!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Романија: Пресретнат брод со мигранти во Црното море


Букурешт, 13 август, 2017 - 15:36 (META) 

Романската крајбрежна стража во Црното море пресретнала брод со 69 мигранти со потекло од Ирак, пренесува балканскиот сервис на „Радио Слободна Европа“.

Крајбрежната стража го забележала бродот, кој пловел под турско знаме, на околу 16 километри од пристаништето Мангалија, кое се наоѓа во југоисточниот дел на Романија, во близина на границата со Бугарија.

Во бродот, кој бил испратен до брегот, имало 30 мажи, 10 жени и 29 деца. Со бродот управувале Бугарин и лице од Кипар.

Од романската полиција соопштиле дека во тек е истрага.


На романскиот брег на Црно Море починале 119 делфини


Букурешт, 4 август, 2017 - 13:37 (META) 

Романската група за заштита на животната средина „Маре нострум“ соопшти дека 119 делфини годинава загинале долж романскиот брег на Црно Море, како последица на вплеткување во рибарските мрежи.

Во соопштението на невладината организација се наведува дека ова е најлошата година по 2012 година, кога 177 делфини починаа како последица на рибарските мрежи. Еден од трите видови делфини во Црно Море се смета за згрозен.
Активистите на „Маре нострум“ ги повикаа граѓаните да „посвојат делфини“.

Групата соопшти дека ги алармирала властите дека и понатаму се користат забранети техники на риболов, кои доведуваат и до смрт на делфините.

Во Романија е забрането да се убиваат делфини, особено зашто во водите на Црно Море живеат само неколку илјади од овие цицачи, чиј број пред 50 години бил 300.000.


ОМВ и „Газпром“ го оживуваат проектот „Јужен тек“


Виена, 14 јуни, 2017 - 10:59 (META) 

Австриската нафтена компанија ОМВ и руски „Газпром“ го оживуваат проектот за гасоводот „Јужен тек“, кој заобиколувајќи ја Украина треба да го донесе гасот од Русија до Виена, пишува австриски „Стандард“.

Како што појаснува австрискиот медиум, станува збор за гасовод кој преку Црно Море треба да стигне не само до Југоисточна Европа, туку и до Централна Европа.

Пред десетина дена, австрискиот канцелар Кристијан Керн разговарал со рускиот претседател Владимир Путин по повод учеството на Меѓународниот економски форум, но медиумите пишуваат дека информациите за гасоводот, барем засега, се кријат од јавноста.

Според аналитичарите, реализацијата на проектот нема само економска заднина, туку би имала и геополитички импликации.


Товарен брод потона во Црно Море


Москва, 19 април, 2017 - 13:56 (META) 

Товарен брод со 12-член екипаж од Русија, Украина и од Грузија денеска потона во Црното Море, соопшти руското Министерство за вонредни ситуации.

Спасувачите пронашле едно лице, а уште четири се локализирани и се подготвуваат за нивно префрлување на спасувачки брод, соопшти висок претставник на министерството на Крим, Владимир Иванов, кој не наведе што се случило со другите членови на екипажот.

На бродот „Герои арсенал“ се наоѓале двајца Руси, девет Украинци и еден граѓанин на Грузија.

Како што јавува новинската агенција ТАСС, бродот пратил сигнал за помош во 3.30 часот по московско време (4.30 по централноевропско време) и потонал на околу 30 километри од ’ртот Зелен Рог.

Портпаролот на Сојузната морнарица соопшти дека бродот кој пренесувал житарки, бил сопственост на турска компанија, регистрирана на Маршалските Острови, а пловел под знамето на Панама.


Извлечено телото на пилотот на рускиот авион кој се урна во Црно Море


Сочи, 26 декември, 2016 - 19:21 (META) 

Нуркачите го извлекоа на површина телото на Роман Волков, пилотот на авионот „ту-154“, кој вчера падна во Црно Море две минути по полетувањето, при што загинаа 92 лица.

