!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Делегации на партии и на институции положија цвеќе на гробот на Борис Трајковски


Скопје, 26 февруари, 2017 - 13:54 (META) 

Делегација на СДСМ, во состав Диме Велковски, Цветанка Ласкова и Дарко Давитковски, положи цвеќе и оддаде почит на поранешниот претседател Борис Трајковски, на 13-годишнината од неговата смрт.

– СДСМ, како и сите граѓани на Македонија, со достојна почит ги вреднува заложбите и придонесот на претседателот Трајковски кон Македонија, кој посветено работеше на соработка и на заедништо и отвори нови перспективи за граѓаните. Овие вредности остануваат водилка за генерациите што доаѓаат – се вели во соопштението на СДСМ.

Цвеќе на гробот на Борис Трајковски положија и делегации од Владата, Собранието, Град Скопје, дипломатскиот кор и здруженија на граѓани.


Делегација на СДСМ оддаде почит на претседателот Киро Глигоров


Скопје, 1 јануари, 2017 - 15:28 (META) 

Делегација на СДСМ положи цвеќе и оддаде почит на првиот претседател на независна и суверена Република Македонија, Киро Глигоров, денеска, на петгодишнината од неговата смрт.

– СДСМ, како и сите граѓани на Македонија, со достојна почит ги вреднува заложбите и придонесот на претседателот Глигоров, кој градеше мостови на соработка во нашата држава и во светот, со што ги отвори перспективите за граѓаните и за Република Македонија – се вели во соопштението на СДСМ.


Делегации положија цвеќе пред споменикот на жртвите од земјотресот


Скопје, 26 јули, 2016 - 11:42 (META) 

Денеска, на Градските гробишта во Бутел, официјални делегации и претставници на институции положија цвеќиња пред Споменикот на жртвите од катастрофалниот земјотрес што се случи во 1963 година.

Цвеќиња во спомен на жртвите во катастрофалниот земјотрес положија делегација на Градот Скопје, делегација на Владата на Република Македонија, делегација на Собранието на Република Македонија, делегација на Советот на Град Скопје, делегација од Министерството за одбрана, делегации од политичките партии, делегации од сите општини на Град Скопје, делегации од дипломатскиот кор во Македонија и делегации од здруженија на граѓани и од други организации.

 


Поради дојава за бомба, евакуирани 2.000 луѓе од пазар во Москва


Москва, 8 март, 2016 - 10:57 (META) 

Околу 2.000 луѓе биле евакуирани од пазар во центарот на Москва по анонимна дојава за подметната бомба, соопштила полицијата, а пренесува ТАСС.

Потврдено е дека сомнителен пакет бил пронајден на пазар, но повеќе детали не се познати.

Пазарот Рижски, од каде што граѓаните биле евакуирани, е еден од најпрометните во главниот град на Русија за купување цвеќе.

Утринава имало многу повеќе луѓе отколку вообичаено поради Интернационалниот ден на жените, кој во Москва многу се почитува.


Владина и градска делегација положија цвеќе на гробот на Борис Трајковски


Скопје, 26 февруари, 2016 - 13:15 (META) 

Делегација предводена од секретарот на Град Скопје, Марјанчо Тодоровски, и од членот на Советот на Град Скопје, Бранислав Саркањац, денеска положи цвеќе на гробот на поранешниот претседател на Република Македонија, Борис Трајковски, и на гробовите на дел од загинатите во авионската несреќа, погребани во Алејата на великаните на градските гробишта во Бутел.

На гробот на претседателот Трајковски цвеќе положија и делегации од Владата на Република Македонија, Собранието на Република Македонија, државни институции, политички партии, претставници на дипломатскиот кор и на здруженија на граѓани.

Денеска се одбележува 12-годишнината од трагичната смрт на поранешниот македонски претседател Борис Трајковски, кој загина во авионска несреќа кај Ротимље, во близина на Мостар, Босна и Херцеговина.

Во авионската несреќа животите ги загубија и портпаролот на претседателот Трајковски, Димка Илкова-Бошковиќ, советниците на претседателот Ристо Блажевски и Анита Лозановска, претставникот на Министерството за внатрешни работи, Миле Крстевски, телохранителите Аце Божиновски и Борис Велиновски, како и пилотот и копилотот на авионот, Марко Марковски и Бранко Ивановски.


Делегација на Град Скопје положи цвеќиња на гробот на Гоце Делчев


Скопје, 4 февруари, 2016 - 13:27 (META) 

Делегација на Градот Скопје, предводена од секретарот на Град Скопје, Марјанчо Тодоровски, положи цвеќиња на гробот на Гоце Делчев, во црквата „Свети Спас“ во Скопје.

Во црквата „Свети Спас“ беше одржана панихида на Македонската православна црква по повод 144-годишнината од раѓањето на еден од најголемите македонски херои и идеолог на македонската револуционерна борба.


Делегација на СДСМ положи цвеќе на вечното почивалиште на Глигоров


Скопје, 1 јануари, 2016 - 14:57 (META) 

По повод четиригодишнината од смртта на првиот претседател на независна и суверена Република Македонија, Киро Глигоров, делегација на СДСМ, предводена од потпретседателот Дамјан Манчевски, денеска положи цвеќе на неговото вечното почивалиште.

