Пуштен во употреба првиот аудио-водич за археолошкиот локалитет „Стоби“


Неготино, 13 јули, 2018 - 12:38 (META) 

Националната установа за управување со археолошкиот локалитет „Стоби“, во соработка со софтверската компанија „Г6 солушн“ (G6 Solutions) од Скопје, го изработија првиот аудио-водич за археолошки локалитет во Македонија и истиот е во употреба од 12 јули 2018 година.

„Во чекор со најсовремените пристапи за управување со посетители при посета на археолошки локалитет, овој аудио-водич ќе му помогне на секој посетител да го запознае и доживее археолошкиот локалитет Стоби, еден од најубавите локалитети во Македонија, на интерактивен и автентичен начин“, се вели во соопштението на оваа Национална установа.

Археолошкиот локалитет „Стоби“ е едена од најпосетуваните туристички дестинации во Македонија и за потребите на посетителите, освен туристички водич кој е на располагање за посетителите на локалитетот, од сега, ќе може да се користи и мобилната апликација „Стоби аудио гајд“ (Stobi audio guide), на македонски и англиски јазик.

Апликацијата содржи сите неопходни информации за објектите кои се во состав на археолошкиот локалитет, како и кус историјат за локалитетот и насоки за движење согласно неговиот историски наратив. Посетителите ќе може да ја спуштат апликацијата на самиот влез на локалитетот каде што е обезбеден и слободен интернет пристап.


Во првите пет месеци бројот на туристи зголемен за 15 проценти


Скопје, 12 јули, 2018 - 14:40 (META) 

Во првите пет месеци од годината, во однос на истиот период лани бројот на туристите е зголемен за 15, 1 проценти, и тоа кај домашните туристи има зголемување за 7,8 проценти, а кај странските има зголемување за 19 проценти, објави Државниот завод за статистика.

Во истиот период, бројот на ноќевањата е зголемен за 13,6 проценти и тоа кај домашните туристи има зголемување за 5,4 проценти, а кај странските има зголемување за 19, 1 проценти.

Најголем број од туристите ги посетуваат нашите езера и Скопје. Најбројни се туристите од Турција, Бугарија, Србија, Грција, Германија и Холандија.


Холандските туристи најбројни и со најмногу субвенции


Скопје, 9 јули, 2018 - 17:05 (META) 

Во последните 10 години односно од 2008 до 2017 година над 200.000 туристи од Холандија оствариле речиси еден милион ноќевања во Македонија, покажува најновата анализа на „ДАТА“. По нив, најмногу ноќевања имало од туристите од Турција односно 922.046 ноќевања од 600.221 Турци, а 417.959 Срби ноќевале 837.802 пати.

Туристичкиот пик Македонија го доживеала во 1987 година кога имало 2,4 милиони ноќевања од македонски туристи и 1,5 ноќевања од странски туристи. Во последните пет години туризмот бележи благ раст, но сепак бројките се далеку од нивото на кое државата била во 80-тите години.
Минатата година во државава имало 1,4 милиони ноќевања од домашни туристи и 1,3 милиони од странски туристи.

Според анализата, во просек странските туристи остануваат две вечери, домашните четири вечери, а Холанѓаните пет. Од 2013 година, државата на тур-операторите им доделува по 65 евра субвенции за секој холандски турист со најмалку три ноќевања.

 

Објавените визуелизации се дел од проектот D.A.T.A. – Data Analytics for Transparency and Accountability имплементиран од Фондацијата за интернет и општество „Метаморфозис“. Овој проект е делумно поддржан од Амбасадата на САД. Мислењата, откритијата и заклучоците или препораките изнесени овде се на имплементаторите/авторите, и не ги одразуваат оние на Владaта на САД.


Бројот на туристи лани зголемен за 16,3 отсто во однос на 2016 година


Скопје, 12 јануари, 2018 - 13:05 (META) 

Бројот на туристи, во периодот јануари-ноември 2017 година е зголемен за 16,3 проценти во однос на истиот период од претходната година, и тоа, кај домашните туристи има зголемување за 5,7 проценти, а кај странските има зголемување за 23,5 проценти, објави Државниот завод за статистика.

За истиот период, бројот на ноќевањата е зголемен за 12,2 проценти, кај домашните туристи има зголемување за 4,6 проценти, а кај странските има зголемување за 22,6 проценти.

Според податоците на Државниот завод за статистика, бројот на туристите во ноември 2017 година изнесува 50.869, а бројот на ноќевањата изнесува 115.749.


Во Цермат туристите се евакуираат со хеликоптери


Цермат, 10 јануари, 2018 - 14:35 (META) 

Околу 13.000 туристи кои два дена беа отсечени во завеаниот ски центар Цермат во Швајцарија денеска се евакуираат со хеликоптери.

Одлуката туристите да бидат евакуирани со хеликоптери била донесена затоа што железничката пруга се уште не е оспособена.

Некои од туристите од тој познат скијачки центар на југозападниот дел на земјата и вчера биле евакуирани со хеликоптери, но евакуацијата била прекината откако се стемнило.

Последните неколку дена поради наноси на кал, камења и ризик од лавини затворени биле повеќе патишта во тој дел на земјата.


Во Швајцарија заробени 13.000 туристи


Берн, 9 јануари, 2018 - 18:11 (META) 

Поради снежната бура, попратени со снежни удари на ветер, околу 13.000 туристи се заглавени во Зермат, популарниот скијачки центар во Швајцарија. Локалните власти предупредуваат на „многу големи лавини“.

