Фоторепортерите почнаа битка со „копи пејст“ објавите, ги чекаат и новинарите


Скопје, 26 март, 2018 - 9:29 (META) 

Фотографии, исти наслови, цели текстови копирани заедно со печатни грешки станаа секојдневие во македонските медиуми. Ретко кој го цитира и медиумиот кој прв објавил екслузивна вест. Какви алатки им стојат на располагање на новинарите и медиумските работници кога се во прашање авторските права? Опомени пред тужба за неовластено користење на авторски фотографии добија портали, но и еден весник и телевизија. Адвокатката која ги застапува фоторепортерите до минатата недела испратила 38 опомени пред тужба.

Пишува: Милена Атанасоска Манасиева – ПИНА

Не може да ги доброи медиумите кои недозволено му користеле авторски фотографии, но точно знае кое дело е негово, дури и да е сечено или фотошопирано. Многумина поминале неказнето, но кога пред седум години своја фотографија „позајмена“ ја видел на билборд како дел од кампања на Град Скопје, македонскиот фоторепортер Томислав Георгиев решил да престане да молчи. Чашата ја прелила токму ситуацијата со оваа државна институција. Градот Скопје нарачал мапи со информативни таблоа за градот, но од неколкуте фотографии употребени за билбордите една била на Георгиев, а не му била платена.

После неколкунеделни преписки со Град Скопје во кои тврдел дека тој со тоа студио нема што да се расправа, туку тие како нарачатели на билбордите, и откако ангажирал адвокат – се спогодиле.

Платија за користење на фотографијата и не дојде до тужба. А бев решен да ги тужам. Не ми беше заради пари, но сакав да почнеме да воспоставуваме некаков ред. Едноставно ми пукна филмот, бидејќи се работеше за институција – вели Георгиев.

Студент што има портал плаќа на рати

Тој, заедно со уште неколку фоторепортери од Македонија, поддржани од Самостојниот синдикат на новинари и медиумски работници (ССНМ) од оваа година најавија борба за нивните авторски права. Јавно соопштија дека веќе нема да толерираат користење на нивни фотографии за комерцијални цели без да им се плати за тоа или да се побара дозвола за објава. Акцијата веќе дава резултати.

Адвокатката Наталија Миленкова која ги води случаите на фоторепортерите, вели дека до минатата недела пуштила опомени пред тужби за онлајн-медиуми, по една за печатен медиум и за телевизија. Вкупно се пуштени 38 опомени кои се однесуваат за околу десеттина фотографии.

Досега имаме склучено три спогодби за обештетување и неколку се во постапка на преговарање, но имајќи го предвид и временскиот период што е потребен за достава на опомените по пошта, веруваме дека за дел допрва ќе следат јавувања – вели Миленкова.

Фоторепортерот Георгиев објаснува дека опомената пред тужба е вонсудско порамнување во износ од 250 евра. Некои од медиумите веќе побарале сумата да ја покријат на рати.

TomiИма еден студент кој има портал, кој е свесен каква грешка направил, па побара сумата да ја плати на рати. Практично, фотографијата ја плаќаат 250 евра. Тоа е скапо, но таа можеби би била гратис ако прашале за користење – вели Георгиев.

Тој потенцира дека ова не го прават за да заработат пари, туку да се создаде навика и почит кон авторските права. Решиле да нема толеранција за никого, па дури и за медиумите во кои самите работат. За медиумите кои нема да ги прифатат спогодбите ќе следат тужби, а според проценка на адвокат тоа ќе ги чини повеќе од 2.000 евра.

Адвокатката Миленкова додава дека секој автор поединечно одлучува и доставува докази до нивната канцаларија за покренување на соодветни постапки. За почеток решиле да почнат со опомени пред тужба, со цел да повлијаат да прекине лошата пракса на неовластено превземање, а и за да се избегнат скапи судски постапки.

Меѓутоа за жал, има портали и медиуми, кои во два или повеќе наврати, за краток временски период, извршиле повреда на авторските права на фотографите – објаснува Миленкова.

