Куманово со најзагаден воздух вчера


Скопје, 12 ноември, 2018 - 11:48 (META) 

Енормна загаденост на воздухот беше регистрирана вчера и ноќеска на голем број мерни места во Македонија. Според присуството на ПМ10 честички најзагаден воздух вчеравечер имаше Куманово, со 264 микрограми на кубен метар воздух, по што следуваше мерното место Битола 1 со 205, и Миладиновци со 183 микрограми.

Максималната дозволена вредност е 50 микрограми ПМ10 честички на кубен метар воздух.

Во Битола 1 загаденоста точно на полноќ паднала 91,2 микрограми, а во Миладиновци на 94,7 микрограми ПМ10 честички на кубен метар воздух. На полноќ во Центар биле измерени 96,1 микрограми, во Карпош 112,6 микрограми, кај Ректорат 128,3 микрограми, а на мобилна станица Бутел 96,4 микрограми.

Претпладнево во 8 часот во поглед на загаденоста со со честичките ПМ10 состојбата е лоша во Центар, кај Ректорат, Миладиновци, Бутел, Тетово и Куманово.

Кај Ректорат се измерени 127,61 микрограми ПМ 10, во Центар 95, во Бутел 108, во Тетово 93,2 микрограми, а во Куманово 70,3 микрограми ПМ 10 честички на кубен метар воздух. Максималната дозволена концентрација е 50.


ЈСП: Поради најавени три протести, голем дел од автобуските линии ќе бидат пренасочени


Скопје, 12 јули, 2018 - 13:04 (META) 

Денеска поради најавени три протести, голем дел од автобуските линии ќе бидат пренасочени, а дел од автобусите ќе возат по скратена траса од вообичаената, информираат од ЈСП.

Од таму додаваат дека „автобусите од јавниот превоз, како возилата на ЈСП Скопје, така и на приватните превозници, ќе сообраќаат согласно условите на терен и наложениот режим од страна на сообраќајната полиција.“

„Поради протестот на Бит пазар предвиден во период од 12 до 16.30 часот, изменет режим на сообраќање ќе важи за автобуските линии 2, 8, 9, 12, 17, 19, 45, 50, 54, 55, 57, 59, 62, 63, 63А, 63Б, 65, 65А, 65Б, 65В, 73, како и за сите останати градски и приградски линии кои по редовната траса минуваат преку Бит пазар. Најавен е и протест во период од 15 до 17 часот на крстосницата на „Рузвелтова“ со булевар „Партизански одреди“. Автобусите што сообраќаат во овој реон ќе возат во зависност од моменталните услови на терен, односно по траса наложена од сообраќајната полиција. Вообичаено како и во изминатите неколку денови и вечерва во период од 20 до 22.30 часот поради протест пред Собрание на РМ, затворен за сообраќај ќе биде центарот на градот. Возилата од јавниот сообраќај ќе бидат пренасочени по улица „Даме Груев“ (позади Собрание на РМ) и по булевар „Свети Кирил и Методиј“ (Рамстор)“, се вели во соопштението на ЈСП.


Центар, Гази Баба и Карпош би можеле да добијат градоначалник во првиот круг


Скопје, 9 октомври, 2017 - 20:32 (META) 

Три скопски општини би можеле да добијат градоначалник уште во првиот круг на гласање, покажа анкетата што ја спроведе „М-проспект“ на барање на „Телма“ и на МЦМС, на примерок од 1.560 испитаници.

Општините Центар, Гази Баба и Карпош по гласањето на 15 октомври би можеле да добијат градоначалник. Според анкетата, кандидатот на СДСМ за Центар, Саша Богдановиќ, ќе го победи Дејан Јовановски од ВМРО-ДПМНЕ, а актуелниот градоначалник и кандидат на ВМРО-ДПМНЕ за Гази Баба, Тони Трајковски, ќе го порази Борче Георѓиевски. Стефан Богоев од СДСМ, според анкетата, ќе го победи Стевчо Јакимовски и ќе стане градоначалник на Карпош.

Сепак, поради премалиот примерок и големата маргина на грешка, која изнесува околу 6 отсто, не беа соопштени процентите, туку беа дадени само прогнози.

Според анкетата, тесна борба ќе се води во Аеродром, Чаир, Ѓорче Петров и во Кисела Вода.


Надмудрувања меѓу Фетаи и Михајлова, рочиштето за „Шамари“ одложено


Скопје, 28 септември, 2017 - 11:23 (META) 

Рочиштето од судскиот процес за насилствата пред Општина Центар во јуни 2013 година, во кој првообвинет е лидерот на ВМРО-ДПМНЕ, Никола Груевски, повторно се одложи бидејќи во судницата не беа присутни обвинетите Димче Крстев и Милан Андоновски.

