!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Туристичките работници бараат законски измени за лиценцирање водичи


Скопје, 18 септември, 2017 - 14:51 (META) 

Здруженијата на угостителство и туризам и на туристичките водичи при Стопанската комора на Македонија бараат законски измени да се овозможи лиценцирање на туристичките водичи за поквалитетни услуги за туристите, како и за да се воведе републичка туристичка инспекција.

Лиценците треба да ги заменат сегашните легитимации кои туристичките водичи ги добиваат со полагање седум испити на кој било факултет за туризам во земјава. Новите лиценци би се обновувале на определен број години врз основа на проверка на знаење.

Според здруженијата, проблем е и дефицитот на водичи со познавање странски јазици за кои има потреба. Најголемиот дел од 380 активни водичи од вкупно регистрирани 760, зборуваат англиски, турски, француски, германски и италијански.

Холандски јазик знаат само двајца водачи, иако од Холандија има голем број туристи.

Од здруженијата, кои денеска потпишаа меморандум за соработка, реагираат и на тоа дека сегашната регулатива не предвидува директни санкции за странските туристички групи без водичи затоа што инспекторите немаат овластувања да ги казнат туку само да ја известат пазарната инспекција.


Локалитетите за спортско качување ќе се користат за привлекување туристи


Скопје, 15 септември, 2017 - 10:02 (META) 

Агенцијата за промоција и поддршка на туризмот (АППТ) во соработка со Македонската спортско-качувачка федерација ќе го промовира авантуристичкиот туризам во земјава преку спортското качување.

За подобрување на условите на качувачките локалитети кај Матка, Маврово и кај Кадина во близина на Скопје, поставени се добро оклинчени спортско-качувачки насоки и сидришта, обележани и лесно достапни за секого.

„Туристичките трендови се во прилог на Македонија и на регионот, а создавањето и одржувањето на локални продукти се квалитетен и автентичен начин да се промовира уникатното од земјите. Туристите кои практикуваат авантуристички туризам се почитувани патувачи и се многу повредни за лакалната економија. Важен е податокот дека 74 проценти од финансиските средства кои ги трошат остануваат кај локалното население, за разлика од другите туристите кои патуваат организирано“, изјави директорот на АППТ, Александар Донев.

Според претседателот на Македонска спортско-качувачка федерација, Владимир Трповски, спортските качувачки клубови имаат активни членови со професионални инструктори на вештачки и на природни карпи.


Бектеши го промовира туризмот во Кина, а со Рифаи разговарал за негово унапредување


Ченгду, 11 септември, 2017 - 12:27 (META) 

Министерот за економија, Крешник Бектеши, денеска ја почна официјалната посета на Кина, а воедно ја предводи и македонската делегација на 22. седница на Генералното собрание на Светската туристичка организација (UNWTO) што се одржува во градот Ченгду, Кина.

На конференцијата, на која присуствуваат министрите за туризам од целиот свет, ќе се разговара за развојот на светскиот туризам, новите трендови во туризмот, подобрувањето на туристичките услуги и за одржливиот туризам. Бектеши на самитот ја претставил стратегијата за туризам на нашата земја.

Тој се сретнал и со генералниот секретар на UNWTO, Талеб Рифаи, со кој договориле реализација нa одредени проекти.

„Меѓу проектите што Бектеши и Рифаи се согласија да ги реализираат се и поддршката на експерти за измени на законите за туризам и за угостителство, прописите за категоризација на угостителските објекти, поддршката за имплементација на системот за одзив на туристи ТСА (tourist satellite account), обуки за вработените во секторот туризам во седиштето на UNWTO во Мадрид, како и обука на студентите кои се запишани на универзитет за туризам“, се вели во соопштението од Министерството за економија.


Бектеши ги презентирал можностите за инвестирање на бизнис-форумот во Ерусалим


Ерусалим, 4 септември, 2017 - 15:33 (META) 

На бизнис-форумот во Ерусалим, министерот за економија Крешник Бектеши ги запознал бизнисмените со можностите што ги нуди Министерството за економија за странски директни инвестиции во различни области, како што се енергетиката, туризмот и слободните економски зони кои се извозно ориентирани.

Тој истакнал дека израелското искуство во деловното работење е од големо значење со оглед на деловната клима што ја има таа земја, како меѓународен фактор во производството, туризмот и особено во областа на иновациите.

Тој предложил воведување директна авиолинија Скопје – Тел Авив, како и потпишување договор во областа на туризмот.

Министерот за економија е во официјална посета на Израел, како дел од владината делегација предводена од премиерот Зоран Заев, која од 2 до 4 септември е во посета на таа земја на покана на израелскиот премиер Бенјамин Нетанјаху.

Дел од делегацијата се вицепремиерот Кочо Анѓушев, министерот за внатрешни работи Оливер Спасовски и министерот за земјоделство Љупчо Николовски.


