„Цивил“: Починати лица и фантоми и натаму фигурираат во Избирачкиот список


Скопје, 10 август, 2018 - 12:23 (META) 

Фантомски гласачи, починати лица со право на глас, лица регистрирани на погрешна адреса. Избирачкиот список е далеку од прочистен, велат од граѓанската организација „Цивил“. До нив уште во првиот ден од јавниот увид пристигнале низа пријави за недоследности. Но најголем проблем, според „Цивил“, е лавиринтот во кој ќе се заглават граѓаните доколку сакаат да го пријават случајот. Затоа организацијата повикува институциите сами да ги средат проблемите во Избирачкиот список и да не ги шетаат граѓаните од врата до врата.

„Фантомите во Избирачкиот список се вратиле и удобно се сместиле на адресите на граѓанките и граѓаните што се јавија во нашата организација. Добивме и една пријава за починато лице,што сѐ уште фигурира во Избирачкиот список. Во еден случај, граѓанин ни пишува дека веднаш се јавил во ДИК да пријави неколку „ненајавени гости“ на својата адреса. Од таму, како и на претходните изборни процеси, го упатиле да се јави во МВР. Гласачите повторно ја слушаат старата приказна: секогаш некој друг е одговорен. „Цивил“ ги повикува граѓанките и граѓаните да ја искористат можноста за увид во Избирачкиот список и да ги пријават неправилностите во ДИК, но и на ЦИВИЛ, со цел да се спроведе јавна контрола на процесот“ велат од „Цивил“.

Реакцијата на „Цивил“ следува по вчерашниот повик од Државната изборна комисија, граѓаните да извршат увид во Избирачкиот список и доколку забележат проблем самите да го пријават. ДИК, овојпат, нема да прави теренски проверки, а промена на податоци ќе се направи само по претходна пријава.


„Цивил“: Регистрирано е семејно гласање, кршење на молкот и закани по набљудувачите


Скопје, 29 октомври, 2017 - 15:59 (META) 

Невладината организација „Цивил“ нотирала три случаи на притисок врз нивните надзорни тимови и тоа во општините Штип, Кавадарци и Сарај, информираат од таму.

Поради, како што велат, крајно сериозните закани, „Цивил“ ги повлече набљудувачите од село Ласкарци, општина Сарај. Заканите дошле од член на избирачкиот одбор, кој било револтиран од присуството на набљудувачите на „Цивил“, односно од извештаите на „Цивил“ од првиот круг на изборите.

– Не веруваме дека во Ласкарци ќе се одржат слободни избори. Ги повикуваме институциите, особено ДИК, да ја провери кондицијата на лицата ангажирани во своите тела. Препорачуваме МВР да ја засили својата контрола во овој дел од општина Сарај и да помогне изборниот процес да се одвива непречено – изјави Џабир Дерала од „Цивил“.

Набљудувачките тимови на „Цивил“ регистрирале 29 нерегуларности како фотографирање  гласачки ливчиња, семејно и групно гласање и кршење на изборен молк.

– Изборниот молк се крши како воопшто да не постои забрана за партиска активност во текот на изборниот ден. Семејно гласање е често и вообичаено во Студеничани и во Шуто Оризари, без реакција од избирачките одбори – додаде Дерала.

Од „Цивил“ апелираат до политичките партии веднаш да престанат со притисоците врз граѓаните и да престанат со кршењето на изборниот молк.


„Цивил“: Неколку нерегуларности и мирен почеток на гласањето


Скопје, 29 октомври, 2017 - 11:15 (META) 

Набљудувачите на невладината организација „Цивил“ утринава бележат мирен и навремен почеток на изборниот ден во 35-те општини каде што се спроведува вториот круг од локалните избори.

Исклучок прави избирачкото место 2433, во ОУ „Витуриа“, во општина Сарај, кое било заклучено до 8.30 часот. Времето на гласање на ова гласачко место, според законот, мора да се продолжи за толку време колку што траело доцнењето.

„Од набљудувачите во општина Шуто Оризари доаѓаат три извештаи. Првиот се однесува на организиран превоз, кој го врши поранешен заменик-министер од претходната власт. Превозот се врши со автомобили и со едно комби, чии регистарски таблички се забележани. Во Штип, полицаец побарал од акредитиран набљудувач на „Цивил“ да се оддалечи од местото кое се наоѓало надвор од избирачкото место. Иако уредно се претставил и ги покажал сите потребни документи, нему му било кажано да замине од таа локација“, се вели во соопштението на „Цивил“.

Во него се додава дека нивните набљудувачи исто така забележале и агитирање од изборен штаб на политичка партија, семејно гласање, фотографирање на гласачко ливче.


„Цивил“: Засилено дејство на партиски активисти и нарушување на изборниот молк


Скопје, 28 октомври, 2017 - 13:10 (META) 

Тимовите на невладината организација „Цивил“, кои ги надгледуваат изборите, денеска забележале засилено дејство на партиските активисти во општините, каде што утре треба да се гласа во вториот круг на локалните избори, се вели во нивното соопштение.

