Нов планински туристички производ кој ги поврзува Македонија, Албанија и Косово


Пешкопеја, 13 август, 2018 - 11:09 (META) 

Нов транс-национален планински туристички производ „Хај скардус треил“ (High Scardus Trail) кој ги поврзува планинските масиви во пограничните области на Албанија, Македонија и Косово беше промовиран на 11 август во Пешкопеја, Албанија.

Во рамките на промоцијата, имаше и промотивно планинарење на две групи по две патеки патеки кои се дел од ХСТ,  Битуше – Веливар – Хиноске и Торбешки мост – Кораб – Радомир.

Планинарите кои тргнаа од Битуше, Македонија на врвот Веливар се сретнаа со планинарите кои тргнаа од Попинар, Албанија и заедно се спуштија во селото Хиноске, Албанија.

Планинарите кои пак го искачија Кораб, на врвот се сретнаа со планинари од Албанија и заедно се спуштија до Радомир, Албанија.

ХСТ има вкупна должина од 495 километри и овозможува создавање на тури со различни должини, траење и нивоа на тежина. Постојат 16 главни секвенци и бројни поврзувачки патеки кои водат до населени места и служат како влезни или излезни точки до или од главната патека.

„495 километри долгата мрежа на патеки го носи латинското име на најголемиот масив во регионот Шар Планина – Скардус, шарена планина. И токму таков разнолик и шарен е и новиот производ со на бои, пејзажи, биодиверзитет, луѓе, традиција, храна“, изјави Аница Палацо, координатор од Македонија на проектот „Перспективи во иднина преку планинскиот туризам“, спроведен од страна Германското друштво за меѓународна соработка (ГИЗ) во име на Германското сојузно министерство за економска соработка и развој (БМЗ).

Целта на проектот е да ги подобри можностите за вработување во туристичкиот сектор во пограничниот регион помеѓу Македонија, Косово и Албанија преку развивање и промовирање на постојните и новите регионални авантуристички понуди за туризам.

Преку овој проект сместувачките капацитети на руралните средини во пограничниот регион се зголемиле со нови 50 легла, а 21 мали претприемачи ги подобриле туристичките услуги надгардувајќи ги нивните капацитети, знаење и вештини. Во рамките на проектот 17 локални претставници биле финансиски поддржани за да нудат туристички услуги преку подобрување на сместувачките капацитети но и угостителство, од кои 13 биле старт-ап бизниси (6 во Албанија, 3 во Косово и 4 во Македонија).

Заменик-министерот за туризам на Албанија, Хајрула Чеку при промоцијата во Албанија рече дека ХСТ претставува диверзификација на туристичките понуди и производи.

„Поврзувањето на селата се добра шанса за соработка на регионот, односно на овие мали земји да им се даде шанса да бидат конкурентни на глобалниот пазар. Тоа е одлична можност за развој на локалната економија преку зголемување на понудата на рестораните, приспособување на куќите за прием на туристи, работа на туристичките водичи и сите што даваат услуги“, рече Чеку.

Од германската амбасада во Албанија истакнаа дека и понатаму ќе поддржуваат вакви проекти кои ќе генерираат економски бенефит за локалното население, развој на туризмот и поврзување на пограничните региони.

Од таму изразија надеж дека проектот ќе заживее, дека ќе има голем број на туристи, ќе ги приближи луѓето од Македонија, Косово и Албанија преку нивното гостопримство и природни убавини, а во исто време ќе има влијание економијата.

 

 


РСС објави повик за грантови за развој на туризмот во земјите од Западен Балкан


Сараево, 16 јули, 2018 - 13:47 (META) 

Регионалниот совет за соработка (РСС) објави програма за доделување на грантови во вкупна вредност од 1,62 милиони евра за развој на туризмот во земјите од Западен Балкан.Парите се наменети за унапредување на инфраструктурата и квалитетот на услугите на културните и авантуристичките рути во регионот.

Со повикот кој ќе трае до 16 август годинава, се очекуваат понуди на субјекти од јавен и од приватен сектор во шест земји на Западен Балкан, по што ќе се доделат грантови за околу 30 или повеќе субјекти или проекти во поединечна вредност до 54 илјади евра, соопштено е од РСС.

На повикот се очекува да конкурираат локални и регионални организации што се занимаваат со туризам, туристички кластери, организации за образование и развој на туризмот, како и национални или паркови на природата.

Програмата за бесповратни финансиски средстав е составен дел од Проектот за развој и промоција на туризмот во вредност од пет милиони евра што го финансира ЕУ, а го спроведува РСС.

