„Тврдокорни“: Со двојазичноста се губи македонскиот карактер на државата


Скопје, 21 јануари, 2018 - 14:52 (META) 

Здружението „Тврдокорни“ и Македонските обединети сили (МОС) заедно со уште неколку здруженија, денеска одржаа протест пред македонското собрание против законот за јазиците.

Тие порачаа дека нивните непријатели се во Собранието и Владата затоа што тие 27 години го уништуваат сопствениот народ. Според нив со двојазичноста се губи македонскиот карактер на државата, се губи и самата држава која дефакто станува трета албанска држава на Балканот.

Претставник на здружението „Тврдокорни“ ги читаше пратениците кои гласале за законот за употреба на јазиците и повика на масовен протест. Тие посакаа 1 милион Македонци да излезат на улица и да кажат доста на продавањето на националните интереси.

Според нив необјасниво е албанскиот јазик да биде службен јазик во Гевгелија, Валандово, Струмица, Кочани, Штип, Радовиш, Берово, Крива Паланка, а замеруваат и за тоа што власта ветувала дебати за се, сега ја суспендирала демократијата туркајќи го законот со европско знаменце.

По завршувањето на протестот, демонстрантите запалија знаме на Европската Унија.


„Тврдокорни“ денеска ќе протестираат против законот за јазиците


Скопје, 21 јануари, 2018 - 10:59 (META) 

Македонски обединети сили (МОС), „Тврдокорни“ и уште неколку здруженија денеска во 13 часот пред Собранието на Република Македонија организираат „Протест против двојазичноста и албанизација на Македонија“. Според организаторите, двојазичноста е губење на македонскиот карактер на државата.

Во повикот на ова здружение на граѓани се вели дека законот за двојазичноста ќе има долготрајни и несогледливи последици врз нашата татковина, дека двојазичноста е губење на македонскиот карактер на државата, уривање на асномските темели и де факто губење и на самата држава.

„Со двојазичноста де факто стануваме трета албанска држава на Балканот. Македонија по секоја цена треба и мора да остане дом на македонскиот народ. Двојазичноста треба, мора и ќе ја спречиме по секоја цена. Нема да дозволиме да се изгуби македонскиот карактер на државата“, се вели во повикот.


„Тврдокорни“ повикуваат на граѓанска непослушност


Скопје, 9 јануари, 2018 - 10:20 (META) 

Граѓанските здруженија „Тврдокорни“, Светскиот македонски конгрес, „Преродба“ и Македонски обединети сили објавија повик за граѓанска непослушност како средство за спротивставување на „политичкото насилство врз македонскиот народ“.

„Во услови на сеопшти напади за разграбување на македонската државност ги повикуваме сите Македонци и пријатели на македонскиот народ на секое место низ разни облици на граѓанска непослушност да го одбраниме својот дом и да ја одбраниме скапо платената македонска државност“, стои во соопштението.

Кампањата за граѓанска непослушност, како што се посочува во соопштението, „се води против внатрешните сили, како партии, организации, така и поединци кои вршат дејства во спроведување на плановите за разнебитување на македонската нација“.

„Сите оние кои во таканареченото Собрание ќе гласаат за навестените антимакедонски закони ќе бидат сметани за непријатели на македонскиот народ. Посебно родените како Македонци кои ќе гласаат за законите како: Законот за јазиците со кој се воведува франкештајнска досега невидена двонационална држава. Договорот за добрососедство со Република Бугарија со кој македонската историја, а со тоа и македонската нација се третираат како бугарски. Планот 3-6-9 со кој се напаѓаат моралот и здравата духовна култура на македонскиот народ. И на крај договарањата за името со кој македонското име во меѓународните односи му се предаваат во сопственост на јужниот сосед. Сите пратеници кои ќе учествуваат во гласањето на овие антимакедонски закони ќе бидат сметани како изроди од македонскиот народ“, стои во повикот.

Од здруженијата велат дека во наредните денови, недели, месеци на пошироката јавност ќе и даваат насоки за начините на изразување на граѓанската непослушност.


„Тврдокорни“ ќе ја дочекаат Новата година пред затворот во Шуто Оризари


Скопје, 31 декември, 2017 - 19:01 (META) 

Македонското патриотско здружение „Тврдокорни“ соопшти дека вечерва ќе организира дочек на Новата година пред истражниот затвор „Скопје“ во Шуто Оризари, како поддршка за притворените за насилствата во Собранието од 27 април.

„Новогодишната ноќ пред истражниот затвор ‘Шутка’ ќе биде во знак на поддршка на притворените уставобранители“, се вели во соопштеноето од здружението „Тврдокорни“.