„Изборниот молк се крши во текот на ноќта и во текот на предизборниот молк. „Цивил“ доби неколку извештаи од изборните набљудувачи и едно аудиосведоштво за изборен поткуп во Штип. Социјалните мрежи се вистински воени зони. Се користи говор на омраза кон политичките противници, но забележливо е што се користат стравот, омразата и поделбите. Етничката и верската омраза, хомофобијата и ксенофобијата се основни алатки на дел од политичките субјекти кои се во изборната трка, како на теренот, така и на интернет“, се вели во соопштението на „Цивил“.

Во пресрет на изборниот ден утре, „Цивил“ апелира до избирачките одбори во општините да ги извршуваат своите задачи совесно и професионално.

„Бараме од избирачките одбори да бидат кооперативни со нашите набљудувачи и да не се обидуваат да ја опструираат нивната работа“, се додава во соопштението.


„Цивил“: Нема потврда за наводите на ВМРО-ДПМНЕ за поткуп на гласачи


Скопје, 27 октомври, 2017 - 13:11 (META) 

Набљудувачите на „Цивил“ не откриле ниту еден случај што би ги потврдил како основани наводите на ВМРО-ДПМНЕ за поткуп на гласачи, изнесени пред првиот круг од локалните избори, што се одржа на 15 октомври.

Како што пишува „Цивил медиа“, ваквите наводи на ВМРО-ДПМНЕ, со навестувања за поткуп на гласачи, биле дел од документ што лидерот на партијата, Никола Груевски, им го доставил на претставници на меѓународната заедница, во деновите пред првиот круг од локалните избори.

„Цивил“, поради тоа, го доставил документот и до своите набљудувачи, од кои било побарано да посветат особено внимание на овие наводи и да побараат потврда за каков било случај што би можел да ја потврди вистинитоста на овој документ.

„Заклучокот од оваа активност на набљудувачите е дека тие не открија ниедна потврда за наводите на ВМРО-ДПМНЕ за поткуп на гласачите“, пишува „Цивил медиа“.

Според документот на ВМРО-ДПМНЕ, станувало збор за поткуп на гласачи во повеќе градови во земјава, а во него биле наведени и лица кои, наводно, ги вршеле незаконските активности.

Многу од наведените случаи на поткуп на гласачи во документот на ВМРО-ДПМНЕ, според извештаите на набљудувачите на „Цивил“, се неосновани бидејќи дел од споменатите лица не постојат, а за другите се утврдило дека се далеку од тоа да ги извршат изборните нерегуларности за кои се говори во документот.

Според извештаите на „Цивил“ од локалните избори на 15 октомври, а во пресрет на вториот круг на 29 октомври, регистрирани се четири обиди за поткуп на гласачи. Ниеден од тие случаи не е во релација со локациите или лицата наведени во документот на ВМРО-ДПМНЕ.


Мирен почеток на изборниот ден со помали нерегуларности, оцени „Цивил“


Скопје, 15 октомври, 2017 - 10:14 (META) 

Претседателот на невладината организација „Цивил“, Џабир Дерала, утринава на прес-конференција рече дека почетокот на изборниот ден бил мирен, со низа помали нерегуларности, односно технички проблеми со кои се соочуваат избирачките одбори.

Посочи дека во текот на вчерашниот ден регистрирале повеќе од 20 случаи на прекршување на изборниот молк и тоа во Велес, Ресен, Скопје, Штип, Тетово и во Гостивар.

– Се лепеа плакати во една општина, имавме случаи во кои детектиравме СМС-пораки со содржина што го крши изборниот молк, кои беа испраќани на многу телефонски броеви. За поздравување е одлуката на општинската изборна комисија на Ресен по откривањето на двете ливчиња во избирачкото место 1631 во Јанковец, кои имале ист сериски број, да ги пребројат сите гласачки ливчиња во општината, меѓутоа веќе денеска забележуваме дека гласачките ливчиња не се насекаде со ист квалитет – рече Дерала.

Во општина Аеродром на неколку избирачки места, нагласи, ливчињата не се добро перфорирани и избирачкиот одбор мора да ги сече со ножици за да им ги дава на гласачите, што во неколку избирачки места предизвикало голема турканица. Појасни дека според пријавените случаи од нивните набљудувачи, УВ-ламбите не работат во повеќе од 20 избирачки места.

– Има луѓе кои не се прснати со спреј, значи можат да гласаат повторно доколку сакаат. Нашите набљудувачи кои се во состав на структурата на „Цивил“, а доаѓаат и од организацијата „Инклузива“, ни јавуваат дека папки за слепи лица нема на сите избирачки места, поточно на шест избирачки места во Гостивар недостигаат тие папки – истакна Дерала.

Тој рече дека се врши евиденција на гласачи во две општини од функционери на одредена партија, кои ги евидентираат гласачите кои доаѓаат за потоа со очигледна намера да се продолжи со мобилизација и со притисок, што, како што појасни, е прекршување на изборниот молк.