Кои се казните за кршење на авторското право:
Согласно позитивната законска регулатива во РМ, авторското право и сродните права уживаат кривична, граѓанска и прекршочна заштита. Кривичната заштита е предвидена во чл. 157 од КЗ каде јасно е наведено дека:  
(1) Тој што во свое име или во име на друг неовластено ќе објави, прикаже, репродуцира, дистрибуира, изведе, емитува или на друг начин неовластено ќе посегне по туѓо авторско право или сродно право, односно авторско дело, изведба или предмет на сродно право, ќе се казни со затвор од шест месеци до три години
(2) Тој што делото од став 1 ќе го стори преку преку компјутерски систем, ќе се казни со затвор од шест месеци до три години
(3) Тој што со делот оод став 1 прибавил поголема имотна корист, ќе се казни со затвор од шест месeци до пет години
(4) Тој што со делот оод став 1 прибавил значителна имотна корист, ќе се казни со затвор од една до пет години
(5) Обидот е казнив
(6) Примероците на авторските дела и предметите на сродните права, како и средствата за репродуцирање се одземаат
(7) Ако делото од овој член го стори правно лице, ќе се казни со парична казна
(8) Гонењето за повреда на морално право се презема по предлог

Плагијатор нема право да се нарекува новинар

Тамара Чаусидис, претседателката на ССНМ, вели дека не познава новинар или медиум кој на суд добил случај за неовластено преземање на авторска содржина. Но, знае доста фоторепортери кои се подготвени да го променат овој нејзин одговор.

И им се восхитувам заради тоа – вели таа.

Претседателката на новинарскиот синдикат очекува голем напредок на ова поле. Чаусидис потенцира дека ССНМ со пружањето правна помош на новинарите и медиумските работници во заштитата на нивните авторски права трасира досега непрооден пат.

Досега ниту еден новинар не се јавил во Синдикатот да бара да му биде заштитено авторското право. Ова, објаснува Чаусидис, е во основа спротивно на фактот дека плагијаторство се смета за еден од деветте смртни гревови на професионалните новинари.

tamaraОној што е фатен да плагира според Меѓународната федерација на новинари нема право да се нарекува новинар. Но за жал, ние некако не си го цениме трудот, па имате цели авторски текстови копирани од збор до збор. За разлика од нив, фоторепортери се јавуваат, бараат нивниот труд да се плати и како што реков во тек се спогодбени постапки или опомени пред тужба за повеќе правни лица – вели Чаусидис.

Какви алатки им стојат на располагање на новинарите и медиумските работници кога се во прашање авторските права? Фотографии, исти наслови, цели текстови копирани заедно со печатни грешки станаа секојдневие во македонските медиуми. Ретко кој го цитира и медиумиот кој прв објавил екслузивна вест.

Адвокатката Миленкова вели дека граѓанско-правната заштита се остварува врз основа на Законот за авторското право и сродните права, Законот за облигациони односи, Законот за обезбедување на побарувањата и Законот за парничната постапка. Исто така, предвидени се и и прекршочни санкции за непочитување на одредбите од Законот за авторското право и сродните права.

Автентичноста на новинарскиот текст се докажува нешто потешко, особено ако истиот е преработуван или изменуван, додека пак со фотографиите тоа е многу полесно. Постојат материјални докази со кои лесно се докажува поврзаноста на авторот со фотографското дело. Ако во практика се случи сепак да се оспорува авторството, постојат лиценцирани вештаци, кои можат да ја докажат автентичноста на фотографијата – вели Миленкова.

Додава дека во практика, честопати сме сведоци и на неовластено превземање на новинарски текстови, изворно, онака како што се објавени, вклучително со печатните или други терминолошки грешки. Миленкова потенцира дека кога се во прашање авторските права, Македонија не може да се пофали со судска пракса каква што имаат соседните држави, особено Србија и Хрватска како и Грција.

Тужи, не ни можеш ништо

На што се должи масовното копи пејст новинарство? Чаусидис смета дека една од причините е што никој досега не се обидел да ја среди оваа област. Но и затоа што многумина не сметаат дека е голема работа ако некој препише туѓ текст или објави туѓа слика.