Како сведоци присуствуваа актуелниот градоначалник на Општина Центар, Андреј Жерновски, и кандидатот за градоначалник Саша Богдановиќ, а присутни беа и обвинетите Миле Јанакиески и Даниела Рангелова.

Обвинителката на СЈО, Фатиме Фетаи, побара од судијката Татјана Михајлова да нареди Крстев на следното рочиште да биде присилно доведен бидејќи не го оправдал денешното отсуство, додека адвокатот на Андоновски, Димитар Дангов, до судот доставил медицинска белешка дека обвинетиот е со нарушено здравје.

Судот го прифати барањето на Фетаи и издаде наредба обвинетиот Крстев да биде присилно доведен на следното рочиште.

Инаку и на денешното рочиште беше видлив анимозитетот помеѓу Фетаи и Михајлова. Судијката рече дека на Фетаи ќе ѝ достави три писмени дописи во врска со барањето на обвинителката од минатото рочиште да објасни зошто списите од предметот биле во Апелација за да може, како што рече Михајлова, Фетаи да се запознае со постапувањето на судот во случај на поднесување жалба.

– Ова е обид да се оправдате за тоа што го реков минатиот пат дека намерно ги одолговлекувате рочиштата – праша Фетаи, додавајќи дека секој си е одговорен за своите постапки.

Искрења меѓу обвинителите на СЈО, Фетаи и Гаврил Бубевски, и судијката имаше и при одредување на датумот за следното рочиште.

Михајлова се правдаше дека судницата број 1 е единствената поголема во судот, на што Фетаи одговори дека тоа нив како „странки“ не ги интересира и не треба да ги интересира и дека должност на судот е да обезбеди услови за судењето.

– Ако продолжиме на овој начин, случајот нема да го завршиме до 2020 година, а предметот ќе застари – рече Фетаи.

Забелешките на обвинителката на СЈО, адвокатот Димитар Дангов ги оцени како притисок врз судот.

Следното рочиште Михајлова го закажа за 20 ноември.

– Ако даде Господ, рочиштето ќе се одржи – рече Михајлова.

По завршување на рочиштето, Фетаи за медиумите ја цитираше оваа изјава на Михајлова, додавајќи дека „Господ нема да даде да се одржи рочиштето ако судот не го почитува законот“.

Инаку и денешното рочиште, како што рече Михајлова, се водеше без да биде снимено бидејќи единствената камера повторно беше зафатена за судењето за настаните во кумановско Диво Насеље.


Во Охрид летово ќе биде забрането движење за туристички автобуси во центарот


Охрид, 15 мај, 2017 - 17:05 (META) 

Во текот на летната сезона, во централното подрачје на Охрид ќе биде забранет влезот на туристичките автобуси, било договорено на денешната средба на претставници на СВР Охрид, општинскиот сектор за локален економски развој, сообраќајни инспектори и на туристичките агенции.

Како што соопшти СВР Охрид, туристичките автобуси не ќе смеат да влегуваат во централното градско подрачје, а на дел од улицата Партизанска, на потегот од студентскиот дом „Кузман Шапкарев“ до „Комерцијална банка“, ќе биде одредено паркиралиште за  привремено запирање на туристичките автобуси. Тоа паркиралиште ќе биде исклучиво за кратко застанување на туристичките автобуси и за симнување на туристите.

Дозволена рута за туристичките автобуси се булеварот Туристичка и улиците Димитар Влахов, Кузман Јосифоски Питу и Партизанска, односно 15. Корпус, Питу Гули и Јане Сандански.

Дозволени места за паркирање за туристичките автобуси, по договор со Јавното претпријатие „Биљјанини извори“, останува просторот кај Градскиот полигон, на булеварот АСНОМ и во непосредна близина на Јавното претпријатие „Водовод“ кај „Биљјанини извори“.


Депонија во центарот на Охрид, помеѓу училиште и детска градинка


Охрид, 21 февруари, 2017 - 11:49 (META) 

Освен што не направи ништо за образованието во Охрид, локалната самоуправа го става на ризик и здравјето на учениците, обвинија од СДСМ.

Од охридскиот разгранок на партијата побараа градоначалникот Никола Бакрачески и раководството на основното училиште „Григор Прличев“ итно да ја исчистат депонијата што се создава среде најголемото основно училиште и веднаш до централната детска градинка, во центарот на Охрид.

– Покрај депонијата, од која се шири смрдеа и претставува опасност од зарази, секојдневно поминуваат деца кои ризикуваат да добијат некаква болест или инфекција – предупредија од општинскиот разгранок на СДСМ во Охрид и приложија фотографии како доказ.