Регионалниот совет за соработка е интервладино оперативно тело на земјите членки на Процесот за соработка во Југоисточна Европа, чиј основач и полноправен член е и Македонија.


Министерството за економија промовираше апликација „Посети ја Македонија“


Скопје, 13 јули, 2018 - 15:51 (META) 

Министерство за економија ја промовираше апликацијата „Посети ја Македонија“ (visitmacedonia). Министерот Крешник Бектеши изјави дека апликацијата ги следи светските трендови за дигитализација и иновации во туристичката промоција, а има за цел да го привлече вниманието на туристите, посебно на транзитните.

„Нивната бројка не е за занемарување, само по Коридорот 10 низ нашата земја транзитираат во просек по 3,5 милиони туристи. Ако им покажеме содржини кои ќе ги привлечат бар малку да скршнат од нивната маршрута и да останат некој ден и во нашата земја, сме добиле многу“, истакна Бектеши на денешната прес-конференција.

Проектното решение го изработи „СИМТ“ и вклучува мобилна, веб-апликација и администраторска конзола на три јазици англиски, македонски и албански.

Целта на мобилната апликација, која е во завршна фаза и веќе може да се симне на „андроид“, а во процес на валидација е за „ајфон“, е да понуди брз пристап кон сите потребни информации за да го направи поудобен и поинтересен престојот на туристот во државата.

„Туристите ќе можат да пристапат до информации за објектите од интерес, од типот на споменици, музеи, ресторани, хотели, природни добра, археолошки наоѓалишта на својот мобилен уред и истите ќе му бидат дадени на располагање преку приказ на детали, слики, GPS координати преставени на интерактивна мапа, со оценки и коментари од останати корисници“, посочи Бектеши.

Во мобилната апликација е содржан и механизам за пребарување низ објектите по разни основи, а истите се организирани од аспект на близината на корисникот, според локацијата на уредот кој го користи. Освен тоа, апликацијата содржи и Планер на патување и Патнички дневник, кој претставува трага од патувањето на корисникот, а нуди можност за споделување на социјалните мрежи. Дневникот е воедно интерактивниот дел на оваа апликација и нешто по што апликацијата на нашата земја  се одделува од вакви слични апликации во светот.

Веб-апликацијата дополнително содржи простор за пријавување на угостителски објекти, културни обележја и сл. Имено, фирмите или други засегнати лица ќе можат да го пријават својот објект за истиот да влезе во системот на апликацијата и на тој начин да се промовира.


Холандските туристи најбројни и со најмногу субвенции


Скопје, 9 јули, 2018 - 17:05 (META) 

Во последните 10 години односно од 2008 до 2017 година над 200.000 туристи од Холандија оствариле речиси еден милион ноќевања во Македонија, покажува најновата анализа на „ДАТА“. По нив, најмногу ноќевања имало од туристите од Турција односно 922.046 ноќевања од 600.221 Турци, а 417.959 Срби ноќевале 837.802 пати.

Туристичкиот пик Македонија го доживеала во 1987 година кога имало 2,4 милиони ноќевања од македонски туристи и 1,5 ноќевања од странски туристи. Во последните пет години туризмот бележи благ раст, но сепак бројките се далеку од нивото на кое државата била во 80-тите години.
Минатата година во државава имало 1,4 милиони ноќевања од домашни туристи и 1,3 милиони од странски туристи.

Според анализата, во просек странските туристи остануваат две вечери, домашните четири вечери, а Холанѓаните пет. Од 2013 година, државата на тур-операторите им доделува по 65 евра субвенции за секој холандски турист со најмалку три ноќевања.

 

Објавените визуелизации се дел од проектот D.A.T.A. – Data Analytics for Transparency and Accountability имплементиран од Фондацијата за интернет и општество „Метаморфозис“. Овој проект е делумно поддржан од Амбасадата на САД. Мислењата, откритијата и заклучоците или препораките изнесени овде се на имплементаторите/авторите, и не ги одразуваат оние на Владaта на САД.


Пет милиони евра за заеднички туристички понуди на Западен Балкан


Сараево, 28 јуни, 2018 - 14:17 (META) 

Тригодишен проект за унапредување на туризмот преку заеднички туристички понуди во земјите од Западен Балкан, вреден пет милиони евра, беше промовиран денеска во Сараево.

Проектот, како што соопшти Регионалниот совет за соработка (РСС), треба да им помогне на земјите од Балканот да ги прошират и соединат туристичките производи од културниот и авантуристичкиот туризам.

