!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ОН: 173 загинати, 100.000 заробени лица во Рака


Рака, 28 јуни, 2017 - 20:54 (META) 

Високиот комесар за човекови права на Обединетите нации, Зеид Раад ал Хусеин, соопшти дека овој месец најмалку 173 цивили се убиени во операција против Исламска држава во Рака.

Тој соопшти дека 100.000 цивили се заробени во тој сириски град.

Светските агенции пренесуваат дека Ал Хусеин ги изнел овие податоци во време кога борците со поддршка од САД водат борба за преземање на Рака од рацете на Исламска држава.

Ал Хусеин ги повика сите страни, вклучувајќи ја и меѓународната заедница, да ги преземат сите можни мерки за да ги поштедат животите на цивилите заробени во тој град.

– Цивилите не смеат да бидат жртвувани заради брзите воени победи – соопшти високиот комесар за човекови права на ОН.


ОН ги обвинија сириските власти за страдањата на цивилите


Њујорк, 31 мај, 2017 - 10:41 (META) 

Високиот комесар на ОН за хуманитарна помош, Стивен О’Брајан, ја обвини сириската влада дека ги користи цивилите како „воена тактика“, одбивајќи да им достави хуманитарна помош на жителите на окупираните градови, што ги принудува цивилите да избираат меѓу глад и бегање на несигурни локации.

Тој истакна пред Советот за безбедност на ОН дека илјадници Сиријци во најмалку 10 градови во изминатите неколку месеци се соочиле со овој избор, вклучувајќи го и источниот дел на Алепо, кој до неодамна беше под контрола на бунтовниците, како и градовите Мадаја и Забадани.

Во последните недели, О’Брајан рекол дека илјадници Сиријци се префрлени во населбата која е под опсада во Дамаск, Хомс и во Џарабулс.

– Евакуациите следеа по повеќегодишни интензивни воздушни напади, гранатитање и снајперски напади. Тактиката е премногу очигледна – да се направи животот неподнослив, а смртта очекувана – рече високиот комесар.

Тој оцени дека тактиката на сириската влада претставува „монструозен облик на суровост“, која се спроведува над цивилите.

О’Брајан истакна дека ОН во април и во мај од властите во Дамаск побарале дозвола за достава на хуманитарна помош за повеќе од милион луѓе, но дека е одобрена достава за само 266.750 лица.


Шест цивили убиени во Алепо


Лондон, 12 јануари, 2017 - 10:59 (META) 

Најмалку шест цивили, од кои четири деца, денеска загинаа во Алепо, соопшти сириската Опсерваторија за човекови права со седиште во Лондон.

Опсерваторијата тврди дека одговорни за нападот се сириските владини сили.

Во соседната провинција Идлиб, најмалку 22 милитанти се убиени во воздушните напади во последните 24 часа, наведоа од опсерваторијата, додевајќи дека некои удари ги извеле авиони на сириските сили, а некои авиони на коалицијата предводена од САД.


Во Ирак во 2016 година загинале 6.878 цивили


Багдад, 3 јануари, 2017 - 10:15 (META) 

Во текот на 2016 година, во Ирак загинале најмалку 6.878 цивили, соопштија од Обединетите нации.

Мисијата на ОН за помош на Ирак (УНАМИ) во соопштение наведе дека за време на минатата година повредени биле најмалку 12.388 цивили, додавајќи дека тие податоци не ги вклучуваат жртвите помеѓу цивилите во западната провинција Анбар во мај, јули, август и во декември.

Овие бројки „мораат да се сфатат како апсолутен минимум“, соопштија од ОН, наведувајќи дека мисијата не била во можност да потврди случаи на цивилни жртви во зоните на конфликтот, како и тие што го изгубиле животите поради „секундарни ефекти на насилство“ како недостатоци на вода, храна, лекови и на здравствена нега.

Според податоците на мисијата УНАМИ, во 2015 година во Ирак биле убиени најмалку 7.515 цивили.


Сириската војска ја презеде контролата врз Алепо


Алепо, 22 декември, 2016 - 20:30 (META) 

Сириската војска денеска соопшти дека ја презела целосната контрола над градот Алепо, по евакуацијата и на последната група цивили и бунтовници од градот, јавува „Би-би-си“.

Претставник на Обединетите нации (ОН) претходно соопштил дека за една недела, односно од минатиот четврток до денеска повеќе од 34.000 лица биле евакуирани од градот.

Евакуираните цивили и припадници на бунтовничките сили се однесени на територија под нивна контрола, западно од Алепо и во провинцијата Идлиб.

Преземањето на контролата врз Алепо, како што пишува британскиот национален сервис, претставува голема победа за сирискиот претседател Башар ал Асад, чија офанзива на градот беше помогната со воздушни напади на руската воена авијација.

Во соопштението, објавено на сириската државна телевизија, војската навела дека е вратена безбедноста во Алепо откако градот е ослободен од тероризмот и од терористите, термин кој сириската влада го користи за бунтовниците.

Инаку, Алепо пред почетокот на немирите и војната во 2011 година, беше најголемиот град во Сирија и економски и индустриски центар во земјата.


