!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Изложба на графичарката Андријана Мациев во Прилеп


Прилеп, 27 јули, 2017 - 10:56 (META) 

Во галеријата „Борко Лазески“ во Центарот за култура „Марко Цепенков“ во Прилеп, утре во 20 часот ќе биде отворена изложбата на дела „Живот во бои 2“ од уметницата Андријана Мациев, која пред прилепчани ќе се претстави со 15 дела.

Андријана Мациев дипломирала на Факултетот за ликовни уметности при Универзитетот „Свети Кирил и Методиј“ во Скопје, во одделот графика, во класата на професор Димитар Малиданов. Член е на Друштвото на ликовни уметници на Македонија.

Зад себе има бројни самостојни и групни изложи и награди стекнати во Европа и во Македонија.


ВМРО-ДПМНЕ: Алаѓозовски спречи Охрид да добие современ центар за култура


Скопје, 10 јули, 2017 - 16:26 (META) 

Министерот за култура, Роберт Алаѓозовски, тајно и зад грбот на јавноста, без никаква транспарентност ниту дебата, ги прекина и ги поништи постапките за реализација на проектот за реконструкција, надградба и за осовременување на Центарот за култура „Григор Прличев“ во Охрид, во кој се сместени и работат националните установи Театар Охрид, „Охридско лето“ и Библиотеката „Григор Прличев“, обвини пратеникот на ВМРО-ДПМНЕ, Крсто Јовановски.

– Веќе беше обезбеден буџет, избрано беше идејно решение и фирма проектант, која треба да ја изработи потребната проектна документација по што би се почнало со градежните активности за реконструкцијата на објектот. Но, сега тоа е стопирано од Алаѓозовски, Заев и од СДС, кои не сакаат во Охрид да има нов, современ и квалитетен објект, кој не е ниту нивна идеја ниту, пак, нивно дело. По контекст на ова, јавно ги прашуваме министерот за култура и владата на СДС, дали прекинувањето на овој значаен проект за бисерот на културата, Охрид, значи „живот“ за Охрид и за охриѓани? Дали за Алаѓозовски, охриѓани не се достојни да добијат објект на кој ќе се гордеат и во кој ќе може да ги следат бројните културно-уметнички настани во својот град? – праша Јовановски.


Почнува „Прилепско културно лето“


Прилеп, 19 јуни, 2017 - 10:53 (META) 

Со почетокот на ликовната колонија „Дрен“ и со концертот на Камерниот оркестар – Битола во Центарот за култура „Марко Цепенков“, вечерва во Прилеп почнува традиционалната манифестација „Прилепско културно лето“.

– Публиката и годинава ќе има можност да ужива во бројни настани од областа на сценско-музичката и ликовната дејност – вели директорот Тони Чатлески.
Колонијата „Дрен“ годинава се одржува по десетти пат. Во ликовното ателје, во дворот на Центарот  за култура, ќе творат десетина уметници од земјата и од странство.

Во 20 часот во ликовниот салон под мотото „Акустична рок-симфонија“ ќе настапи дел од Камерниот оркестар на Битола, кој во акустична верзија ќе исполни безвременски рок-композиции препознатливи за сите генерации. Камерниот оркестар основан пред неколку децении, составен е од професионални музичари и досега има бројни успешни концерти низ Македонија, а учествувал и на реномирани фестивали.

Исто така, во рамките на културното лето од 21 до 23 јуни, во киното „Мис Стон“ ќе се одржи Француски филмски фестивал.


Вечерва во Струга, концерт на вокалниот ансамбл „Симбиоза“


Струга, 13 април, 2017 - 11:34 (META) 

Вечерва, од 20 часот, во холот при Центарот за култура „Браќа Миладиновци“ во Струга, ќе се одржи хорски концерт на вокалниот ансамбл „Симбиоза“.

„Симбиоза“ е мултиетнички, мултикултурен и образовен проект кој произлегува од секојдневната соработка на двајца млади просветни работници, Дамјан Темков (композитор) и Бехар Весели (диригент).

Проектот „Симбиоза“ досега има реализирано шест концерти на реномирани фестивали.

Овој проект, иако најавен само како образовен, има многу поширока мултиетничка, спојувачка димензија, за што сведочи и самата програма.

Публиката, меѓу другото, ќе може да ги доживее македонските изворни песни „Параходот“, „Не си го продавај Кољо“ на албански јазик.

Влезот за концертот е бесплатен.


Почна „Тетовско културно лето“


Тетово, 12 јули, 2016 - 13:01 (META) 

Со повеќе музички изведби на вокалниот ансамбл „Симбиоза“, составен од ученици од различни етникуми од Средното музичко училиште „Илија Николовски Луј“ од Скопје, синоќа пред Центарот за култура во Тетово почна „Тетовското културно лето 2016“.

Од ансамблот беа изведени сплетови од песни со различни национални обележја, кои оваа традицонална манифестација ја најавија како мултикултурна и мултиетничка.

– Преку обединување на различни јазици и мелодии, преплетени и доведени до крајна форма на складно единство, тие „Симбиоза“ е едукативен пример низ чија призма се отсликува тендеција за соживот, заедништво, толеранција и за поттик кон прифаќање на мултиетничкиот концепт – изјави Дамјан Темков, професор во Средното музичко училиште „Илија Николовски Луј“ од Скопје, кој работеше на нумерите што беа изведени од неговите ученици.

Градоначалничката на Тетово, Теута Арифи, на отворањето на манифестацијата побара во иднина „Тетовско културно лето“ да добие финансиска подршка од Министерството за култура.

– „Тетовско културно лето“ е резултат на ентузијазам и на фактот дека граѓаните на Тетово сакаат да бида дел од културните настани. Настапот на ансамблот „Симбиоза“ зборува за тоа колку културата може да биде заедничка и да биде начин не само да живееме со различностите, туку и да живееме заеднички. Затоа сакам да повикам, овој културен настан кој го има Тетово, да биде поддржан од Министерството за култура – вели Арифи.

„Тетовско културно лето“ ќе трае до 25 јули, кога ќе се затвори со настапот на популарниот албански пејач Албан Скендерај на градскиот плоштад во Тетово. Деновиве тетовци во рамки на манифестацијата ќе имаат можност да гледаат шпански филмови, спортски настани, рок-концерти, изложби, куклени театри и слично.