!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

МПЦ: Решението на БПЦ дава надеж за конечно решение на нашата автокефалност


Скопје, 27 ноември, 2017 - 13:49 (META) 

Светиот архиерејски синод на Македонската православна црква – Охридска архиепископија (МПЦ-ОА) изрази благодарност до бугарскиот патријарх Неофит и до членовите на Светиот архиерејски синод на Бугарската православна црква, кои денеска донесоа решение за да прифатат да бидат мајка црква на МПЦ.

„Донесеното решение на САС на БПЦ дава надеж за конечно решавање на статусот на легитимната автокефалност на Македонската православна црква во семејството на помесните православни цркви. Очекуваме, и во иднина, Бугарската православна црква на МПЦ-ОА да ѝ биде постојан сотрудник во остварувањето на потребната богоугодна цел“, се вели во соопштението од МПЦ-ОА.

Од МПЦ-ОА посочуваат дека двете цркви имаат одговорност пред своите едноверни, благочестиви и православни народи кои споделуваат мноштво заеднички христијански вредности низ вековниот опстој.

Светиот синод на Бугарската православна црква на денешната седница одлучи да се ангажира и да ја застапува МПЦ пред помесните православни цркви за востановување на канонскиот статус на Македонската православна црква.


Патријархот Иринеј ја освети црквата која ја градеше фондацијата на Николиќ


Белград, 27 мај, 2017 - 14:53 (META) 

Патријархот на Српската православна црква Иринеј денеска го освети Храмот на светиот маченик Димитриј во Бајчетина чиј ктитор е претседателот на Србија, Томислав Николиќ.

Изградбата на црквата која е во родното место на Николиќ, започна во 2013 година и чини како што наведуваат медиумите, околу милион евра. Николиќ за претседател на Србија беше избран во 2012 година.

Црквата е богата со мозаици од различни периоди, вклучувајќи ги и оние кои се однесуваат на страдањата на крагуевачките ученици во Втората светска војна и жртвите од бомбардирањето на НАТО во 1999 година.

Изградбата е во мермер, а владејачкиот трон е од македонски камен и златен оникс од Аризона.


Верници и други љубопитници ги исполнија изминатата ноќ црквите во Охрид


Охрид, 16 април, 2017 - 13:03 (META) 

Многуилјаден народ, верници и други љубопитници, ги исполнија изминатата ноќ сите цркви во Охрид.

Сепак, радосната вест за Христовото воскресение, најавена со биењето на камбаните, синоќа на полноќ, најбројните ја дочекаа во Светиклиментовиот храм, „Св. Пантелејмон“ на Плаошник.

Со празничната богослужба чиноначалствуваше митрополитот дебарско-кичевски г. Тимотеј, кој им ги честита велигденските празници на бројните верници.

Во долгите поворки, покрај охриѓани имаше голем број домашни и странски гости.

Пред верниците се читаше Велигденското послание на поглаварот на Македонската православна црква г.г. Стефан, во кое тој повикува на мир, љубов, толеранција и на чување на верата.

Свечено и масовно беше и во црквата „Св. Богородица“ во Каменско, од каде градоначалникот на Охрид, Никола Бакрачески, упати честитка до сите граѓани од христијанска вероисповед, посакувајќи им добро здравје, благосостојба и духовна радост.

Велигденска миса се одржа и во католичката црква „Св. Бенедикт“ и во „Св. Кирил и Методиј“ во Охрид.

Денеска, во црквата „Св. Софија“ со почеток во 17 часот, ќе има вечерна архиерејска богослужба, Второ воскресение со читање на светото Евангелие на повеќе странски јазици и делење на велигденски јајца.

Утре, претпладне, втор ден Велигден, ќе има утрена со Златоустова литургија во сите парохиски цркви, додека архиерејска литургија ќе се одржи во црквата „Св. велемаченик Ѓорѓи“ во Струга.


