!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Промовирана првата мапа на планинарски патеки на Шар Планина


Тетово, 20 април, 2017 - 16:14 (META) 

Во Тетово денеска беше промовирана мапа на 54 планинарски патеки на Шар Планина, прва од ваков вид во Македонија. Преку мапата туристите ќе добијат информации за должината на патеката, висинската разлика, инфраструктурните објекти долж патеката и слично.

– Се работи за планинарски патеки кои и досега биле користени. Мапата треба да биде мотив плус за сите планинарски друштва што работат во регионот, да ги зачуваат планинарските патеки, да ги обновуваат, одржуваат и во иднина да се почне со истражување на нови патеки по европски стандарди – вели претседателот на планинарскиот клуб „Љуботен“, Јован Божиновски.

Мапата на планинарски патеки треба да придонесе за развојот на туризмот во овој регион.

– Мапираните патеки ќе бидат дел од туристичката понуда на Шар Планина и ќе будат мотивација да дојдат повеќе планинари на овој масив. Не им е сеедно на туристите дали ќе биде некоја патека мапирана или не и дали ќе биде средена или запустена – изјави Констатин Циривири, претседател на Асоцијацијата на професионални планинарски водичи.

Мапата на планинарски патеки на Шар Планина наскоро ќе биде достапна во сите планинарски друштва и туристички инфраструктурни објекти на шарпланинскиот масив.


На Саемот за културен туризам во Бугарија, за Охрид заинтересирани и бугарски министри


Охрид, 10 април, 2017 - 19:27 (META) 

Штандот на Општина Охрид на Саемот за туризам во Велико Трново, покрај што беше посетен од многубројните посетители кои изразија особен интерес да дојдат во македонскиот туристички бисер, го привлече вниманието и на двајца министри од бугарската влада, Рашко Младенов, министерот за култура, и министерката за туризам, Стела Балтова. Тие изразија заинтересираност за активностите на Општина Охрид во насока на зголемување на туристичката понуда.

Општина Охрид во склад со активностите за промовирање на Охрид како атрактивна туристичка дестинација продолжи со саемското претставување на природните, културни и историски знаменитости на Охрид, презентирајќи го и на Меѓународниот саем за културен туризам и филмски фестивал во Велико Трново, Република Бугарија.

Пред бројните учесници, гости и претставници на туристички агенции, тур-оператори, медиуми и новинари од Бугарија, Турција, Виетнам, Јужна Африка, Португалија, Шпанија, Индонезија, беа презентирани културно-историските знаменитости, природните богатства, различните форми на активен туризам, како и богатата содржина на сместувачките капацитети во Охрид.

Во рамките на саемското претставување, Општина Охрид учествуваше на Филмскиот фестивал кој се одржа заедно со Меѓународниот саем за туризам, со две видеопрезентации во категориите промотивен филм во времетраење од 3 до 20 минути и огласувачки филм до 180 секунди.


Туристичкиот потенцијал на Македонија претставен на саем во Тирана


Тирана, 10 април, 2017 - 12:34 (META) 

Агенцијата за промоција и за поддршка на туризмот (АППТ) ја претстави туристичката понуда на Македонија пред 73 изложувачи и гости на првиот меѓународен саем за туризам „Медитераниан туризм фер“  (Mediteranian tourism fair) во Тирана.

Директорката на АППТ, Лела Крстевска, истакнала дека годинава балканските земји заедно ќе се претстават на саем за туризам во Јапонија, што е потврда за регионалната соработка.

Туристичката понуда од Македонија особено била интересна на помладата публика, а штандот го посетиле македонски и албански дипломати, како и туристички работници.

Туристичката понуда на Македонија треба да се прилагоди на барањата на помладите


Скопје, 29 март, 2017 - 14:07 (META) 

„Она што е тренд во светот и на кое Македонија треба позначајно да работи е дигитализацијата на туризмот“, изјави претседателот на Туристичко-угостителската комора (ТУК) при ССК, Аркан Керим.

Тој додаде дека помладата генерација има специфични потреби за комуникација, потрошувачка и за туристичко доживување.

„Влијанието на технологиите е огромно, од виртуелната до фактичка реалност. Туристите дизајнираат свој патувачки пакет, ги користат услугите и сообраќајот и функционираат на поголем радиус. За краток период обиколуваат повеќе дестинации“, ијзави Керим.

Според него, за поголем развој на туризмот во Македонија, потребно е секоја општина да формира туристичка организација.

„Општинските власти и сите чинители на туризмот во таа општина: локални хотелиери, агенции, ресторани, треба да се обединат и да работат во заеднички настап на трети пазари, за привлекување што повеќе туристи. Така можеме да зборуваме за регионален туристички развој, бидејќи според податоците на државниот завод за статиска во нашата земја, Скопје е најпосетувана туристичка и бизнис-дестинација од страна на странските туристи“, изјави Керим.

Тој додаде дека туристичките работници сметаат дека домашната политичка состојба, треба да се реши без турбуленции.

„И најмал инцидент, може целосно да нè изолира во наредните пет години. Од друга страна, влијанието на надворешните фактори, исто така, може да се одрази негативно врз секторот, како мигрантската криза која се очекува да се интензивира по референдумот во Турција на 16 април“, рече Керим.