Според нивните извештаи, во Ресенскиот Регион имало обид за поткуп од 4.500 денари на двајца членови на едно семејство, кои не ги прифатиле парите и ја информирале полицијата.


„Цивил“ бара политичките партии, кандидатите и институциите да ги почитуваат законите


Скопје, 14 октомври, 2017 - 11:45 (META) 

Невладината организација „Цивил“ упати барање до политичките партии да го почитуваат Изборниот законик, Уставот и законите на Република Македонија, да го почитуваат изборниот молк и да ги сопрат евентуалните планови, ако такви постојат, за изборен поткуп, притисоци и за манипулација на гласачите.

„Бараме од родителите и од наставниот кадар да ги почитуваат децата и да ги остават надвор од политиката. Секој обид да се наруши изборниот молк и да се прекршат законите поврзани со изборниот процес, веднаш да бидат сопрени и санкционирани. Не смее да има толеранција за каков и да е притисок, закана или корупција (купување гласови). Бараме од Државната изборна комисија и ја охрабруваме да ги искористи сите свои законски ингеренции до максимум за да спроведе законит, демократски, фер и слободен изборен процес. Ингеренциите на ДИК се највисоки од сите досегашни состави на оваа институција и таа се наоѓа на врвот на изборниот процес. ДИК не мора да чека приговори и жалби, туку може да дејствува според сопствени наоди и мислење“, велат од невладината.

„Цивил“ ги повика граѓаните да гласаат слободно, според сопственото убедување, а оние кои нема да се најдат на Избирачкиот список, тоа да го пријават. Невладината организација апелираше до медиумите да бидат непристрасни и професионални, да бидат на висина на својата задача и да манифестираат максимална професионална и морална одговорност.


Да се вложат максимални напори изборите да бидат фер и демократски, бара „Цивил“


Скопје, 6 август, 2017 - 15:58 (META) 

„Цивил“ – Центар за слобода по повод распишувањето на локалните избори, потсетува дека институциите и учесниците во изборната трка мораат до максимум да ги почитуваат демократските стандарди за спроведување слободни избори.

Од досегашното набљудување, од „Цивил“ забележале дека предизборната кампања е почната далеку порано, пред датумот на нивното официјално распишување и оттаму ги потсетуваат политичките партии дека според Изборниот законик, кампањата трае 20 дена пред денот на изборите.

„Повеќепати предупредивме дека општинските ресурси се злоупотребуваат во изборен контекст. Политичката корупција, националистичката реторика, притисоците врз гласачкото тело и низа други појави се нотирани низ целата земја. Овие состојби се особено видливи во медиумите и на социјалните мрежи. Реформите и демократизацијата на земјата се наоѓаат на самиот почеток, така што не може да се очекува од нив да профункционираат за толку кратко време, но мора да се вложат максимални напори и политичка волја на сите засегнати страни, изборниот процес да биде слободен, фер и демократски“, велат од невладината организација.

Од „Цивил“ сметаат дека избирачкиот список останува да биде голем предизвик за ДИК бидејќи јавноста нема доверба во него и потсетија дека за време на парламентарните избори мината година, илјадници граѓани не можеле да го остварат своето гласачко право.


ЦИВИЛ повикува: Пријавете политички притисоци и мобинг


Скопје, 7 април, 2017 - 18:58 (META) 

ЦИВИЛ – Центар за слобода објави формулар за пријавување на политички притисок, мобинг или дискриминација.

„По зголемениот број пријави за различни видови политички мотивирани притисоци, закани, дискриминација, па и насилство, ЦИВИЛ дава уште една можност за онеправданите граѓанки и граѓани. Формуларот има за цел откривање и превенција на политичките притисоци, дискриминацијата и мобингот со кој се соочуваат граѓанките и граѓаните“, се вели во известувањето.

Податоците од формуларот се чуваат во најстрога тајност, појаснуваат од невладината организација


„Цивил“: Иванов уште еднаш го прегази Уставот и го охрабри насилството


Скопје, 1 март, 2017 - 18:20 (META) 

„Ѓорге Иванов, човекот кој на власт дојде преку изборна измама организирана од партијата во заминување од власт, и кој, според релевантни правни експерти, го прекрши Уставот на Македонија повеќепати досега, денеска уште еднаш го стори тоа“, се вели во реакцијата на невладината организација „Цивил“, откако претседателот Ѓорге Иванов одлучи да не го даде мандатот на лидерот на СДСМ, Зоран Заев, за да формира влада.

– Со својот настап, тој го одобри и го охрабри насилството на кое сме сведоци овие денови. Накратко, Иванов со своето обраќање не понуди решение, туку го прегази Уставот и ја продлабочи политичката криза во Македонија. Сега преостанува избраните пратеници во парламентот да ги искористат постојните уставни и законски можности, да го „премостат“ Иванов, кој е крајно деструктивен елемент во македонската политика, и да го ефектуираат своето мнозинство  – велат од „Цивил“.