Русија на прославата на Денот на победата ги покажа новите ракети за Арктикот


Москва, 9 мај, 2017 - 12:46 (META) 

На традиционалната голема парада во Москва, на прославата на 72-годишнината од победата на Советскиот Сојуз над нацистичка Германија во Втората светска војна, руските вооружени сили денеска ги прикажаа новите ракети „панцир-СА“. Тие се наменети за противвоздушна одбрана, а се наменети за војување на Арктикот, каде Русија забрзано гради воени бази.

Покрај новите ракети, на парадата на Црвениот плоштад беа презентирани и интерконтиненталните балистички ракети „јарс РС-24“, кои може да носат нуклеарни боеви глави.

Руските ловци, бомбардери и хеликоптери прелетаа преку плоштадот во рамки на парадата, а по него прошета и новата руска национална гарда. Новите единици ќе бидат вооружени со модернизирани пушки „АК-74М“, а задача ќе им биде борбата против тероризмот и организираниот криминал.

Во големата парада учествуваа 10.000 војници и офицери, 135 оклопни возила и 71 летало.

– Ниту една сила не ќе може да доминира со нашиот народ – рече рускиот претседател Владимир Путин, во говорот во кој го осуди уништувањето нанесено од трупите на Хитлерова Германија на Советскиот Сојуз.

Во меѓувреме, украинскиот претседател Петро Порошенко, шеф на уште една држава – наследничка на Советскиот Сојуз, полоожи венец на церемонија во Киев. На украинските војници им порача дека Русија се обидува да ја искористи прославата на победата „за да ги задоволи своите реваншистички, империјалистички и експанзионистички потреби“.

Русија вложува милијарди долари во модернизација на војската среде сè поголемите тензии со НАТО поради конфликтот во Украина, а парадата на Денот на победата послужи за истакнување на воената моќ пред меѓународната публика.


Москва ќе го затвори Црвениот плоштад за новогодишната ноќ


Москва, 28 декември, 2015 - 16:24 (META) 

Московските власти одлучија на 31 декември да го затворат Црвениот плоштад поради безбедносни причини, соопштија денеска градските власти.

Полицијата ќе ги враќа сите што ќе пристигнат на плоштадот за да ја дочекаат Новата година, соопшти шефот на безбедносната служба во Москва, Алексеј Мајаров.

Причина за затворањето на познатиот плоштад е снимањето на концертот во живо за државната телевизија „Канал 1“, на кој ќе може да присуствува само избрана публика, пренесуваат руските медиуми.