанин, кој вршејќи разбојништво настрада во менувачницата, бил осуденик кој од користење слободен викенд во март годинава не се вратил в затвор. Тој летово бил сторител на петнаесетина разбојништва во банки, менувачници и во обложувалници. Разбојништвата претежно ги вршел сам, но последниот пат се здружил со познатиот разбојник од Република Србија.

Во однос на постапката против сопственикот на менувачницата, кој по физичката пресметка со разбојниците пукал во нив и ги убил, обвинителството уште нема донесено дефинитивна одлука.