Кривичниот суд во Скопје на 27 декември им го продолжи притворот за нови триесет дена на пратениците Крсто Мукоски, Сашо Василевски и Љубен Арнаудов, на поранешниот министер за внатрешни работи и директорот на Бирото за јавна безбедност Митко Чавков, организаторите на протестите на „За заедничка Македонија“ Игор Дурловски, Борис Дамовски, Богдан Илиевски и на уште шестнаесет лица осомничени за насилствата во Собранието од 27 април, оваа година.


„Тврдокорни“: ДПМНЕ има последна шанса да си го врати епитетот ВМРО


Скопје, 22 ноември, 2017 - 21:05 (META) 

Членови и претставници на здруженијата „Тврдокорни“, „Семакедонски национален совет“ и „Мост – Македонски обединети сили“ вечерва одржаа мирен протест пред седиштето на ВМРО-ДПМНЕ, против законот за употреба на јазиците.

Горан Неделковски од „Тврдокорни“ пред седиштетот на ВМРО-ДПМНЕ рече дека оваа партија ја има последната шанса да ја одбрани Македонија и да го заштити народот од законите што ги носи СДСМ.

– Со партиите СДСМ и ВМРО-ДПМНЕ е завршено, нивниот морал е чиста нула. Никакви лаги повеќе не ги спасуваат. Не е важно колку Никола Груевски и Зоран Заев сега ја имаат политилката моќ, нивните политички неморални дела станаа толку длабоки што не постои начин тие да имаат иднина како почитувани субјекти. Македонската национална партија ДПМНЕ, доколку посака, лесно може да ги спречи овие антимакедонски дејства. Имаат последна шанса да му се вратат на народот и да ја одбранат Македонија – рече Неделковски, кој, одговарајќи на прашања на новинарите, рече дека ВМРО-ДПМНЕ го загубила епитетот ВМРО и дека не го залужува тоа име.

Претседателот на „Мост – Македонски обединети сили“, Љубиша Настов, предупреди на можна ескалација на состојбите доколку законот биде изгласан во Собранието.

Страшо Олумчев од „Семакедонскиот национален совет“ рече дека бил еден од основачите на ВМРО-ДПМНЕ, но дека повеќе не се гледа во таа партија.

Тој рече дека ја почнале институционалната борба против законот за употреба на јазициите и потсети дека денеска здруженијата поднеле две барања, едното до Уставниот суд, со кое се оспорува донесувањето на законот, и другото до Јавното обвинителство за утврдување на кривична одговорност за пратениците во Собранието, „заради ставање во собраниска процедура на законот за двојазичност“.


„Тврдокорни“ го прогласија Иванов за „кукавица од претседател“ бидејќи не ги примил


Скопје, 12 октомври, 2017 - 20:21 (META) 

Дваесеттината членови на здружението „Преродба“, Семакедонскиот национален совет „Македониум“ и Македонското патриотско здружение „Тврдокорни“ кои денеска излегоа на протест пред претседателската резиденција, не успеаја да му го предадат барањето на претседателот Ѓорге Иванов за одземање на мандатот на премиерот Зоран Заев.

Претставници на здруженијата пред резиденцијата соопштија дека биле известени од обезбедувањето дека Иванов си заминал.

Гневни поради ова, тие го прогласија Иванов за „кукавица“.

– Овој момент да биде јавно пренесен за да види македонскиот народ каков кукавица од претседател има избрано. Кукавица од претседател кој што не сака да прими претставници на сопствениот народ, не може да има легитимитет – изјави Страшко Олумчев, претседател на Семакедонскиот национален совет „Македониум“.

Тој рече дека протестите ќе продолжат и дека повторно ќе се обидат да му ги достават барањата на Иванов.

Членовите на здруженијата денеска одржаа мирен протестен марш, кој почна пред канцеларијата на Делегацијата на Европската Унија и преку булеварот Мајка Тереза (поранешна Водњанска) продолжи до претседателската резиденција на Водно.

Од иницијативата велат дека со одземањето на мандатот на премиерот Зоран Заев „ќе биде овозможено да се преземат сите неопходни мерки за заштита на уставниот поредок на државата, од сите дејства со кои државата и македонскиот народ се ставаат под директна мирна окупација“.


„Тврдокорни“ на протест пред вилата на Иванов ќе бараат да му се одземе мандатот на Заев


Скопје, 12 октомври, 2017 - 9:56 (META) 

Иницијативата „Тврдокорни“ денеска повика на сенароден протест пред вилата на претседателот на државата, Ѓорге Иванов, со барање да му се одземе мандатот на премиерот Зоран Заев за, како што велат, непридржување кон дадените гаранции и работење против македонските национални и државни интереси за туѓи интереси и за уривање на државата.

