!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Одговорноста за убиството на рускиот амбасадор во Турција ja презеде Ал нусра


Истанбул, 21 декември, 2016 - 14:13 (META) 

Одговорноста за убиството на рускиот амбасадор во Турција, Андреј Карлов, ја презеде терористичката организација Џеиш ел фарах, порано позната како фронтот Ал нусра, јавуваат светските медиуми.

Терористичката група ја презеде одговорноста преку писмо кое го објавиле на интернет.

Рускиот амбасадор во Турција, Андреј Карлов, почина откако беше ранет со огнено оружје за време на изложбата „Русија во очите на Турците“.


Постигнат напредок во преговорите за обединување на Кипар


Женева, 12 ноември, 2016 - 10:20 (META) 

На преговорите за повторно обединување на поделениот остров Кипар е постигнат значаен напредок, а разговорите ќе продолжат на 20 ноември во Женева, се наведува во соопштението од Обединетите нации.

Генералниот секретар на ОН, Бан Ки-му, кој во понеделникот го отвори новиот круг преговори меѓу претседателот на кипарските Грци, Никос Анастасиадис, и претседателот на кипарските Турци, Мустафа Аканџи, синоќа рече дека и двајцата претседатели се посветени годинава да најдат решение.

„Во последните пет дена беа разгледани територијалните и други прашања. Постигнат е значаен напредок”, стои во соопштението на ОН.

На барање на лидерот на кипарските Грци, двајцата челници одлучиле да направат пауза и преговорите да продолжат во Женева на 20 ноември.

На Кипар, кој е поделен во 1974 година, живеат 800.000 кипарски Грци и околу 22.000 кипарски Турци. Кипарските Грци, кои го претставуваат Кипар во ЕУ, се непопустливи во барањето турските сили да се повлечат од островот.

Илјадници турски војници се наоѓаат во северниот дел на Кипар, во отцепената држава на кипарските Турци, која е признаена само од Анкара.


Пропадна тендерот за продажба на ФК „Брегалница“


Штип, 3 октомври, 2016 - 16:31 (META) 

Една понуда пристигнала на јавниот повик за продажба на фудбалскиот клуб „Брегалница“ од Штип. На денот кога требаше да бидат отворени понудите, Општината Штип одлучи да го поништи тендерот и уште веднаш распиша нов. Според објаснувањето од Општината, тендерот требало да биде меѓународен, со објава во странски медиум. Имено, идејата била да привлечат странски инвеститори.

Отворањето на понудите имаше голем интерес од јавноста по инцидентот во кој дојде до физичка пресметка меѓу член на управата на клубот и тренерот Јуксел Јесилова, зад кој стои заинтересиран инвеститор од Туција. Во саботата по натпреварот меѓу „Брегалница“ и „Работнички“, Јесилова добил ултиматум со закана дека има 48 часа да го напушти Штип. Јесилова веднаш заминал во странство. Во кратка телефонска порка, тој ни потврди дека е на одмор, надвор од земјата. На прашањето за тоа дали имал закани, кратко одговори: „Да, точно е“.

Во меѓувреме, добивме потврда дека единствената понуда е од турските инвеститори, како и тоа дека Јесилова се враќа утре во Штип, а со него ќе дојдат и заинтересираните турски инвеститори.

Како е направен превид во објавата на тендерот, има различни толкувања. Според некои шпекулации, Општината купува време бидејќи се појавил уште еден заинтересиран инвеститор од Романија. Деновиве се слушнаа и бројни шпекулации дека досегашната управа на „Брегалница“ нема така лесно да се откаже од клубот, иако дел од членовите јавно демантираа.


Во мај во Охрид најбројни биле туристите од Турција


Охрид, 12 јули, 2016 - 15:05 (META) 

Гостите од Турција ѝ дадоа печат на претсезоната во Охрид. Во мај, најголем бил бројот на туристи од оваа земја, што се случува првпат досега.

Веднаш по турските туристи, следуваат оние од  Србија, Бугарија и од Грција, кои во мај, исто така, во голем број го посетиле Охрид.