И самите автори не се агилни, незгодно им е да си ги штитат правата, да се замераат со колегите. Некои и самите не ги почитуваат па не се бунат кога и нивните не се почитуваат. А сето тоа на крај доведува до стрмоглаво обезвреднување на трудот за што секој учесник во медиумскиот бизнис може да посведочи – вели таа.

Чаусидис тврди дека со ова паѓа и цената на новинарите затоа што зошто некој медиум би плаќал колумнист кога може цела колумна да ископира од туѓ сајт, зошто би плаќале фоторепортер кога може да преземе слика од фоторепортер кој часови минал на некој настан, зошто би плаќале истражувачки тим..

Фоторепортерот Георгиев вели дека некои од сопствениците на порталите се крајно безобразни кога ќе им се обрати.

Некои веднаш плаќаат, некои велат; „Тужи, не ни можеш ништо“. Дури од еден портал ми рекоа: „Па ние не ја украдовме сликата од тебе, од руска агенција ја земавме“. Зборот украдовме го користат при комуникација, свесни се дека не треба да ја имаат, ама не ја зеле од мене. Но јас велам, едноставно е, ако не си платил, не е твое.

И од државната МИА се краде

И покрај алармантната состојба со прекршувањето на авторските права, особено од страна на онлајн-медиумите со што се обезвреднува трудот на новинарите и се стимулира плагијаторство, кај многумина има оптимизам. Драган Антоновски, генерален директор и главен и одговорен уредник на Македонската информативна агенција (МИА), вели дека и од нив многумина неовластено земаат содржини и фотографии.

draganМИА, на пример, би можела да живее само од тужби. Но, тоа секако не е целта. Многумина мислат: „па тоа е државна агенција“ и дека може да се зема без разлика дали се претплатници или не. Дури си потпишуваат фотографии дека се од МИА, што е само доказ од каде ги земале. Ако не си претплатник, не смееш да ги користиш услугите, толку е едноставно – вели Антоновски.

Тој открива дека во моментов за услугите на МИА се претплатени 7 портали, 5 весника, 9 телевизии, 4 радија, неколку пи-ар агенции.

Антоновски е оптимист дека со авторските права треба постепено да се делува и дека сите треба да го сфатат како процес на кој ќе се навикнеме. Како долгогодишен новинар се сеќава дека порано имало многу поголема почит меѓу колегите.

Се знаеше што е репортер, коментатор, аналитичар, што е вeст и репортажа. Се работеше по некои светски стандарди. Беше голем грев да му земеш на некој нешто и никој не помислуваше да го прави тоа – вели директорот на МИА.

 

Сè што важи офлајн важи и онлајн

Претседателката на ССНМ, Чаусидис вели дека порталите кои држат до себе не си дозволуваат плагијаторство.

– Можеби порано додека никој не го покренуваше ова прашање луѓето и си дозволуваа, но сега забрзано оди освестувањето – вели таа.

Токму злоупотребата на авторските права како адут го користат поборниците на идејата за регулација на онлајн –медумите. Но, Чаусидис вели дека сè што важи офлајн важи и онлајн.

– Не знам од каде се таа чудна интерпретацијата дека законите не важат за интернет сферата. Кражба преку интернет или физичка кражба сеедно е кражба и подлежи на закон – децидна е таа.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


Десетици медиуми добија опомени за тужби за прекршување на авторски права за фотографии


Скопје, 8 март, 2018 - 12:13 (META) 

Голем број македонски медиуми и неколку приватни лица деновиве добиле писма со опомена од адвокатка којшто застапува неколкумина професионални фоторепортери од Македонија во постапка за неовластено користење нивни авторски фотографии.

Иницијативата за заштита на правата на авторите е поддржана од Самостојниот синдикат на новинари и медиумски работници (ССНМ), и нивниот адвокат Наталија Миленковска, како што ни изјави, испратила триесетина опомени до медиуми или лица што неовластено користеле фотографии да се јават да се постигне спогодба за надоместок кон авторите на фотографиите. Во спротивно, ќе уследат тужби, објаснува Миленковска.

