Најмалку 10 луѓе загинаа во поплава предизвикана од пукање на брана во Кенија


Најроби, 10 мај, 2018 - 10:24 (META) 

Најмалку десет луѓе загинаа, а илјада останаа без домови поради пукање на брана во Кенија. Несреќата која ја предизвикале обилните дождови се случила во градот Солаи, 190 километри оддалечен од претстолнината Најроби.

„Водата одзеде животи и предизвика огромна штета на имотите. Обемот на штета треба да се утврди“, соопштија локалните власти.

Кенискиот огранок на Црвен крст извести дека до сега се спасени 39 лица.


Во поплавите на југот на Азија настрадаа 600 лица


Њу Делхи, 20 август, 2017 - 16:02 (META) 

Околу 600 лица настрадаа во поплавите на југот на Азија каде што акцијата за спасување се уште трае. Во поплавите и свлечиштата предизвикани од нив, биле погодени повеќе од еден милион луѓе.

Властите на Индија побарале помош од војската во две области кои се најгусто населени, а во кои загинаа 55 лица. Во индиската држава Утар Прадеш речиси 100.000 луѓе, од своите домови биле префрлени во засолништа.Индиската држава Бихар е најтешко погодена, каде што бројот на жртвите се зголеми на 153.

Најмалку 20 од 28 милиони жители на Непал се погодени од поплавите, а се проценува дека настрадале 123 лица.

Неколку милиони луѓе во Непал, Бангладеш и Индија се соочуваат со недостаток на храна и постои опасност од заразни болести поради загадената вода. Меѓународниот комитет на Црвениот крст повика на итна акција поради хуманитарната криза на југот на Азија.


Црвен крст на Град Скопје ќе дели вода и совети за справување со жегата


Скопје, 27 јуни, 2017 - 13:03 (META) 

Црвениот крст на Град Скопје најави дека со поддршка од градските власти ќе формира мобилни тимови кои ќе патролираат низ градот Скопје. Тие, како што известуваат од Грвен крст, ќе дистрибуираат вода и летоци со совети, ќе мерат притисок на граѓани кои ќе се пожалат на тегоби, а за потешките случаи ќе обезбедат транспорт до најблиската медицинска установа или до домот на лицето.

Од среда до петок, по четири мобилни тимови ќе излезат на терен и во периодот од 11  до 17 часот ќе патролираат низ централното градско подрачје и на поголемите автобуски постојки.

Две екипи за време на викенди ќе бидат дежурни на планинско-спасителните станици на Водно и на Матка.


Црвен крст организира хуманитарен концерт за помош на самохрана мајка


Скопје, 3 март, 2017 - 16:49 (META) 

Под мотото „Подај рака – спаси некого од мака“, ќе се одржи хуманитарен фолклорен концерт на 10 март во Домот на АРМ во Скопје, со почеток од 20 часот.

Целта на овој хуманитарен концерт е собирање финансиски средства за самохрана невработена мајка од населбата Козле во Скопје, која со своето малолетно дете живее во многу тешка состојба.

Билетите ќе чинат 100 денари и може да се купат на билетарницата во Домот на АРМ или пред почетокот на концертот.

Хуманитарниот концерт е дел од програмата „Црвен крст во акција – Промоција на хумани вредности“ (ЦКА-ПХВ),  кој претставува национална алатка за привлекување и за задржување на волонтери во Црвениот крст на Р.Македонија.

Истата се имплементира во сите општински организации на Црвен крст и на годишно ниво обучува околу 1.200 младинци, потенцијални волонтери во организацијата и 40 дисеминатори кои работаат со младинците.

Младите добиваат обука за вредностите на Црвениот крст, учат за културата како систем од вредности, за културата на дијалог како основен услов за градење интеркултурно опшество.


Во Прешево бегалците добиваат само чај и супа, нема повеќе храна


Прешево, 19 декември, 2016 - 18:06 (META) 

Во Прифатниот центар за мигранти и бегалци во Прешево, каде во последниот месец престојуваат помеѓу 700 и 1.000 лица, од крајот на ноември поради недостиг од продукти, не се дели храна туку само топли чаеви и супа.

Секретарот на Црвен крст во Прешево, Ахмети Халими рече денеска дека мигрантите во тој прифатен центар пред дваесетина дена добивале по еден пакет сува храна дневно по лице, но од крајот на ноември и тоа е укинато.

Халими рече дека Црвен крст веќе нема прецизни податоци за бројот на мигранти кои моментално се сместени во Прешево затоа што тие податоци претходно биле добивани на основа на оние кои земале пакети сува храна.

Прифатниот центар во Прешево е прв од таков вид кој е отворен во Србија и низ него досега поминале повеќе од 700.000 мигранти. Освен чаеви и супи на бегалците и на мигрантите таму им е обезбедено сместување и услови за одржување хигиена.


Сириската војска убива цивили во Алепо, тврдат ОН


Алепо, 13 декември, 2016 - 11:57 (META) 

Обединетите нации денеска соопштија дека сириски провладини сили почнале да влегуваат во домови во источните делови во Алепо и да ги убиваат цивилите кои ќе ги затекнат внатре, пренесува „Би-би-си“.

Од канцеларијата за човекови права на Обединетите нации, како што наведува британскиот национален сервис, изјавиле дека имаат веродостојни докази дека во четири области 82 цивили биле убиени на самото место. Портпаролот на канцеларијата на ОН навел дека состојбите на теренот се како да има „целосно отсуство на хуманост во Алепо“.

Според информациите на светските медиуми, илјадници луѓе се заробени во деловите на источен Алепо кои сè уште се под контрола на бунтовничките сили, додека во меѓувреме трае офанзивата на сириската војска, проследена со жестоки бомбардитања, за целосно преземање на деловите од градот.

