!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Пукал пред црква во Остин, полицијата го убила


Остин, 14 јануари, 2017 - 17:35 (META) 

Полицијата во Остин убила маж кој неколкупати пукал од автоматска пушка во воздух пред црква во сојузната држава Тексас.

Напаѓачот бил убиен откако одбил да го фрли оружјето, соопшти полицијата.

Властите наведуваат дека пукањето во северозападен Остин се случилo откако полицијата добила повик во кој бил пријавен грабеж, а потоа и тепачка на паркиралиште на истата локација. Во повикот се велело дека мажот имал автоматска пушка и сачмарка.

Помошникот началник на полицијата, Крис Мекајвен, рече дека мажот прво пукал во воздух пет или шест пати, потоа се приближил до црквата и продолжил да пука.

Тој одбил да го послуша барањето да го фрли оружјето, а во моментот кога полицијата го застрелала, се наоѓал во дворот на црквата.

Името на напаѓачот сè уште не е објавено.


МПЦ апелира да не се палат бадникови огнови, дрвата да се донираат за сиромашните


Скопје, 5 јануари, 2017 - 10:51 (META) 

Македонската православна црква апелира денеска да не се палат бадникови огнови, а собраните дрва да се донираат на социјално загрозени семејства.

– Верниците кои планираат да организираат коледарски оган, да не го прават тоа, туку да ги донираат дрвата. Исто така, на тој начин ќе покажеме и доволна граѓанска свест во време кога  Скопје, но и другите градови се соочуваат со енормно загадување – се вели во соопштението на МПЦ.

Наместо на улица покрај оган, МПЦ ги повикуваат верниците на богослужба во црква, каде достојно ќе се прослави Христовото раѓање.


Најмалку 160 лица загинаа при уривање на покрив на црква во Нигерија


Ујо, 11 декември, 2016 - 13:18 (META) 

Најмалку 160 лица загинаа кога покров на една црква на југот во Нигерија се урна врз верниците, соопштија денеска властите. Се очекува бројот на загинати да се зголеми.

Црквата која се урнала во градот Ујо, во нигериската сојузна држава Аква Иба, била во изградба, а работниците се брзале да ја дозавршат изградбата за да биде готова за церемонијата на која основачот на црквата, Акан Викс, требало да биде прогласен за бискуп.

Во моментот на падот на металната конструкција, во црквата се наоѓале повеќе од стотина верници, меѓу кои и Викс, како и еден владин претставник, кои останале неповредени.

За причините за несреќата ќе биде поведена истрага, за да се утврди дали се испочитувани стандардите при градење на објектот.

Уривањето згради во Нигерија се случува многу често, поради корупција при склучување на договорите за градење, користење на нестандардни материјали, како и поткуп на инспекторите кои вршат надзор.


Спомен-плоча во чест на научникот Михајло Пупин во Охрид


Охрид, 8 декември, 2016 - 11:07 (META) 

На камбанаријата покрај црквата „Св. Богородица Перивлепта“ во Охрид, денеска, на посебна свеченост, во рамките на одбележувањето на патрониот празник на градот, Св. Климент Охридски – Чудотворец, ќе биде откриена спомен-плоча во чест на донаторот на црковното ѕвоно, научникот со светска слава од почетокот на минатиот век – Михајло Пупин.

Плочата е донација на невладиното здружение „Лајонс клуб Лихнидос“ од Охрид, додека пригодната мермерна плоча пред камбанаријата ќе ја открие еден од потомците на Пупин.

Михајло Пупин, чие семејно стебло, според тврдењата на професорот Павле Митрески, потекнува од охридскиот крај, во 1914 година, во рамките на Српската академија на науките и уметностите (САНУ), ја формирал фонадацијата „Олимпија Пупин“ и давал голема помош на сиромашни деца од тогашна Вардарска Македонија, меѓу кои имало и ученици од Охрид. Помогнал во изградбата на училиштето во стариот дел од Охрид каде што денеска е сместена музејската администрација, а ја изградил и камбанаријата во црквата „Света Богородица Перивлепта“ позната како „Стар Свети Климент“, за која го донирал тогаш најголемото црковно ѕвоно на Балканот.

Македонската академија на науките и уметностите (МАНУ) и САНУ заеднички го афирмираат делото на Михајло Пупин, светскиот великан од областа на физиката и на електрониката, за што во Вевчани, каде му е подигната Спомен-соба во 2008 година, одржаа заедничка тркалезна маса.

Самиот Пупин бил член на повеќе академии на науки и уметности во светот, бил претседател на Американската академија на науките во Њујорк и член на Српската академија на науките и уметностите. За своите научни откритија посмртно ја добил и Пулицеровата награда во 1924 година.