– Опоменатите добија рок од пет дена да ни се јават за да се договориме како ќе се постапи во овој случај, за спогодбено да ги обештетат авторите. Станува збор само за случаи за комерцијална употреба на фотографиите. Испративме триесетина опомени, а ќе има уште многу. Интензивно работиме на тоа, а имаме и многу потешкотии. На пример, некои портали што неовластено презеле и објавувале фотографии не се на оние адреси што се наведени во импресумите, па имаме многу работа да ги пронајдеме – објаснува адвокатката.

Фотографијата со Груевски пред Основниот суд Скопје 1 на Маја Златевска за само неколку часа доживеа 50 „преобјавувања“.

Фотографијата со Груевски пред Основниот суд Скопје 1 на Маја Златевска за само неколку часа доживеа 50 „преобјавувања“.

Според фоторепортерот Томислав Георгиев, кој е еден од оние што ја почнаа оваа акција поддржани од адвокатката, идејата не е толку да се спечалат многу пари по секоја цена, туку да се постави пример како ќе се однесуваат луѓето кон трудот на фоторепортерите. Како што вели тој, досега фоторепортерите доставиле докази за околу 150 случаи на украдена фотографија. Во некои случаи имало и по 50 крадења на фотографија во еден ден, како во случајот со фоторепортерката Маја Златевска, чија фотографија од судење на Никола Груевски за само неколку часа доживеала 50 „преобјавувања“.

– На моја иницијатива, половина и повеќе од парите што би се зеле, ќе одат за адвокат. Идејата не е да заработиме, туку да се реши веќе овој проблем и да се постави пример. Многупати во изминативе години се краделе мои фотографии, но сега веќе мора нешто да се преземе за да прекине оваа „перверзија“ – вели Георгиев.

Станува збор за барање за обештетување од по 250 евра по неовластено објавена фотографија, но и на тоа би попуштиле, вели Георгиев.

Иницијативата за многумина е изненадување, иако беше најавена во декември 2017 на прес-конференција.

Состојбата со прекршувањето на авторските права, особено од страна на онлајн медиумите во државата е алармантна и тоа е нотирано во повеќе стручни анализи, но досега немаше конкретни чекори. Ваквата состојба доведе до обезвреднивање на новинарскиот труд и дестимулираше креирање оригинални содржини.

Кај многумина проблемот со прекрашувањето на авторските права кај онлајн медиумите влијаеше за наивни повици кон нивна регулација. Сепак, преовладува мислењето дека авторските права се веќе регулирани во Законот за авторски и сродни права, а за аудио-визуелни продукти одреби има и Кривичниот законик и воведувањето на уште еден механизам ќе донесе повеќе проблеми отколку решенија.

Според анализите, главниот проблем е неспроведувањето на законите, а ова е прв чекор што воедно е и тест за судскиот систем за воведување ред со неовластеното преземање на авторски содржини, без разлика дали станува збор за текст, фотографија или видео.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Блокирана одлуката на Трамп за укинување на програмата за помош на младите имигранти


Вашингтон, 10 јануари, 2018 - 10:34 (META) 

Американскиот судија Вилијам Алсап синоќа привремено ја блокирал одлуката на администрацијата на претседателот на САД, Доналд Трамп за укинување на програмата која ги штити младите имигранти од депортација.

Како што пренесуваат светските агенции, Алсап го одборил барањето на сојузната држава Калифорнија и на другите тужители да се спречи укинувањето на програмата која ги штити децата кои со родителите илегално дошле во САД, се додека не бидат завршени судските постапки по тужбите на засегнатите.

Алсап рекол дека адвокатите кои ја поддржуваат програмата јасно покажале дека младите имигранти можат да сносат озбилна и неповратна штета доколку судот би донел поинаква одлука. Судијата, исто така, рекол дека адвокатите имаат големи шанси да успеат во тие судски постапки.

Инаку, програмата заштитува околу 800.000 лица кои се доведени во САД илегално како деца или дошле со своите семејства кои останале во САД и по истекот на визите. Програмата вклучува стотици илјади млади на факултетска возраст, кои медиумите во САД ги нарекуваат „Сонувачи“ (Dreamers).

Програмата ја иницираше поранешниот американски претседател, Барак Обама во 2012 година.