„Да ја спасиме Попова Шапка“: Наместо да го градат, институциите го уништуваат центарот


Тетово, 28 јануари, 2017 - 12:28 (META) 

Попова Шапка е оставена без никаква инфраструктура, одржување и без конкретен проект за модернизирање на туристичките капацитети.

Ова денеска на прес-конференција го истакнаа граѓаните што ја поведоа иницијативата под мотото „Да ја спасиме Попова Шапка“.

Тие се загрижени што центарот наместо да се гради, се уништува за овие 15 години.

– Попова Шапка е претворена во трпеза на која не се знае кој јаде и кој пие, претворена е во место каде што секој прави што сака и мисли, краде колку што може, вработува и отстранува од работа кој кого сака и вработените се искористуваат максимално. Не се презема иницијатива за да се обновува, да се чисти, да биде привлечна и профитабилна, од здравствен, спортски, туристички и економски аспект – истакнаа граѓаните на прес-конференцијата.

Тие велат дека со оваа иницијатива сакаат да му се спротивстават на лошото што му се случува на овој центар.

Иницијаторите ќе продолжат и со следни активности и ги повикаа сите граѓани, интелектуалци, правници, економисти, експерти за туризам да им придружат и да им дадат поддршка на иницијативата за спасување на Попова Шапка.


Без електрична енергија утре ќе бидат делови од Центар, Чаир и од Шуто Оризари


Скопје, 27 ноември, 2016 - 15:30 (META) 

Без електрична енергија утре ќе бидат делови од општините Центар, Шуто Оризари, Петровец и Чаир.

Од 9 до 15 часот без струја ќе бидат дел од корисниците од улиците Партениј Зографски, Салвадор Аљенде и Периша Савељиќ во општина Центар.

Од 8.30 до 13 часот струја ќе немаат корисниците од Макошпед – Шуто Оризари и бетонара „ЈОСИНГ“ во општина Шуто Оризари.

Без струја од 8.30 до 13 часот ќе бидат дел од корисниците од селата Дивље, Сушица, Живиње, Горно Коњари, Средно Коњари, Долно Коњари и Чифлик во општина Петровец, а од 9 до 15 часот и корисниците од улицата Дижонска – подулица 13, во општина Чаир.

Како што информираше Регионалниот центар за управување со кризи на Град Скопје, прекинот е поради технички зафати во електромрежата.


Вељаноски: СДСМ предвидува реорганизација на локалната самоуправа


Скопје, 23 ноември, 2016 - 14:40 (META) 

Поранешниот претседател на Собранието, Трајко Вељаноски, ја обвини опозицијата дека во својата предизборна програма предвидува реорганизација на локалната самоуправа и формирање локални полиции.

На денешната прес-конференција во центарот за комуникации на ВМРО-ДПМНЕ, Вељаноски истакна дека СДСМ во својата програма задира и во културата, образованието, децентрализирањето на социјалната заштита, управувањето со земјоделското земјиште, а сето тоа го оцени како скандалозно и опасно за иднината на земјата.

– Тоа што Зоран Заев го најави пред албанската дијаспора во Швајцарија, СДСМ го вметна во својот памфлет кој го нарекува програма. Ветувањето за излегувањето од рамките на Охридскиот договор, отворањето на прашањето за воведување двојазичност и за кантонизација по урнекот на Швајцарија се потврда за најавите на Заев дека сака да го менува Уставот на Република Македонија и да го почне патот кон федерализација на државата – истакна Вељаноски на прес-конференцијата.


ЛП од Центар порача дека ќе води урбана наместо провинцијална политика


Скопје, 23 ноември, 2016 - 10:11 (META) 

Либералната партија синоќа во Општина Центар имаше средба со граѓаните. На средбата присуствуваа носителот на листата во првата изборна единица, Ивон Величковски, како и кандидатите за пратеници Голубка Нечевска-Цветановска, Мето Јовановски, Љупчо Арсовски и Јасмина Димовска.

– Драго ми е што вечерва сме собрани тука на теми што нè интересираат сите, што нè мачат сите, затоа што заедно доаѓаме до решение што ќе ни помогне на сите. Кога сме во Центар, треба да се сетиме и на сето она што се случуваше на локалните избори, на сето она што му се случува на центарот на градот и со нашиот град. Не случајно во Центар ја истакнувам нашата определба дека ќе водиме урбана, наместо провинцијална политика. По оваа одредба се водиме и сега, а ќе се водиме и на локалните избори – рече Величковски.

Тој порача дека овие избори се избори со кои треба да се консолидираат Македонија и институциите, затоа што, како што посочи, нема нема никаков прогрес без организирана држава, стабилни институции и без добра економија.