Почина актерот Салаетин Билал


Скопје, 11 мај, 2018 - 10:28 (META) 

На 76-годишна возраст почина Салаетин Билал (76), македонскиот театарски, филмски и телевизиски актер, кој играше во голем број филмови, телевизиски серии и театарскии претстави.

Во неговата биографија, меѓу другите, се запишани филмовите „Најдолгиот пат“ (1976), „Време води“ (1980), „Ангели на отпад“ (1995), „Џипси меџик“ (1997), „Зад непријателските линии“,  „Прашина“ (2001), преку „Илузија“ (2004), „Сенки“ (2007), „Мајки“ (2010), па се до последните филмови на македонската филмска продукција „Трето полувреме“ (2012), „Балканот не е мртов“ (2013), „Херој“ (2013) и „До балчак“ (2014).

Глумел и во голем број серии, како „Волшебното самарче“ (1975), „Итар Пејо“ (1977), „Илинден“ (1982), „Белото Циганче“ (1984), „Солунски патрдии“ (1986), „Тврдокорни“ (1988-1992), Македонски народни приказни (1994) и уште многу други.

Добитник е на бројни награди.

Салаетин Билал студирал на Театарскиот конзерваториум во Истанбул, Турција. Во 1964 година станал член на ансамблот на Турската драма при Театарот на народностите во Скопје. Како актер гостувал и во проекти изведувани на сцените на Македонскиот народен театар, Драмскиот театар, како и на матичната сцена со ансамблот на Албанската драма.

Забележителни се неговите ролји во Театарот на Ромите „Пралипе“ и во други независни проекти.

Верската церемонија ќе се одржи денеска во 13 часот во Џамијата во Бутел, а погребот е во 13.30 часот на Градските гробишта во Бутел.


Турски државјанин исчезна во водите на Мавровско езеро


Скопје, 30 август, 2015 - 19:39 (META) 

Во водите на Мавровско езеро попладнево исчезнал маж, а специјализирани екипи на МВР пребаруваат по дното на брегот во близина на месноста Бунец.

Се претпоставува дека се работи за државјанин на Република Турција на возраст од околу 60 години кој бил на излет.

Попладнево тој со уште еден излетник запливале во езерото. Во еден момент,исчезнатиот почнал да тоне и се обидувал да исплива, по што му се губи трагата.

Другиот излетник допливал до брегот и побарал помош.


Турчин бара македонско државјанство за да биде погребан во Штип


Штип, 28 јули, 2015 - 15:24 (META) 

Во поодмината возраст, на 85 години, некогашниот жител на Штип, Карман Четин, деновиве допатува од Истанбул со едно барање – да добие македонско државјанство. Овој витален старец сака да биде погребан покрај своите родители и другите претци, кои живееле на овие простори. Поради тоа, деновиве, заедно со подалечните роднини, кои останале да живеат во Штип, подготвува документација за да го добие државјанството.

Четин вели дека помладите членови на неговото семејство не можат да ја разберат оваа негова желба бидејќи тие се родиле и живеат во Турција, која е единствена нивна татковина. Но, не и за Четин, кој сè уште ги памети своите пријатели Македонци.

Овој Турчин, роден штипјанец, заборавил да го зборува македонскиот јазик, но го разбира. Со помош на својот роднина, раскажува како го памети времето на партизаните, кога како многу мал, им носел вода на борците во околната шума.

– Им носев леб на партизаните. Тошо Арсов пред мене го убија – раскажува Четин.

Семејството на овој жител на Истанбул се иселило во 1957 година, во времето на масовното заминување на турските семејства од овие простори. Штип е еден од градовите од каде се иселија илјадници Турци во само неколку месеци. Според податоците, од Македонија во Турција се иселиле околу 450.000 луѓе.
Законот е на страна на Карман Четин, кој со фактот дека се родил во Штип, може да добие македонско државјанство.