Oсомничен со големо досие фрлил бомба кон полицајците, па бил убиен


Тетово, 4 јуни, 2018 - 13:29 (META) 

При полициска акција за апсење, утрово во тетовското село Ларце бил убиен Ј.Р. (38) од селото Ларце. Тој пред да биде застрелан фрлил бомба кон полициските специјалци, соопшти МВР.

Според полицијата, против сега убиениот во периодот од 2000 до 2016 година биле поднесени шест кривични пријави за вкупно 16 тешки форми на кривични дела. Бил пријавен за убиство и убиство во обид, за киднапирање, за недозволено држење на оружје или распрскувачки материи и за тешки кражби и нанесување телесни повреди.

Пред денешната акција имало четири обиди да биде уапсен, меѓутоа тој пружал отпор и тие акции биле безуспешни.

Акцијата почнала утрово во неговата куќа, при што при апсењето фрлил рачна бомба кон полицајците а потоа се дал во бегство, облечен во панцирен елек, вооружен со автоматска пушка со три рамки со куршуми за автоматска пушка, со карабин, како и пиштол марка ТТ 7.62 со рамка куршуми и четири рачни бомби.

Полицајците тргнале по него и при повторниот обид да биде уапсен на 200 метри од неговата куќа, почнал да пука и повторно се обидел да фрли рачна бомба, но бил застрелан.


Еден полицаец е убиен, а четворица се ранети во пукање во Колорадо


Денвер, 31 декември, 2017 - 20:39 (META) 

Еден полицаец е убиен, а четворица се ранети во пукање во американската сојузна држава Колорадо, пренесуваат медиумите во САД. Полицајците настрадале додека интервенирале по пријава за семејно насилство.

Локалните власти потврдија дека во вооружениот инцидент се ранети и двајца цивили. Осомничениот за нападот е убиен.

Пукањето се случило во комплекс апартмани во Хајлендс ранч, јужно од Денвер.

Повеќе патишта во околината биле затворени додека траела интервенцијата на специјалните полициските единици, а на местото пристигнал и бомбашки одред.

Помош на локалните власти им понудило и Федералното истражно биро (ФБИ).

Засега не е позната тежината на повредите на шестмината ранети во инцидентот, но, локалните медиуми пренесуваат дека од една од болниците каде биле хоспитализирани тројца повредени соопштиле дека тие се надвор од животна опасност.

Инаку, во Колорадо се забележани едни од најкрвавите масовни престрелки во историјата на САД, меѓу кои и пукањето во средното училиште „Колумбајн“ во 1999 година кога 13 лица, од кои 12 ученици беа убиени.


Приведени уште четири лица за убиството на 24-годишниот чаирчанец


Скопје, 27 декември, 2017 - 14:10 (META) 

Полицијата денеска извршила претреси и привела уште четири лица за убиството на 24-годишниот Б.И. кој беше застрелан на автобуска постојка на улицата „Џон Кенеди“ во Чаир пред една седмица, велат од МВР.

Во претходната ваква акција, ден по убиството, беа приведени три лица и беше пронајден автомобилот „југо“ во кој биле убијците.


Струмичанецот што смртно го рани ловецот се обидел да ги скрие трагите


Струмица, 10 декември, 2017 - 13:32 (META) 

СВР Струмица до Основното јавно обвинителство во Струмица поднесе кривична пријава за тешки дела против општата сигурност против З.Ј (38) од Струмица, во врска со смртта на ловецот кој беше смртно застрелан завчера во близина на браната Водоча.

Додека пријавениот со уште седум лица бил на лов, завчера околу 13.50 часот на местото викано „Медев рид“во близина на браната Водоча, испукал еден патрон од пушка што не била негова сопственост и го погодил Ж.И. од селото Рич, кој во моментот се движел по шумска патека низ непрегледна шума, на оддалеченост од околу 30 метри. Тоа му нанело повреди во главата и почнал да крвари и паднал во бесознание.

Тогаш пријавениот, според СВР Струмица, ги известил другите учесници во ловот дека Ж.И. се самозастрелал и пушката што ја носел повредениот ја скрил 50-тина метри подалеку. Потоа, додека другите ловци со трактор го однеле тешко ранетиот кон Струмица, З.Ј. на пушката што ја користел отстранил траги и потоа заминал во селото Белотино и ја вратил на нејзиниот сопственик.

И загинатиот и неговиот убиец немале дозвола за оружје ниту биле членови на ловно друштво.

З.Ј. е приведен а судија на претходна постапка од Основниот суд Струмица на З.Ј. му одредил мерка притвор од 30 дена.


Убиен маж во пукање во Топанско Поле


Скопје, 25 ноември, 2017 - 8:11 (META) 

Во престрелка што се случила во 22.30 часот вчера, во населбата Топанско Поле, близу супермаркетот „Принц“, еден 35-годишник го загубил животот, а еден 52-годишник добил тешки повреди.

Во инцидентот на улицата Лазо Трповски, животот го загубил И.А од селото Блаце, а повредениот Љ.Ќ. живеел недалеку од местото на инцидентот, на улицата Дижонска. Тој е пренесен во Ургентниот центар со тешки повреди.

Како што за „Мета“ објаснија очевидци, полицијата при истрагата затворила големо подрачје околу местото на инцидентот и сообраќајот се пренасочувал.