Бектеши: Работниците со примања до 22.000 денари можат да користат бесплатен одмор


Скопје, 30 август, 2017 - 15:25 (META) 

„По предлог на Министерството за економија, Владата донесе мерка со која им нудиме на работниците со примања до 22.000 денари да искористат годишен одмор надвор од сезона во туристичките центри на Македонија, во вкупна вредност од 15.000 денари“, изјави денеска на прес-конференција во Владата, министерот за економија Крешник Бектеши.

Потврдите ќе ги издава Министерството за економија по принципот „прв дојден, прв услужен“.

Директорот на Агенцијата за промоција и поддршка на туризмот, Александар Донев, ги повика менаџерите на хотелите и на мотелите да се пријават на јавниот повик што ќе биде објавен во дневните весници и на веб-страницата на Министерството за економија.

– Таму ќе може да ги најдат сите подетални информации за начинот на користење на средствата и за текот на реализација на програмата. Рокот за прием на апликациите за сместувачките туристички капацитети е до 5 септември годинава – истакна Донев.


Заев и Ел Шинави разговарале за продлабочување на економската соработка


Скопје, 24 август, 2017 - 14:56 (META) 

Премиерот Зоран Заев, денеска се сретна со амбасадорката на Египет во Македонија во заминување, Манал Џеина ел Шинави.

На средбата разговарале за можностите и начините за продлабочување на економската и соработката во областа на туризмот помеѓу Македонија и Египет.

Двајцата соговорници договориле да се разгледаат законските можности и олеснувања, што би можеле да ги мотивираат бизнисмените за инвестиции во двете држави.

Ел Шинави денеска се сретна и со министерот за надворешни работи Никола Димитров кој и оддаде признание за придонесот во унапредувањето на билатералните односи за време на нејзиниот мандат.


Бектеши и Пломп разговарале за економската соработка помеѓу Македонија и Холандија


Скопје, 31 јули, 2017 - 14:51 (META) 

Министерот за економија, Крешник Бектеши, денеска се сретнал со холандскиот амбасадор, Ваутер Пломп, при што разговарале за туризмот, земјоделството и за инвестициите во обновливи извори на енергија.

Бектеши изјавил дека земјоделството и инвестициите во обновливи извори на енергија се две гранки на економијата, многу важни за нашата земја, па размената на искуства со Холандија би била од огромна помош.

Холандскиот амбасадор потврдил дека Македонија останува посакувана туристичка дестинација за Холанѓаните и изрази интерес за развивање на долгорочен план за Охридскиот Регион, со оглед на фактот што бројот на холандските туристи е зголемен, а тоа налага потреба и за зголемување на бројот сместувачките капацитети.


Полски новинари ја промовираат Македонија како туристичка дестинација


Скопје, 31 јули, 2017 - 11:37 (META) 

Петмина новинари од Полска ја посетија Македонија за да ги откријат убавините на земјата и да ја промовираат како туристичка дестинација помеѓу полските туристи.

Новинарите, кои во Македонија престојуваа од 17 до 22 јули на покана и во органазија на „ТАВ Македонија“, ги посетиле Скопскиот и Битолскиот Регион, како и Охрид.

– Имплементирајќи ја неодамнешната успешна маркетинг-активност со турските блогери за промоција на Македонија помеѓу турските граѓани, презедовме многу слична маркетинг-иницијатива, за да ја промовираме Македонија како интересна туристичка дестинација меѓу туристичките агенции и тур-оператори од Полска, како и самите патници од оваа земја – изјави генералениот директор на „ТАВ Македонија“, Алпер Ерсој.


Заев – Багиров: Азербејџански бизнисмени гледаат потенцијал за инвестирање во Македонија


Скопје, 25 јули, 2017 - 17:25 (META) 

Премиерот Зоран Заев денеска се сретна со амбасадорот на Азербејџан за Македонија, Фаик Багиров.

На средбата било разговарано за соработка на економски план, а Багиров му соопштил на Заев дека имало повеќе азербејџански бизнисмени кои гледаат потенцијал за инвестирање во Македонија.

Премиерот Заев се заблагодарил за добрата соработка помеѓу Македонија и Азербејџан и најавил нејзино понатамошно развивање во областа на трговијата, економијата, енергетиката, туризмот.


Во Дојран утре ќе се одржи референдум за рудниците Казандол и Башибоз


Дојран, 22 јули, 2017 - 12:12 (META) 

Дојранчани утре ќе излезат на референдум на кој ќе гласаат дали се „за“ или „против“ отворање рудници на територијата на нивната општина.

Тие стравуваат дека рудникот Казандол, но и потенцијалното отворање на Башибоз на планината Беласица, се еколошка закана по земјоделството, туризмот и за Дојранско Езеро.

Досега, референдуми се одржаа во Гевгелија и во Богданци, каде што жителите се изјаснија против отворање рудници, а референдум ќе се одржи и во Валандово на 20 август.