!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ИД не е скршена, планира напади во Европа, тврди уапсен џихадист


Лондон, 13 декември, 2017 - 12:09 (META) 

Борец на Исламска држава, уапсен на границата со Турција, изјавил дека ИД не е се распаднала туку дека нејзините борци се префрлени во Европа за да извршат напади.

Британскиот весник „Дејли мејл“ наведува дека турските безбедносни служби минатиот месеци го уапсиле дваесет и шестгодишниот Садам ал-Хамади на турско-сириската граница. Тој тврди дека ИД не се распаднала, туку дека нејзините борци го искористиле хаосот кој настанал при ослободувањето на Рака и побегнале кон европските држави во кои планираат напади.

Ал Хамади соопштил дека терористите преку Турција ќе влезат во Европа и ќе изведат терористички напади. Весникот наведува дека уапсениот признал дека помогнал при шверцување терористи во Рака, која се сметаше за главно упориште на ИД.

Уапсениот 18 месеци бил во редовите на ИД, а тврди дека регрутирал и многу борци од повеќе држави, вклучувајќи ја и Британија.


Светот да го признае Ерусалим за престолнина на Палестина, порача Ердоган


Истанбул, 13 декември, 2017 - 11:25 (META) 

Турскиот претседател Реџеп Тајип Ердоган денеска на вонредниот самит на Организацијата за исламска соработка (ОИС) во Истанбул ги повика сите земји во светот да го признаат Ерусалим за престолнина на Палестина.

– Ерусалим е нашата црвена линија. Израел е окупаторска и терористичка држава – изјави Ердоган на почетокот на самитот посветен на прашањето за Ерусалим.

Ердоган, покажувајќи фотографија од палестинско момче со затворени очи и опколено од израелски војници, рече дека израелската Влада ги малтретирала беспомошните луѓе. Тој ги повика САД да се откажат од „незаконската и провокативна одлука “ за Ерусалим, додавајќи дека со ваквиот потег САД ги наградува „терористичките активности“ на Израел.


Уапсени 23 странци во Истанбул кои планирале голем напад


Истанбул, 9 декември, 2017 - 20:48 (META) 

Во голема операција на антитерористичките единици денеска во најголемиот турски град Истанбул се уапсени 23 странски државјани, под сомнение дека се припадници на терористичката Исламска држава и дека подготвувале голем напад.

При претресите биле запленети голем број на документи на ИД и дигитални материјали.


Во Турција издадени налози за апсење на 360 лица од редовите на војската


Анкара, 29 ноември, 2017 - 10:33 (META) 

Турското обвинителство издало налози за апсење на 360 лица, повеќето војници, во рамки на операцијата против приврзаниците на муслиманскиот свештеник Фетулах Ѓулен.

Во операцијата, која е фокусирана на Истанбул, се уапсени 333 војници, меѓу кои 216 лица на активна должност.

Истанбулската полиција продолжува со операцијата на апсење осомничени, а приватната турска новинска агенција „Доган“ наведува дека меѓу уапсените има и седум пилоти.

Операцијата против приврзаниците на Ѓулен секојдневно продолжува, 16 месеци по обидот за пуч во Турција, па минатата недела беа приведени околу 700 лица.

Анкара ги обвинува Ѓулен и неговата мрежа за организирање на минатогодишниот неуспешен пуч, но Ѓулен ги негира ваквите тврдења.

Повеќе од 50.000 лица се уапсени и ставени во притвор до почетокот на судењето поради сомнеж за поврзаност со Ѓулен, додека 150.000 лица се сменети или суспендирани од позиции во јавниот и во приватниот сектор откако на 15 јули минатата година, при обидот за пуч во Турција, беа убиени 250 лица.

Турските власти велат дека само таквата чистка може да ја неутрализира заканата од мрежата на Ѓулен, за која тврдат дека е инфилтрирана во институциите како што се војската, судството и образованието.


Ердоган тврди дека е на иста бранова должина со Трамп


Анкара, 28 ноември, 2017 - 14:31 (META) 

Првпат по долго време, лидерите на Турција и на САД беа на иста бранова должина, изјави турскиот претседател Реџеп Таип Ердоган, коментирајќи го неодамнешниот телефонски разговор со американскиот претседател, Доналд Трамп.

Говорејќи пред пратениците на својата Партија за правда и развој, Ердоган рече дека во следните денови ќе продолжат разговорите со Трамп за прашања како што се курдските борци од Сирија, кои Турција ги смета за терористи, како и за мрежата на приврзаници на Фетулах Ѓулен, кого Анкара го обвинува за минатогодишниот неуспешен државен удар.


Решението за Сирија ќе бара отстапки од сите страни, изјави Путин


Сочи, 22 ноември, 2017 - 17:46 (META) 

Рускиот претседател, Владимир Путин, денеска изјави дека постои вистинска шанса за ставање крај на судирите во Сирија, додавајќи дека решението ќе бара отстапки од сите учесници во судирите, вклучително и од сириските власти на претседателот Башар ал Асад, јавуваат светските агенции.