„Во следните три години преку овој проект на РСС, ќе се доделат до 30 мали грантови во вредност од околу 50 илјади евра со цел на унапредување на инфраструктурата поврзана со културниот и авантуристичкиот туризам, при што првите јавни повици за грантови ќе бидат објавени веќе во средината на јули годинава – изјави Горан Свилановиќ, генерален секретар на РСС.

Активностите ќе бидат спроведувани со помош на владите, приватниот и невладиниот сектор, а крајната цел е привлекување што поголем број странски туристи.

Проектот ќе го спроведува РСС, а го финансира Европската унија. РСС е оперативно меѓувладино тело на Процесот за соработка во Југоисточна Европа, чиј основач и полноправен член е и Република Македонија.


Се формира мрежа за иновативен туризам


Скопје, 14 мај, 2018 - 17:12 (META) 

Во рамките на проектот за зајакнување на иновативен туризам (СТЕП) денеска се одржа првата конститутивна седница на мрежата за проширување и унапредување на стратешкиот и координиран пристап до нови и стратешки пазари за извоз на туризам за туристички бизниси и за подобрена комуникација и соработка.

Учесници беа претставници мали и средни претпријатија, владини агенции на централно и на локално ниво, стопански комори, стартери и граѓани, како и невладини организации и медиуми.

На првиот состанок беа разгледани активностите кои ќе доведат до постигнување на резултатите од проектот.

Сите учесници се подготвени да бидат активен дел од мрежата. На средбата беа презентирани и позитивните искуства на некои нови компании и бизниси кои ќе бидат поттик за сите други потенцијални членови.

Утре ќе се одржи првата конститутивна седница во регионот на Елбасан.

Проектот за зајакнување на иновативен туризам (СТЕП) партнерски го спроведуваат Фондацијата за интернет и општество „Метаморфозис“, Центарот за регионален развој на Полог и Советот на округот Елбасан.


Општина Гостивар и „Метаморфозис“ потпишаа Меморандум за соработка за Проектот за зајакнување на иновативен туризам


Гостивар, 19 март, 2018 - 16:55 (META) 

Општина Гостивар и Фондацијата за интернет о и општество „Метаморфозис“, денеска потпишаа Меморандум за соработка за Проектот за зајакнување на иновативен туризам (СТЕП).

Меморандумот го потпишаа градоначалникот Арбен Таравари и извршниот директор на Фондацијата „Метаморфозис“, Бардил Јашари.

На свеченоста на потпишувањето присуствуваше и шефот на Делегацијата на Европската Унија во Македонија, Самуел Жбогар.

Целта на проектот е да се промовира енергичен туристички сектор кој ефикасно се прилагодува на потребите на домашните и меѓународните пазари и придонесува за забрзување на порастот и стимулирање на отворањето нови работни места во прекуграничната туристичка зона помеѓу Македонија и Албанија, поточно во подрачјето на Гостивар и Елбасан.

Со меморандумот Фондацијата „Метаморфозис“ со Заедницата за развој на полошкиот регион и Советот на Елбасан е превидено да ги промовираат вредностите на сите потенцијални места и можности за развој на туризмот во полошкиот регион.

Општината Гостивар ќе обезбеди информации, експертиза и искуство, како и ќе ги поттикне малите и средни претпријатија и сите заинтересирани страни активно да дадат придонес кон реализирање на целите на проектот.

Проектот е финансиран од Програмата за меѓугранична соработка на Европската Унија (ИПА 2).


Отворен повик за 21 милиони евра за развој на туризмот преку инфраструктурни инвестиции


Скопје, 16 март, 2018 - 12:57 (META) 

Владата во соработка со Европската унија и Светска банка денеска објавија втор повик за искористување на 21 милиони евра во рамките на Проектот за локална и регионална конкурентност.

18 милиони евра се обезбедени од ИПА-програмата на Европска комисија, а три милиони евра се од буџетот, повикот е администриран од Светска банка.

Преку овој проект ќе се овозможи општините, асоцијациите и приватните компании да аплицираат за средства со кои ќе се поддржат клучни инвестиции и во инфраструктурни и неинфраструктурни проектни активности, а кои ќе придонесат за поконкурентен и одржлив локален и национален туристички развој.

Вицепремиерот, Кочо Анѓушев рече дека најголем интерес очекува од општините, за да си ја подобрат инфраструктурата од која најголем интерес имаат сите граѓани.

„Се сретнав со речиси сите градоначалници на кои им укажав дека кога ќе излезе овој повик треба да излезат со готови проекти, а не сега да ги изготвуваат. Добар дел од нив, веќе ме информираа дека се подготвени. За општините кои немаат капацитети, има пари за техничка помош за да направат проекти“, рече Анѓушев.