Обединетите нации и Меѓународниот комитет на Црвениот крст упатија апел до Сирија и до нејзиниот сојузник Русија да прекинат со бомбардирањата и да им дозволат на цивилите безбеден коридор за излез од деловите на Алепо.

Во меѓувреме, светските агенции јавуваат дека Турција во моментов преговара со Русија за отворање на коридор за евакуирање на сириските бунтовници и на цивилите од квартовите во источен Алепо кои се под контрола на опозициските сили.

Одбраната што бунтовниците ја поставија во Алепо вчера била пробиена и сириската војска заначајно напредувала во источниот дел на градот, а опозициските броци се повлекле во неколку од преостанатите подрачја во градот.


Меѓународниот Црвен крст бара да се поштедат цивилите во Мосул


Женева, 18 октомври, 2016 - 18:53 (META) 

Меѓународниот Црвен крст денеска ги повика сите страни во борбата за ирачкиот град Мосул да ги поштедат цивилите и да дозволат ранетите да бидат евакуирани.

Регионалниот директор на меѓународниот Црвен крст за Блискиот Исток, Роберт Мардини, на прес-конференција во Женева соопшти дека организацијата ги зајакнала медицинските центри, вклучувајќи и лечење на евентуални жртви на хемиско оружје.

Хуманитарната агенција се надева дека ќе може да следи како се постапува со луѓето кои ирачката војска ќе ги задржи или испитува откако ќе го напуштат северниот град, кој е под контрола на Исламска држава.


Семејствата од поплавените подрачја ќе добијат по околу 200 евра од Црвен крст


Скопје, 31 август, 2016 - 13:08 (META) 

Граѓаните од поплавените подрачја ќе добијат околу 200 евра по семејство од средствата собрани на двете сметки на Црвен крст, односно од сметката на Фондот на солидарност и од телефонските броеви на која беа донирани 63,8 милиони денари или 1.038.389 евра.

Бројката на семејства на која им е потребна помош се движи од 4.000 до 4.500.

– Пријавувањето на граѓаните кои претрпеле штета е до петок, неофицијалната бројката на семејства на кои им треба помош е 4.000 – 4.500. Треба да ги почекаме официјалните податоци и потоа овие 63 милиони денари кои досега ги имаме собрано, ќе ги исплатиме линеарно. Ние ќе ги користиме резултатите добиени од комисиите кои се излезени на терен. Сметаме дека линеарниот начин на исплата на средства е најправеден и најхуман. По ист принцип ќе бидат распределени и средствата што дополнително ќе пристигнат  – изјави генералниот секретар на Црвен крст, Саит Саити.

Тој информираше дека за поголема транспарентност при распределба на средствата била формирана Комисија за констатирање на состојбата со средствата во која биле 13 лица претставници од компании кои најмногу донирале, граѓани од погодените подрачја, волонтери, претставници од надлежните институции.

Во однос на парите донирани од австрискиот Црвен крст во висина од 550.000 евра, Саити истакна дека планирани се активности за обука на локалното населените за справување со последици од природни катастрофи, психосоцијална поддршка и активности за поддршка на училиштата во погодените региони.

– Од овие пари, на 300 најранливи категории на семејства ќе им бидат исплатени по 500 евра. Преку меѓународниот Црвен крст и Црвената полумесечина, обезбедивме 300.000 швајцарски франци кои ќе бидат искористени за храна и за хигиена и за обука на 3.000 лица за локалната самоуправа во погодениот регион во делот на справување со последици од природни катастрофи – додаде Саити.

Во комисијата на Црвен крст присуствуваше и првиот човек на компанијата „Бучим“, Николајчо Николов, кој истакна дека средствата за прослава на Денот на рударите ги пренамениле за помош на граѓаните од поплавените подрачја и биле обезбедени дополнителни средства со што на граѓаните им помогнале со 100.000 евра.

 


На двете сметки на Црвен крст собрани 840.002 евра, акцијата завршува денеска


Скопје, 29 август, 2016 - 15:09 (META) 

На жиро-сметката на Фондот за солидарност на Црвен крст до денеска се уплатени 38.409.843 денари или 624.550 евра, а од донирањето 100 денари со повик на телефоните 075/070/077 143 400, собрани се 13.250.300 денари, односно 215.452 евра, или вкупно 840.002 евра, соопштија од Црвен крст.

Досега, како што известија од Црвен крст, нивните екипи дистрибуирале:

  • 34.036 пакети со храна (еден пакет е наменет за четири лица);
  • 31.004 дневни и топли оброци;
  • 46.377  литри млечни производи;
  • 7.008 пакети со хигиенски производи;
  • 2.577 бебешки пакети;
  • 315 тони вода;
  • 586 душеци;
  • 4.590 кебиња;
  • 600 килограми облека;
  • 764 пара чизми;
  • 341 литар дезинтал.

Средствата што досега се собрани ќе бидат распределни линеарно на граѓаните од поплавените подрачја.


Крводарителска акција по повод празникот Голема Богородица


Скопје, 28 август, 2016 - 10:46 (META) 

Општинската организација на Црвен крст Центар во соработка со Институтот за трансфузиона медицина и оваа година, по 14. пат, ќе ја реализира традиционалната крводарителска акција по повод празникот Голема Богородица.

Акцијата ќе се одржи денесска, од 9 до 17 часот, во Домот на АРМ.

Минатата година на акцијата биле собрани 242 единици крв, а од Црвен крст – Центар се надеваат дека таа бројка годинава ќе се зголеми.