Црква се гради во кругот на Клиничката болница во Штип


Штип, 14 ноември, 2016 - 17:28 (META) 

На денот на свети Кузман и Дамјан, беа поставени темели на истоимената црква во дворот на Клиничката болница во Штип. Владиката Иларион најави дека осветувањето ќе биде следната година.
Уште со најавата дека ќе се гради црква до болницата, социјалните мрежи беа преполни со негодувања.

– Зошто наместо за бетон, парите да не се употребат за поправка на апаратите, како томографот кој не работи повеќе од една година? Или за набавка на чаршафи и пижами за пациентите? Ако се гради црква, дали ќе додадат до неа и џамија или синагога – реагираа граѓаните, кои со фотографии потсетуваа на состојбите во некои болнички одделенија, каде таванот прокиснува или на креветите има искината постелнина.

Од управата на болницата уште веднаш ги отфрлија обвинувањата за ненаменско трошење на парите. Директорот Александар Стојановски изјави дека парите за црквата се донација од организација од Шведска, која самата одлучила за намената. Парите ги обезбедува семејството Розенгрин, чиј претставник беше денеска во Штип на поставување на темелите. Семејството неодамна донираше опрема и медицински апарати за болницата.

– Последниот пат кога бевме тука, со директорот и со владиката Иларион дискутиравме дека овде, во болницата, нема црква. Тогаш почнавме да размислуваме како да ја изградиме. Во Шведска секоја голема болница има црква – изјави Томас Розенгрен од невладината организација „Хенд хил хенд“, кој најави нова донација од опрема и со апарати.

Се планира мала црква, во која, според донаторите и раководството на Клиничката болница, ќе можат да се помолат за здравје пациентите и нивните роднини, по пример на болниците во многу европски држави, каде ако нема црква, има мал параклис.

Последните две години во Штип и во околината се градат десетина нови цркви. Една никнува веднаш до основно училиште, каде, според општинската опозиција, нема пристојна спортска сала за изведување настава.


Католичката црква во Албанија денеска ќе прогласи 38 католици за блажени


Тирана, 5 ноември, 2016 - 10:19 (META) 

Католичката црква во Албанија денеска во градот Скадар ќе прогласи 38 католици за блажени. Сите 38 католици ќе бидат запишани во книгата на блажени поради нивната маченичка смрт за време на комунизмот.

Мисата ќе ја одржи кардиналот Анџело Амато. Се очекува на настанот да присуствуваат високи црковни лица од Католичката црква.

Меѓу 38 албански маченици кои ќе бидат прогласени за блажени е и последниот надбискуп на Драч, Винценц Прендуши. Бил обвинет дека е непријател на народот, реакционер, ватикански шпион, а осуден е на дваесет години затвор каде бил мачен, исмејуван и понижуван на разни начини сè до неговата смрт.


Конференција во чест на свети Климент Охридски


Охрид, 20 октомври, 2016 - 10:44 (META) 

Меѓународна конференција во чест на илјада и стогодишнината од блаженото упокојување на великиот ученик на светите браќа Кирил и Методиј, се одржува од денеска до 22 октомври во конгресниот центар во Охрид. Настанот е насловен „Свети Климент Охридски – Милоста и милосрдието во Библијата и во црквата“ и е дел од државната програма за одбележување на јубилејот од неговото упокојување.

Конференцијата е организирана од православниот богословски факултет „Свети Климент Охридски“ од Скопје, а се одржува под покровителство на Универзитетот „Свети Кирил и Методиј“ од Скопје.

На конференцијата учествуваат научници и теолози од богословските факултети при универзитетите од Букурешт, Рим, Загреб, Белград, Санкт Петербург, Софија, Солун и од Скопје.
Мегу другите, обраќања ќе имаат д-р Ѓорге Иванов, претседател на Република Македонија, проф. д-р Никола Јанкуловски, ректор на универзитетот „Свети Кирил и Методиј“ во Скопје, и архиепископот охридски и македонски г.г. Стефан.


ФРОДЕМ: МПЦ да не биде соучесник во одбраната на обвинетите криминални партиски лица


Скопје, 17 септември, 2016 - 11:08 (META) 

Фронтот за демократска Македонија (ФРОДЕМ) ја повикува Македонската православна црква (МПЦ) да се каже дали во Општината Центар во 2013 година протестирале партиски насилници или верници.

Од ФРОДЕМ велат дека во последното соопштение на ВМРО-ДПМНЕ се вели дека: ,,претставници на Македонската православна црква и здружението на граѓани „Веритас“ се спротивставиле на намерите да се стопира изградбата на црквата „Свети Константин и Елена“ во центарот на град Скопје.

