!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Почина славниот актер Љубиша Самарџиќ


Белград, 9 септември, 2017 - 15:28 (META) 

Љубиша Самарџиќ, еден од најславните актери во Србија, но и во поранешна СФРЈ, починал во Белград во 81. година од животот, објавија утрово српските медиуми.

Тој починал по едномесечно лечење од леукемија на одделот за хематологија во клиничкиот центар во Србија. Љубиша Самарџиќ во декември минатата година имаше тешка операција на тумор на мозокот.

Неговото последно појавување во јавноста беше на 30 март годинава во Домот на младите во Белград, на отворањето на 64. Мартовски фестивал на документарниот и краткометражниот филм.

Тој беше ѕвезда на голем број филмови во СФРЈ, а потоа и во Србија, а во последните децении на кариератата работеше и како режисер.

Љубиша Самарџиќ беше оженет со Мирјана Самарџиќ, со која беа во брак повеќе од 50 години. Роден е на 19 ноември 1936 година во Скопје, во рударско семејство.


Нов метод за лекување рак со вируси „ловци“


Вашингтон, 5 ноември, 2015 - 18:04 (META) 

Здравствените власти на Соединетите Американски Држави (САД) го одобриле новиот, како што велат, револуционерен метод за лекување рак, преку вбризгување на вирус на херпес со двојно дејство, кој ги напаѓа клетките зафатени од тумор, а ги поштедува здравите, поттикнувајќи го имунолошкиот систем да се бори против туморот, пренесува хрватскиот јавен сервис ХРТ.

Новата терапија, како што се наведува, треба да ги поштеди болните од нус-појавите што ги предизвикуваат постојните методи, како хемотерапијата и зрачењето.

Како што пренесува ХРТ, терапијата Т-ВЕК (T-VEC) ќе се продава под комерцијалното име „Имлигик“ (Imlygic), a e развиена од фирмата за биотехнологија „Бивекс“ од Масачусетс.

Инаку, посебно модифицираниот вирус на херпес се вбризгува директно во туморот, а веќе е одобрен за лекување рак на кожата.

За разлика од хемотерапијата и од радиотерапијата, кои ги убиваат клетките на ракот, но истовремено ги оштетуваат и другите делови од телото, модифицираните вируси ги напаѓаат само клетките зафатени до тумор, а како нус-појава пациентот може да има треска еден или два дена.


Ватикан: Папата нема тумор


Ватикан, 21 октомври, 2015 - 10:46 (META) 

Ватикан ги демантираше написите во италијанските весници дека поглаварот на Римокатоличката црква, папата Франциск, има мал, бениген тумор на мозокот.

Портпаролот на Ватикан, Федерико Ломбарди, оцени дека денешните написи на италијанскиот весник „Котидијано национале“ се „неосновани и сериозно неодговорни“.

„Папата, како и секогаш, ги извршува своите интензивни активности“, наведе Ломбарди во пишана изјава.

Цитирајќи неименувани извори, италијанскиот дневен весник „Котидијано национале“, пренесе дека папата Франциск неодамна посетил клиника во близина на Пиза, за да биде прегледан од јапонскиот специјалист Таканори Фукушима.

Како што е наведено, докторот утврдил дека папата има темна дамка која може да се отстрани без операција.