Во овој период е забележано зголемување на бројот на посетителите што доаѓаат од азиските земји, пред сè, од Јужна Кореја, за кои Охрид е незаобиколна дестинација, во рамките на балканската рута.

Бројот на домашните туристи во мај 2016 година, во однос на мај 2015 година, е зголемен за 1,4 проценти, а бројот на странските туристи е зголемен за 6,7 проценти.


Сто и тринаесет години од смртта на Гоце Делчев


Скопје, 4 мај, 2016 - 9:38 (META) 

Во Македонија денеска се одбележуваат 113 години од смртта на револуционерот Гоце Делчев.

Делчев е роден на 4 февруари 1872 година во Кукуш, во семејството на Султана и на Никола. Се школувал во гимназија во Солун и на Воената академија во Софија. Учителствувал во Штип, а како член на Централниот комитет на ТМОРО, работел на создавање мрежа на бази, комитети и комитски чети на организацијата.

Учествувал на Солунскиот конгрес на ВМРО (1896 г.), а до 1901 година бил задграничен претставник на ВМРО во Софија. Делчев е убиен од турска војска на денешен ден во 1903 година, во селото Баница, Серско.

Неговите посмртни останки првин се чувале во Баница, до 1917 година, кога биле пренесени во Ксанти, а потоа во Софија. До 1923 година, ковчежето со коските се чувало во домот на Михаил Чаков. Останките на Делчев на 11 октомври 1946 година биле пренесени во црквата „Свети Спас“ во Скопје.


Турците протестираа пред „Сител“: „Излези Латас, ако имаш образ“


Скопје, 11 февруари, 2016 - 14:04 (META) 

Со извиците „Излези Латас“, „Оставка“, „Демократија“, „Излези Ѕинго“, неколку десетици Турци од Македонија протестираа пред теливизија „Сител“ и побараа главниот уредник, Драган Павловиќ – Латас, да даде оставка и да поднесе одговорност за искажаниот говор на омраза во синоќешното интервју со лидерот на СДСМ, Зоран Заев, кому му рече дека „лаже како Турчин“.

Тие побараа Латас да излезе и да им објасни што излажал турскиот народ и го повикаа да се извини за искажаните навреди и за дискредитацијата.

Ердоган Сарач, претседател на Движењето на националното единство на Турците, рече дека се сомнева во искреноста на извинувањето на Латас, дадено во дневникот во 23 часот, и го повика Народниот правобранител да поднесе законски дејства против телевизијата и нејзиниот уредник.

– Искажуваме сомнеж дека тоа извинување не е личен став на новинарот, туку тоа е направено под притисок на други центри на моќ во државата. Очигледно е дека овој човек исполнува туѓа агенда. Оттука бараме од сопственикот на телевизија „Сител“ да се огради од говорот на омраза и да преземе мерки против уредникот кој искажува нетрпеливост и омраза спрема Турците. Бараме и оградување од ВМРО-ДПМНЕ затоа што Латас е нивен трубач и гласноговорник. Особено го повикуваме јавниот правобранител да преземе законски дејства врз телевизијата и уредникот – рече Сарач.

Насобраните граѓани закачија две турски знамиња на еден џип кој беше паркиран пред телевизијата.

– Револтирани сме од ваков однос на еден наводен новинар. Овој медиум режиран од власта мора еднаш засекогаш да престане да навредува и да дискредитира. Овде сме да дадеме поддршка на Трците, но и на сите граѓани. Овој новинар треба да поднесе одговорност ако воопшто има образ – рече еден од присутните.


Сејфула: Изјавата на Латас е навреда за Турците од целиот свет


Скопје, 11 февруари, 2016 - 12:49 (META) 

Неколку десетици граѓани, поголемиот дел од нив припадници на турската заедница во Македонија, се собраа на мирен протест пред Владата затоа што, како што рекоа, се згрозени од изјавата на уредникот на телевизија „Сител“, Драган Павловиќ – Латас, кој во интервјуто со лидерот на опозицијата, Зоран Заев, му рече „лажеш како Турчин“.

На протестот тие рекоа дека ова е навреда за Турците од целиот свет.