„Со ова соопштение на ВМРО-ДПМНЕ, МПЦ и нејзини претставници се означени како соучесници и организатори на насилните протести. Жално и недозволиво е молчењето на МПЦ поради бесрамниот обид на злоупотреба на верските чувства на граѓаните за одбрана на обвинетите криминални и насилни партиски личности и функционери. Доколку МПЦ е црква на сите верници и доколку се залага за вистина, бараме таа јавно да одговори на две прашања: дали протестите во Општина Центар беа организирани на „верска основа“ или по партиска наредба и дали во Општина Центар демолираа „верници“ или партиски насилници? Со понатамошното затскривање и молчење МПЦ ќе се стави во улога на соучесник во срамната пародија на одбрана на обвинетите криминални и насилни партиски личности и функционери“, пишува во соопштението на ФРОДЕМ.


Груевски, Заев, Ахмети и Иванов во делегацијата за прогласување на Мајка Тереза за светица


Скопје, 5 август, 2016 - 12:25 (META) 

Претседателот на Република Македонија, Ѓорге Иванов, на 4 септември во Рим ќе ја предводи македонската државно-црковна делегација, на свечениот чин на прогласувањето на Мајка Тереза за светица.

На свеченоста, покрај македонскиот претседател, ќе присуствуваат министерот за надворешни работи, Никола Попоски, и министерката за култура, Елизабета Канческа-Милевска, делегации на Католичката црква во Република Македонија и на Македонската православна црква – Охридска архиепископија, градоначалникот на Град Скопје, како и член на фамилијата на Мајка Тереза.

Претседателот Иванов, како предводник на македонската државно-црковна делегација на свеченоста во Ватикан, по повод прогласувањето на Мајка Тереза за светица, ги покани и лидерите на четирите најголеми политички партии, ВМРО-ДПМНЕ, СДСМ, ДУИ и ДПА да присуствуваат на овој историски чин за нашата земја. Своето присуство на манифестацијата во Рим го потврдија Никола Груевски, Зоран Заев и Али Ахмети.

Во писмата упатени до лидерите на партиите, претседателот Иванов истакнува дека канонизацијата на Мајка Тереза е настан што сите нас треба да нè издигне над секојдневните политички тензии и недоразбирања и да ни помогне да го препознаеме човекот и човечкото во нашиот политички противник.

„Како што знаеме да живееме со нашите најдлабоки верски и етнички разлики, така мора одново да научиме да живееме и со нашите идеолошки и политички разлики и меѓусебно да се почитуваме. Сметам дека ова е одлична можност за барем еден миг да ги оставиме разликите зад нас и пред меѓународната јавност, но, уште поважно, пред македонските граѓани да покажеме единство“, стои во писмото од претседателот Иванов до лидерите на четирите партии.

Претседателот Иванов во писмата до политичките лидери истакнува дека канонизацијата на Мајка Тереза е чин што ќе го обедини светот и крајно време е да нè обедини и нас.

На  канонизацијата на Мајка Тереза се очекува присуство на многубројни верници и важни гости од целиот свет.  Како земји на нејзиното потекло, раѓање и мисија, Република Македонија, заедно со Република Албанија и со Република Индија ќе имаат посебно место на оваа свеченост.

Мајка Тереза беше добитник на Нобелова награда за мир, а нејзиниот чудотворен карактер беше признаен од Римокатоличката црква.

Церемонијата на беатификација на Мајка Тереза, која беше чекор кон нејзино прогласување за светица, беше одржана на плоштадот Свети Петар во Рим во 2003 година, на која присуствуваа повеќе од 300.000 верници. Со свечената служба раководеше тогашниот поглавар на Римокатоличката црква, папата Јован Павле Втори, додека на церемонијата присуствуваше и многубројна македонска делегација, предводена од претседателот Борис Трајковски.


Објавено името и на вториот напаѓач во црквата во Франција


Париз, 28 јули, 2016 - 10:11 (META) 

Вториот напаѓач во црквата во Нормандија е идентификуван како 19-годишниот Абдел Малик Петитџан, информираат од француското обвинителство.

Петитџан е од град во Источна Франција, во близина на границата со Германија, наведуваат француските медуми.

Во јуни полицијата отворила досие за Петитџан поради сомневање дека е радикализиран, а владата наведува дека во земјата има околу 10.500 такви лица.

Двајцата мажи убија свештеник со нож и држеа неколку заложници во црква во Сент Етјен ду Рувре пред да бидат убиени од француски специјалци.

Претходно, првиот напаѓач беше идентификуван како Абдел Кермиш (19), кој двапати бил уапсен на пат кон Сирија. Тој се наоѓал во куќен притвор и за време на нападот носел електронска алка.

Исламска држава објави видеозапис во кој се прикажани двајцата мажи што го убија свештеникот во француската црква, како ветуваат лојалност на лидерот на ИД, Абу Бакр ал Багдади.