БПЦ прифати да ѝ биде мајка црква на МПЦ


Софија, 27 ноември, 2017 - 13:17 (META) 

Синодот на Бугарската православна црква – Бугарска патријаршија го прифати барањето да и биде мајка црква на Македонската православна црква и да ја застапува пред помесните православни цркви.

Синодот на БПЦ на денешното заседание во комплетен состав го разгледа писмото од архиепископот на МПЦ- ОА, г.г. Стефан, испратено на 9 ноември.

„Бугарската православна црква – Бугарска патријаршија никогаш не била рамнодушна кон страдањата на Македонската православна црква, поради што се разговараше. Во ситуација кога Македонската православна црква ја признава Бугарската православна црква – Бугарска патријаршија (БПЦ-БП) за своја мајка црква, БПЦ-БП го смета за своја света должност ангажманот да понуди целосна соработка, посредство и застапување пред помесните православни цркви, преземајќи сè што е неопходно за утврдување на канонскиот статус на МПЦ“, пишува во одлуката на Светиот синод на БПЦ за писмото од МПЦ.

Синодот на БПЦ одлучил да формирана архиерејска комисија за преговори со МПЦ и со другите помесни православни цркви за воспоставување на канонски статус на МПЦ, пишува во одлуката.

Претходно, пред почетокот на седницата, бугарскиот патријарх Неофит рече дека треба да се прифати подадената рака од Македонската православна црква.


МПЦ побарала од Бугарската православна црква да ѝ биде црква – мајка


Скопје, 19 ноември, 2017 - 9:59 (META) 

Светиот синод на Македонската православна црква – Охридска архиепископија испратил писмо до Бугарската православна црква во кое бара од неа да ѝ биде црква – мајка ако ја признаат афтокефалноста на МПЦ-ОА, објави емисијата „Вера и општество“ на Бугарската национална телевизија (БНТ).

Писмото е испратено на 9 ноември до Светиот синод на Бугарската црква, по редовна седница на МПЦ-ОА во Скопје, на која било едногласно одлучено да се упатат одредени предлози и барања до сестринската црква.

„Македонската православна црква – Охридска архиепископија ќе ја препознае и ќе ја признае Бугарската православна црква – Бугарска патријаршија како мајка – црква, која прва ја прифаќа и признава нејзината автокефалност, истата ја обзнанува и ја актуелизира, ја претставува и се застапува за неа пред Вселенската патријаршија и пред другите помесни цркви“, се нагласува во писмото.

Синодот од Скопје бара од БПЦ да воспостави „евхаристичко единство со возобновената Охридска архиепископија во лицето на Македонската православна црква“.

Со евентуалното потпишување меѓу двете цркви, се бара воспоставување единство меѓу двете епископии, што ќе биде основа за „евхаристичко единство и со епископиите од другите помесни православни цркви“.

МПЦ се надева на прифаќање на нејзините предлози од Светиот синод на БПЦ „за доброто на севкупната црковна целост“.