Американскиот министер за правда, Џеф Сешонс во септември, минатата година објави дека програмата ќе биде постепено укината, наведувајќи дека поранешниот претседател Обама ги пречекорил своите овластувања кога го применил во 2012 година, заобиколувајќи го Конгресот.


ДИК ќе одлучува за прегласување на избирачко место во Чаир


Скопје, 6 ноември, 2017 - 15:06 (META) 

Државната изборна комисија (ДИК) на денешната седница, закажана за 16 часот, треба да го разгледа и да го усвои решението на Управниот суд за повторување на гласањето на избирачкото место 2901 во општина Чаир, од вториот круг на локалните избори, одржан на 29 октомври.

Инаку, повтореното гласање на ова избирачко место во Чаир може да влијае на конечниот резултат од изборите во оваа општина, односно да го одреди новиот градоначалник на општината.

Разликата во Чаир меѓу Висар Ганиу од ДУИ и Зекирија Ибраими од Беса во вториот круг од изборите беше 209 гласа, во прилог на Ганиу, а на избирачкото место 2901 разликата е 66 гласа. На ова избирачко место вкупно се запишани 719 гласачи.

Управниот суд претходно ги одби другите 15 тужби што политичките партии ги поднесоа по вториот круг од локалните избори. Најмногу тужби против одлуките на ДИК до судот поднесе Алијанса за Албанците – вкупно 11, четири поднесе Беса, а една тужба поднесе Народното движење за Македонија (НДМ).


Се чека Управен суд да каже што решил за приговорите на партиите


Скопје, 5 ноември, 2017 - 10:54 (META) 

Според соопштението објавено на веб-страницата на Управен суд вчера доцна вечерта, денеска судот би требало да соопшти какви пресуди донел за вчера разгледаните 10 тужби од политичките партии против одлуките на Државната изборна комисија (ДИК), што ги разгледуваше.

Од вкупно 16 примени тужби, судот вчера разгледуваше 10, а за денеска остануваат шест. Партиите незадоволни од неприфаќањето на нивните приговори во ДИК поднесоа тужби, и тоа Алијанса за Албанците – 11, Беса поднесе четири тужби и НДМ една тужба.

Според соопштението потпишано од претседателот на Управниот суд, Бурим Сејдини, донесена е одлука само за една тужба.

„Ве известуваме дека во текот на денешниот ден, 4 ноември 2017 година, во Управниот суд се одржаа 10 јавни седници по тужби на подносителите на кандидатски листи за локалните избори 2017 година, додека јавните седници за преостанатите шест тужби ќе се одржат во текот на утрешниот ден и тие се објавени на веб-страницата на Управниот суд. Исто така, Ве известуваме дека до овој момент донесена е одлука по една тужба, која на веб-страницата на судот ќе биде објавена и достапна за јавноста најдоцна утре, 5 ноември 2017 година“, стои во вчерашното соопштение објавено на веб-страницата на Управен суд.


Нема прегласување на првиот круг од локалните избори, одлучи ДИК


Скопје, 24 октомври, 2017 - 20:06 (META) 

Државната изборна комисија (ДИК) на вечерашната седница ги прогласи за конечни резултатите од првиот круг од локалните избори, откако од Управниот суд ги доби одлуките за тужбите поднесени од ВМРО-ДПМНЕ, ТМРО, Левица и од Алијанса за Албанците.

На седницата на ДИК било заклучено дека нема да има прегласување на првиот круг во ниту една од општините во Македонија, додека вториот круг од локалните избори ќе се одржи во 35 општини, каде на 1.517 избирачки места ќе се гласа за градоначалник.

Втор круг за избор на градоначалник ќе има во скопските општини Гази Баба, Кисела Вода, Бутел, Шуто Оризари, Чаир и Сарај.

Управниот суд прифати само една од 24 тужби поднесени од ВМРО-ДПМНЕ, односно таа што се однесува на гласачкото место 2461 во Општина Сарај. Сепак, Судечкиот совет го одби приговорот на ВМРО-ДПМНЕ, а во одлуката објавена на веб-страницата на судот се наведува дека ДИК погрешно утврдила дека приговорот на ВМРО-ДПМНЕ се однесува на гласањето за градоначалник на Скопје, а станувало збор за Совет на Град Скопје. По разгледувањето на оригиналните записници, Управниот суд утврдил дека ДИК правилно одлучила да го одбие приговорот бидејќи доказите укажуваат дека не е прекршен Изборниот законик.


