Заев – Јилдирим: Турција ја поддржува Македонија во НАТО интеграциите


Анкара, 12 февруари, 2018 - 11:44 (META) 

На средбата со својот турски колега Бинали Јилдирим во Анкара, македонскиот премиер Зоран Заев побарал да продолжи поддршката од Турција за членството на Македонија во НАТО, а турскиот премиер порачал дека неговата земја и понатаму ја поддржува Македонија во оваа стратешка цел, соопшти Службата за односи со јавноста при македонската влада.

На средбата, на која од македонската страна присуствувале и министерот без ресор Аднан Ќахил, пратениците во Собранието на Република Македонија, Енес Ибраими и Јусуф Хасан и државниот секретар во МНР, Виктор Димовски, Заев изразил сочувство за жртвите во борбата против тероризмот со цел заштита на територијалниот суверенитет и интегритет на Турција.

И турската и македонската страна изразиле определеност за унапредување на економската соработка меѓу двете земји и за зголемување на трговската размена.

Договорено е активирање на Мешовитиот комитет меѓу двете држави кој што ефикасно ќе ги решава сите потреби за подобра соработка на секое ниво. Премиерот Заев соопшти дека од страна на Република Македонија, комитетот ќе го води министерот без ресор, Аднан Ќахил.

– За нашата држава важни се сите инвестиции, а Турција е 6-та во Македонија по бројност на инвестиции. Подготвени сме да создадеме услови за уште повеќе инвестиции бидејќи има заинтересирани инвеститори. Ние очекуваме напредок во ЕУ и НАТО интеграциите оваа година, а тоа очекуваме да влијае на зголемување на инвестициите, а со тоа подобар квалитет на живот на граѓаните – рекол Заев.


Поранешниот турски премиер, Ахмет Давутоглу, во посета на Македонија


Скопје, 26 септември, 2017 - 10:28 (META) 

Поранешниот премиер на Република Турција, Ахмет Давутоглу, од утре до 29 септември ќе престојува во работна посета на Република Македонија.

Во рамки на посетата, Давутоглу ќе има средби со претседателот на Република Македонија, Ѓорѓе Иванов, и со премиерот Зоран Заев.

Давутоглу на 28 септември ќе се обрати на панел-дискусијата за „Перцепцијата на Република Турција во Република Македонија“, во организација на Здружението на дипломирани студенти од Турција.

На најавената панел-дискусија ќе говорат Илија Димовски, координатор на првата пратеничка група на ВМРО-ДПМНЕ, Муедин Ристеми, поранешен амбасадор на Република Македонија во Република Турција, Есер Џевахир, член на управниот одбор на „Џевахир холдинг“ и пратеникот Стево Пендаровски.

Функцијата премиер на Турција, Давутоглу ја извршуваше од 29 август 2014 година, откако Реџеп Таип Ердоган беше избран за претседател на Турција, до 5 мај 2016 година, кога се повлече од позицијата. Претходно, од 2009 до 2014 година беше министер за надворешни работи на Турција.