Најмалку 15 лица загинаа а повеќе од 40 се повредени во црква во Египет


Каиро, 9 април, 2017 - 11:31 (META) 

Најмалку 15 луѓе ги загубиле животите а над 40 се тешко повредени во експлозија во Коптската православна црква „Свети Ѓорѓи“ во Танта, Египет.

Гратчето е близу Каиро, а коптските правослани христијани сочинуваат околу 10 отсто од 85 милионското население на Египет, потсетува египетската телевизија „Ал Арабија“. Телевизијата известува дека уште не се знае причината за експлозијата и потсетува дека Коптите со векови живеат мирно покрај своите соседи муслимани.


Пукал пред црква во Остин, полицијата го убила


Остин, 14 јануари, 2017 - 17:35 (META) 

Полицијата во Остин убила маж кој неколкупати пукал од автоматска пушка во воздух пред црква во сојузната држава Тексас.

Напаѓачот бил убиен откако одбил да го фрли оружјето, соопшти полицијата.

Властите наведуваат дека пукањето во северозападен Остин се случилo откако полицијата добила повик во кој бил пријавен грабеж, а потоа и тепачка на паркиралиште на истата локација. Во повикот се велело дека мажот имал автоматска пушка и сачмарка.

Помошникот началник на полицијата, Крис Мекајвен, рече дека мажот прво пукал во воздух пет или шест пати, потоа се приближил до црквата и продолжил да пука.

Тој одбил да го послуша барањето да го фрли оружјето, а во моментот кога полицијата го застрелала, се наоѓал во дворот на црквата.

Името на напаѓачот сè уште не е објавено.


МПЦ апелира да не се палат бадникови огнови, дрвата да се донираат за сиромашните


Скопје, 5 јануари, 2017 - 10:51 (META) 

Македонската православна црква апелира денеска да не се палат бадникови огнови, а собраните дрва да се донираат на социјално загрозени семејства.

– Верниците кои планираат да организираат коледарски оган, да не го прават тоа, туку да ги донираат дрвата. Исто така, на тој начин ќе покажеме и доволна граѓанска свест во време кога  Скопје, но и другите градови се соочуваат со енормно загадување – се вели во соопштението на МПЦ.

Наместо на улица покрај оган, МПЦ ги повикуваат верниците на богослужба во црква, каде достојно ќе се прослави Христовото раѓање.


Најмалку 160 лица загинаа при уривање на покрив на црква во Нигерија


Ујо, 11 декември, 2016 - 13:18 (META) 

Најмалку 160 лица загинаа кога покров на една црква на југот во Нигерија се урна врз верниците, соопштија денеска властите. Се очекува бројот на загинати да се зголеми.

Црквата која се урнала во градот Ујо, во нигериската сојузна држава Аква Иба, била во изградба, а работниците се брзале да ја дозавршат изградбата за да биде готова за церемонијата на која основачот на црквата, Акан Викс, требало да биде прогласен за бискуп.

Во моментот на падот на металната конструкција, во црквата се наоѓале повеќе од стотина верници, меѓу кои и Викс, како и еден владин претставник, кои останале неповредени.

За причините за несреќата ќе биде поведена истрага, за да се утврди дали се испочитувани стандардите при градење на објектот.

Уривањето згради во Нигерија се случува многу често, поради корупција при склучување на договорите за градење, користење на нестандардни материјали, како и поткуп на инспекторите кои вршат надзор.


Спомен-плоча во чест на научникот Михајло Пупин во Охрид


Охрид, 8 декември, 2016 - 11:07 (META) 

На камбанаријата покрај црквата „Св. Богородица Перивлепта“ во Охрид, денеска, на посебна свеченост, во рамките на одбележувањето на патрониот празник на градот, Св. Климент Охридски – Чудотворец, ќе биде откриена спомен-плоча во чест на донаторот на црковното ѕвоно, научникот со светска слава од почетокот на минатиот век – Михајло Пупин.

Плочата е донација на невладиното здружение „Лајонс клуб Лихнидос“ од Охрид, додека пригодната мермерна плоча пред камбанаријата ќе ја открие еден од потомците на Пупин.