„Со одземањето на мандатот ќе биде овозможено да се преземат сите неопходни мерки за заштита на уставниот поредок и на државата, од сите дејства со кои државата и македонскиот народ се ставаат под директна мирна окупација“, велат од инцијативата.

Протестот ќе почне во 17 часот, пред канцеларијата на Делегација на Европска Унија, од каде, како што велат од инцијативата, ќе се обратат до ЕУ и до НАТО и ќе испратат 12 протестни барања. Протестот ќе продолжи по улицата Мајка Тереза, сѐ до Вилата Водно, каде на претседателот Иванов ќе му биде предадено протестното барање.


„Тврдокорни“ протестираа за аболиција на напаѓачите во Собрание


Скопје, 2 септември, 2017 - 21:08 (META) 

Граѓанското здружение „Тврдокорни“ денеска во Скопје протестираше против најавениот закон за двојазичност, населување мигранти и побара да не се дели Македонија меѓу Бугарија и Грција.

„Тврдокорни“ со транспаренти „Слобода за патриотите, затвор за предавниците на Македонија“, побараа аболиција на, како што велат, „уставобранителите“, односно учесниците во насилниот упад во Собранието на 27 април.

Протестот почна со едноминутна молитва во дворот на Соборниот храм, по што пордолжи пред Владата каде демонстрантите извадија црвени картони, кои симоблично ѝ ги покажаа на новата Влада, за која велат дека лошо владее.

Организаторите најавија дека на 13 септември, кога ќе се носи законот за двојазичност, повторно ќе излезат на протест за да го искажат своето незадоволство.

Јанко Бачев од Народното движење на Македонија, кој се обрати пред насобраните граѓани, рече дека тие што упаднале во парламентот не се терористи туку луѓе кои го бранеле Уставот и никој не влегол таму заради насилство против лидерот на СДСМ, Зоран Заев.


„Тврдокорни“ на 2 септември ќе протестираат против двојазичност и кампови за мигранти


Скопје, 24 август, 2017 - 19:42 (META) 

Иницијативата „Тврдокорни“ преку нивната „Фејсбук“ страница повика на марш кој ќе се одржи на 2 септември во сабота, со почеток во 17 часот под мотото „Марш за аболиција на патриотите – Марш за будење на Македонскиот народ“.

Според најавите, протестот ќе почне од Соборниот храм по што ќе продолжи до Владата, а ќе заврши пред Собранието.

„Ајде сите заедно да се спротивставиме на неправдите кон македонскиот народ кои континуирано се спроведуваат десетина години наназад, сите заедно да се спротивставиме на двојазичноста, да се спротивставиме на обидот во Македонија да се населат т.н мигранти, ајде да им ставиме до знаење на политичарите дека народот е тој кој одлучува за својата иднина, и дека народот нема да седи мирен додека некој се обидува да му го одземе и тоа малку што е останато и нераспродадено, да им покажеме дека и ние имаме гордост. Ги повикуваме сите искрени патриоти да присуствуваат“, се вели во најавата на инцијативата на „Фејсбук“.


Почнува судењето на деветтемина обвинети за нападот во Собранието


Скопје, 18 мај, 2017 - 9:24 (META) 

Денеска во Основниот суд Скопје 1 почнува судењето против девет лица за кои Основното јавно обвинителство Скопје поднесе обвинение за насилствата во Собранието на 27 април.

Тие се товарат за учество во толпа што ќе спречи службено лице во извршување службено дејство.

На дел од обвинитетите судот им одреди мерки на претпазливост, а четворица од нив треба да бидат спроведени во судот од куќен притвор за денешното рочиште.

Пред судот се собрани околу триесетина членови на здружението „Тврдокорни“, кои, како што најавија вчера, ќе протестираат и ќе им дадат поддршка на своите „браќа и сестри“. Дел од насобраните носат црни маички на кои на предниот дел пишува „Слобода за жабата“, а на задниот дел – „Македонија на Македонците“.

Тие покажаа транспарент „Верував во сè, но не дека моите ќе ми судат за Македонија“.

Пред судот има полициско обезбебедување, но не во голем број, а засега нема ниту припадници на специјалните полициски сили.

Инаку, вчера претседателот на државата Ѓорге Иванов, во интервју за телевизијата „Канал 5“, побара амнестија од Собранието за обвинетите за насилствата.

Пратениците и членови на високото раководство на СДСМ кои беа нападнати во Собранието неколкупати го критикуваа јавното обвинителство за квалификацијата на кривичното дело, учество во толпа, бидејќи, како што велат, станува збор за многу посериозни дела, меѓу кои обид за убиство и терористичко загрозување на уставниот поредок на државата.

Досега се поднесени кривични пријави за 30 осомничени за насилствата во Собранието, од кои двајца се товарат за обид за убиство на лидерот на Алијансата на Албанците, Зијадин Села.