Според извори од местото на акцијата, нуркачите што учествувале во операцијата за извлекување на телата на жртвите и на деловите на авионот, пронашле уште едно тело, а кога го извлекле на површина, врз основа на униформата заклучиле дека се работи за Волков.

Истиот извор наведува дека претходно на површина извлечени биле уште 70 посмртни остатоци на жртвите на несреќата.

Во Москва утринава пристигна првиот авион со телата на загинатите и почна процесот на нивна идентификација.


Телата на жртвите од падот на рускиот авион ги бараат 27 бродови


Сочи, 25 декември, 2016 - 14:35 (META) 

Руското министерство за одбрана соопшти дека 27 бродови и чамци, како и повеќе од 3.000 луѓе и 100 нуркачи ги бараат телата на жртвите од авионската несреќа која се случи во близина на Сочи.

„Вкупно 27 бродови и чамци, 37 возачи, четири хеликоптери и дронови, како и подморница ја пребаруваат областа во која се урна рускиот воен авион“, се наведува во соопштението.

Авионот на руското министерство за одбрана „ту-154“ се урна во Црно Море во близина на Сочи, непосредно по полетувањето за Сирија, при што загинаа 93 лица.

Сè уште се истражуваат причините за несреќата.


Во падот на рускиот авион загинаа хористите од „Ансамбл Александров“


Сочи, 25 декември, 2016 - 10:46 (META) 

Руското министерство за одбрана ја објави листата на патници на авионот „ту-154“ кој со 92 патници и членови на екипажот се урна во Црното Море откако од Сочи полета кон Сирија.

Во леталото имало 64 членови на официјалниот воен хор на руските вооружени сили „Ансамбл Александров“, кој требало во руската воена база Хмеимин да учествува во прославата за Нова година. Во авионот се наоѓала и извршната директорка на хуманитарниот фонд „Праведна помош“, Јелисавета Глинка.

Воените истражувачи на истражувачкиот комитет на Русија отворија кривична истрага, а портпаролот на Кремљ, Димитриј Песков, истакна дека претседателот на Русија, Владимир Путин, ги добил информациите за падот на авионот и дека е навремено брифиран за ситуацијата.

– Прерано е што било да се каже, претседателот чека сликата да биде целосна – рече Песков, кој додаде дека рускиот министер за одбрана, Серфеј Шојгу, е на постојана телефонска врска со Путин.

Засега е пронајдено тело на една од жртвите, како и документи на новинар од рускиот „Канал 1“.

Портпаролот на руското министерство за одбрана, Игор Конашенков, изјави дека во авионот имало осум членови на екипажот и 84 патници. Освен музичарите, помеѓу патниците имало војници и новинари.

Руската воена телевизија „Звезда“ соопшти дека помеѓу новинарите имало тројца нивни колеги, а дека тројца од новинарите се од „Канал 1“.


Руски воен авион со 92 патника падна во Црно Море


Сочи, 25 декември, 2016 - 9:35 (META) 

Руски воен авион со 92 патника и членови на екипажот се урна на пат од Сочи кон Сирија, пренесуваат руските медиуми.

Истражниот комитет на Русија веднаш отвори кривична истрага за трагедијата, а портпаролката Светлана Петренко вели дека нема информација за бројот на загинатите или преживеаните.

Таа наведе дека кривична истрага е отворено поради „кршење на правилата на летачката безбедност или подготовката за нив“. Наведено е дека запленети се документи и се испрашуваат лицата кои го подготвувале авионот за лет.

Авионот исчезнал од радарот околу 5 часот и 40 минути по московско време, кратко по полетувањето од Сочи.

Дел од руските медиуми наведуваат дека спасувачките екипи ги лоцирале остатоците од леталото на околу 1,5 километар од брегот, на длабочина од 50 до 70 метри.

Најголемиот дел од патниците биле музичари на рускиот воен хор кои тргнале во руската база Хмеимин каде требало да учествуваат во прославата за Нова година. Со нив биле и девет претставници на медиумите, шест војници и осум членови на екипажот.