Михајло Пупин, чие семејно стебло, според тврдењата на професорот Павле Митрески, потекнува од охридскиот крај, во 1914 година, во рамките на Српската академија на науките и уметностите (САНУ), ја формирал фонадацијата „Олимпија Пупин“ и давал голема помош на сиромашни деца од тогашна Вардарска Македонија, меѓу кои имало и ученици од Охрид. Помогнал во изградбата на училиштето во стариот дел од Охрид каде што денеска е сместена музејската администрација, а ја изградил и камбанаријата во црквата „Света Богородица Перивлепта“ позната како „Стар Свети Климент“, за која го донирал тогаш најголемото црковно ѕвоно на Балканот.

Македонската академија на науките и уметностите (МАНУ) и САНУ заеднички го афирмираат делото на Михајло Пупин, светскиот великан од областа на физиката и на електрониката, за што во Вевчани, каде му е подигната Спомен-соба во 2008 година, одржаа заедничка тркалезна маса.

Самиот Пупин бил член на повеќе академии на науки и уметности во светот, бил претседател на Американската академија на науките во Њујорк и член на Српската академија на науките и уметностите. За своите научни откритија посмртно ја добил и Пулицеровата награда во 1924 година.


Црква се гради во кругот на Клиничката болница во Штип


Штип, 14 ноември, 2016 - 17:28 (META) 

На денот на свети Кузман и Дамјан, беа поставени темели на истоимената црква во дворот на Клиничката болница во Штип. Владиката Иларион најави дека осветувањето ќе биде следната година.
Уште со најавата дека ќе се гради црква до болницата, социјалните мрежи беа преполни со негодувања.

– Зошто наместо за бетон, парите да не се употребат за поправка на апаратите, како томографот кој не работи повеќе од една година? Или за набавка на чаршафи и пижами за пациентите? Ако се гради црква, дали ќе додадат до неа и џамија или синагога – реагираа граѓаните, кои со фотографии потсетуваа на состојбите во некои болнички одделенија, каде таванот прокиснува или на креветите има искината постелнина.

Од управата на болницата уште веднаш ги отфрлија обвинувањата за ненаменско трошење на парите. Директорот Александар Стојановски изјави дека парите за црквата се донација од организација од Шведска, која самата одлучила за намената. Парите ги обезбедува семејството Розенгрин, чиј претставник беше денеска во Штип на поставување на темелите. Семејството неодамна донираше опрема и медицински апарати за болницата.

– Последниот пат кога бевме тука, со директорот и со владиката Иларион дискутиравме дека овде, во болницата, нема црква. Тогаш почнавме да размислуваме како да ја изградиме. Во Шведска секоја голема болница има црква – изјави Томас Розенгрен од невладината организација „Хенд хил хенд“, кој најави нова донација од опрема и со апарати.

Се планира мала црква, во која, според донаторите и раководството на Клиничката болница, ќе можат да се помолат за здравје пациентите и нивните роднини, по пример на болниците во многу европски држави, каде ако нема црква, има мал параклис.

Последните две години во Штип и во околината се градат десетина нови цркви. Една никнува веднаш до основно училиште, каде, според општинската опозиција, нема пристојна спортска сала за изведување настава.


Католичката црква во Албанија денеска ќе прогласи 38 католици за блажени


Тирана, 5 ноември, 2016 - 10:19 (META) 

Католичката црква во Албанија денеска во градот Скадар ќе прогласи 38 католици за блажени. Сите 38 католици ќе бидат запишани во книгата на блажени поради нивната маченичка смрт за време на комунизмот.

Мисата ќе ја одржи кардиналот Анџело Амато. Се очекува на настанот да присуствуваат високи црковни лица од Католичката црква.

Меѓу 38 албански маченици кои ќе бидат прогласени за блажени е и последниот надбискуп на Драч, Винценц Прендуши. Бил обвинет дека е непријател на народот, реакционер, ватикански шпион, а осуден е на дваесет години затвор каде бил мачен, исмејуван и понижуван на разни начини сè до неговата смрт.