Судот прифати една тужба на ВМРО-ДПМНЕ за Сарај, ДИК ќе каже дали ќе има прегласување


Скопје, 24 октомври, 2017 - 11:03 (META) 

Управниот суд уважи една жалба од 28-те поднесени тужби против приговорите одбиени од Државната изборна комисија (ДИК) за гласањето и за сумирањето на резултатите од првиот круг од локалните избори што се одржа на 15 октомври.

Управниот суд ги објави одлуките по сите тужби од партиите на својата веб-страница, според кои уважена е една тужба поднесена од коалицијата предводена од ВМРО-ДПМНЕ за поништување на гласање на избори за членови на Советот на Град Скопје, на гласачкото место 2461 во општина Сарај.

Сите други тужби Управниот суд ги одбил како неосновани.

Инаку, тужби до Управниот суд за одбиените приговори од ДИК поднесоа ВМРО-ДПМНЕ, вкупно 24, а по една – ТМРО, Левица и Алијанса за Албанците.

По добивање на одлуката од Управниот суд, ДИК треба да се изјасни дали прегласувањето во избирачкото место 2461 во Сарај ќе има влијание врз изборниот резултат и дали врз основа на тоа ќе има прегласување на ова избирачко место.

Одлуките на Управниот суд се конечни.

По тужбите на партиите одлучуваа пет судечки совети, секој составен од пет судии, избрани со жрепка. Управниот суд објави дел од одлуките во текот на вчерашниот ден, но поради проблеми со компјутерскиот систем, како што беше соопштено од судот, другите 12 одлуки беа објавени ноќеска.

Вториот круг од локланите избори за градоначалници во 35 општини ќе се оджри в недела, на 29 октомври.


Пратениците се надмудруваат кој колку тужби за клевета и навреда поднел


Скопје, 4 април, 2017 - 14:26 (META) 

На седмото продолжение на Конститутивната седница, пред паузата за ручек, пратениците наместо за точката на дневен ред односно за изборот на претседател и членови на Комисијата за избори и именувања расправаа кој колку тужби за клевети и навреди поднел.

Откако независниот пратеник од коалицијата на СДСМ, Павле Богоевски рече дека лидерот на ВМРО-ДПМНЕ Никола Груевски за месец март потрошил 184.000 денари за роаминг од неговиот службен мобилен телефон, пратеникот Илија Димовски ја демантираше информацијата и притоа додаде дека тој никогаш не поднесувал тужби за клевета и навреда.

– Информацијата дека Груевски потрошил 3.000 евра за роаминг е целосна невистина. Јас се сомневам дека тоа е направено свесно за да имаат медиумите на Сорос од каде да влечат неточни информации и да го претставуваат како невистина. Да се надеваме дека е почетничка грешка. Јас подолго време сум во политиката и кон мене се кажувале илјадници невистини и клевети, но јас имам принцип никогаш да не поднесувам тубжи – рече Димовски.

Радмила Шекеринска од СДСМ рече дека функционерите од ВМРО-ДПМНЕ до сега наплатиле 36.000 евра од тужби за клевети и навреди.

– Трите барања за тужби што ги поднесев јас се заглавени во судските лавиринти затоа што тужените не доаѓаа на судење. Доколку е неточна информацијата за сметката за телефон, очекувам пратеникот Никола Груевски да ја демантира информацијата и да покаже дека сметките ги платил од сопствен џеб – рече Шекеринска.

Димовски рече дека нема проблем ако тужбите се на релација политичари спрема политичари, на што реплицираше Петре Шилегов од СДСМ кој истакна дека тој никогаш немал проблем да го тужат политичари, но додаде дека него „го тужат криминалци“.

Седницата ќе продолжи во 15 часот.