ВМРО-ДПМНЕ: Убијците на Мартин Јанушев имаат заштита од највисокиот врв на власта


Скопје, 17 ноември, 2017 - 19:52 (META) 

„Никој 15 дена не знае ни каде се наоѓа, ни кој му помогнал да избега на убиецот на Мартин Јанушев. Така е затоа што очигледно криминалците инволвирани во оваа егзекуција имаат заштита од највисокиот врв на власта. Така е затоа што криминалците беа ослободувани и обработуваа за СДСМ и сега институциите се блокирани и не смеат да ги гонат“, вели ВМРО-ДПМНЕ во реакција на денешната изјава на министерот за внатрешни работи, Оливер Спасовски, дека е познат идентитетот на убиецот.

„На Оливер Спасовски му беа потребни две недели да излезе со некакво име за наводниот сторител на ладнокрвното убиство и да ја убедува јавноста дека токму за него имал „несоборливи докази“. Оливер Спасовски нема несоборливи докази, туку си ја има само мувата на капата затоа што убиецот и сите негови помагачи се шетаат слободно и ја поминаа границата благодарение на помошта што им беше дадена, а целата јавност во рок од половина час знаеше кој е сторител“, се вели во соопштението.


ВМРО-ДПМНЕ: Цели три дена не е фатен убиецот на фудбалерот, исчезна и Спасовски


Скопје, 5 ноември, 2017 - 18:32 (META) 

„Убиецот на младиот фудбалер Мартин Јанушев за овие три дена можеше да избега и да стигне каде сака! Убиецот на младиот фудбалер Мартин Јанушев за овие три дена можеше да се засолни каде било, да бара алиби и да се обиде да ја префрли вината на некое трето лице“, порача Александар Нацев на партиска прес-конференција во седиштето на ВМРО-ДПМНЕ.

Тој праша зошто МВР молчи и не соопштува ништо за истрагата.

– Прашањето што се поставува во моментов гласи, кој му ја дава оваа предност на убиецот и зошто тој добива ваков третман? Зошто нема потерница? Каде се снимките од безбедносните камери? Зошто се крие со каков автомобил се движеле? Министерството за внатрешни работи го нема. Исчезна и Оливер Спасовски, кој љубеше да држи прес-конференции за мачки што гребеле автомобил. Граѓаните се загрижени за сопствената безбедност заради неефикасноста на полицијата командувана од кадри на СДС. Сè поголеми се и сомнежите дека намерно се одолгжува со истрагата – рече Нацев.

На прес-конференцијата одговори СДСМ. Владејачката партија порача дека наместо да шири нови лажни вести, ВМРО-ДПМНЕ треба да ги остави надлежните институции да ги расчистат сите инциденти.

„Сокривањата, заштитата и заташкувањата убиства, инциденти и криминал што беа одлика на владеењето на ВМРО-ДПМНЕ, завршија со ослободувањето и со професионализацијата на државните институции. Надлежните институции постапуваат во согласност со законите и ги расчистуваат сите инциденти без разлика на тоа кои се извршителите“, стои во соопштението на СДСМ.


Мажот застрелан во Аеродром во болница бил донесен мртов


Скопје, 3 ноември, 2017 - 20:13 (META) 

Мажот што денеска околу 17.40 часот бил застрелан со огнено оружје во скопската населба Аеродром, во Клиниката за хируршки болести „Свети Наум Охридски“ бил донесен мртов, информираше Министерството за здравство.

Потоа лекарите се обидувале да го реанимираат цели 40 минути, но тоа било безуспешно, па била констатирана смрт, известија од министерството.

Како што извести МВР, денеска околу 17.40 часот пред угостителскиот објект „Ред кафе“ на улицата Владимир Комаров во скопската населба Аеродром, со огнено оружје бил застрелан М.Ј.

Според некои медиуми, напаѓачот, кој потоа го фрлил и избегал, испукал четири-пет куршуми во жртвата.


Еден убиен и тројца повредени во пукање пред ноќен клуб во Берлин


Берлин, 16 септември, 2017 - 10:23 (META) 

Едно лице е убиено, а три се повредени во пукотници што ноќеска се случиле пред ноќен клуб во Берлин, јавуваат светските медиуми.

На пукањето му претходела расправија во близина на ноќниот клуб во берлинскиот кварт Ноехохешонхаузен.

Засега не се познати мотивите за расправијата и за пукањето, а нема информации од полицијата ниту за идентитетот на настраданите.


Македонски Австралиец убиен во ресторан во Мелбурн, напаѓачите избегале


Мелбурн, 9 септември, 2017 - 20:16 (META) 

Дени Димовски (31) е избоден до смрт во тепачка на забава во еден ресторан во западниот дел на Мелбурн, Австралија, јавуваат австралиските медиуми.

Несреќниот настан се случил во ресторанот „Корзо грил“ во Каролин Спрингс, во раните утрински часови во саботата. Полицијата соопшти дека групата избегала од местото на настанот. Групата заминала пеш од македонскиот ресторан откако жртвата била прободена неколкупати, но се верувало дека имало неколку автомобили во близина.

Димовски починал веднаш откако бил пренесен во болница.

Сопствениците на ресторанот, Џим и Јасмина Рибаровски, изјавиле дека Димовски бил редовен гостин во нивниот ресторан.