!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Напад со автомобил во Франција, три лица се повредени


Тулуз, 10 ноември, 2017 - 19:08 (META) 

Во францускиот град Тулуз денеска се случи напад со возило врз пешаци, но за разлика од некои инциденти во изминатите две години во Франција, овојпат не станува збор за терористички напад.

Како што јавија француските медиуми, автомобил управуван од лице со психички проблеми удрило група студенти од Кина кои излегувале од средното училиште „Сент Егзипери“ во предградието Блања.

Повредените се две 23-годишни девојки и 22-годишно момче.

Возачот, кој е на возраст од 28 години, е уапсен, а на полицијата и бил претходно познат поради проблематично однесување. Тој изјавил дека „гласови“ му кажале дека треба некого да повреди.

Во објектот на училиштето „Сент Егзипери“ се одржуваат постдипломски студии од повеќе насоки.


Полицајка избодена во Тулуз


Тулуз, 30 август, 2016 - 16:39 (META) 

Полицајка е сериозно повредена откако маж ја нападнал во полициска станица во францускиот град Тулуз, јавуваат француските медиуми.

Напаѓачот, наводно, се обидел да ѝ го грабне оружјето на полицајката, а откако не успеал, извадил нож и ја прободел во грлото.

Полицајката е хоспитализирана со повеќе повреди, но засега не се откриваат повеќе детали
„Ла депеш ди Миди“ објави видеоснимка од местото на нападот, наведувајќи дека 31-годишниот напаѓач, кој е азилант со нарушено психичко здравје, ја нападнал полицајката затоа што таа ја претставувала Франција.

Напаѓачот, наводно, влегол во полициската станица за да поднесе жалба, по што бил уапсен.

Во Франција е прогласена вонредна состојба по серијата терористички напади кои почнаа во јануари 2015 година. Најголемата трагедија се случи во ноември минатата година, кога беа убиени 130 лица во Париз. По тој напад, Франција воведе вонредна состојба, која сè уште е на сила.

На 14 јули годинава во Ница беа убиени 84 лица, откако припадник на Исламска држава со камион влета во толпата што присуствуваше на прославата Денот на Бастиља.