СОС сака да го оцрни граѓанското општество со невистини и со манипулации


Скопје, 7 февруари, 2017 - 13:06 (META) 

Јавно извинување и повлекување на сите лаги, клевети и дезинформации изнесени од „Стоп операција Сорос“ (СОС), побара 21 граѓанска организација денеска на прес-конференција.

Доколку не добијат јавно извинување, тие велат дека ќе бидат принудени правдата да ја бараат на суд, односно ќе поднесат тужби за клевета и за навреда.

– На СОС и на неговите налогодавци очигледно им пречат слободното и независно граѓанско општество, слободата на изразување и, воопшто, сите демократски вредности и принципи. Затоа тие во јавноста пласираат невистини, манипулативни податоци и лажни информации, со намера да го замолчат граѓанското општество – вели програмскиот директор на Фондацијата за интернет и општество „Метаморфозис“, Филип Стојановски.

Од граѓанските организации истакнаа дека е клевата и лага дека тие работеле да ја дестабилизираат државата, дека предизвикувале криза, дека работеле за партиски цели, дека биле плаќани за да одат на протести и дека добивале милиони на нивните сметки за партиски цели.

– Упатуваме порака до сите државни институции што поседуваат информации за работењето на граѓанските организации да не ги надминуваат своите законски надлежности и да не се ставаат во служба на недемократската хајка против слободоумното граѓанско општество – рече Сања Богатиновска од Здружението на млади европски федералисти.

Граѓанските организации порачаа дека и понатаму ќе останат доследни на своите заложби за слобода, демократија, еднаквост, правда и почитување на човековите права.


Лавина барања за извинувања и деманти на тврдењата на Чилиманов и на СОС


Скопје, 6 февруари, 2017 - 15:58 (META) 

Деманти на нападите и на обвинувањата изречени од новинарот Цветин Чилиманов и од Никола Србов, кои заедно со новинарот Ненад Мирчевски, во саботата на прес-конференција изрекоа многу обвинувања и клевети, продолжуваат да стасуваат до медиумите и попладнево.

Уште шест невладини организации, НВО Инфоцентар, Младински културен центар – Битола, Фондација за локален развој и демократија „Фокус“ – Велес, Центар за одржлив развој на заедницата –Дебар (ЦОРЗ), „Евротинк“ од Скопје и „Пактис“ од Прилеп, изречените тези од иницијативата „Стоп операција Сорос“ ги нарекоа груби лаги, клевети и манипулации. Тие побараа објавување на демантите во медиумите и извинувања.

„Граѓаните добро знаат дека НВО Инфоцентар непрекинато веќе 13 години работи независно, непартиски и транспарентно, залагајќи се за слобода на изразување, слободни медиуми, демократија и почитување на правата на сите граѓани во Република Македонија“, реагира НВО Инфоцентар.

Младинскиот културен центар – Битола вели дека се спомнати неточни високи суми на префрлени средства од страна на Фондацијата „Отворено општество“ – Македонија на сметката на МКЦ-Битола, наводно за предизборни активности.

Фондација за локален развој и демократија „Фокус“ – Велес тврдењата на „Стоп операција Сорос“ ги нарече груби лаги и манипулации.

„Згрозени сме од оркестрираниот напад на три лица кои под превезот на некаква независна граѓанска иницијатива се осмелија да ја вмрежат Фондацијата за локален развој и демократија „Фокус“ – Велес во некаква шема со исто така граѓански здруженија, кои наводно работат надвор од законските прописи и по нечиј диктат“, се вели во нивната реакција.

Центарот за одржлив развој на заедницата –Дебар (ЦОРЗ), тврдењата на СОС ги нарече „гнасни лаги и невистини“.

„ЦОРЗ – Дебар ја демантира изјавата на СОС дека работи по наредба на Фондацијата „Отворено општество“, според агенда диктирана од Џорџ Сорос и на политички кампањи на СДСМ. Напротив, ЦОРЗ – Дебар работи на остварување на своите цели во согласност со статутот на програмските области: добро владеење, одржлив развој и младински прашања“, се вели во демантот.

Претходно со деманти реагираа и фондацијата „Метаморфозис“ и многу  други граѓански здруженија и организации.