Путин ова го истакна во своето обраќање во Сочи, на отворањето на мини-самитот посветен на Сирија, на кој учествуваа претседателите на Турција и на Иран, Реџеп Таип Ердоган и Хасан Рохани.

– Сирискиот народ треба сам да ја одреди својата иднина… Очигледно е дека тој процес нема да биде едноставен и ќе бара компромиси и отстапки од сите учесници, вклучувајќи ја и сириската влада – рекол Путин.

Тој додал дека Москва, Техеран и Анкара ќе преземат најактивни напори овој процес да биде што е можно попродуктивен.

Судирите меѓу сириските владини сили и опозициските бунтовници траат од 2011 година.


Нов бран апсења во Турција


Анкара, 22 ноември, 2017 - 10:24 (META) 

Турските власти издале налог за апсење на 216 лица, вклучувајќи и поранешни вработени во Министерството за финансии, поради сомневање дека се поврзани со неуспешниот обид за пуч.

Досега се уапсени 17 поранешни вработени во Министерството за финансии, додека властите трагаат по уште 65 лица за наводни врски со мрежата на муслиманскиот свештеник Фетулах Ѓулен.

Во одвоени акции, властите извеле операции во 40 провинции против „приватни имами“ за кои се верува дека регрутираат членови за мрежата на Ѓулен од редовите на турските вооружени сили.

Анкара го обвинува Ѓулен, кој со години живее во егзил во САД, дека го организирал обидот за пуч на 15 јули минатата година и повеќепати побара од САД да го испорачаат. Ѓулен ја негира вината.
По обидот за пуч, повеќе од 50.000 лица се ставени во притвор до почетокот на судењето, додека околу 150.000 се сменети или суспендирани од позициите во војската, јавниот и во приватниот сектор.


Уредникот на „Џумхуријет“ осуден на затворска казна за порака на „Твитер“


Анкара, 21 ноември, 2017 - 14:23 (META) 

Турскиот суд го осуди уредникот на интернет-изданието на опозицискиот весник „Џумхуријет“, Огуз Гувен, на три години и еден месец затвор врз основа на обвинението за прибегнување кон „терористичка пропаганда“, соопшти денеска весникот.

Гувен е обвинет поради порака на „Твитер“, во која е јавено дека во сообраќајна несреќа загина обвинител што го поднел првото обвинение против мрежата на проповедникот Фетулах Ѓулен.

Гувен е правно одговорен за профилот на „Твитер“ на овој медиум.

Во твитот кој бргу бил избришан е наведено дека обвинителот бил „покосен“.

Судот во Истанбул вчера пресуди дека пораката претставува пропаганда за движењето на Ѓулен, кој во Турција за смета за одговорен за минатогодишниот неуспешен пуч.

Ѓулен, кој живее во САД, ја демантира вмешаноста во неуспешниот обид за пуч.

Се очекува Гувен да ја обжали пресудата.


НАТО му се извини на Ердоган што го постави на листата на непријатели


Брисел, 18 ноември, 2017 - 11:25 (META) 

Генералниот секретар на НАТО, Јенс Столтенберг, му се извини на претседателот на Турција, Реџеп Таип Ердоган, затоа што неговото име се најде на листата на непријатели за време на воена вежба.

Ердоган повлече 40 војници од вежбата затоа што неговото име, но и името на Кемал Ататурк, се најдоа помеѓу непријателите и рече дека тоа „не е единство и не е алијанса“.

Столтенберг истакна дека инцидентот не претставува став на НАТО и дека е во прашање „потег на поединец“, како и дека листата на непријатели, наводно, ја составувало лице што не е вработено во НАТО.

Столтенберг објасни дека тоа лице било под договор со норвешките власти, кои го тргнале од воената вежба и спроведуваат истрага за инцидентот.

– Турија е многу ценет сојузник на НАТО и тие придонесуваат за заедничката безбедност – изјави Столтенберг.


Уапсени 60 припадници на безбедносните служби во Турција


Анкара, 16 ноември, 2017 - 9:54 (META) 

Турските власти уапсиле 60 поранешни припадници на безбедносните служби, осомничени за поврзаност со неуспешниот воен удар.

Властите издале налог за апсење на 100 поранешни припадници на безбедносните служби во акција, чиј фокус била Анкара, но е спроведена и во други 30 провинции.

Се верува дека осомничените се поврзани со турскиот свештеник Фетулах Ѓулен, кого Анкара го обвинува за неуспешен воен удар во јули 2016 година.

Повеќе од 50.000 лица, вклучувајќи и припадници на безбедносните служби, војска, како и службеници, се приведени по неуспешниот воен удар.