Бугарија: Во Црно Море неопходно е присуство на НАТО, а не на одделни држави


Брисел, 28 октомври, 2016 - 9:54 (META) 

Бугарија настoјува решението за дополнително воено присуство во Црно Море да биде на НАТО, а не на одделни држави. Министерот за одбрана на Бугарија, Николај Ненчев, соопшти дека очекува до декември Бугарија и Романија да ги дефинираат своите позиции околу ова прашање, јави агенцијата БТА.

„Јас сум против да влегуваме во преговори со Романија и со Турција за ова прашање. И понатаму ќе настојувам, ако се донесе такво решение, тоа да биде на НАТО, а не на одделни страни од алијансата и сметам дека тоа е праведно“, изјави Ненчев за бугарските медиуми во седиштето на НАТО во Брисел.

Тој посочи дека станува збор за прашање за кое се разговара подолго време, но сè уште нема конечно решение. Министерот соопшти дека за ова разговарал со својот романски колега.

„Можеби ќе имаме заедничка позиција. Останува да се видиме во декември за да ги прецизираме позициите по ова прашање. Денеска можеа да се слушнат мислења од повеќе министри, кои ја изразија својата загриженост од случувањата во реонот на Црно Море и искажаа став оти сакаат засилено присуство таму, што е можно поскоро, во форма на обуки и на насоки од НАТО“, појасни Ненчев.

Тој истакна дека за време на првата сесија од состанокот на министрите за одбрана на земјите-членки на НАТО нема да се донесуваат решенија.

„Прашањето за регионот на Црното Море треба дополнително да се прецизира и засега нема конечно решение“, додаде министерот за одбрана на Бугарија.

Тој соопшти дека Бугарија ќе учествува со 400 припадници во баталјонот на мултинационалната бригада на НАТО во Романија, според ротационен прицип. Баталјонот, како што посочи Ненчев, нема да е постојано присутен таму, а ќе учествува во обуки, кога ќе биде неопходно.

Министерот, исто така, соопшти дека Велика Британија покажува интерес за обезбедување заштита на бугарскиот воздушен простор, за што, според него, има потреба од негово засилување.

„Продолжуваме со разговорите со Полска и ги очекуваме нивните конкретни предлози наскоро. Нема ништо лошо во една таква мисија. Во Бугарија се создаде перцепција дека тоа го правиме поради наша неспособност, поради тоа што сме ги исцрпеле ресурсите на авијацијата, но тоа не одговара на вистината. Тоа е мисија на НАТО, која се спроведува во Романија и во други земји, а може да биде спроведена и во Бугарија. Можеме да постогнеме добар договор со Полска и со Велика Британија“, рече Ненчев.

Тој соопшти дека Бугарија ќе учествува со една фрегата во новата операција на НАТО во Средоземното Море, според ротационен принцип.

Одговарајќи на прашање дали бугарски војници ќе бидат испратени во баталјоните во балтичките земји и во Полска, Ненчев рече дека кај бугарските власти за тоа не станало збор и дека нема намера за такво учество.


Русија е подготвена за гасовод сличен на „Јужен тек“ ако ЕУ е заинтересирана


Москва, 24 март, 2016 - 17:22 (META) 

Русија е подготвена да го спроведе проектот за гасовод под Црно Море сличен на „Јужен тек“ ако Европската комисија покаже интерес, изјави денеска портпаролот на рускиот претседател Дмитриј Песков.

Песков изјави дека Русија разговарала за таквиот проект со партнерите, но сè зависи од тоа „колку е предвидливо и конструктивно однесувањето на Европска комисија“, пренесува руската новинска агенција ТАСС.

Тој изјавил дека директорот на „Газпром“, Алексеј Милер, неодамна престојувал во Италија каде што бил потпишан меморандум за проектот под Црно Море за доставување гас до Грција и до Италија.