Раководителот на секторот за соработка на Делегацијата на Европска унија, Никола Бертолини рече дека државата е преубава, но има многу ѓубре.

„Во еден преубав предел од државата се изгубив. Немаше патокази, но имаше многу ѓубре. Наидов на диви депонии. Но тоа треба да се спречи. Овие граѓани заслужуваат подобро опкружување. Очекувам следните 18 месеци општините да работат дење и ноќе за да се постигнат резултати и да имаат готови проекти за да аплицираат“, рече Бертолини.

Директорот на канцеларијата на Светска банка, Марко Мантованели рече дека туризмот е значајна гранка за развој на економијата и тој учествува со 10 проценти во светскиот БДП.

„Преку конкурентноста го гледаме развојот на туризмот. Земјата има голем потенцијал и заслужува туристички да биде препознаена во светот. Студијата на Светска банка објавена лани покажува дека ефектите од туризмот се поддршка на економскиот развој, вработувања, заштита на околината, вкрстување на културните вредности. Но, туризмот треба да биде одржлив за да ги даде потребните резултати. Како несакани последици може да биде лошата употреба на природните ресурси“, рече Мантованели.

Со овие финансиски средства предвидено е подобрување на квалитетот на услуги, јакнење на капацитетите за водење и вештини на лиценцирани туристички водичи, собирање на отпад и култура на управување со отпад, сигнализации и попатни информации на патиштата, попатна инфраструктура за посетители.

За општините се предвидени еден, односно три милиони евра грант доколку имаат регионален пристап, за малите и средни претпријатија, доколку има здружување предвидени се 300.000 евра.


Македонија и Албанија ќе развиваат иновативен туризам во Полошкиот и регионот на Елбасан


Тетово, 15 март, 2018 - 15:24 (META) 

Денеска во хотелот „Меркур“ во Тетово беше претставен новиот проект на Европската Унија за прекугранична соработка помеѓу Македонија и Албанија во областа на развојот на туризмот СТЕП.

Проектот за зајакнување на иновативниот туризам (СТЕП) ќе биде имплементиран од Фондацијата „Метаморфозис“ во соработка со Центарот за развој на Полошки плански регион и Советот на Округот Елбасан.

На промотивниот настан каде што покрај официјалните претставници на двата региона, носителите на проектот и десетици туристички претприемачи од двата региона, свои обраќања имаа градоначалничката на Тетово, Теута Арифи и словенечкиот амбасадор, Милан Јазбец.

Покрај размената на искуства, на настанот беа претставени потенцијалните придобивки од проектот за малите и средните претпријатија и другите релевантни јавни и приватни туристички субјекти од регионот на Елбасан во Албанија и Полошкиот регион во Македонија.

Фокусот на проектот е зајакнување на конкретниот потенцијал на тутристичката понуда преку иновативни пристапи и употребува на онлајн алатки со цел зајакнување на капацитетите, меѓуграничната соработка, креирање на подобри понуди и отворање кон нови пазари.

Воедно, овој настан беше почетна точка за креирање на СТЕП мрежа на туристички субјекти од двата региони.


Грција ја поддржa Македонија за приклучување кон Јадранско-јонската иницијатива


Скопје, 23 февруари, 2018 - 10:33 (META) 

Грција ја поддржува кандидатурата на Македонија за членство во Јадранско – јонската иницијатива, јавува Македонската информативна агенција (МИА).

– Заменикот министер за надворешни работи на Грција, Јоргос Катругалос, со допис до надлежните комесари за проширување, Јоханес Хан и за регионална политика, Корина Крецу, ја објави намерата на Грција да ја поддржи кандидатурата на ПЈРМ во рамките на стратегијата на Европската унија за Јадранско –јонскиот регион (EUSAIR) – пишува во соопштението од грчкото МНР.

Од грчкото МНР потсетуваат дека во иницијативата вклучени се Грција, Италија, Словенија, Хрватска, Србија, Црна Гора, Албанија и Босна и Херцеговина, а соработка се реализира преку четири столба кои се однесуваат на „синиот раст“, односно растот во морските и поморските сектори, поврзувањето, односно транспорт и енергетика, животна средина и туризам.

Грчката поддршка за македонската кандидатура во Јадранско – јонската иницијатива, беше договорена и соопштена на средбата на Зоран Заев и Алексис Ципрас во Давос, како една од двете отстапки што ќе ги направи официјална Атина откако Македонија ги преименува аеродромот и автопатот.