– СДСМ и сите граѓани на Македонија, со пиетет се сеќаваат на достигнувањата што претседателот Киро Глигоров ги оствари за државата – се вели во соопштението на партијата.


Повеќе делегации положија цвеќе пред споменикот на НОБ


Скопје, 13 ноември, 2015 - 13:45 (META) 

Пред Споменикот на ослободителите на градот Скопје, пред платото на Владата на Република Македонија, повеќе делегации положија цвеќе во чест на Денот на ослободување на Скопје, 13 Ноември. Цвеќе положи и делегација од Град Скопје, составена од градоначалникот Коце Трајановски и од претседателката на Советот на Град Скопје, Ирена Мишева.

Во името на борците-ослободители на Скопје, се обрати Трајко Стаматовски, кој истакна дека говорел неколкупати на одбележување на годишнини од ослободувањето на Скопје, но секогаш му е чест да се обрати од нивно име.

– Секогаш кога сум говорел за ослободувањето на Скопје, сум го истакнувал херојството на ослободителите на нашиот главен град. Единиците на Третата, Дванаесеттата и на Шеснаесеттата македонска бригада, борбите ги водеа по улиците на Скопје и во поголемите објекти во кои беше забарикадиран непријателот. Ние извојувавме победа и ги остваривме стремежите на претходните генерации. Го направивме тоа само со сопствени сили, свесни дека до вистинска слобода се доаѓа само на таков начин – рече Стаматовски.

 


Денеска се одбележува Денот на македонската револуционерна борба


Скопје, 23 октомври, 2015 - 10:48 (META) 

По повод 23 Октомври – Денот на македонската револуционерна борба, владина делегација, предводена од вицепремиерот и министер за финансии, Зоран Ставрески, и делегација од Градот Скопје, предводена од градоначалникот Коце Трајановски, ќе положат цвеќе пред споменикот на основачите на Внатрешната македонска револуционерна организација во паркот Жена-борец, спроти Собранието на Република Македонија.

Одборот за доделување на државната награда „23 Октомври“, денеска напладне во Собранието на Република Македонија ќе ја додели државната награда за 2015 година, за долгогодишни остварувања во областа на науката, културата, образованието, заштитата на државните интереси и за промоција на државните приоритети, вредности и културно-историското наследство на Република Македонија.

Во областа на културата и на уметноста наградата ќе ја добијат ликовниот уметник Стефан Хаџи-Николов, писателот Фејзи Бојку и музикологот, публицист, новинар и музички критичар, Костадин Костадиновски.


Прилеп: Делегации положија цвеќе на Могилата на непобедените


Прилеп, 11 октомври, 2015 - 18:31 (META) 

По повод 74-годишнината од почетокот на народното востание, изутрината делегации на Собранието на Република Македонија, АРМ, Владата, Сојузот на борците, локалната самоуправа, политички партии, на здруженија и граѓани ги посетија Паркот на револуцијата, Могилата на непобедените, Алејата на народните херои, Споменикот на жената-борец, положија цвеќиња и се поклонија пред моштите на жртвите што ги дал Прилеп во Народната револуција и антифашистичката борба.

Со почит за борците, хероите и за жртвите, прилепскиот градоначалник Марјан Ристески нагласи дека на овој светол ден од македонската национална историја гордост е да се биде прилепчанец, зашто од Прилеп почна ослободителното востание, а заветот на борците од НОБ е аманет.

– Гордост е да се биде прилепчанец и Македонец на овој светол ден, зашто токму на 11 октомври пред 74 години пукна првата пушка, почна антифашистичката борба. Прилеп беше прогласен за град-херој со најмногу народни херои и загинати во оваа антифашистичка револуција. Борбата на сегашните и идни генерации продолжува да ги претвориме Македонија и Прилеп во попросперитетни со нови инвестиции за подобар живот за сите граѓани. Македонија да биде дел од европското семејство – изјави Ристески.

Илија Велкоски од Сојузот на борците потсети дека Прилеп дал 650 жртви и 15 народни херои како ниеден град и беше срцето на народната револуција.

– За време на револуцијата 1941-1945 година, Македонија даде преку 25.000 жртви, што значи скапо ја плати сопствената слобода. Прилеп е носител на револуцијата со повеќе од 8.000 директни учесници, што значи од секоја куќа имаше по еден учесник во НОБ. Градот даде 650 жртви, 141 носител на партизанска споменица од 1941 година и 15 народни херои, како ниеден град од поранешна Југославија. Прилеп го даде срцето на револуцијата – рече Велкоски.

За министерот за земјоделство, шумарство и водостопанство, Михаил Цветков, кој ја предводеше владината делегација, Македонија по вековни борби, по народното востание од 1941 година, стигна до своја држава.

– Ми претставува голема чест што денеска ја предводев владината делегација за оддавање почит на паднатите борци кои ги удрија темелите на денешна Македонија. Драго ми е што по вековни борби успеавме да направиме држава, треба да продолжиме да се бориме да ја зачуваме оваа држава, да ја направиме просперитетна и да биде дел од Европа и од НАТО – изјави Цветков.