Ослободени 1.800 заробеници на Боко харам во Нигерија


Абуџа, 22 декември, 2016 - 11:17 (META) 

Нигериската војска ослободила 1.800 цивили од екстремистичката група Боко харам и заробила повеќе од 500 припадници на групата во изминатата седмица во шумата Самбиса, упориште на екстремистите од североистокот на земјата, соопшти висок воен претставник.

Војската спроведува операции во шумата Самбиса која се простира на повеќе од 1.300 квадратни километри во државата Борно, каде борци на групата побегнале по воените порази.

– Во операции во период од 14 до 21 декември, вкупно 1.880 цивили се спасени од енклавите на Боко харам – соопшти генерал Лео Ирабор по прес-конференцијата во главниот град на државата Борно, Мајдугуриј.

Тој рече дека продолжуваат операциите во рамки на кампањата што војската ја поведе минатата година за да ги протера екстремистите од овие области.


Продолжува евакуацијата во Алепо, 1.000 луѓе го напуштија градот


Алепо, 19 декември, 2016 - 10:08 (META) 

Околу 1.000 луѓе го напуштија денеска источниот дел на Алепо, при новата евакуација на жителите во тој дел од градот, кој е под опасада на владините сили.

Шефот на единицата на лекари и на волонтери кои ја коордирнираат евакуацијата, Ахмад ал Дбис, изјави дека луѓето биле евакуирани со 20 автобуси и се упатиле во западниот дел на градот.

Иствреме се врши евакуација и од градовите Фуа и Кафаја, во согласност со договорот за прекин на огнот со кој се овозможува последните бунтовници и цивили да ја напуштат бунтовничката енклава во источниот дел на Алепо.

Денеска членките на Советот за безбедност на ОН постигнаа договор за нацрт-резолуцијата за набљудувачите во Алепо, откако Франција ги зеде предвид забелешките на Русија, а гласањето треба да биде денеска.

Со нацрт-резолуцијата што ја предложија Русите, генералниот секретар на Обединетите Нации се повикува да ја осигури безбедноста во „координација со заинтересираните страни“, вклучувајќи ја и сириската влада која сега го контролира источниот дел на Алепо, за да може претставниците на ОН да ги следат условите во кои се наоѓаат цивилите што останале во Алепо.


Евакуирани 6.462 лица во Алепо


Алепо, 16 декември, 2016 - 9:48 (META) 

Во изминатото деноноќие од Алепо се евакуирани 6.462 лица, меѓу кои и повеќе од три илјади бунтовници и 300 ранети, соопштија руските власти.

Автобусите кои евакуираат лица се придружувани од офицери на рускиот Центар за примирје и од соработници на Црвениот крст. Возилата се движат кон реонот Ал Рашидин, во западниот делови од градот од каде се префрлаат кон градот Идлиб.

Светските медиуми јавуваат дека на маршрутата се поставени и контролни пунктови, а за да се избегнат провокации, рускиот Центар ги следи операциите со дронови на кои има камери.


Сириската војска убива цивили во Алепо, тврдат ОН


Алепо, 13 декември, 2016 - 11:57 (META) 

Обединетите нации денеска соопштија дека сириски провладини сили почнале да влегуваат во домови во источните делови во Алепо и да ги убиваат цивилите кои ќе ги затекнат внатре, пренесува „Би-би-си“.

Од канцеларијата за човекови права на Обединетите нации, како што наведува британскиот национален сервис, изјавиле дека имаат веродостојни докази дека во четири области 82 цивили биле убиени на самото место. Портпаролот на канцеларијата на ОН навел дека состојбите на теренот се како да има „целосно отсуство на хуманост во Алепо“.

Според информациите на светските медиуми, илјадници луѓе се заробени во деловите на источен Алепо кои сè уште се под контрола на бунтовничките сили, додека во меѓувреме трае офанзивата на сириската војска, проследена со жестоки бомбардитања, за целосно преземање на деловите од градот.

Обединетите нации и Меѓународниот комитет на Црвениот крст упатија апел до Сирија и до нејзиниот сојузник Русија да прекинат со бомбардирањата и да им дозволат на цивилите безбеден коридор за излез од деловите на Алепо.

Во меѓувреме, светските агенции јавуваат дека Турција во моментов преговара со Русија за отворање на коридор за евакуирање на сириските бунтовници и на цивилите од квартовите во источен Алепо кои се под контрола на опозициските сили.

Одбраната што бунтовниците ја поставија во Алепо вчера била пробиена и сириската војска заначајно напредувала во источниот дел на градот, а опозициските броци се повлекле во неколку од преостанатите подрачја во градот.


Сириската војска го зазеде стариот дел на Алепо


Алепо, 7 декември, 2016 - 9:53 (META) 

Сириската војска денеска ја презела целосната контрола над стариот дел на Алепо, кој беше држен од бунтовничките сили, соопшти сириската опсерваторија за човекови права со седиште во Лондон, јавуваат светските агенции.

Сириската војска во стариот дел на градот, кој е втор по големина во Сирија, влегла вчера.

Како што јавуваат агенциите, бунтовничките сили во последните две недели изгубиле две третини од источните области од Алепо, кои беа под нивна контрола.

Десетици илјади цивили, како што пренесува „Би-би-си“, сè уште се наоѓаат во последните области од градот, кои ги држат опозициските сили.