Во соопштението објавено на сајтот на скијачкиот центар предупредуваат на можен недостаток на струга во целиот град.

Полицијата вчера наутро ги затвори патиштата кои водат до таа област, а во вечерните саати беа откажани и возовите.

Скијањето и планинарењето е забрането во таа област која се наоѓа на 120 километри од Женева.
Портпаролката на Зермат, Жанин Имеш, за „Ен-би-си“ њус рекла дека моментално во таа област има околу 13.000 туристи и дека ситуацијата е под контрола.


„ТУИ Холандија“ ќе воведе сезонски летови од Ајндховен до Охрид


Скопје, 26 декември, 2017 - 13:22 (META) 

Тур-операторот „ТУИ Холандија“ ќе воведе нови сезонски летови од Ајндховен до Охрид во летната сезона во 2018 гoдина, информираат од „ТАВ Македонија“.

Сезонските летови од Ајндховен треба да донесат од 3.000 до 3.500 патници на охридскиот аеродром. Вклучително и со летовите од Амстердам, „ТУИ Холандија“ се очекува да донесе 15.000 туристи на Охридското Езеро следната година.

– Веќе сообраќаме на линијата Амстердам – Охрид, а сега ќе почнеме и со летови од Ајндховен до Охрид, двапати неделно, односно секој понеделник и петок, почнувајќи од 11 мај до 21 септември. Главната причина за воведување на оваа сезонска линија е поради тоа што сакаме да привлечеме туристи и од Белгија. Сигурни сме дека можеме да го прошириме пазарот – изјави Жак Кријнон, продукт-менаџер во „ТУИ Бенелукс“.

Генералниот директор на „ТАВ Македонија“, Алпер Ерсој се надева дека турите на „ТУИ Холандија“ ќе привлечат не само туристи од Холандија, туку и туристи од други европски земји.

„ТАВ Македонија“ ги заврши првите 11 месеци од 2017 година со 13 проценти пораст на бројот на патници, достигнувајќи 1.876.304 на двата македонски аеродрома во Скопје и во Охрид. Во исто време, бројот на летови е зголемен за седум проценти, достигнувајќи вкупно 16.756 летови.


Туристичките работници се соочуваат со нелојална конкуренција и сива економија


Скопје, 11 декември, 2017 - 15:45 (META) 

Здружението на угостителство и туризам при Стопанската комора на Македонија ќе поднесе иницијатива за изменување и дополнување на Законот за туристичка дејност и Законот за угостителска дејност, за да се намалат нелојалната конкуренција и сивата економија во овој сектор, но и да се подобри квалитетот на услугите.

Заменик-претседателот на Здружението, Славе Сирачевски информираше дека ќе се предложи обновување на лиценцата за работа по одреден период од две или три години, за да се обезбеди систем на самоконтрола на пазарот.

– Здружението иницира измена и на процесот на исплата на субвенциите, бидејќи постапката е сложена и обемна, со многу непотребни детали, поради што доаѓа до доцнење во исплата на субвенциите – изјави Асим Мемедовиќ, член на Здружението.

Измени и дополнувања, туристичките работници предлагаат и во делот на дефинирање на работата на туристичките водичи. Во угостителството, Здружението предлага да се направи категоризација на сите угостителски објекти за сместување.

– Тоа подразбира дека освен сегашната категоризација за хотели, мотели и пансиони, од исклучителна важност е да се категоризираат туристичките апартмани, планинарски и ловни домови. Најголемиот проблем во моментов е непостоењето категоризација на апартманите – посочуваат од Здружението.

Туристичките работници, нелојална конкуренција имаат и во продажбата на аранжмани преку онлајн-платформите.

Инаку, според податоците на Државниот завод за статистика, во првите девет месеци годинава, во однос лани, бројот на туристи е зголемен за 16,7 проценти, а бројот на ноќевањата е зголемен за 12,4 проценти.

Најмногу туристи има од Србија, Хрватска, Албанија, Косово, Германија, Бугарија, Полска и Грција. Согласно политиката на субвенционирање, од 2010 година заклучно со 2017 година ќе бидат исплатени 11,9 милиони евра.


Бројот на туристи зголемен за 15,8 отсто во првите осум месеци во однос на лани


Скопје, 12 октомври, 2017 - 16:06 (META) 

Во првите осум месеци годинава бројот на туристите е зголемен за 15,8 отсто во однос на истиот период од лани, објави Државниот завод за статистика. Кај домашните туристи има зголемување за 6,6 проценти, а кај странските за 22,7 проценти.

Бројот на туристите во август изнесува 188.758 и во однос на истиот месец лани е зголемен за 20,4 проценти, а бројот на ноќевањата изнесува 766.844 и е зголемен за 10,4 проценти.

Во истиот период, бројот на домашните туристи е зголемен за 3,4 проценти, а бројот на странските туристи е зголемен за 46,5 проценти.

Бројот на ноќевањата на домашните туристи во август во однос на истиот месец лани е зголемен за 1,6 отсто, а бројот на ноќевањата на странските туристи е зголемен за 41,9 отсто.


Автобус со германски туристи се преврте во Анталија


Анталија, 7 октомври, 2017 - 17:43 (META) 

Три лица загинаа, а десет се повредени откако автобус полн со германски туристи удрил во палма во Анталија, по што се превртел.

Како што јавуваат американските медиуми, меѓу повредените има и едно дете, а едно лице е во критична состојба.

Возачот на автобусот, кој е турски државјанин, е уапсен.