Пролетна атмосфера во Охрид на првиот пролетен ден


Охрид, 20 март, 2017 - 18:25 (META) 

Првиот ден на пролетта, донесе и атмосфера на пролет во македонскиот туристички центар Охрид. Сончевото, пријатно и топло време, ги наполни шеталиштата, крајезерскиот кеј, отворените летни бавчи на кафулињата и на рестораните.

Од хотелите информираат дека имаат мал број гости од Турција и од Шведска, а дека изминатиов викенд престојувале гости од Албанија, Грција и од други соседни земји, како и група Кинези од познатата балканска тура, која во Македонија ги содржи градовите Скопје и Охрид.

Отсега и Јапонците ќе бидат дел од балканската туристичка тура.

Агенцијата за промоција и за поддршка на туризмот на Република Македонија и Јапонската агенција за меѓународна соработка (Japanese international cooperation agency) потпишаа меморандум за соработка, со кој нашата земја, заедно со другите земји на Балканот, Албанија, Србија, Црна Гора и Босна и Херцеговина, ќе го промовираат регионот во Јапонија.

Преку оваа тура изминативе години Македонија ја посетија бројни туристи од Кина, Јужна Кореја и од други земји на Далечниот Исток.


Европски грант за дигитализација на културното наследство во Охрид


Охрид, 16 март, 2017 - 15:47 (META) 

Охрид е еден од четирите града на Балканот под патронат на УНЕСКО, кој доби нов европски грант од првиот повик на програмата на Европската Унија, „Интеррег Балкан – Медитеран“ 2014-2020 (Interreg Balkan- Mediterranean), во висина од 169.000 евра за европскиот партнерски проект „Е-систем за управување со интер-регионалното културно наследство“ (Inter Regional Cultural Heritage Management e-System – IRC- HERMES).

Со овој проект ќе се изврши дигитализација на културното наследство. Покрај документирањето и дигитализацијата, овој проект ќе опфати и заштита и промоција на културното наследство.

Покрај Охрид, средства добија и Крф и Самос од Грција, како и Ѓирокастро од Албанија.

За проектот аплицираше и ќе го реализира секторот за туризам и локален економски развој, при Општина Охрид.


Општините Новаци и Алмопија ќе го развиваат туризмот со пари од ЕУ


Скопје, 14 март, 2017 - 11:49 (META) 

Завршната конференција на проектот „Жива историја – живо наследство“ ќе биде организирана во општинската сала на Општина Новаци, утре во 12 часот.

Проектот, кој чини 293.036 евра, е финансиран од Европската Унија во рамките на Програмата за прекугранична соработка помеѓу Македонија и Грција.

Целта на овој проект е да се зајакне соработката помеѓу општината Новаци и грчката општина Алмопија, за да се промовираат и да се заштитат природното и културното наследство на оваа прекуграничната област.

За таа цел беше формирано стратешко партнерство меѓу двете општини.

Како резултат на проектот, беа направени три туристички патеки за велосипедизам, планинарење и за крстосување со теренски возила. Исто така била направена и мобилна апликација за убавините на Мариово и на Новаци, за да се олесни туризмот во оваа област.

На настанот ќе се обратат Јаромир Левичек од Делегацијата на Европската Унија, градоначалникот на општина Новаци, Лазар Котевски, и градоначалникот на општина Алмопија, Димитрос Бинос.


Охрид е на листата на градови што годинава треба да се посетат, според „Лонли планет“


Охрид, 25 февруари, 2017 - 17:22 (META) 

Една од најголемите туристички компании „Лонли планет“ (Lonely Planet) објави листа на 10 градови во светот, кои треба да се посетат оваа година, а меѓу нив, на петто место е и Охрид.

Според оваа листа, Бордо во Франција е прогласен за најдобар град на светот за патување за оваа година, на второто место е Кејптаун, додека третата позиција е за Лос Анџелес.

Во пресрет на туристичката сезона, Охрид се промовира на бројни саеми за туризам низ Европа, а постојано од странските интернет-агенции се објавуваат и промотивни текстови, во кои се опишуваат убавините и културните богатства на градот.

Оваа листа ја објави и британскиот медиум „Индепендент“.


Амбасадорот Пломп твитна слика на билборд од Хаг со реклама за одмор во Охрид


Скопје, 3 февруари, 2017 - 17:24 (META) 

Холандскиот амбасадор во земјава, Ваутер Пломп, на својот твитер-профил сподели слика од реклама за туризам во Македонија на билборд во Холандија.

„Заебележано во Холандија (сликано од возот Хаг – Лајден) дестинација за одмор #Македонија #Охрид“, напиша Пломп на „Твитер“.

На рекламата е претставен Охрид и се вели дека холандските туристи можат да добијат осум дена одмор за 189 евра.

Рекламата е од тур-операторот „Корендон“ преку кој холандските туристи ја посетуваат Македонија.

 


Туристичките потенцијали на Македонија претставени на саем во Турција


Истанбул, 29 јануари, 2017 - 10:40 (META) 

Туристичките потенцијали на Македонија беа презентирани пред претставници од туристичката индустрија на Саемот за туризам во Истанбул на кој присуствуваат повеќе од 80 држави.

Агенцијата за промоција и поддршка на туризмот ги промовираше природата, културата и отоманските споменици во Македонија, како и македонската традиција и градовите кои може да се посетат.

Делегацијата на Агенцијата оствари бројни средби со претставници на познати тур-оператори и компании кои дејствуваат во областа на туризмот.