– Вчерашната изјава на Латас е навредлива не само за Турците во Mакедонија, туку и за Турците во целиот свет. Протестите ќе продолжат и ќе бидат помасовни. Сите граѓани што се чувствуваа навредени од изјавата, ќе може да поднесат тужба против уредникот на „Сител“ – рече Ипо Сејфула, претседател на месната заедница од Долно Количани.

Тој рече дека изјавата на Латас не е само навреда за Турците, туку е навреда и за сите новинари, на кои им порача дека Латас не треба да биде дел од нивниот круг.

Насобраните граѓани сега се упатуваат на протест пред телевизијата „Сител“.


Турците денеска на протест пред Владата и пред „Сител“


Скопје, 11 февруари, 2016 - 10:01 (META) 

Tурците во Македонија денеска пред Владата организираат протест по вчерашната навреда од уредникот на телевизија „Сител“, Драган Павловиќ – Латас, кој на претседателот на СДСМ, Зоран Заев, му се обрати со зборовите „лажеш како Турчин“.

Во повикот објавен на „Фејсбук“ стои дека дрскоста на Драган Павловиќ – Латас нема крај, паниката и нервозата е видлива и прекумерна.

„Во денешниот дневник (10.02.2016 г., н.з.) во кој гостуваше претседателот на Социјалдемократскиот сојуз на Македонија, Зоран Заев, уредникот на дневникот, Драган Павловиќ – Латас ме навреди мене и сите припадници од турска националност, според законот за граѓанска одговорност за изречена клевета или навреда. Ве повикувам сите слободоумни граѓани утре (четврток) точно напладне, на мирен протест пред Влада на Република Македонија да го изразиме нашиот револт против дрската навреда кон нас Турците, а во 13 часот пред телевизија „Сител“. Протестот има цел да побара: Владата да се огради од коментарот на Драган Павловиќ – Латас (поради тоа што таа е најголем финансиер на „Сител“), бараме сите партии со предзнакот „турски“ да излезат од коалиција со ВМРО-ДПМНЕ, бараме пратениците во Собранието на Република Македонија да побараат одговорност од „Сител“. На истиот протест ќе се договориме за да поднесеме групна тужба против уредникот на дневникот на телевизија „Сител“, Драган Павловиќ – Латас, во согласност со законот за граѓанска одговорност за изречена клевета или навреда“, стои во повикот.


Латас: Им се извинувам на сите Турци и ветувам дека навредата нема да се повтори


Скопје, 11 февруари, 2016 - 0:14 (META) 

Главниот и одговорен уредник на телевизијата „Сител“, Драган Павловиќ – Латас, им се извини на сите Турци затоа што во интервјуто со лидерот на СДСМ, Зоран Заев, му рече дека „лаже како Турчин“.

Павловиќ – Латас рече дека му е жал и дека се извинува на секој Турчин што се почувствувал навреден. Тој вети дека навредата нема да му се повтори.

– Мој гаф, во текот на дневникот употребив израз дека „Заев лаже како Турчин“. Им се извинувам на сите Турци поединечно, како на турската нација, така и на турската држава. Напротив, сметам дека и турскиот народ и турската држава се големи пријатели на Република Македонија, особено во поново време, нивните граѓани се лојални и придонесуваат за сите позитивни процеси во државава и затоа жалам и се извинувам на секој Турчин што се почуствувал навреден и ветувам дека тоа никако не може да се повтори, бидејќи тоа не е ниту мој став, ниту мое убедување, едноставно тоа е мој гаф – рече Латас.

Веднаш по интервјуто, невладината организација „Уфук“ и Партијата за движење на Турците во Македонија (ТХП) побараа Латас да им се извини за навредата и повикаа на бојкот на телевизијата.


Понеделник е неработен ден за Турците во Македонија


Скопје, 17 декември, 2015 - 10:29 (META) 

Денот на настава на турски јазик, понеделник, е неработен ден за граѓаните припадници на турската заедница во Република Македонија, соопшти Министерството за труд и социјална политика.

Оттаму на граѓаните припадници на турската заедница им го честитаат Денот на наставата на турски јазик.